(து³தியோ பா⁴கோ³)

(Dutiyo bhāgo)

68. இந்த்³ரியபரோபரியத்தஞாணனித்³தே³ஸவண்ணனா

68. Indriyaparopariyattañāṇaniddesavaṇṇanā

111. இந்த்³ரியபரோபரியத்தஞாணனித்³தே³ஸே ததா²க³தஸ்ஸாதி வசனே உத்³தே³ஸே ஸரூபதோ அவிஜ்ஜமானேபி ‘‘ச² ஞாணானி அஸாதா⁴ரணானி ஸாவகேஹீ’’தி (படி॰ ம॰ மாதிகா 1.73) வுத்தத்தா ‘‘ததா²க³தஸ்ஸா’’தி வுத்தமேவ ஹோதி. தஸ்மா உத்³தே³ஸே அத்த²தோ ஸித்³த⁴ஸ்ஸ ததா²க³தவசனஸ்ஸ நித்³தே³ஸே க³ஹணங் கதங். ஸத்தே பஸ்ஸதீதி ரூபாதீ³ஸு ச²ந்த³ராகே³ன ஸத்ததாய லக்³க³தாய ஸத்தா, தே ஸத்தே இந்த்³ரியபரோபரியத்தஞாணேன சக்கு²னா பஸ்ஸதி ஓலோகேதி. அப்பரஜக்கே²தி பஞ்ஞாமயே அக்கி²ம்ஹி அப்பங் ராகா³தி³ரஜோ ஏதேஸந்தி அப்பரஜக்கா², அப்பங் ராகா³தி³ரஜோ ஏதேஸந்தி வா அப்பரஜக்கா². தே அப்பரஜக்கே². மஹாரஜக்கே²தி பஞ்ஞாமயே அக்கி²ம்ஹி மஹந்தங் ராகா³தி³ரஜோ ஏதேஸந்தி மஹாரஜக்கா², மஹந்தங் ராகா³தி³ரஜோ ஏதேஸந்தி வா மஹாரஜக்கா². திக்கி²ந்த்³ரியே முதி³ந்த்³ரியேதி திக்கா²னி ஸத்³தா⁴தீ³னி இந்த்³ரியானி ஏதேஸந்தி திக்கி²ந்த்³ரியா, முதூ³னி ஸத்³தா⁴தீ³னி இந்த்³ரியானி ஏதேஸந்தி முதி³ந்த்³ரியா. ஸ்வாகாரே த்³வாகாரேதி ஸுந்த³ரா ஸத்³தா⁴த³யோ ஆகாரா கொட்டா²ஸா ஏதேஸந்தி ஸ்வாகாரா, குச்சி²தா க³ரஹிதா ஸத்³தா⁴த³யோ ஆகாரா கொட்டா²ஸா ஏதேஸந்தி த்³வாகாரா. ஸுவிஞ்ஞாபயே து³விஞ்ஞாபயேதி யே கதி²தங் காரணங் ஸல்லக்கெ²ந்தி ஸுகே²ன ஸக்கா ஹொந்தி விஞ்ஞாபேதுங், தே ஸுவிஞ்ஞாபயா, தப்³பி³பரீதா து³விஞ்ஞாபயா. அப்பேகச்சே பரலோகவஜ்ஜப⁴யத³ஸ்ஸாவினோதி அபி ஏகே பரலோகஞ்சேவ ராகா³தி³வஜ்ஜஞ்ச ப⁴யதோ பஸ்ஸந்தே, இமஸ்ஸ பன பத³ஸ்ஸ நித்³தே³ஸே பரலோகஸ்ஸேவ ந வுத்தத்தா க²ந்தா⁴தி³லோகே ச ராகா³தி³வஜ்ஜே ச பரங் பா³ள்ஹங் ப⁴யங் பஸ்ஸனஸீலாதி பரலோகவஜ்ஜப⁴யத³ஸ்ஸாவினோ. தே பரலோகவஜ்ஜப⁴யத³ஸ்ஸாவினேதி ஏவமத்தோ² க³ஹேதப்³போ³. அப்பேகச்சே ந பரலோகவஜ்ஜப⁴யத³ஸ்ஸாவினோதி தப்³பி³பரீதே. லோகோதி ச லுஜ்ஜனபலுஜ்ஜனட்டே²ன. வஜ்ஜந்தி ச வஜ்ஜனீயட்டே²ன. எத்தாவதா உத்³தே³ஸஸ்ஸ நித்³தே³ஸோ கதோ ஹோதி.

111. Indriyaparopariyattañāṇaniddese tathāgatassāti vacane uddese sarūpato avijjamānepi ‘‘cha ñāṇāni asādhāraṇāni sāvakehī’’ti (paṭi. ma. mātikā 1.73) vuttattā ‘‘tathāgatassā’’ti vuttameva hoti. Tasmā uddese atthato siddhassa tathāgatavacanassa niddese gahaṇaṃ kataṃ. Satte passatīti rūpādīsu chandarāgena sattatāya laggatāya sattā, te satte indriyaparopariyattañāṇena cakkhunā passati oloketi. Apparajakkheti paññāmaye akkhimhi appaṃ rāgādirajo etesanti apparajakkhā, appaṃ rāgādirajo etesanti vā apparajakkhā. Te apparajakkhe. Mahārajakkheti paññāmaye akkhimhi mahantaṃ rāgādirajo etesanti mahārajakkhā, mahantaṃ rāgādirajo etesanti vā mahārajakkhā. Tikkhindriye mudindriyeti tikkhāni saddhādīni indriyāni etesanti tikkhindriyā, mudūni saddhādīni indriyāni etesanti mudindriyā. Svākāre dvākāreti sundarā saddhādayo ākārā koṭṭhāsā etesanti svākārā, kucchitā garahitā saddhādayo ākārā koṭṭhāsā etesanti dvākārā. Suviññāpaye duviññāpayeti ye kathitaṃ kāraṇaṃ sallakkhenti sukhena sakkā honti viññāpetuṃ, te suviññāpayā, tabbiparītā duviññāpayā. Appekacceparalokavajjabhayadassāvinoti api eke paralokañceva rāgādivajjañca bhayato passante, imassa pana padassa niddese paralokasseva na vuttattā khandhādiloke ca rāgādivajje ca paraṃ bāḷhaṃ bhayaṃ passanasīlāti paralokavajjabhayadassāvino. Te paralokavajjabhayadassāvineti evamattho gahetabbo. Appekacce na paralokavajjabhayadassāvinoti tabbiparīte. Lokoti ca lujjanapalujjanaṭṭhena. Vajjanti ca vajjanīyaṭṭhena. Ettāvatā uddesassa niddeso kato hoti.

புன நித்³தே³ஸஸ்ஸ படினித்³தே³ஸங் கரொந்தோ அப்பரஜக்கே² மஹாரஜக்கே²திஆதி³மாஹ. தத்த² தீஸு ரதனேஸு ஓகப்பனஸங்கா²தா ஸத்³தா⁴ அஸ்ஸ அத்தீ²தி ஸத்³தோ⁴. ஸோ ஸத்³தா⁴ஸம்பன்னோ புக்³க³லோ அஸ்ஸத்³தி⁴யரஜஸ்ஸ சேவ அஸ்ஸத்³தி⁴யமூலகஸ்ஸ ஸேஸாகுஸலரஜஸ்ஸ ச அப்பகத்தா அப்பரஜக்கோ². நத்தி² ஏதஸ்ஸ ஸத்³தா⁴தி அஸ்ஸத்³தோ⁴. ஸோ வுத்தப்பகாரஸ்ஸ ரஜஸ்ஸ மஹந்தத்தா மஹாரஜக்கோ². ஆரத்³த⁴ங் வீரியமனேனாதி ஆரத்³த⁴வீரியோ. ஸோ கோஸஜ்ஜரஜஸ்ஸ சேவ கோஸஜ்ஜமூலகஸ்ஸ ஸேஸாகுஸலரஜஸ்ஸ ச அப்பகத்தா அப்பரஜக்கோ². ஹீனவீரியத்தா குச்சி²தேன ஆகாரேன ஸீத³தீதி குஸீதோ³, குஸீதோ³ ஏவ குஸீதோ. ஸோ வுத்தப்பகாரஸ்ஸ ரஜஸ்ஸ மஹந்தத்தா மஹாரஜக்கோ². ஆரம்மணங் உபேச்ச டி²தா ஸதி அஸ்ஸாதி உபட்டி²தஸ்ஸதி. ஸோ முட்ட²ஸ்ஸச்சரஜஸ்ஸ சேவ முட்ட²ஸ்ஸச்சமூலகஸ்ஸ ஸேஸாகுஸலரஜஸ்ஸ ச அப்பகத்தா அப்பரஜக்கோ². முட்டா² நட்டா² ஸதி அஸ்ஸாதி முட்ட²ஸ்ஸதி. ஸோ வுத்தப்பகாரஸ்ஸ ரஜஸ்ஸ மஹந்தத்தா மஹாரஜக்கோ². அப்பனாஸமாதி⁴னா உபசாரஸமாதி⁴னா வா ஆரம்மணே ஸமங், ஸம்மா வா ஆஹிதோ டி²தோதி ஸமாஹிதோ, ஸமாஹிதசித்தோதி வா ஸமாஹிதோ. ஸோ உத்³த⁴ச்சரஜஸ்ஸ சேவ உத்³த⁴ச்சமூலகஸ்ஸ ஸேஸாகுஸலரஜஸ்ஸ ச அப்பகத்தா அப்பரஜக்கோ². ந ஸமாஹிதோ அஸமாஹிதோ. ஸோ வுத்தப்பகாரஸ்ஸ ரஜஸ்ஸ மஹந்தத்தா மஹாரஜக்கோ². உத³யத்த²கா³மினீ பஞ்ஞா அஸ்ஸ அத்தீ²தி பஞ்ஞவா. ஸோ மோஹரஜஸ்ஸ சேவ மோஹமூலகஸ்ஸ ஸேஸாகுஸலரஜஸ்ஸ ச அப்பகத்தா அப்பரஜக்கோ². மோஹமூள்ஹத்தா து³ட்டா² பஞ்ஞா அஸ்ஸாதி து³ப்பஞ்ஞோ. ஸோ வுத்தப்பகாரஸ்ஸ ரஜஸ்ஸ மஹந்தத்தா மஹாரஜக்கோ². ஸத்³தோ⁴ புக்³க³லோ திக்கி²ந்த்³ரியோதி ப³ஹுலங் உப்பஜ்ஜமானாய ப³லவதியா ஸத்³தா⁴ய ஸத்³தோ⁴, தேனேவ ஸத்³தி⁴ந்த்³ரியேன திக்கி²ந்த்³ரியோ. அஸ்ஸத்³தோ⁴ புக்³க³லோ முதி³ந்த்³ரியோதி ப³ஹுலங் உப்பஜ்ஜமானேன அஸ்ஸத்³தி⁴யேன அஸ்ஸத்³தோ⁴, அந்தரந்தரா உப்பஜ்ஜமானேன து³ப்³ப³லேன ஸத்³தி⁴ந்த்³ரியேன முதி³ந்த்³ரியோ. ஏஸ நயோ ஸேஸேஸுபி. ஸத்³தோ⁴ புக்³க³லோ ஸ்வாகாரோதி தாய ஏவ ஸத்³தா⁴ய ஸோப⁴னாகாரோ. அஸ்ஸத்³தோ⁴ புக்³க³லோ த்³வாகாரோதி தேனேவ அஸ்ஸத்³தி⁴யேன விரூபாகாரோ. ஏஸ நயோ ஸேஸேஸுபி. ஸுவிஞ்ஞாபயோதி ஸுகே²ன விஞ்ஞாபேதுங் ஸக்குணெய்யோ. து³விஞ்ஞாபயோதி து³க்கே²ன விஞ்ஞாபேதுங் ஸக்குணெய்யோ. பரலோகவஜ்ஜப⁴யத³ஸ்ஸாவீதி எத்த² யஸ்மா பஞ்ஞாஸம்பன்னஸ்ஸேவ ஸத்³தா⁴தீ³னி ஸுபரிஸுத்³தா⁴னி ஹொந்தி, தஸ்மா ஸுபரிஸுத்³த⁴ஸத்³தா⁴தி³ஸம்பன்னோ தங்ஸம்பயுத்தாய, ஸுபரிஸுத்³த⁴ஸத்³தா⁴தி³ஸம்பன்னோபி வா தப்பச்சயாய பஞ்ஞாய பரலோகவஜ்ஜப⁴யத³ஸ்ஸாவீ ஹோதி. தஸ்மா ஏவ ஹி ஸத்³தா⁴த³யோபி சத்தாரோ ‘‘பரலோகவஜ்ஜப⁴யத³ஸ்ஸாவீ’’தி வுத்தா.

Puna niddesassa paṭiniddesaṃ karonto apparajakkhe mahārajakkhetiādimāha. Tattha tīsu ratanesu okappanasaṅkhātā saddhā assa atthīti saddho. So saddhāsampanno puggalo assaddhiyarajassa ceva assaddhiyamūlakassa sesākusalarajassa ca appakattā apparajakkho. Natthi etassa saddhāti assaddho. So vuttappakārassa rajassa mahantattā mahārajakkho. Āraddhaṃ vīriyamanenāti āraddhavīriyo. So kosajjarajassa ceva kosajjamūlakassa sesākusalarajassa ca appakattā apparajakkho. Hīnavīriyattā kucchitena ākārena sīdatīti kusīdo, kusīdo eva kusīto. So vuttappakārassa rajassa mahantattā mahārajakkho. Ārammaṇaṃ upecca ṭhitā sati assāti upaṭṭhitassati. So muṭṭhassaccarajassa ceva muṭṭhassaccamūlakassa sesākusalarajassa ca appakattā apparajakkho. Muṭṭhā naṭṭhā sati assāti muṭṭhassati. So vuttappakārassa rajassa mahantattā mahārajakkho. Appanāsamādhinā upacārasamādhinā vā ārammaṇe samaṃ, sammā vā āhito ṭhitoti samāhito, samāhitacittoti vā samāhito. So uddhaccarajassa ceva uddhaccamūlakassa sesākusalarajassa ca appakattā apparajakkho. Na samāhito asamāhito. So vuttappakārassa rajassa mahantattā mahārajakkho. Udayatthagāminī paññā assa atthīti paññavā. So moharajassa ceva mohamūlakassa sesākusalarajassa ca appakattā apparajakkho. Mohamūḷhattā duṭṭhā paññā assāti duppañño. So vuttappakārassa rajassa mahantattā mahārajakkho. Saddho puggalo tikkhindriyoti bahulaṃ uppajjamānāya balavatiyā saddhāya saddho, teneva saddhindriyena tikkhindriyo. Assaddho puggalo mudindriyoti bahulaṃ uppajjamānena assaddhiyena assaddho, antarantarā uppajjamānena dubbalena saddhindriyena mudindriyo. Esa nayo sesesupi. Saddho puggalo svākāroti tāya eva saddhāya sobhanākāro. Assaddho puggalo dvākāroti teneva assaddhiyena virūpākāro. Esa nayo sesesupi. Suviññāpayoti sukhena viññāpetuṃ sakkuṇeyyo. Duviññāpayoti dukkhena viññāpetuṃ sakkuṇeyyo. Paralokavajjabhayadassāvīti ettha yasmā paññāsampannasseva saddhādīni suparisuddhāni honti, tasmā suparisuddhasaddhādisampanno taṃsampayuttāya, suparisuddhasaddhādisampannopi vā tappaccayāya paññāya paralokavajjabhayadassāvī hoti. Tasmā eva hi saddhādayopi cattāro ‘‘paralokavajjabhayadassāvī’’ti vuttā.

