Library / Tipiṭaka / ติปิฎก • Tipiṭaka / กถาวตฺถุปาฬิ • Kathāvatthupāḷi

    ๑๗. สตฺตรสมวโคฺค

    17. Sattarasamavaggo

    (๑๖๙) ๔. อินฺทฺริยพทฺธกถา

    (169) 4. Indriyabaddhakathā

    ๗๘๖. อินฺทฺริยพทฺธเญฺญว ทุกฺขนฺติ? อามนฺตาฯ อินฺทฺริยพทฺธเญฺญว อนิจฺจํ สงฺขตํ ปฎิจฺจสมุปฺปนฺนํ ขยธมฺมํ วยธมฺมํ วิราคธมฺมํ นิโรธธมฺมํ วิปริณามธมฺมนฺติ? น เหวํ วตฺตเพฺพ…เป.… นนุ อนินฺทฺริยพทฺธํ อนิจฺจํ สงฺขตํ ปฎิจฺจสมุปฺปนฺนํ ขยธมฺมํ วยธมฺมํ วิราคธมฺมํ นิโรธธมฺมํ วิปริณามธมฺมนฺติ? อามนฺตาฯ หญฺจิ อนินฺทฺริยพทฺธํ อนิจฺจํ สงฺขตํ ปฎิจฺจสมุปฺปนฺนํ ขยธมฺมํ วยธมฺมํ วิราคธมฺมํ นิโรธธมฺมํ วิปริณามธมฺมํ, โน จ วต เร วตฺตเพฺพ – ‘‘อินฺทฺริยพทฺธเญฺญว ทุกฺข’’นฺติฯ

    786. Indriyabaddhaññeva dukkhanti? Āmantā. Indriyabaddhaññeva aniccaṃ saṅkhataṃ paṭiccasamuppannaṃ khayadhammaṃ vayadhammaṃ virāgadhammaṃ nirodhadhammaṃ vipariṇāmadhammanti? Na hevaṃ vattabbe…pe… nanu anindriyabaddhaṃ aniccaṃ saṅkhataṃ paṭiccasamuppannaṃ khayadhammaṃ vayadhammaṃ virāgadhammaṃ nirodhadhammaṃ vipariṇāmadhammanti? Āmantā. Hañci anindriyabaddhaṃ aniccaṃ saṅkhataṃ paṭiccasamuppannaṃ khayadhammaṃ vayadhammaṃ virāgadhammaṃ nirodhadhammaṃ vipariṇāmadhammaṃ, no ca vata re vattabbe – ‘‘indriyabaddhaññeva dukkha’’nti.

    อนินฺทฺริยพทฺธํ อนิจฺจํ สงฺขตํ ปฎิจฺจสมุปฺปนฺนํ…เป.… วิปริณามธมฺมํ, ตญฺจ น ทุกฺขนฺติ? อามนฺตาฯ อินฺทฺริยพทฺธํ อนิจฺจํ สงฺขตํ…เป.… วิปริณามธมฺมํ, ตญฺจ น ทุกฺขนฺติ? น เหวํ วตฺตเพฺพ…เป.…ฯ

    Anindriyabaddhaṃ aniccaṃ saṅkhataṃ paṭiccasamuppannaṃ…pe… vipariṇāmadhammaṃ, tañca na dukkhanti? Āmantā. Indriyabaddhaṃ aniccaṃ saṅkhataṃ…pe… vipariṇāmadhammaṃ, tañca na dukkhanti? Na hevaṃ vattabbe…pe….

    อินฺทฺริยพทฺธํ อนิจฺจํ สงฺขตํ…เป.… วิปริณามธมฺมํ, ตญฺจ ทุกฺขนฺติ 1? อามนฺตาฯ อนินฺทฺริยพทฺธํ อนิจฺจํ สงฺขตํ…เป.… วิปริณามธมฺมํ, ตญฺจ ทุกฺขนฺติ 2? น เหวํ วตฺตเพฺพ…เป.…ฯ

    Indriyabaddhaṃ aniccaṃ saṅkhataṃ…pe… vipariṇāmadhammaṃ, tañca dukkhanti 3? Āmantā. Anindriyabaddhaṃ aniccaṃ saṅkhataṃ…pe… vipariṇāmadhammaṃ, tañca dukkhanti 4? Na hevaṃ vattabbe…pe….

