| Library / Tipiṭaka / තිපිටක • Tipiṭaka / පටිසම්‌භිදාමග්‌ගපාළි • Paṭisambhidāmaggapāḷi |
2. ඉන්‌ද්‍රියනිද්‌දෙසො
2. Indriyaniddeso
27. සද්‌ධින්‌ද්‍රියස්‌ස පඤ්‌ච විවෙකා, පඤ්‌ච විරාගා, පඤ්‌ච නිරොධා, පඤ්‌ච වොස්‌සග්‌ගා, ද්‌වාදස නිස්‌සයා. වීරියින්‌ද්‍රියස්‌ස…පෙ.… සතින්‌ද්‍රියස්‌ස… සමාධින්‌ද්‍රියස්‌ස… පඤ්‌ඤින්‌ද්‍රියස්‌ස පඤ්‌ච විවෙකා, පඤ්‌ච විරාගා, පඤ්‌ච නිරොධා, පඤ්‌ච වොස්‌සග්‌ගා, ද්‌වාදස නිස්‌සයා.
27. Saddhindriyassa pañca vivekā, pañca virāgā, pañca nirodhā, pañca vossaggā, dvādasa nissayā. Vīriyindriyassa…pe… satindriyassa… samādhindriyassa… paññindriyassa pañca vivekā, pañca virāgā, pañca nirodhā, pañca vossaggā, dvādasa nissayā.
සද්‌ධින්‌ද්‍රියස්‌ස කතමෙ පඤ්‌ච විවෙකා? වික්‌ඛම්‌භනවිවෙකො, තදඞ්‌ගවිවෙකො, සමුච්‌ඡෙදවිවෙකො, පටිප්‌පස්‌සද්‌ධිවිවෙකො, නිස්‌සරණවිවෙකො. වික්‌ඛම්‌භනවිවෙකො ච නීවරණානං පඨමජ්‌ඣානං භාවයතො, තදඞ්‌ගවිවෙකො ච දිට්‌ඨිගතානං නිබ්‌බෙධභාගියං සමාධිං භාවයතො, සමුච්‌ඡෙදවිවෙකො ච ලොකුත්‌තරං ඛයගාමිමග්‌ගං භාවයතො, පටිප්‌පස්‌සද්‌ධිවිවෙකො ච ඵලක්‌ඛණෙ, නිස්‌සරණවිවෙකො ච නිරොධො නිබ්‌බානං. සද්‌ධින්‌ද්‍රියස්‌ස ඉමෙ පඤ්‌ච විවෙකා. ඉමෙසු පඤ්‌චසු විවෙකෙසු ඡන්‌දජාතො හොති සද්‌ධාධිමුත්‌තො, චිත්‌තඤ්‌චස්‌ස ස්‌වාධිට්‌ඨිතං…පෙ.… සද්‌ධින්‌ද්‍රියස්‌ස ඉමෙ පඤ්‌ච විවෙකා, පඤ්‌ච විරාගා, පඤ්‌ච නිරොධා, පඤ්‌ච වොස්‌සග්‌ගා, ද්‌වාදස නිස්‌සයා.
Saddhindriyassa katame pañca vivekā? Vikkhambhanaviveko, tadaṅgaviveko, samucchedaviveko, paṭippassaddhiviveko, nissaraṇaviveko. Vikkhambhanaviveko ca nīvaraṇānaṃ paṭhamajjhānaṃ bhāvayato, tadaṅgaviveko ca diṭṭhigatānaṃ nibbedhabhāgiyaṃ samādhiṃ bhāvayato, samucchedaviveko ca lokuttaraṃ khayagāmimaggaṃ bhāvayato, paṭippassaddhiviveko ca phalakkhaṇe, nissaraṇaviveko ca nirodho nibbānaṃ. Saddhindriyassa ime pañca vivekā. Imesu pañcasu vivekesu chandajāto hoti saddhādhimutto, cittañcassa svādhiṭṭhitaṃ…pe… saddhindriyassa ime pañca vivekā, pañca virāgā, pañca nirodhā, pañca vossaggā, dvādasa nissayā.
වීරියින්‌ද්‍රියස්‌ස…පෙ.… සතින්‌ද්‍රියස්‌ස…පෙ.… සමාධින්‌ද්‍රියස්‌ස… පඤ්‌ඤින්‌ද්‍රියස්‌ස කතමෙ පඤ්‌ච විවෙකා? වික්‌ඛම්‌භනවිවෙකො, තදඞ්‌ගවිවෙකො, සමුච්‌ඡෙදවිවෙකො, පටිප්‌පස්‌සද්‌ධිවිවෙකො, නිස්‌සරණවිවෙකො…පෙ.… පඤ්‌ඤින්‌ද්‍රියස්‌ස ඉමෙ පඤ්‌ච විවෙකා, පඤ්‌ච විරාගා, පඤ්‌ච නිරොධා , පඤ්‌ච වොස්‌සග්‌ගා, ද්‌වාදස නිස්‌සයාති.
Vīriyindriyassa…pe… satindriyassa…pe… samādhindriyassa… paññindriyassa katame pañca vivekā? Vikkhambhanaviveko, tadaṅgaviveko, samucchedaviveko, paṭippassaddhiviveko, nissaraṇaviveko…pe… paññindriyassa ime pañca vivekā, pañca virāgā, pañca nirodhā , pañca vossaggā, dvādasa nissayāti.
විවෙකකථා නිට්‌ඨිතා.
Vivekakathā niṭṭhitā.
