| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
9. ඉන්‌දඛීලසුත්‌තං
9. Indakhīlasuttaṃ
1109. ‘‘යෙ හි කෙචි, භික්‌ඛවෙ, සමණා වා බ්‍රාහ්‌මණා වා ‘ඉදං දුක්‌ඛ’න්‌ති යථාභූතං නප්‌පජානන්‌ති…පෙ.… ‘අයං දුක්‌ඛනිරොධගාමිනී පටිපදා’ති යථාභූතං නප්‌පජානන්‌ති, තෙ අඤ්‌ඤස්‌ස සමණස්‌ස වා බ්‍රාහ්‌මණස්‌ස වා මුඛං උල්‌ලොකෙන්‌ති 1 – ‘අයං නූන භවං ජානං ජානාති, පස්‌සං පස්‌සතී’’’ති.
1109. ‘‘Ye hi keci, bhikkhave, samaṇā vā brāhmaṇā vā ‘idaṃ dukkha’nti yathābhūtaṃ nappajānanti…pe… ‘ayaṃ dukkhanirodhagāminī paṭipadā’ti yathābhūtaṃ nappajānanti, te aññassa samaṇassa vā brāhmaṇassa vā mukhaṃ ullokenti 2 – ‘ayaṃ nūna bhavaṃ jānaṃ jānāti, passaṃ passatī’’’ti.
‘‘සෙය්‍යථාපි , භික්‌ඛවෙ, තූලපිචු වා කප්‌පාසපිචු වා ලහුකො වාතූපාදානො සමෙ භූමිභාගෙ නික්‌ඛිත්‌තො. තමෙනං පුරත්‌ථිමො වාතො පච්‌ඡිමෙන සංහරෙය්‍ය, පච්‌ඡිමො වාතො පුරත්‌ථිමෙන සංහරෙය්‍ය, උත්‌තරො වාතො දක්‌ඛිණෙන සංහරෙය්‍ය, දක්‌ඛිණො වාතො උත්‌තරෙන සංහරෙය්‍ය. තං කිස්‌ස හෙතු? ලහුකත්‌තා, භික්‌ඛවෙ, කප්‌පාසපිචුනො. එවමෙව ඛො, භික්‌ඛවෙ, යෙ හි කෙචි සමණා වා බ්‍රාහ්‌මණා වා ‘ඉදං දුක්‌ඛ’න්‌ති යථාභූතං නප්‌පජානන්‌ති…පෙ.… ‘අයං දුක්‌ඛනිරොධගාමිනී පටිපදා’ති යථාභූතං නප්‌පජානන්‌ති, තෙ අඤ්‌ඤස්‌ස සමණස්‌ස වා බ්‍රාහ්‌මණස්‌ස වා මුඛං උල්‌ලොකෙන්‌ති – ‘අයං නූන භවං ජානං ජානාති, පස්‌සං පස්‌සතී’ති. තං කිස්‌ස හෙතු? අදිට්‌ඨත්‌තා, භික්‌ඛවෙ, චතුන්‌නං අරියසච්‌චානං.
‘‘Seyyathāpi , bhikkhave, tūlapicu vā kappāsapicu vā lahuko vātūpādāno same bhūmibhāge nikkhitto. Tamenaṃ puratthimo vāto pacchimena saṃhareyya, pacchimo vāto puratthimena saṃhareyya, uttaro vāto dakkhiṇena saṃhareyya, dakkhiṇo vāto uttarena saṃhareyya. Taṃ kissa hetu? Lahukattā, bhikkhave, kappāsapicuno. Evameva kho, bhikkhave, ye hi keci samaṇā vā brāhmaṇā vā ‘idaṃ dukkha’nti yathābhūtaṃ nappajānanti…pe… ‘ayaṃ dukkhanirodhagāminī paṭipadā’ti yathābhūtaṃ nappajānanti, te aññassa samaṇassa vā brāhmaṇassa vā mukhaṃ ullokenti – ‘ayaṃ nūna bhavaṃ jānaṃ jānāti, passaṃ passatī’ti. Taṃ kissa hetu? Adiṭṭhattā, bhikkhave, catunnaṃ ariyasaccānaṃ.
‘‘යෙ ච ඛො කෙචි, භික්‌ඛවෙ, සමණා වා බ්‍රාහ්‌මණා වා ‘ඉදං දුක්‌ඛ’න්‌ති යථාභූතං පජානන්‌ති…පෙ.… ‘අයං දුක්‌ඛනිරොධගාමිනී පටිපදා’ති යථාභූතං පජානන්‌ති, තෙ න අඤ්‌ඤස්‌ස සමණස්‌ස වා බ්‍රාහ්‌මණස්‌ස වා මුඛං උල්‌ලොකෙන්‌ති – ‘අයං නූන භවං ජානං ජානාති, පස්‌සං පස්‌සතී’’’ති.
‘‘Ye ca kho keci, bhikkhave, samaṇā vā brāhmaṇā vā ‘idaṃ dukkha’nti yathābhūtaṃ pajānanti…pe… ‘ayaṃ dukkhanirodhagāminī paṭipadā’ti yathābhūtaṃ pajānanti, te na aññassa samaṇassa vā brāhmaṇassa vā mukhaṃ ullokenti – ‘ayaṃ nūna bhavaṃ jānaṃ jānāti, passaṃ passatī’’’ti.
‘‘සෙය්‍යථාපි, භික්‌ඛවෙ, අයොඛීලො වා ඉන්‌දඛීලො වා ගම්‌භීරනෙමො සුනිඛාතො අචලො අසම්‌පකම්‌පී. පුරත්‌ථිමාය චෙපි දිසාය ආගච්‌ඡෙය්‍ය භුසා වාතවුට්‌ඨි, නෙව සඞ්‌කම්‌පෙය්‍ය 3 න සම්‌පකම්‌පෙය්‍ය න සම්‌පචාලෙය්‍ය; පච්‌ඡිමාය චෙපි දිසාය…පෙ.… උත්‌තරාය චෙපි දිසාය…පෙ.… දක්‌ඛිණාය චෙපි දිසාය ආගච්‌ඡෙය්‍ය භුසා වාතවුට්‌ඨි, නෙව සඞ්‌කම්‌පෙය්‍ය න සම්‌පකම්‌පෙය්‍ය න සම්‌පචාලෙය්‍ය. තං කිස්‌ස හෙතු? ගම්‌භීරත්‌තා, භික්‌ඛවෙ, නෙමස්‌ස සුනිඛාතත්‌තා ඉන්‌දඛීලස්‌ස. එවමෙව ඛො, භික්‌ඛවෙ, යෙ ච ඛො කෙචි සමණා වා බ්‍රාහ්‌මණා වා ‘ඉදං දුක්‌ඛ’න්‌ති යථාභූතං පජානන්‌ති…පෙ.… අයං දුක්‌ඛනිරොධගාමිනී පටිපදා’ති යථාභූතං පජානන්‌ති, තෙ න අඤ්‌ඤස්‌ස සමණස්‌ස වා බ්‍රාහ්‌මණස්‌ස වා මුඛං උල්‌ලොකෙන්‌ති – ‘අයං නූන භවං ජානං ජානාති, පස්‌සං පස්‌සතී’ති. තං කිස්‌ස හෙතු? සුදිට්‌ඨත්‌තා, භික්‌ඛවෙ, චතුන්‌නං අරියසච්‌චානං. කතමෙසං චතුන්‌නං? දුක්‌ඛස්‌ස අරියසච්‌චස්‌ස…පෙ.… දුක්‌ඛනිරොධගාමිනියා පටිපදාය අරියසච්‌චස්‌ස.
‘‘Seyyathāpi, bhikkhave, ayokhīlo vā indakhīlo vā gambhīranemo sunikhāto acalo asampakampī. Puratthimāya cepi disāya āgaccheyya bhusā vātavuṭṭhi, neva saṅkampeyya 4 na sampakampeyya na sampacāleyya; pacchimāya cepi disāya…pe… uttarāya cepi disāya…pe… dakkhiṇāya cepi disāya āgaccheyya bhusā vātavuṭṭhi, neva saṅkampeyya na sampakampeyya na sampacāleyya. Taṃ kissa hetu? Gambhīrattā, bhikkhave, nemassa sunikhātattā indakhīlassa. Evameva kho, bhikkhave, ye ca kho keci samaṇā vā brāhmaṇā vā ‘idaṃ dukkha’nti yathābhūtaṃ pajānanti…pe… ayaṃ dukkhanirodhagāminī paṭipadā’ti yathābhūtaṃ pajānanti, te na aññassa samaṇassa vā brāhmaṇassa vā mukhaṃ ullokenti – ‘ayaṃ nūna bhavaṃ jānaṃ jānāti, passaṃ passatī’ti. Taṃ kissa hetu? Sudiṭṭhattā, bhikkhave, catunnaṃ ariyasaccānaṃ. Katamesaṃ catunnaṃ? Dukkhassa ariyasaccassa…pe… dukkhanirodhagāminiyā paṭipadāya ariyasaccassa.
‘‘තස්‌මාතිහ, භික්‌ඛවෙ, ‘ඉදං දුක්‌ඛ’න්‌ති යොගො කරණීයො…පෙ.… ‘අයං දුක්‌ඛනිරොධගාමිනී පටිපදා’ති යොගො කරණීයො’’ති. නවමං.
‘‘Tasmātiha, bhikkhave, ‘idaṃ dukkha’nti yogo karaṇīyo…pe… ‘ayaṃ dukkhanirodhagāminī paṭipadā’ti yogo karaṇīyo’’ti. Navamaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 9. ඉන්‌දඛීලසුත්‌තවණ්‌ණනා • 9. Indakhīlasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 9. ඉන්‌දඛීලසුත්‌තවණ්‌ණනා • 9. Indakhīlasuttavaṇṇanā
