| Library / Tipiṭaka / திபிடக • Tipiṭaka / பஞ்சபகரண-மூலடீகா • Pañcapakaraṇa-mūlaṭīkā |
16. இந்த்³ரியபச்சயனித்³தே³ஸவண்ணனா
16. Indriyapaccayaniddesavaṇṇanā
16. அரூபஜீவிதிந்த்³ரியம்பி ஸங்க³ஹிதந்தி மிஸ்ஸகத்தா ஜீவிதிந்த்³ரியங் ந ஸப்³பே³ன ஸப்³ப³ங் வஜ்ஜிதப்³ப³ந்தி அதி⁴ப்பாயோ.
16. Arūpajīvitindriyampi saṅgahitanti missakattā jīvitindriyaṃ na sabbena sabbaṃ vajjitabbanti adhippāyo.
அவினிப்³பு⁴த்தத⁴ம்மானந்தி எத்த² அயங் அதி⁴ப்பாயோ – ரூபாரூபானங் அஞ்ஞமஞ்ஞங் அவினிப்³பு⁴த்தவோஹாரோ நத்தீ²தி அரூபானங் இந்த்³ரியபச்சயபூ⁴தானி பச்சயந்தராபெக்கா²னி சக்கா²தீ³னி அத்தனோ விஜ்ஜமானக்க²ணே அவினிப்³பு⁴த்தத⁴ம்மானங் இந்த்³ரியபச்சயதங் அப²ரந்தானிபி இந்த்³ரியபச்சயா ஸியுங். யோ பன நிரபெக்கோ² இந்த்³ரியபச்சயோ அவினிப்³பு⁴த்தத⁴ம்மானங் ஹோதி, ஸோ அத்தனோ விஜ்ஜமானக்க²ணே தேஸங் இந்த்³ரியபச்சயதங் அப²ரந்தோ நாம நத்தி². யதி³ ச இத்தி²ந்த்³ரியபுரிஸிந்த்³ரியானி இந்த்³ரியபச்சயோ லிங்கா³தீ³னங் ஸியுங், அவினிப்³பு⁴த்தானங் தேஸம்பி ஸியுங். ந ஹி ரூபங் ரூபஸ்ஸ, அரூபங் வா அரூபஸ்ஸ வினிப்³பு⁴த்தஸ்ஸ இந்த்³ரியபச்சயோ அத்தீ²தி. ஸதி சேவங் இத்தி²புரிஸிந்த்³ரியேஹி அவினிப்³பு⁴த்தத்தா கலலாதி³காலே ச லிங்கா³தீ³னி ஸியுங், யேஸங் தானி இந்த்³ரியபச்சயதங் ப²ரெய்யுங், ந ச ப²ரந்தி. தஸ்மா ந தேஹி தானி அவினிப்³பு⁴த்தகானி, அவினிப்³பு⁴த்தத்தாபா⁴வதோ ச தேஸங் இந்த்³ரியபச்சயதங் ந ப²ரந்தி. அஞ்ஞேஸங் பன யேஹி தானி ஸஹஜாதானி, தேஸங் அபீ³ஜபா⁴வதோயேவ ந ப²ரந்தி, தஸ்மா ஆபன்னவினிப்³பு⁴த்தபா⁴வானங் தேஸங் லிங்கா³தீ³னங் அவினிப்³பு⁴த்தானங் அஞ்ஞேஸஞ்ச ஸமானகலாபத⁴ம்மானங் இந்த்³ரியபச்சயதாய அப²ரணதோ தானி இந்த்³ரியபச்சயோ ந ஹொந்தீதி. யேஸங் பீ³ஜபூ⁴தானி இத்தி²புரிஸிந்த்³ரியானி, தேஸங் லிங்கா³தீ³னங் அபரமத்த²பா⁴வதோதி கேசி, தே பன கலலாதி³காலேபி லிங்கா³தீ³னங் தத³னுரூபானங் அத்தி²தங் இச்ச²ந்தி.
Avinibbhuttadhammānanti ettha ayaṃ adhippāyo – rūpārūpānaṃ aññamaññaṃ avinibbhuttavohāro natthīti arūpānaṃ indriyapaccayabhūtāni paccayantarāpekkhāni cakkhādīni attano vijjamānakkhaṇe avinibbhuttadhammānaṃ indriyapaccayataṃ apharantānipi indriyapaccayā siyuṃ. Yo pana nirapekkho indriyapaccayo avinibbhuttadhammānaṃ hoti, so attano vijjamānakkhaṇe tesaṃ indriyapaccayataṃ apharanto nāma natthi. Yadi ca itthindriyapurisindriyāni indriyapaccayo liṅgādīnaṃ siyuṃ, avinibbhuttānaṃ tesampi siyuṃ. Na hi rūpaṃ rūpassa, arūpaṃ vā arūpassa vinibbhuttassa indriyapaccayo atthīti. Sati cevaṃ itthipurisindriyehi avinibbhuttattā kalalādikāle ca liṅgādīni siyuṃ, yesaṃ tāni indriyapaccayataṃ phareyyuṃ, na ca pharanti. Tasmā na tehi tāni avinibbhuttakāni, avinibbhuttattābhāvato ca tesaṃ indriyapaccayataṃ na pharanti. Aññesaṃ pana yehi tāni sahajātāni, tesaṃ abījabhāvatoyeva na pharanti, tasmā āpannavinibbhuttabhāvānaṃ tesaṃ liṅgādīnaṃ avinibbhuttānaṃ aññesañca samānakalāpadhammānaṃ indriyapaccayatāya apharaṇato tāni indriyapaccayo na hontīti. Yesaṃ bījabhūtāni itthipurisindriyāni, tesaṃ liṅgādīnaṃ aparamatthabhāvatoti keci, te pana kalalādikālepi liṅgādīnaṃ tadanurūpānaṃ atthitaṃ icchanti.
ஜாதிபூ⁴மிவஸேன வுத்தேஸு பே⁴தே³ஸு குஸலஜாதியங் ரூபாவசரகுஸலமேவ ஆருப்பே ட²பேதப்³ப³ந்தி ‘‘ட²பெத்வா பன ரூபாவசரகுஸலங் அவஸேஸா குஸலாகுஸலா’’தி வுத்தங். பட²மலோகுத்தரங் பன தோ³மனஸ்ஸயுத்தஞ்ச விஸுங் ஏகா ஜாதி பூ⁴மி வா ந ஹோதீதி ஆருப்பே அலப்³ப⁴மானம்பி ந ட²பிதங். ஹேதுஆதீ³ஸுபி ‘‘ததா² அபரியாபன்னகுஸலஹேது, ததா² அகுஸலஹேதூ’’திஆதீ³ஸு (பட்டா²॰ அட்ட²॰ 1.1) ஏஸ நயோ யோஜேதப்³போ³.
Jātibhūmivasena vuttesu bhedesu kusalajātiyaṃ rūpāvacarakusalameva āruppe ṭhapetabbanti ‘‘ṭhapetvā pana rūpāvacarakusalaṃ avasesā kusalākusalā’’ti vuttaṃ. Paṭhamalokuttaraṃ pana domanassayuttañca visuṃ ekā jāti bhūmi vā na hotīti āruppe alabbhamānampi na ṭhapitaṃ. Hetuādīsupi ‘‘tathā apariyāpannakusalahetu, tathā akusalahetū’’tiādīsu (paṭṭhā. aṭṭha. 1.1) esa nayo yojetabbo.
டி²திக்க²ணேதி இத³ங் ரூபஜீவிதிந்த்³ரியஸ்ஸ ஸஹஜாதபச்சயத்தாபா⁴வங் ஸந்தா⁴ய வுத்தங். உப்பாத³க்க²ணேபி பன தஸ்ஸ இந்த்³ரியபச்சயதா ந ஸக்கா நிவாரேதுங். வக்க²தி ஹி ‘‘அப்³யாகதங் த⁴ம்மங் படிச்ச…பே॰… அஸஞ்ஞஸத்தானங் ஏகங் மஹாபூ⁴தங் படிச்ச…பே॰… இந்த்³ரியபச்சயங் கம்மபச்சயஸதி³ஸ’’ந்தி (பட்டா²॰ 1.1.66). ந ஹி அஸஞ்ஞஸத்தானங் இந்த்³ரியபச்சயா உப்பஜ்ஜமானஸ்ஸ ரூபஸ்ஸ ரூபஜீவிதிந்த்³ரியதோ அஞ்ஞோ இந்த்³ரியபச்சயோ அத்தி², பஞ்சவோகாரே பவத்தே ச கடத்தாரூபஸ்ஸ. படிச்சவாராத³யோ ச ச² உப்பாத³க்க²ணமேவ க³ஹெத்வா பவத்தா, ஏவஞ்ச கத்வா பச்சா²ஜாதபச்சயோ ஏதேஸு அனுலோமதோ ந திட்ட²தீதி.
Ṭhitikkhaṇeti idaṃ rūpajīvitindriyassa sahajātapaccayattābhāvaṃ sandhāya vuttaṃ. Uppādakkhaṇepi pana tassa indriyapaccayatā na sakkā nivāretuṃ. Vakkhati hi ‘‘abyākataṃ dhammaṃ paṭicca…pe… asaññasattānaṃ ekaṃ mahābhūtaṃ paṭicca…pe… indriyapaccayaṃ kammapaccayasadisa’’nti (paṭṭhā. 1.1.66). Na hi asaññasattānaṃ indriyapaccayā uppajjamānassa rūpassa rūpajīvitindriyato añño indriyapaccayo atthi, pañcavokāre pavatte ca kaṭattārūpassa. Paṭiccavārādayo ca cha uppādakkhaṇameva gahetvā pavattā, evañca katvā pacchājātapaccayo etesu anulomato na tiṭṭhatīti.
இந்த்³ரியபச்சயனித்³தே³ஸவண்ணனா நிட்டி²தா.
Indriyapaccayaniddesavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / பட்டா²னபாளி • Paṭṭhānapāḷi / (2) பச்சயனித்³தே³ஸோ • (2) Paccayaniddeso
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-அனுடீகா • Pañcapakaraṇa-anuṭīkā / 16. இந்த்³ரியபச்சயனித்³தே³ஸவண்ணனா • 16. Indriyapaccayaniddesavaṇṇanā
