| Library / Tipiṭaka / তিপিটক • Tipiṭaka / পটিসম্ভিদামগ্গপাল়ি • Paṭisambhidāmaggapāḷi |
৬৮. ইন্দ্রিযপরোপরিযত্তঞাণনিদ্দেসো
68. Indriyaparopariyattañāṇaniddeso
১১১. কতমং তথাগতস্স ইন্দ্রিযপরোপরিযত্ত ঞাণং? ইধ তথাগতো সত্তে পস্সতি অপ্পরজক্খে মহারজক্খে তিক্খিন্দ্রিযে মুদিন্দ্রিযে স্ৰাকারে দ্ৰাকারে সুৰিঞ্ঞাপযে দুৰিঞ্ঞাপযে অপ্পেকচ্চে পরলোকৰজ্জভযদস্সাৰিনো অপ্পেকচ্চে ন পরলোকৰজ্জভযদস্সাৰিনো।
111. Katamaṃ tathāgatassa indriyaparopariyatta ñāṇaṃ? Idha tathāgato satte passati apparajakkhe mahārajakkhe tikkhindriye mudindriye svākāre dvākāre suviññāpaye duviññāpaye appekacce paralokavajjabhayadassāvino appekacce na paralokavajjabhayadassāvino.
অপ্পরজক্খে মহারজক্খেতি সদ্ধো পুগ্গলো অপ্পরজক্খো, অস্সদ্ধো পুগ্গলো মহারজক্খো। আরদ্ধৰীরিযো পুগ্গলো অপ্পরজক্খো, কুসীতো পুগ্গলো মহারজক্খো। উপট্ঠিতস্সতি পুগ্গলো অপ্পরজক্খো, মুট্ঠস্সতি পুগ্গলো মহারজক্খো। সমাহিতো পুগ্গলো অপ্পরজক্খো, অসমাহিতো পুগ্গলো মহারজক্খো। পঞ্ঞৰা পুগ্গলো অপ্পরজক্খো, দুপ্পঞ্ঞো পুগ্গলো মহারজক্খো।
Apparajakkhe mahārajakkheti saddho puggalo apparajakkho, assaddho puggalo mahārajakkho. Āraddhavīriyo puggalo apparajakkho, kusīto puggalo mahārajakkho. Upaṭṭhitassati puggalo apparajakkho, muṭṭhassati puggalo mahārajakkho. Samāhito puggalo apparajakkho, asamāhito puggalo mahārajakkho. Paññavā puggalo apparajakkho, duppañño puggalo mahārajakkho.
তিক্খিন্দ্রিযে মুদিন্দ্রিযেতি সদ্ধো পুগ্গলো তিক্খিন্দ্রিযো, অস্সদ্ধো পুগ্গলো মুদিন্দ্রিযো। আরদ্ধৰীরিযো পুগ্গলো তিক্খিন্দ্রিযো, কুসীতো পুগ্গলো মুদিন্দ্রিযো। উপট্ঠিতস্সতি পুগ্গলো তিক্খিন্দ্রিযো, মুট্ঠস্সতি পুগ্গলো মুদিন্দ্রিযো। সমাহিতো পুগ্গলো তিক্খিন্দ্রিযো, অসমাহিতো পুগ্গলো মুদিন্দ্রিযো। পঞ্ঞৰা পুগ্গলো তিক্খিন্দ্রিযো, দুপ্পঞ্ঞো পুগ্গলো মুদিন্দ্রিযো।
Tikkhindriyemudindriyeti saddho puggalo tikkhindriyo, assaddho puggalo mudindriyo. Āraddhavīriyo puggalo tikkhindriyo, kusīto puggalo mudindriyo. Upaṭṭhitassati puggalo tikkhindriyo, muṭṭhassati puggalo mudindriyo. Samāhito puggalo tikkhindriyo, asamāhito puggalo mudindriyo. Paññavā puggalo tikkhindriyo, duppañño puggalo mudindriyo.
স্ৰাকারে দ্ৰাকারেতি সদ্ধো পুগ্গলো স্ৰাকারো, অস্সদ্ধো পুগ্গলো দ্ৰাকারো। আরদ্ধৰীরিযো পুগ্গলো স্ৰাকারো, কুসীতো পুগ্গলো দ্ৰাকারো। উপট্ঠিতস্সতি পুগ্গলো স্ৰাকারো, মুট্ঠস্সতি পুগ্গলো দ্ৰাকারো। সমাহিতো পুগ্গলো স্ৰাকারো, অসমাহিতো পুগ্গলো দ্ৰাকারো। পঞ্ঞৰা পুগ্গলো স্ৰাকারো, দুপ্পঞ্ঞো পুগ্গলো দ্ৰাকারো।
Svākāre dvākāreti saddho puggalo svākāro, assaddho puggalo dvākāro. Āraddhavīriyo puggalo svākāro, kusīto puggalo dvākāro. Upaṭṭhitassati puggalo svākāro, muṭṭhassati puggalo dvākāro. Samāhito puggalo svākāro, asamāhito puggalo dvākāro. Paññavā puggalo svākāro, duppañño puggalo dvākāro.
সুৰিঞ্ঞাপযে দুৰিঞ্ঞাপযেতি সদ্ধো পুগ্গলো সুৰিঞ্ঞাপযো, অস্সদ্ধো পুগ্গলো দুৰিঞ্ঞাপযো। আরদ্ধৰীরিযো পুগ্গলো সুৰিঞ্ঞাপযো, কুসীতো পুগ্গলো দুৰিঞ্ঞাপযো। উপট্ঠিতস্সতি পুগ্গলো সুৰিঞ্ঞাপযো, মুট্ঠস্সতি পুগ্গলো দুৰিঞ্ঞাপযো। সমাহিতো পুগ্গলো সুৰিঞ্ঞাপযো , অসমাহিতো পুগ্গলো দুৰিঞ্ঞাপযো। পঞ্ঞৰা পুগ্গলো সুৰিঞ্ঞাপযো, দুপ্পঞ্ঞো পুগ্গলো দুৰিঞ্ঞাপযো।
Suviññāpaye duviññāpayeti saddho puggalo suviññāpayo, assaddho puggalo duviññāpayo. Āraddhavīriyo puggalo suviññāpayo, kusīto puggalo duviññāpayo. Upaṭṭhitassati puggalo suviññāpayo, muṭṭhassati puggalo duviññāpayo. Samāhito puggalo suviññāpayo , asamāhito puggalo duviññāpayo. Paññavā puggalo suviññāpayo, duppañño puggalo duviññāpayo.
অপ্পেকচ্চে পরলোকৰজ্জভযদস্সাৰিনো, অপ্পেকচ্চে ন পরলোকৰজ্জভযদস্সাৰিনোতি সদ্ধো পুগ্গলো পরলোকৰজ্জভযদস্সাৰী, অস্সদ্ধো পুগ্গলো ন পরলোকৰজ্জভযদস্সাৰী। আরদ্ধৰীরিযো পুগ্গলো পরলোকৰজ্জভযদস্সাৰী, কুসীতো পুগ্গলো ন পরলোকৰজ্জভযদস্সাৰী। উপট্ঠিতস্সতি পুগ্গলো পরলোকৰজ্জভযদস্সাৰী, মুট্ঠস্সতি পুগ্গলো ন পরলোকৰজ্জভযদস্সাৰী। সমাহিতো পুগ্গলো পরলোকৰজ্জভযদস্সাৰী, অসমাহিতো পুগ্গলো ন পরলোকৰজ্জভযদস্সাৰী। পঞ্ঞৰা পুগ্গলো পরলোকৰজ্জভযদস্সাৰী, দুপ্পঞ্ঞো পুগ্গলো ন পরলোকৰজ্জভযদস্সাৰী।
Appekacce paralokavajjabhayadassāvino, appekacce na paralokavajjabhayadassāvinoti saddho puggalo paralokavajjabhayadassāvī, assaddho puggalo na paralokavajjabhayadassāvī. Āraddhavīriyo puggalo paralokavajjabhayadassāvī, kusīto puggalo na paralokavajjabhayadassāvī. Upaṭṭhitassati puggalo paralokavajjabhayadassāvī, muṭṭhassati puggalo na paralokavajjabhayadassāvī. Samāhito puggalo paralokavajjabhayadassāvī, asamāhito puggalo na paralokavajjabhayadassāvī. Paññavā puggalo paralokavajjabhayadassāvī, duppañño puggalo na paralokavajjabhayadassāvī.
১১২. লোকোতি – খন্ধলোকো, ধাতুলোকো, আযতনলোকো, ৰিপত্তিভৰলোকো , ৰিপত্তিসম্ভৰলোকো, সম্পত্তিভৰলোকো, সম্পত্তিসম্ভৰলোকো।
112.Lokoti – khandhaloko, dhātuloko, āyatanaloko, vipattibhavaloko , vipattisambhavaloko, sampattibhavaloko, sampattisambhavaloko.
একো লোকো – সব্বে সত্তা আহারট্ঠিতিকা। দ্ৰে লোকা – নামঞ্চ, রূপঞ্চ। তযো লোকা – তিস্সো ৰেদনা। চত্তারো লোকা – চত্তারো আহারা। পঞ্চ লোকা – পঞ্চুপাদানক্খন্ধা। ছ লোকা – ছ অজ্ঝত্তিকানি আযতনানি। সত্ত লোকা – সত্ত ৰিঞ্ঞাণট্ঠিতিযো । অট্ঠ লোকা – অট্ঠ লোকধম্মা। নৰ লোকা – নৰ সত্তাৰাসা। দস লোকা – দসাযতনানি। দ্ৰাদসলোকা – দ্ৰাদসাযতনানি। অট্ঠারস লোকা – অট্ঠারস ধাতুযো।
Eko loko – sabbe sattā āhāraṭṭhitikā. Dve lokā – nāmañca, rūpañca. Tayo lokā – tisso vedanā. Cattāro lokā – cattāro āhārā. Pañca lokā – pañcupādānakkhandhā. Cha lokā – cha ajjhattikāni āyatanāni. Satta lokā – satta viññāṇaṭṭhitiyo . Aṭṭha lokā – aṭṭha lokadhammā. Nava lokā – nava sattāvāsā. Dasa lokā – dasāyatanāni. Dvādasalokā – dvādasāyatanāni. Aṭṭhārasa lokā – aṭṭhārasa dhātuyo.
ৰজ্জন্তি সব্বে কিলেসা ৰজ্জা, সব্বে দুচ্চরিতা ৰজ্জা, সব্বে অভিসঙ্খারা ৰজ্জা, সব্বে ভৰগামিকম্মা ৰজ্জা। ইতি ইমস্মিঞ্চ লোকে ইমস্মিঞ্চ ৰজ্জে তিব্বা ভযসঞ্ঞা পচ্চুপট্ঠিতা হোতি, সেয্যথাপি উক্খিত্তাসিকে ৰধকে। ইমেহি পঞ্ঞাসায আকারেহি ইমানি পঞ্চিন্দ্রিযানি জানাতি পস্সতি অঞ্ঞাতি পটিৰিজ্ঝতি – ইদং তথাগতস্স ইন্দ্রিযপরোপরিযত্তে ঞাণং।
Vajjanti sabbe kilesā vajjā, sabbe duccaritā vajjā, sabbe abhisaṅkhārā vajjā, sabbe bhavagāmikammā vajjā. Iti imasmiñca loke imasmiñca vajje tibbā bhayasaññā paccupaṭṭhitā hoti, seyyathāpi ukkhittāsike vadhake. Imehi paññāsāya ākārehi imāni pañcindriyāni jānāti passati aññāti paṭivijjhati – idaṃ tathāgatassa indriyaparopariyatte ñāṇaṃ.
ইন্দ্রিযপরোপরিযত্তঞাণনিদ্দেসো অট্ঠসট্ঠিমো।
Indriyaparopariyattañāṇaniddeso aṭṭhasaṭṭhimo.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / পটিসম্ভিদামগ্গ-অট্ঠকথা • Paṭisambhidāmagga-aṭṭhakathā / ৬৮. ইন্দ্রিযপরোপরিযত্তঞাণনিদ্দেসৰণ্ণনা • 68. Indriyaparopariyattañāṇaniddesavaṇṇanā