    ๗๘๗. อินฺทฺริยพทฺธเญฺญว ทุกฺขนฺติ? อามนฺตาฯ นนุ ยทนิจฺจํ ตํ ทุกฺขํ 5 วุตฺตํ ภควตา – ‘‘อนินฺทฺริยพทฺธํ อนิจฺจ’’นฺติ? อามนฺตาฯ หญฺจิ ยทนิจฺจํ ตํ ทุกฺขํ 6 วุตฺตํ ภควตา – อนินฺทฺริยพทฺธํ อนิจฺจํ, โน จ วต เร วตฺตเพฺพ – ‘‘อินฺทฺริยพทฺธเญฺญว ทุกฺข’’นฺติฯ

    787. Indriyabaddhaññeva dukkhanti? Āmantā. Nanu yadaniccaṃ taṃ dukkhaṃ 7 vuttaṃ bhagavatā – ‘‘anindriyabaddhaṃ anicca’’nti? Āmantā. Hañci yadaniccaṃ taṃ dukkhaṃ 8 vuttaṃ bhagavatā – anindriyabaddhaṃ aniccaṃ, no ca vata re vattabbe – ‘‘indriyabaddhaññeva dukkha’’nti.

    ๗๘๘. น วตฺตพฺพํ – ‘‘อินฺทฺริยพทฺธเญฺญว ทุกฺข’’นฺติ? อามนฺตาฯ ยถา อินฺทฺริยพทฺธสฺส ทุกฺขสฺส ปริญฺญาย ภควติ พฺรหฺมจริยํ วุสฺสติ, เอวเมวํ อนินฺทฺริยพทฺธสฺส ทุกฺขสฺส ปริญฺญาย ภควติ พฺรหฺมจริยํ วุสฺสตีติ ? น เหวํ วตฺตเพฺพ…เป.… ยถา อินฺทฺริยพทฺธํ ทุกฺขํ ปริญฺญาตํ น ปุน อุปฺปชฺชติ , เอวเมวํ อนินฺทฺริยพทฺธํ ทุกฺขํ ปริญฺญาตํ น ปุน อุปฺปชฺชตีติ? น เหวํ วตฺตเพฺพฯ เตน หิ อินฺทฺริยพทฺธเญฺญว ทุกฺขนฺติฯ

    788. Na vattabbaṃ – ‘‘indriyabaddhaññeva dukkha’’nti? Āmantā. Yathā indriyabaddhassa dukkhassa pariññāya bhagavati brahmacariyaṃ vussati, evamevaṃ anindriyabaddhassa dukkhassa pariññāya bhagavati brahmacariyaṃ vussatīti ? Na hevaṃ vattabbe…pe… yathā indriyabaddhaṃ dukkhaṃ pariññātaṃ na puna uppajjati , evamevaṃ anindriyabaddhaṃ dukkhaṃ pariññātaṃ na puna uppajjatīti? Na hevaṃ vattabbe. Tena hi indriyabaddhaññeva dukkhanti.

    อินฺทฺริยพทฺธกถา นิฎฺฐิตาฯ

    Indriyabaddhakathā niṭṭhitā.




    Next: (๑๗๐) ๕. ฐเปตฺวา อริยมคฺคนฺติกถา • (170) 5. Ṭhapetvā ariyamaggantikathā




    Footnotes:
    1. อิทํ-ปุจฺฉาทฺวเยน ปุริมปุจฺฉาทฺวยสฺส ปุรโต ภวิตพฺพํ
    2. อิทํ-ปุจฺฉาทฺวเยน ปุริมปุจฺฉาทฺวยสฺส ปุรโต ภวิตพฺพํ
    3. idaṃ-pucchādvayena purimapucchādvayassa purato bhavitabbaṃ
    4. idaṃ-pucchādvayena purimapucchādvayassa purato bhavitabbaṃ
    5. สํ. นิ. ๓.๑๕
    6. สํ. นิ. ๓.๑๕
    7. saṃ. ni. 3.15
    8. saṃ. ni. 3.15



    Related texts:



    อฎฺฐกถา • Aṭṭhakathā / อภิธมฺมปิฎก (อฎฺฐกถา) • Abhidhammapiṭaka (aṭṭhakathā) / ปญฺจปกรณ-อฎฺฐกถา • Pañcapakaraṇa-aṭṭhakathā / ๔. อินฺทฺริยพทฺธกถาวณฺณนา • 4. Indriyabaddhakathāvaṇṇanā

    ฎีกา • Tīkā / อภิธมฺมปิฎก (ฎีกา) • Abhidhammapiṭaka (ṭīkā) / ปญฺจปกรณ-มูลฎีกา • Pañcapakaraṇa-mūlaṭīkā / ๔. อินฺทฺริยพทฺธกถาวณฺณนา • 4. Indriyabaddhakathāvaṇṇanā

    ฎีกา • Tīkā / อภิธมฺมปิฎก (ฎีกา) • Abhidhammapiṭaka (ṭīkā) / ปญฺจปกรณ-อนุฎีกา • Pañcapakaraṇa-anuṭīkā / ๔. อินฺทฺริยพทฺธกถาวณฺณนา • 4. Indriyabaddhakathāvaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact