| Library / Tipiṭaka / তিপিটক • Tipiṭaka / পঞ্চপকরণ-অট্ঠকথা • Pañcapakaraṇa-aṭṭhakathā |
১৬. ইন্দ্রিযপচ্চযনিদ্দেসৰণ্ণনা
16. Indriyapaccayaniddesavaṇṇanā
১৬. ইন্দ্রিযপচ্চযনিদ্দেসে চক্খুন্দ্রিযন্তি চক্খুসঙ্খাতং ইন্দ্রিযং। ইন্দ্রিযপচ্চযেনাতি সযং পুরেজাতো হুত্ৰা অরূপধম্মানং উপ্পাদতো পট্ঠায যাৰ ভঙ্গা ইন্দ্রিযপচ্চযেন পচ্চযো হোতি। সোতিন্দ্রিযাদীসুপি এসেৰ নযো। অরূপিনো ইন্দ্রিযাতি এত্থ অরূপজীৰিতিন্দ্রিযম্পি সঙ্গহিতং। তংসমুট্ঠানানন্তি এত্থ হেট্ঠা ৰুত্তনযেনেৰ কটত্তারূপম্পি সঙ্গহিতং। ৰুত্তঞ্হেতং পঞ্হাৰারে – পটিসন্ধিক্খণে ৰিপাকাব্যাকতা ইন্দ্রিযা সম্পযুত্তকানং খন্ধানং কটত্তা চ রূপানং ইন্দ্রিযপচ্চযেন পচ্চযোতি। এৰং তাৰেত্থ পাল়িৰণ্ণনা ৰেদিতব্বা।
16. Indriyapaccayaniddese cakkhundriyanti cakkhusaṅkhātaṃ indriyaṃ. Indriyapaccayenāti sayaṃ purejāto hutvā arūpadhammānaṃ uppādato paṭṭhāya yāva bhaṅgā indriyapaccayena paccayo hoti. Sotindriyādīsupi eseva nayo. Arūpino indriyāti ettha arūpajīvitindriyampi saṅgahitaṃ. Taṃsamuṭṭhānānanti ettha heṭṭhā vuttanayeneva kaṭattārūpampi saṅgahitaṃ. Vuttañhetaṃ pañhāvāre – paṭisandhikkhaṇe vipākābyākatā indriyā sampayuttakānaṃ khandhānaṃ kaṭattā ca rūpānaṃ indriyapaccayena paccayoti. Evaṃ tāvettha pāḷivaṇṇanā veditabbā.
অযং পন ইন্দ্রিযপচ্চযো ইত্থিন্দ্রিযপুরিসিন্দ্রিযৰজ্জানং সমৰীসতিযা ইন্দ্রিযানং ৰসেন ঠিতো। ইত্থিন্দ্রিযপুরিসিন্দ্রিযানি হি কিঞ্চাপি ইত্থিলিঙ্গপুরিসলিঙ্গাদীনং বীজভূতানি, কললাদিকালে পন ৰিজ্জমানেসুপি তেসু ইত্থিলিঙ্গপুরিসলিঙ্গাদীনং অভাৰা তানি নেৰ তেসং, ন অঞ্ঞেসং ইন্দ্রিযপচ্চযতং ফরন্তি। ইন্দ্রিযপচ্চযো হি অত্তনো ৰিজ্জমানক্খণে অৰিনিব্ভুত্তধম্মানং ইন্দ্রিযপচ্চযতং অফরন্তো নাম নত্থি, তস্মা তানি ইন্দ্রিযপচ্চযা ন হোন্তি। যেসং পনেতানি বীজভূতানি, তেসং তানি সুত্তন্তিকপরিযাযেন পকতূপনিস্সযভাৰং ভজন্তি। ইতি ইন্দ্রিযপচ্চযো সমৰীসতিযা ইন্দ্রিযানং ৰসেন ঠিতোতি ৰেদিতব্বো। সো জাতিতো কুসলাকুসলৰিপাককিরিযরূপৰসেন পঞ্চধা ভিজ্জতি। তত্থ কুসলো ভূমিৰসেন চতুধা, অকুসলো কামাৰচরোৰ ৰিপাকো চতুধাৰ কিরিযাসঙ্খাতো তিধা, রূপং কামাৰচরমেৰাতি এৰং অনেকধা ভিজ্জতীতি এৰং তাৰেত্থ নানপ্পকারভেদতো ৰিঞ্ঞাতব্বো ৰিনিচ্ছযো।
Ayaṃ pana indriyapaccayo itthindriyapurisindriyavajjānaṃ samavīsatiyā indriyānaṃ vasena ṭhito. Itthindriyapurisindriyāni hi kiñcāpi itthiliṅgapurisaliṅgādīnaṃ bījabhūtāni, kalalādikāle pana vijjamānesupi tesu itthiliṅgapurisaliṅgādīnaṃ abhāvā tāni neva tesaṃ, na aññesaṃ indriyapaccayataṃ pharanti. Indriyapaccayo hi attano vijjamānakkhaṇe avinibbhuttadhammānaṃ indriyapaccayataṃ apharanto nāma natthi, tasmā tāni indriyapaccayā na honti. Yesaṃ panetāni bījabhūtāni, tesaṃ tāni suttantikapariyāyena pakatūpanissayabhāvaṃ bhajanti. Iti indriyapaccayo samavīsatiyā indriyānaṃ vasena ṭhitoti veditabbo. So jātito kusalākusalavipākakiriyarūpavasena pañcadhā bhijjati. Tattha kusalo bhūmivasena catudhā, akusalo kāmāvacarova vipāko catudhāva kiriyāsaṅkhāto tidhā, rūpaṃ kāmāvacaramevāti evaṃ anekadhā bhijjatīti evaṃ tāvettha nānappakārabhedato viññātabbo vinicchayo.
