| Library / Tipiṭaka / ತಿಪಿಟಕ • Tipiṭaka / ಪಞ್ಚಪಕರಣ-ಅಟ್ಠಕಥಾ • Pañcapakaraṇa-aṭṭhakathā |
೮. ಇನ್ದ್ರಿಯಕಥಾವಣ್ಣನಾ
8. Indriyakathāvaṇṇanā
೮೫೩-೮೫೬. ಇದಾನಿ ಇನ್ದ್ರಿಯಕಥಾ ನಾಮ ಹೋತಿ। ತತ್ಥ ಲೋಕಿಯಾ ಸದ್ಧಾ ಸದ್ಧಾ ಏವ ನಾಮ, ನ ಸದ್ಧಿನ್ದ್ರಿಯಂ। ತಥಾ ಲೋಕಿಯಂ ವೀರಿಯಂ…ಪೇ॰… ಸತಿ… ಸಮಾಧಿ… ಪಞ್ಞಾ ಪಞ್ಞಾಯೇವ ನಾಮ, ನ ಪಞ್ಞಿನ್ದ್ರಿಯನ್ತಿ ಯೇಸಂ ಲದ್ಧಿ, ಸೇಯ್ಯಥಾಪಿ ಹೇತುವಾದಾನಞ್ಚೇವ ಮಹಿಸಾಸಕಾನಞ್ಚ; ತೇ ಸನ್ಧಾಯ ಪುಚ್ಛಾ ಸಕವಾದಿಸ್ಸ, ಪಟಿಞ್ಞಾ ಇತರಸ್ಸ । ನತ್ಥಿ ಲೋಕಿಯಾ ಸದ್ಧಾತಿಆದಿ ಯಸ್ಮಾ ಲೋಕಿಯಾಪಿ ಸದ್ಧಾದಯೋವ ಧಮ್ಮಾ ಅಧಿಪತಿಯಟ್ಠೇನ ಇನ್ದ್ರಿಯಂ, ನ ಸದ್ಧಾದೀಹಿ ಅಞ್ಞಂ ಸದ್ಧಿನ್ದ್ರಿಯಾದಿ ನಾಮ ಅತ್ಥಿ, ತಸ್ಮಾ ಲೋಕಿಯಾನಮ್ಪಿ ಸದ್ಧಾದೀನಞ್ಞೇವ ಸದ್ಧಿನ್ದ್ರಿಯಾದಿಭಾವದಸ್ಸನತ್ಥಂ ವುತ್ತಂ। ಅತ್ಥಿ ಲೋಕಿಯೋ ಮನೋತಿಆದಿ ಯಥಾ ತೇ ಲೋಕಿಯಾಪಿ ಮನಾದಯೋ ಧಮ್ಮಾ ಮನಿನ್ದ್ರಿಯಾದೀನಿ, ಏವಂ ಲೋಕಿಯಾ ಸದ್ಧಾದಯೋಪಿ ಸದ್ಧಿನ್ದ್ರಿಯಾನೀತಿ ಉಪಮಾಯ ತಸ್ಸತ್ಥಸ್ಸ ವಿಭಾವನತ್ಥಂ ವುತ್ತಂ। ಸೇಸಮೇತ್ಥ ಯಥಾಪಾಳಿಮೇವ ನಿಯ್ಯಾತೀತಿ।
853-856. Idāni indriyakathā nāma hoti. Tattha lokiyā saddhā saddhā eva nāma, na saddhindriyaṃ. Tathā lokiyaṃ vīriyaṃ…pe… sati… samādhi… paññā paññāyeva nāma, na paññindriyanti yesaṃ laddhi, seyyathāpi hetuvādānañceva mahisāsakānañca; te sandhāya pucchā sakavādissa, paṭiññā itarassa . Natthi lokiyā saddhātiādi yasmā lokiyāpi saddhādayova dhammā adhipatiyaṭṭhena indriyaṃ, na saddhādīhi aññaṃ saddhindriyādi nāma atthi, tasmā lokiyānampi saddhādīnaññeva saddhindriyādibhāvadassanatthaṃ vuttaṃ. Atthi lokiyo manotiādi yathā te lokiyāpi manādayo dhammā manindriyādīni, evaṃ lokiyā saddhādayopi saddhindriyānīti upamāya tassatthassa vibhāvanatthaṃ vuttaṃ. Sesamettha yathāpāḷimeva niyyātīti.
ಇನ್ದ್ರಿಯಕಥಾವಣ್ಣನಾ।
Indriyakathāvaṇṇanā.
ಏಕೂನವೀಸತಿಮೋ ವಗ್ಗೋ।
Ekūnavīsatimo vaggo.
Related texts:
ತಿಪಿಟಕ (ಮೂಲ) • Tipiṭaka (Mūla) / ಅಭಿಧಮ್ಮಪಿಟಕ • Abhidhammapiṭaka / ಕಥಾವತ್ಥುಪಾಳಿ • Kathāvatthupāḷi / (೧೯೩) ೮. ಇನ್ದ್ರಿಯಕಥಾ • (193) 8. Indriyakathā
ಟೀಕಾ • Tīkā / ಅಭಿಧಮ್ಮಪಿಟಕ (ಟೀಕಾ) • Abhidhammapiṭaka (ṭīkā) / ಪಞ್ಚಪಕರಣ-ಮೂಲಟೀಕಾ • Pañcapakaraṇa-mūlaṭīkā / ೮. ಇನ್ದ್ರಿಯಕಥಾವಣ್ಣನಾ • 8. Indriyakathāvaṇṇanā
ಟೀಕಾ • Tīkā / ಅಭಿಧಮ್ಮಪಿಟಕ (ಟೀಕಾ) • Abhidhammapiṭaka (ṭīkā) / ಪಞ್ಚಪಕರಣ-ಅನುಟೀಕಾ • Pañcapakaraṇa-anuṭīkā / ೮. ಇನ್ದ್ರಿಯಕಥಾವಣ್ಣನಾ • 8. Indriyakathāvaṇṇanā
