| Library / Tipiṭaka / திபிடக • Tipiṭaka / பஞ்சபகரண-அட்ட²கதா² • Pañcapakaraṇa-aṭṭhakathā |
4. இந்த்³ரியப³த்³த⁴கதா²வண்ணனா
4. Indriyabaddhakathāvaṇṇanā
786-787. இதா³னி இந்த்³ரியப³த்³த⁴கதா² நாம ஹோதி. தத்த² து³வித⁴ங் து³க்க²ங் – இந்த்³ரியப³த்³த⁴ங், அனிந்த்³ரியப³த்³த⁴ஞ்ச. இந்த்³ரியப³த்³த⁴ங் து³க்க²வத்து²தாய து³க்க²ங், அனிந்த்³ரியப³த்³த⁴ங் உத³யப்³ப³யபடிபீளனட்டே²ன ‘‘யத³னிச்சங் தங் து³க்க²’’ந்தி ஸங்க³ஹிதத்தா து³க்க²ங். இமங் விபா⁴க³ங் அக்³க³ஹெத்வா ‘‘யஸ்ஸ பரிஞ்ஞாய ப⁴க³வதி ப்³ரஹ்மசரியங் வுஸ்ஸதி, தங் இந்த்³ரியப³த்³த⁴மேவ து³க்க²ங், ந இதர’’ந்தி யேஸங் லத்³தி⁴, ஸெய்யதா²பி ஹேதுவாதா³னங், தேஸங் இதரஸ்ஸாபி து³க்க²பா⁴வங் த³ஸ்ஸேதுங் இந்த்³ரியப³த்³த⁴ஞ்ஞேவாதி புச்சா² ஸகவாதி³ஸ்ஸ, படிஞ்ஞா இதரஸ்ஸ. அத² நங் ‘‘யஸ்மா ப⁴க³வதா ‘யத³னிச்சங் தங் து³க்க²’ந்தி வுத்தங், தஸ்மா இந்த்³ரியப³த்³தே⁴னேவ தேன அனிச்சேன ப⁴விதப்³ப³’’ந்தி சோதே³துங் இந்த்³ரியப³த்³த⁴ஞ்ஞேவ அனிச்சந்திஆதி³மாஹ. நனு அனிந்த்³ரியப³த்³த⁴ங் அனிச்சந்தி நனு பத²வீபப்³ப³தபாஸாணாதி³ அனிந்த்³ரியப³த்³த⁴ம்பி அனிச்சந்தி அத்தோ².
786-787. Idāni indriyabaddhakathā nāma hoti. Tattha duvidhaṃ dukkhaṃ – indriyabaddhaṃ, anindriyabaddhañca. Indriyabaddhaṃ dukkhavatthutāya dukkhaṃ, anindriyabaddhaṃ udayabbayapaṭipīḷanaṭṭhena ‘‘yadaniccaṃ taṃ dukkha’’nti saṅgahitattā dukkhaṃ. Imaṃ vibhāgaṃ aggahetvā ‘‘yassa pariññāya bhagavati brahmacariyaṃ vussati, taṃ indriyabaddhameva dukkhaṃ, na itara’’nti yesaṃ laddhi, seyyathāpi hetuvādānaṃ, tesaṃ itarassāpi dukkhabhāvaṃ dassetuṃ indriyabaddhaññevāti pucchā sakavādissa, paṭiññā itarassa. Atha naṃ ‘‘yasmā bhagavatā ‘yadaniccaṃ taṃ dukkha’nti vuttaṃ, tasmā indriyabaddheneva tena aniccena bhavitabba’’nti codetuṃ indriyabaddhaññeva aniccantiādimāha. Nanuanindriyabaddhaṃ aniccanti nanu pathavīpabbatapāsāṇādi anindriyabaddhampi aniccanti attho.
788. ந வத்தப்³ப³ங் இந்த்³ரியப³த்³த⁴ஞ்ஞேவ து³க்க²ந்தி பஞ்ஹே ஆமந்தாதி படிஞ்ஞா ஸகவாதி³ஸ்ஸ. அனிந்த்³ரியப³த்³த⁴ஞ்ஹி து³க்க²தோ³மனஸ்ஸானங் ஆரம்மணங் ஹோதி. உண்ஹகாலஸ்மிஞ்ஹி அக்³கி³ ஸீதகாலே ச வாதோ து³க்க²ஸ்ஸ ஆரம்மணங், நிச்சம்பி போ⁴க³வினாஸாத³யோ தோ³மனஸ்ஸஸ்ஸ. தஸ்மா வினாபி அனிச்சட்டே²ன அனிந்த்³ரியப³த்³த⁴ங் து³க்க²ந்தி வத்தப்³ப³ங். கம்மகிலேஸேஹி பன அனிப்³ப³த்தத்தா து³க்க²ங் அரியஸச்சந்தி ந வத்தப்³ப³ங், ததா² மக்³கே³ன அபரிஞ்ஞெய்யத்தா. யஸ்மா பன திணகட்டா²தி³னிரோதோ⁴ வா உதுபீ³ஜாதி³னிரோதோ⁴ வா து³க்க²னிரோத⁴ங் அரியஸச்சங் நாம ந ஹோதி, தஸ்மா இந்த்³ரியப³த்³த⁴ங் து³க்க²ஞ்சேவ அரியஸச்சஞ்ச, இதரங் பன து³க்க²மேவாதி இத³ங் நானத்தங் த³ஸ்ஸேதுங் படிஜானாதி. யதா² இந்த்³ரியப³த்³த⁴ஸ்ஸாதிஆதி³வசனங் இந்த்³ரியப³த்³த⁴ஸ்ஸ பரிஞ்ஞாய ப்³ரஹ்மசரியவாஸங் பரிஞ்ஞாதஸ்ஸ புன அனுப்பத்திங் தீ³பேதி. தேனேவெத்த² ஸகவாதி³னா படிக்கே²போ கதோ. ‘‘யத³னிச்சங் தங் து³க்க²’’ந்தி வசனேன பன ஸங்க³ஹிதஸ்ஸ அனிந்த்³ரியப³த்³த⁴ஸ்ஸ து³க்க²பா⁴வங் படிஸேதே⁴துங் ந ஸக்காதி, தஸ்மா அஸாத⁴கந்தி.
788. Na vattabbaṃ indriyabaddhaññeva dukkhanti pañhe āmantāti paṭiññā sakavādissa. Anindriyabaddhañhi dukkhadomanassānaṃ ārammaṇaṃ hoti. Uṇhakālasmiñhi aggi sītakāle ca vāto dukkhassa ārammaṇaṃ, niccampi bhogavināsādayo domanassassa. Tasmā vināpi aniccaṭṭhena anindriyabaddhaṃ dukkhanti vattabbaṃ. Kammakilesehi pana anibbattattā dukkhaṃ ariyasaccanti na vattabbaṃ, tathā maggena apariññeyyattā. Yasmā pana tiṇakaṭṭhādinirodho vā utubījādinirodho vā dukkhanirodhaṃ ariyasaccaṃ nāma na hoti, tasmā indriyabaddhaṃ dukkhañceva ariyasaccañca, itaraṃ pana dukkhamevāti idaṃ nānattaṃ dassetuṃ paṭijānāti. Yathā indriyabaddhassātiādivacanaṃ indriyabaddhassa pariññāya brahmacariyavāsaṃ pariññātassa puna anuppattiṃ dīpeti. Tenevettha sakavādinā paṭikkhepo kato. ‘‘Yadaniccaṃ taṃ dukkha’’nti vacanena pana saṅgahitassa anindriyabaddhassa dukkhabhāvaṃ paṭisedhetuṃ na sakkāti, tasmā asādhakanti.
இந்த்³ரியப³த்³த⁴கதா²வண்ணனா.
Indriyabaddhakathāvaṇṇanā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / கதா²வத்து²பாளி • Kathāvatthupāḷi / (169) 4. இந்த்³ரியப³த்³த⁴கதா² • (169) 4. Indriyabaddhakathā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-மூலடீகா • Pañcapakaraṇa-mūlaṭīkā / 4. இந்த்³ரியப³த்³த⁴கதா²வண்ணனா • 4. Indriyabaddhakathāvaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-அனுடீகா • Pañcapakaraṇa-anuṭīkā / 4. இந்த்³ரியப³த்³த⁴கதா²வண்ணனா • 4. Indriyabaddhakathāvaṇṇanā