এৰং ভিন্নে পনেত্থ চতুভূমকোপি কুসলিন্দ্রিযপচ্চযো পঞ্চৰোকারে সম্পযুত্তধম্মানঞ্চেৰ চিত্তসমুট্ঠানরূপস্স চ ইন্দ্রিযপচ্চযেন পচ্চযো, তথা অকুসলো। ঠপেত্ৰা পন রূপাৰচরকুসলং অৰসেসা কুসলাকুসলা আরুপ্পে সম্পযুত্তধম্মানঞ্ঞেৰ ইন্দ্রিযপচ্চযেন পচ্চযো। চতুভূমকো ৰিপাকিন্দ্রিযপচ্চযো একন্তেনেৰ সম্পযুত্তকানং ইন্দ্রিযপচ্চযেন পচ্চযো। কামাৰচররূপাৰচরা পনেত্থ পঞ্চৰোকারে উপ্পজ্জনতো পৰত্তে চিত্তসমুট্ঠানরূপস্স, পটিসন্ধিযং কটত্তারূপস্সাপি ইন্দ্রিযপচ্চযেন পচ্চযা হোন্তি। লোকুত্তরা চিত্তসমুট্ঠানরূপস্সেৰ। আরুপ্পে উপ্পন্না লোকুত্তরৰিপাকা ইন্দ্রিযা রূপস্স পচ্চযা ন হোন্তি। তেভূমকা কিরিযিন্দ্রিযা পঞ্চৰোকারে সম্পযুত্তধম্মানঞ্চেৰ চিত্তসমুট্ঠানরূপস্স চ, কামাৰচরারূপাৰচরা পন আরুপ্পে সম্পযুত্তধম্মানঞ্ঞেৰ ইন্দ্রিযপচ্চযতং ফরন্তি। চক্খুন্দ্রিযাদিৰসেন ছব্বিধে রূপিন্দ্রিযে চক্খুন্দ্রিযং কুসলাকুসলৰিপাকতো সম্পযুত্তধম্মানং দ্ৰিন্নং চক্খুৰিঞ্ঞাণানং, সোতিন্দ্রিযাদীনি তথাৰিধানঞ্ঞেৰ সোতৰিঞ্ঞাণাদীনং, রূপজীৰিতিন্দ্রিযং অত্তনা সহজাতরূপানং ঠিতিক্খণে ইন্দ্রিযপচ্চযেন পচ্চযো। সহজাতপচ্চযতা পন তস্স নত্থীতি এৰমেত্থ পচ্চযুপ্পন্নতোপি ৰিঞ্ঞাতব্বো ৰিনিচ্ছযোতি।
Evaṃ bhinne panettha catubhūmakopi kusalindriyapaccayo pañcavokāre sampayuttadhammānañceva cittasamuṭṭhānarūpassa ca indriyapaccayena paccayo, tathā akusalo. Ṭhapetvā pana rūpāvacarakusalaṃ avasesā kusalākusalā āruppe sampayuttadhammānaññeva indriyapaccayena paccayo. Catubhūmako vipākindriyapaccayo ekanteneva sampayuttakānaṃ indriyapaccayena paccayo. Kāmāvacararūpāvacarā panettha pañcavokāre uppajjanato pavatte cittasamuṭṭhānarūpassa, paṭisandhiyaṃ kaṭattārūpassāpi indriyapaccayena paccayā honti. Lokuttarā cittasamuṭṭhānarūpasseva. Āruppe uppannā lokuttaravipākā indriyā rūpassa paccayā na honti. Tebhūmakā kiriyindriyā pañcavokāre sampayuttadhammānañceva cittasamuṭṭhānarūpassa ca, kāmāvacarārūpāvacarā pana āruppe sampayuttadhammānaññeva indriyapaccayataṃ pharanti. Cakkhundriyādivasena chabbidhe rūpindriye cakkhundriyaṃ kusalākusalavipākato sampayuttadhammānaṃ dvinnaṃ cakkhuviññāṇānaṃ, sotindriyādīni tathāvidhānaññeva sotaviññāṇādīnaṃ, rūpajīvitindriyaṃ attanā sahajātarūpānaṃ ṭhitikkhaṇe indriyapaccayena paccayo. Sahajātapaccayatā pana tassa natthīti evamettha paccayuppannatopi viññātabbo vinicchayoti.
ইন্দ্রিযপচ্চযনিদ্দেসৰণ্ণনা।
Indriyapaccayaniddesavaṇṇanā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / পট্ঠানপাল়ি • Paṭṭhānapāḷi / (২) পচ্চযনিদ্দেসো • (2) Paccayaniddeso