112. இதா³னி ‘‘பரலோகவஜ்ஜப⁴யத³ஸ்ஸாவீ’’தி எத்த² வுத்தங் லோகஞ்ச வஜ்ஜஞ்ச த³ஸ்ஸேதுங் லோகோதிஆதி³மாஹ. எத்த² க²ந்தா⁴ ஏவ லுஜ்ஜனபலுஜ்ஜனட்டே²ன லோகோதி க²ந்த⁴லோகோ. ஸேஸத்³வயேபி ஏஸேவ நயோ. விபத்திப⁴வலோகோதி அபாயலோகோ. ஸோ ஹி அனிட்ட²ப²லத்தா விரூபோ லாபோ⁴தி விபத்தி, ப⁴வதீதி ப⁴வோ, விபத்தி ஏவ ப⁴வோ விபத்திப⁴வோ, விபத்திப⁴வோ ஏவ லோகோ விபத்திப⁴வலோகோ. விபத்திஸம்ப⁴வலோகோதி அபாயூபக³ங் கம்மங். தஞ்ஹி ஸம்ப⁴வதி ஏதஸ்மா ப²லந்தி ஸம்ப⁴வோ, விபத்தியா ஸம்ப⁴வோ விபத்திஸம்ப⁴வோ, விபத்திஸம்ப⁴வோ ஏவ லோகோ விபத்திஸம்ப⁴வலோகோ. ஸம்பத்திப⁴வலோகோதி ஸுக³திலோகோ. ஸோ ஹி இட்ட²ப²லத்தா ஸுந்த³ரோ லாபோ⁴தி ஸம்பத்தி, ப⁴வதீதி ப⁴வோ, ஸம்பத்தி ஏவ ப⁴வோ ஸம்பத்திப⁴வோ, ஸம்பத்திப⁴வோ ஏவ லோகோ ஸம்பத்திப⁴வலோகோ. ஸம்பத்திஸம்ப⁴வலோகோதி ஸுக³தூபக³ங் கம்மங். தஞ்ஹி ஸம்ப⁴வதி ஏதஸ்மா ப²லந்தி ஸம்ப⁴வோ, ஸம்பத்தியா ஸம்ப⁴வோ ஸம்பத்திஸம்ப⁴வோ, ஸம்பத்திஸம்ப⁴வோ ஏவ லோகோ ஸம்பத்திஸம்ப⁴வலோகோ. ஏகோ லோகோதிஆதீ³னி ஹெட்டா² வுத்தத்தா²னேவ.

112. Idāni ‘‘paralokavajjabhayadassāvī’’ti ettha vuttaṃ lokañca vajjañca dassetuṃ lokotiādimāha. Ettha khandhā eva lujjanapalujjanaṭṭhena lokoti khandhaloko. Sesadvayepi eseva nayo. Vipattibhavalokoti apāyaloko. So hi aniṭṭhaphalattā virūpo lābhoti vipatti, bhavatīti bhavo, vipatti eva bhavo vipattibhavo, vipattibhavo eva loko vipattibhavaloko. Vipattisambhavalokoti apāyūpagaṃ kammaṃ. Tañhi sambhavati etasmā phalanti sambhavo, vipattiyā sambhavo vipattisambhavo, vipattisambhavo eva loko vipattisambhavaloko. Sampattibhavalokoti sugatiloko. So hi iṭṭhaphalattā sundaro lābhoti sampatti, bhavatīti bhavo, sampatti eva bhavo sampattibhavo, sampattibhavo eva loko sampattibhavaloko. Sampattisambhavalokoti sugatūpagaṃ kammaṃ. Tañhi sambhavati etasmā phalanti sambhavo, sampattiyā sambhavo sampattisambhavo, sampattisambhavo eva loko sampattisambhavaloko. Eko lokotiādīni heṭṭhā vuttatthāneva.

வஜ்ஜந்தி நபுங்ஸகவசனங் அஸுகோதி அனித்³தி³ட்ட²த்தா கதங். கிலேஸாதி ராகா³த³யோ. து³ச்சரிதாதி பாணாதிபாதாத³யோ. அபி⁴ஸங்கா²ராதி புஞ்ஞாபி⁴ஸங்கா²ராத³யோ. ப⁴வகா³மிகம்மாதி அத்தனோ விபாகதா³னவஸேன ப⁴வங் க³ச்ச²ந்தீதி ப⁴வகா³மினோ, அபி⁴ஸங்கா²ரேஸுபி விபாகஜனகானேவ கம்மானி வுத்தானி. இதீதி வுத்தப்பகாரனித³ஸ்ஸனங். இமஸ்மிஞ்ச லோகே இமஸ்மிஞ்ச வஜ்ஜேதி வுத்தப்பகாரே லோகே ச வஜ்ஜே ச. திப்³பா³ ப⁴யஸஞ்ஞாதி ப³லவதீ ப⁴யஸஞ்ஞா. திப்³பா³தி பரஸத்³த³ஸ்ஸ அத்தோ² வுத்தோ, ப⁴யஸஞ்ஞாதி ப⁴யஸத்³த³ஸ்ஸ, லோகவஜ்ஜத்³வயம்பி ஹி ப⁴யவத்து²த்தா ஸயஞ்ச ஸப⁴யத்தா ப⁴யங், ப⁴யமிதி ஸஞ்ஞா ப⁴யஸஞ்ஞா. பச்சுபட்டி²தா ஹோதீதி தங் தங் படிச்ச உபேச்ச டி²தா ஹோதி. ஸெய்யதா²பி உக்கி²த்தாஸிகே வத⁴கேதி யதா² நாம பஹரிதுங் உச்சாரிதக²க்³கே³ பச்சாமித்தே திப்³பா³ ப⁴யஸஞ்ஞா பச்சுபட்டி²தா ஹோதி, ஏவமேவ லோகே ச வஜ்ஜே ச திப்³பா³ ப⁴யஸஞ்ஞா பச்சுபட்டி²தா ஹோதி. இமேஹி பஞ்ஞாஸாய ஆகாரேஹீதி அப்பரஜக்க²பஞ்சகாதீ³ஸு த³ஸஸு பஞ்சகேஸு ஏகேகஸ்மிங் பஞ்சன்னங் பஞ்சன்னங் ஆகாரானங் வஸேன பஞ்ஞாஸாய ஆகாரேஹி. இமானி பஞ்சிந்த்³ரியானீதி ஸத்³தி⁴ந்த்³ரியாதீ³னி பஞ்சிந்த்³ரியானி . ஜானாதீதி ததா²க³தோ பஞ்ஞாய பஜானாதி. பஸ்ஸதீதி தி³ப்³ப³சக்கு²னா தி³ட்ட²ங் விய கரோதி. அஞ்ஞாதீதி ஸப்³பா³காரமரியாதா³ஹி ஜானாதி. படிவிஜ்ஜ²தீதி ஏகதே³ஸங் அஸேஸெத்வா நிரவஸேஸத³ஸ்ஸனவஸேன பஞ்ஞாய பதா³லேதீதி.

Vajjanti napuṃsakavacanaṃ asukoti aniddiṭṭhattā kataṃ. Kilesāti rāgādayo. Duccaritāti pāṇātipātādayo. Abhisaṅkhārāti puññābhisaṅkhārādayo. Bhavagāmikammāti attano vipākadānavasena bhavaṃ gacchantīti bhavagāmino, abhisaṅkhāresupi vipākajanakāneva kammāni vuttāni. Itīti vuttappakāranidassanaṃ. Imasmiñca loke imasmiñca vajjeti vuttappakāre loke ca vajje ca. Tibbā bhayasaññāti balavatī bhayasaññā. Tibbāti parasaddassa attho vutto, bhayasaññāti bhayasaddassa, lokavajjadvayampi hi bhayavatthuttā sayañca sabhayattā bhayaṃ, bhayamiti saññā bhayasaññā. Paccupaṭṭhitā hotīti taṃ taṃ paṭicca upecca ṭhitā hoti. Seyyathāpi ukkhittāsike vadhaketi yathā nāma paharituṃ uccāritakhagge paccāmitte tibbā bhayasaññā paccupaṭṭhitā hoti, evameva loke ca vajje ca tibbā bhayasaññā paccupaṭṭhitā hoti. Imehi paññāsāya ākārehīti apparajakkhapañcakādīsu dasasu pañcakesu ekekasmiṃ pañcannaṃ pañcannaṃ ākārānaṃ vasena paññāsāya ākārehi. Imāni pañcindriyānīti saddhindriyādīni pañcindriyāni . Jānātīti tathāgato paññāya pajānāti. Passatīti dibbacakkhunā diṭṭhaṃ viya karoti. Aññātīti sabbākāramariyādāhi jānāti. Paṭivijjhatīti ekadesaṃ asesetvā niravasesadassanavasena paññāya padāletīti.

இந்த்³ரியபரோபரியத்தஞாணனித்³தே³ஸவண்ணனா நிட்டி²தா.

Indriyaparopariyattañāṇaniddesavaṇṇanā niṭṭhitā.

Next: 69. ஆஸயானுஸயஞாணனித்³தே³ஸவண்ணனா • 69. Āsayānusayañāṇaniddesavaṇṇanā

Related texts:

திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / படிஸம்பி⁴தா³மக்³க³பாளி • Paṭisambhidāmaggapāḷi / 68. இந்த்³ரியபரோபரியத்தஞாணனித்³தே³ஸோ • 68. Indriyaparopariyattañāṇaniddeso

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact