| Library / Tipiṭaka / திபிடக • Tipiṭaka / படிஸம்பி⁴தா³மக்³க³பாளி • Paṭisambhidāmaggapāḷi |
68. இந்த்³ரியபரோபரியத்தஞாணனித்³தே³ஸோ
68. Indriyaparopariyattañāṇaniddeso
111. கதமங் ததா²க³தஸ்ஸ இந்த்³ரியபரோபரியத்த ஞாணங்? இத⁴ ததா²க³தோ ஸத்தே பஸ்ஸதி அப்பரஜக்கே² மஹாரஜக்கே² திக்கி²ந்த்³ரியே முதி³ந்த்³ரியே ஸ்வாகாரே த்³வாகாரே ஸுவிஞ்ஞாபயே து³விஞ்ஞாபயே அப்பேகச்சே பரலோகவஜ்ஜப⁴யத³ஸ்ஸாவினோ அப்பேகச்சே ந பரலோகவஜ்ஜப⁴யத³ஸ்ஸாவினோ.
111. Katamaṃ tathāgatassa indriyaparopariyatta ñāṇaṃ? Idha tathāgato satte passati apparajakkhe mahārajakkhe tikkhindriye mudindriye svākāre dvākāre suviññāpaye duviññāpaye appekacce paralokavajjabhayadassāvino appekacce na paralokavajjabhayadassāvino.
அப்பரஜக்கே² மஹாரஜக்கே²தி ஸத்³தோ⁴ புக்³க³லோ அப்பரஜக்கோ², அஸ்ஸத்³தோ⁴ புக்³க³லோ மஹாரஜக்கோ². ஆரத்³த⁴வீரியோ புக்³க³லோ அப்பரஜக்கோ², குஸீதோ புக்³க³லோ மஹாரஜக்கோ². உபட்டி²தஸ்ஸதி புக்³க³லோ அப்பரஜக்கோ², முட்ட²ஸ்ஸதி புக்³க³லோ மஹாரஜக்கோ². ஸமாஹிதோ புக்³க³லோ அப்பரஜக்கோ², அஸமாஹிதோ புக்³க³லோ மஹாரஜக்கோ². பஞ்ஞவா புக்³க³லோ அப்பரஜக்கோ², து³ப்பஞ்ஞோ புக்³க³லோ மஹாரஜக்கோ².
Apparajakkhe mahārajakkheti saddho puggalo apparajakkho, assaddho puggalo mahārajakkho. Āraddhavīriyo puggalo apparajakkho, kusīto puggalo mahārajakkho. Upaṭṭhitassati puggalo apparajakkho, muṭṭhassati puggalo mahārajakkho. Samāhito puggalo apparajakkho, asamāhito puggalo mahārajakkho. Paññavā puggalo apparajakkho, duppañño puggalo mahārajakkho.
திக்கி²ந்த்³ரியே முதி³ந்த்³ரியேதி ஸத்³தோ⁴ புக்³க³லோ திக்கி²ந்த்³ரியோ, அஸ்ஸத்³தோ⁴ புக்³க³லோ முதி³ந்த்³ரியோ. ஆரத்³த⁴வீரியோ புக்³க³லோ திக்கி²ந்த்³ரியோ, குஸீதோ புக்³க³லோ முதி³ந்த்³ரியோ. உபட்டி²தஸ்ஸதி புக்³க³லோ திக்கி²ந்த்³ரியோ, முட்ட²ஸ்ஸதி புக்³க³லோ முதி³ந்த்³ரியோ. ஸமாஹிதோ புக்³க³லோ திக்கி²ந்த்³ரியோ, அஸமாஹிதோ புக்³க³லோ முதி³ந்த்³ரியோ. பஞ்ஞவா புக்³க³லோ திக்கி²ந்த்³ரியோ, து³ப்பஞ்ஞோ புக்³க³லோ முதி³ந்த்³ரியோ.
Tikkhindriyemudindriyeti saddho puggalo tikkhindriyo, assaddho puggalo mudindriyo. Āraddhavīriyo puggalo tikkhindriyo, kusīto puggalo mudindriyo. Upaṭṭhitassati puggalo tikkhindriyo, muṭṭhassati puggalo mudindriyo. Samāhito puggalo tikkhindriyo, asamāhito puggalo mudindriyo. Paññavā puggalo tikkhindriyo, duppañño puggalo mudindriyo.
ஸ்வாகாரே த்³வாகாரேதி ஸத்³தோ⁴ புக்³க³லோ ஸ்வாகாரோ, அஸ்ஸத்³தோ⁴ புக்³க³லோ த்³வாகாரோ. ஆரத்³த⁴வீரியோ புக்³க³லோ ஸ்வாகாரோ, குஸீதோ புக்³க³லோ த்³வாகாரோ. உபட்டி²தஸ்ஸதி புக்³க³லோ ஸ்வாகாரோ, முட்ட²ஸ்ஸதி புக்³க³லோ த்³வாகாரோ. ஸமாஹிதோ புக்³க³லோ ஸ்வாகாரோ, அஸமாஹிதோ புக்³க³லோ த்³வாகாரோ. பஞ்ஞவா புக்³க³லோ ஸ்வாகாரோ, து³ப்பஞ்ஞோ புக்³க³லோ த்³வாகாரோ.
Svākāre dvākāreti saddho puggalo svākāro, assaddho puggalo dvākāro. Āraddhavīriyo puggalo svākāro, kusīto puggalo dvākāro. Upaṭṭhitassati puggalo svākāro, muṭṭhassati puggalo dvākāro. Samāhito puggalo svākāro, asamāhito puggalo dvākāro. Paññavā puggalo svākāro, duppañño puggalo dvākāro.
ஸுவிஞ்ஞாபயே து³விஞ்ஞாபயேதி ஸத்³தோ⁴ புக்³க³லோ ஸுவிஞ்ஞாபயோ, அஸ்ஸத்³தோ⁴ புக்³க³லோ து³விஞ்ஞாபயோ. ஆரத்³த⁴வீரியோ புக்³க³லோ ஸுவிஞ்ஞாபயோ, குஸீதோ புக்³க³லோ து³விஞ்ஞாபயோ. உபட்டி²தஸ்ஸதி புக்³க³லோ ஸுவிஞ்ஞாபயோ, முட்ட²ஸ்ஸதி புக்³க³லோ து³விஞ்ஞாபயோ. ஸமாஹிதோ புக்³க³லோ ஸுவிஞ்ஞாபயோ , அஸமாஹிதோ புக்³க³லோ து³விஞ்ஞாபயோ. பஞ்ஞவா புக்³க³லோ ஸுவிஞ்ஞாபயோ, து³ப்பஞ்ஞோ புக்³க³லோ து³விஞ்ஞாபயோ.
Suviññāpaye duviññāpayeti saddho puggalo suviññāpayo, assaddho puggalo duviññāpayo. Āraddhavīriyo puggalo suviññāpayo, kusīto puggalo duviññāpayo. Upaṭṭhitassati puggalo suviññāpayo, muṭṭhassati puggalo duviññāpayo. Samāhito puggalo suviññāpayo , asamāhito puggalo duviññāpayo. Paññavā puggalo suviññāpayo, duppañño puggalo duviññāpayo.
அப்பேகச்சே பரலோகவஜ்ஜப⁴யத³ஸ்ஸாவினோ, அப்பேகச்சே ந பரலோகவஜ்ஜப⁴யத³ஸ்ஸாவினோதி ஸத்³தோ⁴ புக்³க³லோ பரலோகவஜ்ஜப⁴யத³ஸ்ஸாவீ, அஸ்ஸத்³தோ⁴ புக்³க³லோ ந பரலோகவஜ்ஜப⁴யத³ஸ்ஸாவீ. ஆரத்³த⁴வீரியோ புக்³க³லோ பரலோகவஜ்ஜப⁴யத³ஸ்ஸாவீ, குஸீதோ புக்³க³லோ ந பரலோகவஜ்ஜப⁴யத³ஸ்ஸாவீ. உபட்டி²தஸ்ஸதி புக்³க³லோ பரலோகவஜ்ஜப⁴யத³ஸ்ஸாவீ, முட்ட²ஸ்ஸதி புக்³க³லோ ந பரலோகவஜ்ஜப⁴யத³ஸ்ஸாவீ. ஸமாஹிதோ புக்³க³லோ பரலோகவஜ்ஜப⁴யத³ஸ்ஸாவீ, அஸமாஹிதோ புக்³க³லோ ந பரலோகவஜ்ஜப⁴யத³ஸ்ஸாவீ. பஞ்ஞவா புக்³க³லோ பரலோகவஜ்ஜப⁴யத³ஸ்ஸாவீ, து³ப்பஞ்ஞோ புக்³க³லோ ந பரலோகவஜ்ஜப⁴யத³ஸ்ஸாவீ.
Appekacce paralokavajjabhayadassāvino, appekacce na paralokavajjabhayadassāvinoti saddho puggalo paralokavajjabhayadassāvī, assaddho puggalo na paralokavajjabhayadassāvī. Āraddhavīriyo puggalo paralokavajjabhayadassāvī, kusīto puggalo na paralokavajjabhayadassāvī. Upaṭṭhitassati puggalo paralokavajjabhayadassāvī, muṭṭhassati puggalo na paralokavajjabhayadassāvī. Samāhito puggalo paralokavajjabhayadassāvī, asamāhito puggalo na paralokavajjabhayadassāvī. Paññavā puggalo paralokavajjabhayadassāvī, duppañño puggalo na paralokavajjabhayadassāvī.
112. லோகோதி – க²ந்த⁴லோகோ, தா⁴துலோகோ, ஆயதனலோகோ, விபத்திப⁴வலோகோ , விபத்திஸம்ப⁴வலோகோ, ஸம்பத்திப⁴வலோகோ, ஸம்பத்திஸம்ப⁴வலோகோ.
112.Lokoti – khandhaloko, dhātuloko, āyatanaloko, vipattibhavaloko , vipattisambhavaloko, sampattibhavaloko, sampattisambhavaloko.
ஏகோ லோகோ – ஸப்³பே³ ஸத்தா ஆஹாரட்டி²திகா. த்³வே லோகா – நாமஞ்ச, ரூபஞ்ச. தயோ லோகா – திஸ்ஸோ வேத³னா. சத்தாரோ லோகா – சத்தாரோ ஆஹாரா. பஞ்ச லோகா – பஞ்சுபாதா³னக்க²ந்தா⁴. ச² லோகா – ச² அஜ்ஜ²த்திகானி ஆயதனானி. ஸத்த லோகா – ஸத்த விஞ்ஞாணட்டி²தியோ . அட்ட² லோகா – அட்ட² லோகத⁴ம்மா. நவ லோகா – நவ ஸத்தாவாஸா. த³ஸ லோகா – த³ஸாயதனானி. த்³வாத³ஸலோகா – த்³வாத³ஸாயதனானி. அட்டா²ரஸ லோகா – அட்டா²ரஸ தா⁴துயோ.
Eko loko – sabbe sattā āhāraṭṭhitikā. Dve lokā – nāmañca, rūpañca. Tayo lokā – tisso vedanā. Cattāro lokā – cattāro āhārā. Pañca lokā – pañcupādānakkhandhā. Cha lokā – cha ajjhattikāni āyatanāni. Satta lokā – satta viññāṇaṭṭhitiyo . Aṭṭha lokā – aṭṭha lokadhammā. Nava lokā – nava sattāvāsā. Dasa lokā – dasāyatanāni. Dvādasalokā – dvādasāyatanāni. Aṭṭhārasa lokā – aṭṭhārasa dhātuyo.
வஜ்ஜந்தி ஸப்³பே³ கிலேஸா வஜ்ஜா, ஸப்³பே³ து³ச்சரிதா வஜ்ஜா, ஸப்³பே³ அபி⁴ஸங்கா²ரா வஜ்ஜா, ஸப்³பே³ ப⁴வகா³மிகம்மா வஜ்ஜா. இதி இமஸ்மிஞ்ச லோகே இமஸ்மிஞ்ச வஜ்ஜே திப்³பா³ ப⁴யஸஞ்ஞா பச்சுபட்டி²தா ஹோதி, ஸெய்யதா²பி உக்கி²த்தாஸிகே வத⁴கே. இமேஹி பஞ்ஞாஸாய ஆகாரேஹி இமானி பஞ்சிந்த்³ரியானி ஜானாதி பஸ்ஸதி அஞ்ஞாதி படிவிஜ்ஜ²தி – இத³ங் ததா²க³தஸ்ஸ இந்த்³ரியபரோபரியத்தே ஞாணங்.
Vajjanti sabbe kilesā vajjā, sabbe duccaritā vajjā, sabbe abhisaṅkhārā vajjā, sabbe bhavagāmikammā vajjā. Iti imasmiñca loke imasmiñca vajje tibbā bhayasaññā paccupaṭṭhitā hoti, seyyathāpi ukkhittāsike vadhake. Imehi paññāsāya ākārehi imāni pañcindriyāni jānāti passati aññāti paṭivijjhati – idaṃ tathāgatassa indriyaparopariyatte ñāṇaṃ.
இந்த்³ரியபரோபரியத்தஞாணனித்³தே³ஸோ அட்ட²ஸட்டி²மோ.
Indriyaparopariyattañāṇaniddeso aṭṭhasaṭṭhimo.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / கு²த்³த³கனிகாய (அட்ட²கதா²) • Khuddakanikāya (aṭṭhakathā) / படிஸம்பி⁴தா³மக்³க³-அட்ட²கதா² • Paṭisambhidāmagga-aṭṭhakathā / 68. இந்த்³ரியபரோபரியத்தஞாணனித்³தே³ஸவண்ணனா • 68. Indriyaparopariyattañāṇaniddesavaṇṇanā
