| Library / Tipiṭaka / တိပိဋက • Tipiṭaka / ပဋိသမ္ဘိဒာမဂ္ဂပာဠိ • Paṭisambhidāmaggapāḷi |
၅. ဣန္ဒ္ရိယသမောဓာနံ
5. Indriyasamodhānaṃ
၂၀၄. ပုထုဇ္ဇနော သမာဓိံ ဘာဝေန္တော ကတိဟာကာရေဟိ ဥပဋ္ဌာနကုသလော ဟောတိ? သေက္ခော သမာဓိံ ဘာဝေန္တော ကတိဟာကာရေဟိ ဥပဋ္ဌာနကုသလော ဟောတိ? ဝီတရာဂော သမာဓိံ ဘာဝေန္တော ကတိဟာကာရေဟိ ဥပဋ္ဌာနကုသလော ဟောတိ? ပုထုဇ္ဇနော သမာဓိံ ဘာဝေန္တော သတ္တဟိ အာကာရေဟိ ဥပဋ္ဌာနကုသလော ဟောတိ။ သေက္ခော သမာဓိံ ဘာဝေန္တော အဋ္ဌဟိ အာကာရေဟိ ဥပဋ္ဌာနကုသလော ဟောတိ။ ဝီတရာဂော သမာဓိံ ဘာဝေန္တော ဒသဟိ အာကာရေဟိ ဥပဋ္ဌာနကုသလော ဟောတိ။
204. Puthujjano samādhiṃ bhāvento katihākārehi upaṭṭhānakusalo hoti? Sekkho samādhiṃ bhāvento katihākārehi upaṭṭhānakusalo hoti? Vītarāgo samādhiṃ bhāvento katihākārehi upaṭṭhānakusalo hoti? Puthujjano samādhiṃ bhāvento sattahi ākārehi upaṭṭhānakusalo hoti. Sekkho samādhiṃ bhāvento aṭṭhahi ākārehi upaṭṭhānakusalo hoti. Vītarāgo samādhiṃ bhāvento dasahi ākārehi upaṭṭhānakusalo hoti.
ပုထုဇ္ဇနော သမာဓိံ ဘာဝေန္တော ကတမေဟိ သတ္တဟာကာရေဟိ ဥပဋ္ဌာနကုသလော ဟောတိ? အာဝဇ္ဇိတတ္တာ အာရမ္မဏူပဋ္ဌာနကုသလော ဟောတိ, သမထနိမိတ္တူပဋ္ဌာနကုသလော ဟောတိ, ပဂ္ဂဟနိမိတ္တူပဋ္ဌာနကုသလော ဟောတိ, အဝိက္ခေပူပဋ္ဌာနကုသလော ဟောတိ, ဩဘာသူပဋ္ဌာနကုသလော ဟောတိ, သမ္ပဟံသနူပဋ္ဌာနကုသလော ဟောတိ, ဥပေက္ခူပဋ္ဌာနကုသလော ဟောတိ – ပုထုဇ္ဇနော သမာဓိံ ဘာဝေန္တော ဣမေဟိ သတ္တဟိ အာကာရေဟိ ဥပဋ္ဌာနကုသလော ဟောတိ။
Puthujjano samādhiṃ bhāvento katamehi sattahākārehi upaṭṭhānakusalo hoti? Āvajjitattā ārammaṇūpaṭṭhānakusalo hoti, samathanimittūpaṭṭhānakusalo hoti, paggahanimittūpaṭṭhānakusalo hoti, avikkhepūpaṭṭhānakusalo hoti, obhāsūpaṭṭhānakusalo hoti, sampahaṃsanūpaṭṭhānakusalo hoti, upekkhūpaṭṭhānakusalo hoti – puthujjano samādhiṃ bhāvento imehi sattahi ākārehi upaṭṭhānakusalo hoti.
သေက္ခော သမာဓိံ ဘာဝေန္တော ကတမေဟိ အဋ္ဌဟိ အာကာရေဟိ ဥပဋ္ဌာနကုသလော ဟောတိ? အာဝဇ္ဇိတတ္တာ အာရမ္မဏူပဋ္ဌာနကုသလော ဟောတိ, သမထနိမိတ္တူပဋ္ဌာနကုသလော ဟောတိ, ပဂ္ဂဟနိမိတ္တူပဋ္ဌာနကုသလော ဟောတိ, အဝိက္ခေပူပဋ္ဌာနကုသလော ဟောတိ, ဩဘာသူပဋ္ဌာနကုသလော ဟောတိ, သမ္ပဟံသနူပဋ္ဌာနကုသလော ဟောတိ, ဥပေက္ခူပဋ္ဌာနကုသလော ဟောတိ, ဧကတ္တူပဋ္ဌာနကုသလော ဟောတိ – သေက္ခော သမာဓိံ ဘာဝေန္တော ဣမေဟိ အဋ္ဌဟိ အာကာရေဟိ ဥပဋ္ဌာနကုသလော ဟောတိ။
Sekkho samādhiṃ bhāvento katamehi aṭṭhahi ākārehi upaṭṭhānakusalo hoti? Āvajjitattā ārammaṇūpaṭṭhānakusalo hoti, samathanimittūpaṭṭhānakusalo hoti, paggahanimittūpaṭṭhānakusalo hoti, avikkhepūpaṭṭhānakusalo hoti, obhāsūpaṭṭhānakusalo hoti, sampahaṃsanūpaṭṭhānakusalo hoti, upekkhūpaṭṭhānakusalo hoti, ekattūpaṭṭhānakusalo hoti – sekkho samādhiṃ bhāvento imehi aṭṭhahi ākārehi upaṭṭhānakusalo hoti.
ဝီတရာဂော သမာဓိံ ဘာဝေန္တော ကတမေဟိ ဒသဟိ အာကာရေဟိ ဥပဋ္ဌာနကုသလော ဟောတိ? အာဝဇ္ဇိတတ္တာ အာရမ္မဏူပဋ္ဌာနကုသလော ဟောတိ။ပေ.။ ဧကတ္တူပဋ္ဌာနကုသလော ဟောတိ, ဉာဏူပဋ္ဌာနကုသလော ဟောတိ, ဝိမုတ္တူပဋ္ဌာနကုသလော ဟောတိ – ဝီတရာဂော သမာဓိံ ဘာဝေန္တော ဣမေဟိ ဒသဟိ အာကာရေဟိ ဥပဋ္ဌာနကုသလော ဟောတိ။
Vītarāgo samādhiṃ bhāvento katamehi dasahi ākārehi upaṭṭhānakusalo hoti? Āvajjitattā ārammaṇūpaṭṭhānakusalo hoti…pe… ekattūpaṭṭhānakusalo hoti, ñāṇūpaṭṭhānakusalo hoti, vimuttūpaṭṭhānakusalo hoti – vītarāgo samādhiṃ bhāvento imehi dasahi ākārehi upaṭṭhānakusalo hoti.
၂၀၅. ပုထုဇ္ဇနော ဝိပသ္သနံ ဘာဝေန္တော ကတိဟာကာရေဟိ ဥပဋ္ဌာနကုသလော ဟောတိ, ကတိဟာကာရေဟိ အနုပဋ္ဌာနကုသလော ဟောတိ? သေက္ခော ဝိပသ္သနံ ဘာဝေန္တော ကတိဟာကာရေဟိ ဥပဋ္ဌာနကုသလော ဟောတိ , ကတိဟာကာရေဟိ အနုပဋ္ဌာနကုသလော ဟောတိ? ဝီတရာဂော ဝိပသ္သနံ ဘာဝေန္တော ကတိဟာကာရေဟိ ဥပဋ္ဌာနကုသလော ဟောတိ, ကတိဟာကာရေဟိ အနုပဋ္ဌာနကုသလော ဟောတိ?
205. Puthujjano vipassanaṃ bhāvento katihākārehi upaṭṭhānakusalo hoti, katihākārehi anupaṭṭhānakusalo hoti? Sekkho vipassanaṃ bhāvento katihākārehi upaṭṭhānakusalo hoti , katihākārehi anupaṭṭhānakusalo hoti? Vītarāgo vipassanaṃ bhāvento katihākārehi upaṭṭhānakusalo hoti, katihākārehi anupaṭṭhānakusalo hoti?
ပုထုဇ္ဇနော ဝိပသ္သနံ ဘာဝေန္တော နဝဟိ အာကာရေဟိ ဥပဋ္ဌာနကုသလော ဟောတိ, နဝဟိ အာကာရေဟိ အနုပဋ္ဌာနကုသလော ဟောတိ။ သေက္ခော ဝိပသ္သနံ ဘာဝေန္တော ဒသဟိ အာကာရေဟိ ဥပဋ္ဌာနကုသလော ဟောတိ, ဒသဟိ အာကာရေဟိ အနုပဋ္ဌာနကုသလော ဟောတိ။ ဝီတရာဂော ဝိပသ္သနံ ဘာဝေန္တော ဒ္ဝာဒသဟိ အာကာရေဟိ ဥပဋ္ဌာနကုသလော ဟောတိ, ဒ္ဝာဒသဟိ အာကာရေဟိ အနုပဋ္ဌာနကုသလော ဟောတိ။
Puthujjano vipassanaṃ bhāvento navahi ākārehi upaṭṭhānakusalo hoti, navahi ākārehi anupaṭṭhānakusalo hoti. Sekkho vipassanaṃ bhāvento dasahi ākārehi upaṭṭhānakusalo hoti, dasahi ākārehi anupaṭṭhānakusalo hoti. Vītarāgo vipassanaṃ bhāvento dvādasahi ākārehi upaṭṭhānakusalo hoti, dvādasahi ākārehi anupaṭṭhānakusalo hoti.
ပုထုဇ္ဇနော ဝိပသ္သနံ ဘာဝေန္တော ကတမေဟိ နဝဟိ အာကာရေဟိ ဥပဋ္ဌာနကုသလော ဟောတိ, ကတမေဟိ နဝဟိ အာကာရေဟိ အနုပဋ္ဌာနကုသလော ဟောတိ? အနိစ္စတော ဥပဋ္ဌာနကုသလော ဟောတိ, နိစ္စတော အနုပဋ္ဌာနကုသလော ဟောတိ။ ဒုက္ခတော ဥပဋ္ဌာနကုသလော ဟောတိ, သုခတော အနုပဋ္ဌာနကုသလော ဟောတိ။ အနတ္တတော ဥပဋ္ဌာနကုသလော ဟောတိ, အတ္တတော အနုပဋ္ဌာနကုသလော ဟောတိ။ ခယတော ဥပဋ္ဌာနကုသလော ဟောတိ, ဃနတော အနုပဋ္ဌာနကုသလော ဟောတိ။ ဝယတော ဥပဋ္ဌာနကုသလော ဟောတိ, အာယူဟနာနုပဋ္ဌာနကုသလော ဟောတိ။ ဝိပရိဏာမူပဋ္ဌာနကုသလော ဟောတိ, ဓုဝတော အနုပဋ္ဌာနကုသလော ဟောတိ။ အနိမိတ္တူပဋ္ဌာနကုသလော ဟောတိ, နိမိတ္တာနုပဋ္ဌာနကုသလော ဟောတိ။ အပ္ပဏိဟိတူပဋ္ဌာနကုသလော ဟောတိ, ပဏိဓိအနုပဋ္ဌာနကုသလော 1 ဟောတိ။ သုညတူပဋ္ဌာနကုသလော ဟောတိ, အဘိနိဝေသာနုပဋ္ဌာနကုသလော ဟောတိ – ပုထုဇ္ဇနော ဝိပသ္သနံ ဘာဝေန္တော ဣမေဟိ နဝဟိ အာကာရေဟိ ဥပဋ္ဌာနကုသလော ဟောတိ, ဣမေဟိ နဝဟိ အာကာရေဟိ အနုပဋ္ဌာနကုသလော ဟောတိ။
Puthujjano vipassanaṃ bhāvento katamehi navahi ākārehi upaṭṭhānakusalo hoti, katamehi navahi ākārehi anupaṭṭhānakusalo hoti? Aniccato upaṭṭhānakusalo hoti, niccato anupaṭṭhānakusalo hoti. Dukkhato upaṭṭhānakusalo hoti, sukhato anupaṭṭhānakusalo hoti. Anattato upaṭṭhānakusalo hoti, attato anupaṭṭhānakusalo hoti. Khayato upaṭṭhānakusalo hoti, ghanato anupaṭṭhānakusalo hoti. Vayato upaṭṭhānakusalo hoti, āyūhanānupaṭṭhānakusalo hoti. Vipariṇāmūpaṭṭhānakusalo hoti, dhuvato anupaṭṭhānakusalo hoti. Animittūpaṭṭhānakusalo hoti, nimittānupaṭṭhānakusalo hoti. Appaṇihitūpaṭṭhānakusalo hoti, paṇidhianupaṭṭhānakusalo 2 hoti. Suññatūpaṭṭhānakusalo hoti, abhinivesānupaṭṭhānakusalo hoti – puthujjano vipassanaṃ bhāvento imehi navahi ākārehi upaṭṭhānakusalo hoti, imehi navahi ākārehi anupaṭṭhānakusalo hoti.
၂၀၆. သေက္ခော ဝိပသ္သနံ ဘာဝေန္တော ကတမေဟိ ဒသဟိ အာကာရေဟိ ဥပဋ္ဌာနကုသလော ဟောတိ, ကတမေဟိ ဒသဟိ အာကာရေဟိ အနုပဋ္ဌာနကုသလော ဟောတိ? အနိစ္စတော ဥပဋ္ဌာနကုသလော ဟောတိ, နိစ္စတော အနုပဋ္ဌာနကုသလော ဟောတိ။ပေ.။ သုညတူပဋ္ဌာနကုသလော ဟောတိ, အဘိနိဝေသာနူပဋ္ဌာနကုသလော ဟောတိ။ ဉာဏူပဋ္ဌာနကုသလော ဟောတိ, အဉာဏအနုပဋ္ဌာနကုသလော ဟောတိ – သေက္ခော ဝိပသ္သနံ ဘာဝေန္တော ဣမေဟိ ဒသဟိ အာကာရေဟိ ဥပဋ္ဌာနကုသလော ဟောတိ, ဣမေဟိ ဒသဟိ အာကာရေဟိ အနုပဋ္ဌာနကုသလော ဟောတိ။
206. Sekkho vipassanaṃ bhāvento katamehi dasahi ākārehi upaṭṭhānakusalo hoti, katamehi dasahi ākārehi anupaṭṭhānakusalo hoti? Aniccato upaṭṭhānakusalo hoti, niccato anupaṭṭhānakusalo hoti…pe… suññatūpaṭṭhānakusalo hoti, abhinivesānūpaṭṭhānakusalo hoti. Ñāṇūpaṭṭhānakusalo hoti, añāṇaanupaṭṭhānakusalo hoti – sekkho vipassanaṃ bhāvento imehi dasahi ākārehi upaṭṭhānakusalo hoti, imehi dasahi ākārehi anupaṭṭhānakusalo hoti.
ဝီတရာဂော ဝိပသ္သနံ ဘာဝေန္တော ကတမေဟိ ဒ္ဝာဒသဟိ အာကာရေဟိ ဥပဋ္ဌာနကုသလော ဟောတိ, ကတမေဟိ ဒ္ဝာဒသဟိ အာကာရေဟိ အနုပဋ္ဌာနကုသလော ဟောတိ? အနိစ္စတော ဥပဋ္ဌာနကုသလော ဟောတိ, နိစ္စတော အနုပဋ္ဌာနကုသလော ဟောတိ။ပေ.။ ဉာဏူပဋ္ဌာနကုသလော ဟောတိ, အဉာဏာနုပဋ္ဌာနကုသလော ဟောတိ။ ဝိသညောဂူပဋ္ဌာနကုသလော ဟောတိ, သညောဂာနုပဋ္ဌာနကုသလော ဟောတိ။ နိရောဓူပဋ္ဌာနကုသလော ဟောတိ, သင္ခာရာနုပဋ္ဌာနကုသလော ဟောတိ – ဝီတရာဂော ဝိပသ္သနံ ဘာဝေန္တော ဣမေဟိ ဒ္ဝာဒသဟိ အာကာရေဟိ ဥပဋ္ဌာနကုသလော ဟောတိ, ဣမေဟိ ဒ္ဝာဒသဟိ အာကာရေဟိ အနုပဋ္ဌာနကုသလော ဟောတိ။
Vītarāgo vipassanaṃ bhāvento katamehi dvādasahi ākārehi upaṭṭhānakusalo hoti, katamehi dvādasahi ākārehi anupaṭṭhānakusalo hoti? Aniccato upaṭṭhānakusalo hoti, niccato anupaṭṭhānakusalo hoti…pe… ñāṇūpaṭṭhānakusalo hoti, añāṇānupaṭṭhānakusalo hoti. Visaññogūpaṭṭhānakusalo hoti, saññogānupaṭṭhānakusalo hoti. Nirodhūpaṭṭhānakusalo hoti, saṅkhārānupaṭṭhānakusalo hoti – vītarāgo vipassanaṃ bhāvento imehi dvādasahi ākārehi upaṭṭhānakusalo hoti, imehi dvādasahi ākārehi anupaṭṭhānakusalo hoti.
အာဝဇ္ဇိတတ္တာ အာရမ္မဏူပဋ္ဌာနကုသလဝသေန ဣန္ဒ္ရိယာနိ သမောဓာနေတိ, ဂောစရဉ္စ ပဇာနာတိ, သမတ္ထဉ္စ ပဋိဝိဇ္ဈတိ။ပေ.။ ဓမ္မေ သမောဓာနေတိ, ဂောစရဉ္စ ပဇာနာတိ, သမတ္ထဉ္စ ပဋိဝိဇ္ဈတိ။ ဣန္ဒ္ရိယာနိ သမောဓာနေတီတိ ကထံ ဣန္ဒ္ရိယာနိ သမောဓာနေတိ? အဓိမောက္ခဋ္ဌေန သဒ္ဓိန္ဒ္ရိယံ သမောဓာနေတိ။ပေ.။ သမထနိမိတ္တူပဋ္ဌာနကုသလဝသေန, ပဂ္ဂဟနိမိတ္တူပဋ္ဌာနကုသလဝသေန, အဝိက္ခေပူပဋ္ဌာနကုသလဝသေန, ဩဘာသူပဋ္ဌာနကုသလဝသေန, သမ္ပဟံသနူပဋ္ဌာနကုသလဝသေန, ဥပေက္ခူပဋ္ဌာနကုသလဝသေန , ဧကတ္တူပဋ္ဌာနကုသလဝသေန, ဉာဏူပဋ္ဌာနကုသလဝသေန, ဝိမုတ္တူပဋ္ဌာနကုသလဝသေန။
Āvajjitattā ārammaṇūpaṭṭhānakusalavasena indriyāni samodhāneti, gocarañca pajānāti, samatthañca paṭivijjhati…pe… dhamme samodhāneti, gocarañca pajānāti, samatthañca paṭivijjhati. Indriyāni samodhānetīti kathaṃ indriyāni samodhāneti? Adhimokkhaṭṭhena saddhindriyaṃ samodhāneti…pe… samathanimittūpaṭṭhānakusalavasena, paggahanimittūpaṭṭhānakusalavasena, avikkhepūpaṭṭhānakusalavasena, obhāsūpaṭṭhānakusalavasena, sampahaṃsanūpaṭṭhānakusalavasena, upekkhūpaṭṭhānakusalavasena , ekattūpaṭṭhānakusalavasena, ñāṇūpaṭṭhānakusalavasena, vimuttūpaṭṭhānakusalavasena.
အနိစ္စတော ဥပဋ္ဌာနကုသလဝသေန, နိစ္စတော အနုပဋ္ဌာနကုသလဝသေန, ဒုက္ခတော ဥပဋ္ဌာနကုသလဝသေန, သုခတော အနုပဋ္ဌာနကုသလဝသေန, အနတ္တတော ဥပဋ္ဌာနကုသလဝသေန, အတ္တတော အနုပဋ္ဌာနကုသလဝသေန, ခယတော ဥပဋ္ဌာနကုသလဝသေန, ဃနတော အနုပဋ္ဌာနကုသလဝသေန, ဝယတော ဥပဋ္ဌာနကုသလဝသေန, အာယူဟနာနုပဋ္ဌာနကုသလဝသေန, ဝိပရိဏာမူပဋ္ဌာနကုသလဝသေန, ဓုဝတော အနုပဋ္ဌာနကုသလဝသေန, အနိမိတ္တူပဋ္ဌာနကုသလဝသေန, နိမိတ္တာနုပဋ္ဌာနကုသလဝသေန, အပ္ပဏိဟိတူပဋ္ဌာနကုသလဝသေန, ပဏိဓိအနုပဋ္ဌာနကုသလဝသေန, သုညတူပဋ္ဌာနကုသလဝသေန, အဘိနိဝေသာနုပဋ္ဌာနကုသလဝသေန, ဉာဏူပဋ္ဌာနကုသလဝသေန, အဉာဏာနုပဋ္ဌာနကုသလဝသေန, ဝိသညောဂူပဋ္ဌာနကုသလဝသေန, သညောဂာနုပဋ္ဌာနကုသလဝသေန , နိရောဓူပဋ္ဌာနကုသလဝသေန, သင္ခာရာနုပဋ္ဌာနကုသလဝသေန ဣန္ဒ္ရိယာနိ သမောဓာနေတိ, ဂောစရဉ္စ ပဇာနာတိ, သမတ္ထဉ္စ ပဋိဝိဇ္ဈတိ။
Aniccato upaṭṭhānakusalavasena, niccato anupaṭṭhānakusalavasena, dukkhato upaṭṭhānakusalavasena, sukhato anupaṭṭhānakusalavasena, anattato upaṭṭhānakusalavasena, attato anupaṭṭhānakusalavasena, khayato upaṭṭhānakusalavasena, ghanato anupaṭṭhānakusalavasena, vayato upaṭṭhānakusalavasena, āyūhanānupaṭṭhānakusalavasena, vipariṇāmūpaṭṭhānakusalavasena, dhuvato anupaṭṭhānakusalavasena, animittūpaṭṭhānakusalavasena, nimittānupaṭṭhānakusalavasena, appaṇihitūpaṭṭhānakusalavasena, paṇidhianupaṭṭhānakusalavasena, suññatūpaṭṭhānakusalavasena, abhinivesānupaṭṭhānakusalavasena, ñāṇūpaṭṭhānakusalavasena, añāṇānupaṭṭhānakusalavasena, visaññogūpaṭṭhānakusalavasena, saññogānupaṭṭhānakusalavasena , nirodhūpaṭṭhānakusalavasena, saṅkhārānupaṭṭhānakusalavasena indriyāni samodhāneti, gocarañca pajānāti, samatthañca paṭivijjhati.
၂၀၇. စတုသဋ္ဌိယာ အာကာရေဟိ တိဏ္ဏန္နံ ဣန္ဒ္ရိယာနံ ဝသီဘာဝတာပညာ အာသဝာနံ ခယေ ဉာဏံ။ ကတမေသံ တိဏ္ဏန္နံ ဣန္ဒ္ရိယာနံ? အနညာတညသ္သာမီတိန္ဒ္ရိယသ္သ, အညိန္ဒ္ရိယသ္သ, အညာတာဝိန္ဒ္ရိယသ္သ။
207. Catusaṭṭhiyā ākārehi tiṇṇannaṃ indriyānaṃ vasībhāvatāpaññā āsavānaṃ khaye ñāṇaṃ. Katamesaṃ tiṇṇannaṃ indriyānaṃ? Anaññātaññassāmītindriyassa, aññindriyassa, aññātāvindriyassa.
အနညာတညသ္သာမီတိန္ဒ္ရိယံ ကတိ ဌာနာနိ ဂစ္ဆတိ? အညိန္ဒ္ရိယံ ကတိ ဌာနာနိ ဂစ္ဆတိ? အညာတာဝိန္ဒ္ရိယံ ကတိ ဌာနာနိ ဂစ္ဆတိ? အနညာတညသ္သာမီတိန္ဒ္ရိယံ ဧကံ ဌာနံ ဂစ္ဆတိ – သောတာပတ္တိမဂ္ဂံ။ အညိန္ဒ္ရိယံ ဆ ဌာနာနိ ဂစ္ဆတိ – သောတာပတ္တိဖလံ, သကဒာဂာမိမဂ္ဂံ, သကဒာဂာမိဖလံ, အနာဂာမိမဂ္ဂံ, အနာဂာမိဖလံ, အရဟတ္တမဂ္ဂံ။ အညာတာဝိန္ဒ္ရိယံ ဧကံ ဌာနံ ဂစ္ဆတိ – အရဟတ္တဖလံ။
Anaññātaññassāmītindriyaṃ kati ṭhānāni gacchati? Aññindriyaṃ kati ṭhānāni gacchati? Aññātāvindriyaṃ kati ṭhānāni gacchati? Anaññātaññassāmītindriyaṃ ekaṃ ṭhānaṃ gacchati – sotāpattimaggaṃ. Aññindriyaṃ cha ṭhānāni gacchati – sotāpattiphalaṃ, sakadāgāmimaggaṃ, sakadāgāmiphalaṃ, anāgāmimaggaṃ, anāgāmiphalaṃ, arahattamaggaṃ. Aññātāvindriyaṃ ekaṃ ṭhānaṃ gacchati – arahattaphalaṃ.
သောတာပတ္တိမဂ္ဂက္ခဏေ အနညာတညသ္သာမီတိန္ဒ္ရိယသ္သ သဒ္ဓိန္ဒ္ရိယံ အဓိမောက္ခပရိဝာရံ ဟောတိ, ဝီရိယိန္ဒ္ရိယံ ပဂ္ဂဟပရိဝာရံ ဟောတိ, သတိန္ဒ္ရိယံ ဥပဋ္ဌာနပရိဝာရံ ဟောတိ, သမာဓိန္ဒ္ရိယံ အဝိက္ခေပပရိဝာရံ ဟောတိ, ပညိန္ဒ္ရိယံ ဒသ္သနပရိဝာရံ ဟောတိ, မနိန္ဒ္ရိယံ ဝိဇာနနပရိဝာရံ ဟောတိ, သောမနသ္သိန္ဒ္ရိယံ အဘိသန္ဒနပရိဝာရံ ဟောတိ, ဇီဝိတိန္ဒ္ရိယံ ပဝတ္တသန္တတာဓိပတေယ္ယပရိဝာရံ ဟောတိ။ သောတာပတ္တိမဂ္ဂက္ခဏေ ဇာတာ ဓမ္မာ, ဌပေတ္ဝာ စိတ္တသမုဋ္ဌာနံ ရူပံ, သဗ္ဗေဝ ကုသလာ ဟောန္တိ, သဗ္ဗေဝ အနာသဝာ ဟောန္တိ, သဗ္ဗေဝ နိယ္ယာနိကာ ဟောန္တိ, သဗ္ဗေဝ အပစယဂာမိနော ဟောန္တိ, သဗ္ဗေဝ လောကုတ္တရာ ဟောန္တိ, သဗ္ဗေဝ နိဗ္ဗာနာရမ္မဏာ ဟောန္တိ။ သောတာပတ္တိမဂ္ဂက္ခဏေ အနညာတညသ္သာမီတိန္ဒ္ရိယသ္သ ဣမာနိ အဋ္ဌိန္ဒ္ရိယာနိ သဟဇာတပရိဝာရာ ဟောန္တိ, အညမညပရိဝာရာ ဟောန္တိ, နိသ္သယပရိဝာရာ ဟောန္တိ, သမ္ပယုတ္တပရိဝာရာ ဟောန္တိ, သဟဂတာ ဟောန္တိ, သဟဇာတာ ဟောန္တိ, သံသဋ္ဌာ ဟောန္တိ, သမ္ပယုတ္တာ ဟောန္တိ။ တေဝ တသ္သ အာကာရာ စေဝ ဟောန္တိ ပရိဝာရာ စ။
Sotāpattimaggakkhaṇe anaññātaññassāmītindriyassa saddhindriyaṃ adhimokkhaparivāraṃ hoti, vīriyindriyaṃ paggahaparivāraṃ hoti, satindriyaṃ upaṭṭhānaparivāraṃ hoti, samādhindriyaṃ avikkhepaparivāraṃ hoti, paññindriyaṃ dassanaparivāraṃ hoti, manindriyaṃ vijānanaparivāraṃ hoti, somanassindriyaṃ abhisandanaparivāraṃ hoti, jīvitindriyaṃ pavattasantatādhipateyyaparivāraṃ hoti. Sotāpattimaggakkhaṇe jātā dhammā, ṭhapetvā cittasamuṭṭhānaṃ rūpaṃ, sabbeva kusalā honti, sabbeva anāsavā honti, sabbeva niyyānikā honti, sabbeva apacayagāmino honti, sabbeva lokuttarā honti, sabbeva nibbānārammaṇā honti. Sotāpattimaggakkhaṇe anaññātaññassāmītindriyassa imāni aṭṭhindriyāni sahajātaparivārā honti, aññamaññaparivārā honti, nissayaparivārā honti, sampayuttaparivārā honti, sahagatā honti, sahajātā honti, saṃsaṭṭhā honti, sampayuttā honti. Teva tassa ākārā ceva honti parivārā ca.
သောတာပတ္တိဖလက္ခဏေ။ပေ.။ အရဟတ္တဖလက္ခဏေ အညာတာဝိန္ဒ္ရိယသ္သ သဒ္ဓိန္ဒ္ရိယံ အဓိမောက္ခပရိဝာရံ ဟောတိ။ပေ.။ ဇီဝိတိန္ဒ္ရိယံ ပဝတ္တသန္တတာဓိပတေယ္ယပရိဝာရံ ဟောတိ။ အရဟတ္တဖလက္ခဏေ ဇာတာ ဓမ္မာ သဗ္ဗေဝ အဗ္ယာကတာ ဟောန္တိ, ဌပေတ္ဝာ စိတ္တသမုဋ္ဌာနံ ရူပံ သဗ္ဗေဝ အနာသဝာ ဟောန္တိ, သဗ္ဗေဝ လောကုတ္တရာ ဟောန္တိ, သဗ္ဗေဝ နိဗ္ဗာနာရမ္မဏာ ဟောန္တိ။ အရဟတ္တဖလက္ခဏေ အညာတာဝိန္ဒ္ရိယသ္သ ဣမာနိ အဋ္ဌိန္ဒ္ရိယာနိ သဟဇာတပရိဝာရာ ဟောန္တိ ။ တေဝ တသ္သ အာကာရာ စေဝ ဟောန္တိ ပရိဝာရာ စ။ ဣတိ ဣမာနိ အဋ္ဌ အဋ္ဌကာနိ စတုသဋ္ဌိ ဟောန္တိ။
Sotāpattiphalakkhaṇe…pe… arahattaphalakkhaṇe aññātāvindriyassa saddhindriyaṃ adhimokkhaparivāraṃ hoti…pe… jīvitindriyaṃ pavattasantatādhipateyyaparivāraṃ hoti. Arahattaphalakkhaṇe jātā dhammā sabbeva abyākatā honti, ṭhapetvā cittasamuṭṭhānaṃ rūpaṃ sabbeva anāsavā honti, sabbeva lokuttarā honti, sabbeva nibbānārammaṇā honti. Arahattaphalakkhaṇe aññātāvindriyassa imāni aṭṭhindriyāni sahajātaparivārā honti . Teva tassa ākārā ceva honti parivārā ca. Iti imāni aṭṭha aṭṭhakāni catusaṭṭhi honti.
အာသဝာတိ ကတမေ တေ အာသဝာ? ကာမာသဝော, ဘဝာသဝော, ဒိဋ္ဌာသဝော, အဝိဇ္ဇာသဝော။ ကတ္ထေတေ အာသဝာ ခီယန္တိ 3? သောတာပတ္တိမဂ္ဂေန အနဝသေသော ဒိဋ္ဌာသဝော ခီယတိ။ အပာယဂမနီယော ကာမာသဝော ခီယတိ, အပာယဂမနီယော ဘဝာသဝော ခီယတိ, အပာယဂမနီယော အဝိဇ္ဇာသဝော ခီယတိ။ ဧတ္ထေတေ အာသဝာ ခီယန္တိ။ သကဒာဂာမိမဂ္ဂေန ဩဠာရိကော ကာမာသဝော ခီယတိ, တဒေကဋ္ဌော ဘဝာသဝော ခီယတိ, တဒေကဋ္ဌော အဝိဇ္ဇာသဝော ခီယတိ။ ဧတ္ထေတေ အာသဝာ ခီယန္တိ။ အနာဂာမိမဂ္ဂေန အနဝသေသော ကာမာသဝော ခီယတိ, တဒေကဋ္ဌော ဘဝာသဝော ခီယတိ, တဒေကဋ္ဌော အဝိဇ္ဇာသဝော ခီယတိ။ ဧတ္ထေတေ အာသဝာ ခီယန္တိ။ အရဟတ္တမဂ္ဂေန အနဝသေသော ဘဝာသဝော ခီယတိ, အနဝသေသော အဝိဇ္ဇာသဝော ခီယတိ။ ဧတ္ထေတေ အာသဝာ ခီယန္တိ။
Āsavāti katame te āsavā? Kāmāsavo, bhavāsavo, diṭṭhāsavo, avijjāsavo. Katthete āsavā khīyanti 4? Sotāpattimaggena anavaseso diṭṭhāsavo khīyati. Apāyagamanīyo kāmāsavo khīyati, apāyagamanīyo bhavāsavo khīyati, apāyagamanīyo avijjāsavo khīyati. Etthete āsavā khīyanti. Sakadāgāmimaggena oḷāriko kāmāsavo khīyati, tadekaṭṭho bhavāsavo khīyati, tadekaṭṭho avijjāsavo khīyati. Etthete āsavā khīyanti. Anāgāmimaggena anavaseso kāmāsavo khīyati, tadekaṭṭho bhavāsavo khīyati, tadekaṭṭho avijjāsavo khīyati. Etthete āsavā khīyanti. Arahattamaggena anavaseso bhavāsavo khīyati, anavaseso avijjāsavo khīyati. Etthete āsavā khīyanti.
၂၀၈.
208.
န တသ္သ အဒ္ဒိဋ္ဌမိဓတ္ထိ ကိဉ္စိ၊ အထော အဝိညာတမဇာနိတဗ္ဗံ။
Na tassa addiṭṭhamidhatthi kiñci, atho aviññātamajānitabbaṃ;
သဗ္ဗံ အဘိညာသိ ယဒတ္ထိ နေယ္ယံ၊ တထာဂတော တေန သမန္တစက္ခူတိ။
Sabbaṃ abhiññāsi yadatthi neyyaṃ, tathāgato tena samantacakkhūti.
သမန္တစက္ခူတိ ကေနဋ္ဌေန သမန္တစက္ခု? စုဒ္ဒသ ဗုဒ္ဓဉာဏာနိ – ဒုက္ခေ ဉာဏံ ဗုဒ္ဓဉာဏံ, ဒုက္ခသမုဒယေ ဉာဏံ ဗုဒ္ဓဉာဏံ။ပေ.။ သဗ္ဗညုတဉာဏံ ဗုဒ္ဓဉာဏံ, အနာဝရဏဉာဏံ ဗုဒ္ဓဉာဏံ။ ဣမာနိ စုဒ္ဒသ ဗုဒ္ဓဉာဏာနိ။ ဣမေသံ စုဒ္ဒသန္နံ ဗုဒ္ဓဉာဏာနံ အဋ္ဌ ဉာဏာနိ သာဝကသာဓာရဏာနိ, ဆ ဉာဏာနိ အသာဓာရဏာနိ သာဝကေဟိ။
Samantacakkhūti kenaṭṭhena samantacakkhu? Cuddasa buddhañāṇāni – dukkhe ñāṇaṃ buddhañāṇaṃ, dukkhasamudaye ñāṇaṃ buddhañāṇaṃ…pe… sabbaññutañāṇaṃ buddhañāṇaṃ, anāvaraṇañāṇaṃ buddhañāṇaṃ. Imāni cuddasa buddhañāṇāni. Imesaṃ cuddasannaṃ buddhañāṇānaṃ aṭṭha ñāṇāni sāvakasādhāraṇāni, cha ñāṇāni asādhāraṇāni sāvakehi.
ယာဝတာ ဒုက္ခသ္သ ဒုက္ခဋ္ဌော ဉာတော, အညာတော ဒုက္ခဋ္ဌော နတ္ထီတိ – သမန္တစက္ခု။ ယံ သမန္တစက္ခု တံ ပညိန္ဒ္ရိယံ။ ပညိန္ဒ္ရိယသ္သ ဝသေန အဓိမောက္ခဋ္ဌေန သဒ္ဓိန္ဒ္ရိယံ, ပဂ္ဂဟဋ္ဌေန ဝီရိယိန္ဒ္ရိယံ, ဥပဋ္ဌာနဋ္ဌေန သတိန္ဒ္ရိယံ, အဝိက္ခေပဋ္ဌေန သမာဓိန္ဒ္ရိယံ။ ယာဝတာ ဒုက္ခသ္သ ဒုက္ခဋ္ဌော ဒိဋ္ဌော ဝိဒိတော သစ္ဆိကတော ဖသ္သိတော ပညာယ; အဖသ္သိတော ပညာယ ဒုက္ခဋ္ဌော နတ္ထီတိ – သမန္တစက္ခု။ ယံ သမန္တစက္ခု တံ ပညိန္ဒ္ရိယံ။ ပညိန္ဒ္ရိယသ္သ ဝသေန အဓိမောက္ခဋ္ဌေန သဒ္ဓိန္ဒ္ရိယံ, ပဂ္ဂဟဋ္ဌေန ဝီရိယိန္ဒ္ရိယံ, ဥပဋ္ဌာနဋ္ဌေန သတိန္ဒ္ရိယံ, အဝိက္ခေပဋ္ဌေန သမာဓိန္ဒ္ရိယံ။ ယာဝတာ သမုဒယသ္သ သမုဒယဋ္ဌော။ပေ.။ ယာဝတာ နိရောဓသ္သ နိရောဓဋ္ဌော။ ယာဝတာ မဂ္ဂသ္သ မဂ္ဂဋ္ဌော။ ယာဝတာ အတ္ထပဋိသမ္ဘိဒာယ အတ္ထပဋိသမ္ဘိဒဋ္ဌော။ ယာဝတာ ဓမ္မပဋိသမ္ဘိဒာယ ဓမ္မပဋိသမ္ဘိဒဋ္ဌော။ ယာဝတာ နိရုတ္တိပဋိသမ္ဘိဒာယ နိရုတ္တိပဋိသမ္ဘိဒဋ္ဌော။ ယာဝတာ ပဋိဘာနပဋိသမ္ဘိဒာယ ပဋိဘာနပဋိသမ္ဘိဒဋ္ဌော။ ယာဝတာ ဣန္ဒ္ရိယပရောပရိယတ္တေ ဉာဏံ။ ယာဝတာ သတ္တာနံ အာသယာနုသယေ ဉာဏံ။ ယာဝတာ ယမကပာဋိဟီရေ ဉာဏံ။ ယာဝတာ မဟာကရုဏာသမာပတ္တိယာ ဉာဏံ။ ယာဝတာ သဒေဝကသ္သ လောကသ္သ သမာရကသ္သ သဗ္ရဟ္မကသ္သ သသ္သမဏဗ္ရာဟ္မဏိယာ ပဇာယ သဒေဝမနုသ္သာယ ဒိဋ္ဌံ သုတံ မုတံ ဝိညာတံ ပတ္တံ ပရိယေသိတံ အနုဝိစရိတံ မနသာ, တံ ဉာတံ ဒိဋ္ဌံ ဝိဒိတံ သစ္ဆိကတံ ဖသ္သိတံ ပညာယ။ အဖသ္သိတံ ပညာယ နတ္ထီတိ – သမန္တစက္ခု။ ယံ သမန္တစက္ခု တံ ပညိန္ဒ္ရိယံ။ ပညိန္ဒ္ရိယသ္သ ဝသေန အဓိမောက္ခဋ္ဌေန သဒ္ဓိန္ဒ္ရိယံ, ပဂ္ဂဟဋ္ဌေန ဝီရိယိန္ဒ္ရိယံ, ဥပဋ္ဌာနဋ္ဌေန သတိန္ဒ္ရိယံ, အဝိက္ခေပဋ္ဌေန သမာဓိန္ဒ္ရိယံ။
Yāvatā dukkhassa dukkhaṭṭho ñāto, aññāto dukkhaṭṭho natthīti – samantacakkhu. Yaṃ samantacakkhu taṃ paññindriyaṃ. Paññindriyassa vasena adhimokkhaṭṭhena saddhindriyaṃ, paggahaṭṭhena vīriyindriyaṃ, upaṭṭhānaṭṭhena satindriyaṃ, avikkhepaṭṭhena samādhindriyaṃ. Yāvatā dukkhassa dukkhaṭṭho diṭṭho vidito sacchikato phassito paññāya; aphassito paññāya dukkhaṭṭho natthīti – samantacakkhu. Yaṃ samantacakkhu taṃ paññindriyaṃ. Paññindriyassa vasena adhimokkhaṭṭhena saddhindriyaṃ, paggahaṭṭhena vīriyindriyaṃ, upaṭṭhānaṭṭhena satindriyaṃ, avikkhepaṭṭhena samādhindriyaṃ. Yāvatā samudayassa samudayaṭṭho…pe… yāvatā nirodhassa nirodhaṭṭho… yāvatā maggassa maggaṭṭho… yāvatā atthapaṭisambhidāya atthapaṭisambhidaṭṭho… yāvatā dhammapaṭisambhidāya dhammapaṭisambhidaṭṭho… yāvatā niruttipaṭisambhidāya niruttipaṭisambhidaṭṭho… yāvatā paṭibhānapaṭisambhidāya paṭibhānapaṭisambhidaṭṭho… yāvatā indriyaparopariyatte ñāṇaṃ… yāvatā sattānaṃ āsayānusaye ñāṇaṃ… yāvatā yamakapāṭihīre ñāṇaṃ… yāvatā mahākaruṇāsamāpattiyā ñāṇaṃ… yāvatā sadevakassa lokassa samārakassa sabrahmakassa sassamaṇabrāhmaṇiyā pajāya sadevamanussāya diṭṭhaṃ sutaṃ mutaṃ viññātaṃ pattaṃ pariyesitaṃ anuvicaritaṃ manasā, taṃ ñātaṃ diṭṭhaṃ viditaṃ sacchikataṃ phassitaṃ paññāya. Aphassitaṃ paññāya natthīti – samantacakkhu. Yaṃ samantacakkhu taṃ paññindriyaṃ. Paññindriyassa vasena adhimokkhaṭṭhena saddhindriyaṃ, paggahaṭṭhena vīriyindriyaṃ, upaṭṭhānaṭṭhena satindriyaṃ, avikkhepaṭṭhena samādhindriyaṃ.
သဒ္ဒဟန္တော ပဂ္ဂဏ္ဟာတိ, ပဂ္ဂဏ္ဟန္တော သဒ္ဒဟတိ။ သဒ္ဒဟန္တော ဥပဋ္ဌာပေတိ, ဥပဋ္ဌာပေန္တော သဒ္ဒဟတိ။ သဒ္ဒဟန္တော သမာဒဟတိ, သမာဒဟန္တော သဒ္ဒဟတိ။ သဒ္ဒဟန္တော ပဇာနာတိ, ပဇာနန္တော သဒ္ဒဟတိ။ ပဂ္ဂဏ္ဟန္တော ဥပဋ္ဌာပေတိ, ဥပဋ္ဌာပေန္တော ပဂ္ဂဏ္ဟာတိ။ ပဂ္ဂဏ္ဟန္တော သမာဒဟတိ, သမာဒဟန္တော ပဂ္ဂဏ္ဟာတိ။ ပဂ္ဂဏ္ဟန္တော ပဇာနာတိ, ပဇာနန္တော ပဂ္ဂဏ္ဟာတိ။ ပဂ္ဂဏ္ဟန္တော သဒ္ဒဟတိ, သဒ္ဒဟန္တော ပဂ္ဂဏ္ဟာတိ။ ဥပဋ္ဌာပေန္တော သမာဒဟတိ, သမာဒဟန္တော ဥပဋ္ဌာပေတိ။ ဥပဋ္ဌာပေန္တော ပဇာနာတိ, ပဇာနန္တော ဥပဋ္ဌာပေတိ။ ဥပဋ္ဌာပေန္တော သဒ္ဒဟတိ, သဒ္ဒဟန္တော ဥပဋ္ဌာပေတိ။ ဥပဋ္ဌာပေန္တော ပဂ္ဂဏ္ဟာတိ, ပဂ္ဂဏ္ဟန္တော ဥပဋ္ဌာပေတိ။ သမာဒဟန္တော ပဇာနာတိ, ပဇာနန္တော သမာဒဟတိ။ သမာဒဟန္တော သဒ္ဒဟတိ, သဒ္ဒဟန္တော သမာဒဟတိ။ သမာဒဟန္တော ပဂ္ဂဏ္ဟာတိ, ပဂ္ဂဏ္ဟန္တော သမာဒဟတိ။ သမာဒဟန္တော ဥပဋ္ဌာပေတိ, ဥပဋ္ဌာပေန္တော သမာဒဟတိ။ ပဇာနန္တော သဒ္ဒဟတိ, သဒ္ဒဟန္တော ပဇာနာတိ။ ပဇာနန္တော ပဂ္ဂဏ္ဟာတိ, ပဂ္ဂဏ္ဟန္တော ပဇာနာတိ။ ပဇာနန္တော ဥပဋ္ဌာပေတိ, ဥပဋ္ဌာပေန္တော ပဇာနာတိ။ ပဇာနန္တော သမာဒဟတိ, သမာဒဟန္တော ပဇာနာတိ။
Saddahanto paggaṇhāti, paggaṇhanto saddahati. Saddahanto upaṭṭhāpeti, upaṭṭhāpento saddahati. Saddahanto samādahati, samādahanto saddahati. Saddahanto pajānāti, pajānanto saddahati. Paggaṇhanto upaṭṭhāpeti, upaṭṭhāpento paggaṇhāti. Paggaṇhanto samādahati, samādahanto paggaṇhāti. Paggaṇhanto pajānāti, pajānanto paggaṇhāti. Paggaṇhanto saddahati, saddahanto paggaṇhāti. Upaṭṭhāpento samādahati, samādahanto upaṭṭhāpeti. Upaṭṭhāpento pajānāti, pajānanto upaṭṭhāpeti. Upaṭṭhāpento saddahati, saddahanto upaṭṭhāpeti. Upaṭṭhāpento paggaṇhāti, paggaṇhanto upaṭṭhāpeti. Samādahanto pajānāti, pajānanto samādahati. Samādahanto saddahati, saddahanto samādahati. Samādahanto paggaṇhāti, paggaṇhanto samādahati. Samādahanto upaṭṭhāpeti, upaṭṭhāpento samādahati. Pajānanto saddahati, saddahanto pajānāti. Pajānanto paggaṇhāti, paggaṇhanto pajānāti. Pajānanto upaṭṭhāpeti, upaṭṭhāpento pajānāti. Pajānanto samādahati, samādahanto pajānāti.
သဒ္ဒဟိတတ္တာ ပဂ္ဂဟိတံ, ပဂ္ဂဟိတတ္တာ သဒ္ဒဟိတံ။ သဒ္ဒဟိတတ္တာ ဥပဋ္ဌာပိတံ, ဥပဋ္ဌာပိတတ္တာ သဒ္ဒဟိတံ။ သဒ္ဒဟိတတ္တာ သမာဒဟိတံ, သမာဒဟိတတ္တာ သဒ္ဒဟိတံ။ သဒ္ဒဟိတတ္တာ ပဇာနိတံ, ပဇာနိတတ္တာ သဒ္ဒဟိတံ။ ပဂ္ဂဟိတတ္တာ ဥပဋ္ဌာပိတံ , ဥပဋ္ဌာပိတတ္တာ ပဂ္ဂဟိတံ။ ပဂ္ဂဟိတတ္တာ သမာဒဟိတံ, သမာဒဟိတတ္တာ ပဂ္ဂဟိတံ။ ပဂ္ဂဟိတတ္တာ ပဇာနိတံ ပဇာနိတတ္တာ ပဂ္ဂဟိတံ။ ပဂ္ဂဟိတတ္တာ သဒ္ဒဟိတံ, သဒ္ဒဟိတတ္တာ ပဂ္ဂဟိတံ။ ဥပဋ္ဌာပိတတ္တာ သမာဒဟိတံ, သမာဒဟိတတ္တာ ဥပဋ္ဌာပိတံ။ ဥပဋ္ဌာပိတတ္တာ ပဇာနိတံ, ပဇာနိတတ္တာ ဥပဋ္ဌာပိတံ။ ဥပဋ္ဌာပိတတ္တာ သဒ္ဒဟိတံ, သဒ္ဒဟိတတ္တာ ဥပဋ္ဌာပိတံ။ ဥပဋ္ဌာပိတတ္တာ ပဂ္ဂဟိတံ, ပဂ္ဂဟိတတ္တာ ဥပဋ္ဌာပိတံ။ သမာဒဟိတတ္တာ ပဇာနိတံ, ပဇာနိတတ္တာ သမာဒဟိတံ။ သမာဒဟိတတ္တာ သဒ္ဒဟိတံ, သဒ္ဒဟိတတ္တာ သမာဒဟိတံ။ သမာဒဟိတတ္တာ ပဂ္ဂဟိတံ, ပဂ္ဂဟိတတ္တာ သမာဒဟိတံ။ သမာဒဟိတတ္တာ ဥပဋ္ဌာပိတံ, ဥပဋ္ဌာပိတတ္တာ သမာဒဟိတံ။ ပဇာနိတတ္တာ သဒ္ဒဟိတံ, သဒ္ဒဟိတတ္တာ ပဇာနိတံ။ ပဇာနိတတ္တာ ပဂ္ဂဟိတံ, ပဂ္ဂဟိတတ္တာ ပဇာနိတံ။ ပဇာနိတတ္တာ ဥပဋ္ဌာပိတံ, ဥပဋ္ဌာပိတတ္တာ ပဇာနိတံ။ ပဇာနိတတ္တာ သမာဒဟိတံ, သမာဒဟိတတ္တာ ပဇာနိတံ။
Saddahitattā paggahitaṃ, paggahitattā saddahitaṃ. Saddahitattā upaṭṭhāpitaṃ, upaṭṭhāpitattā saddahitaṃ. Saddahitattā samādahitaṃ, samādahitattā saddahitaṃ. Saddahitattā pajānitaṃ, pajānitattā saddahitaṃ. Paggahitattā upaṭṭhāpitaṃ , upaṭṭhāpitattā paggahitaṃ. Paggahitattā samādahitaṃ, samādahitattā paggahitaṃ. Paggahitattā pajānitaṃ pajānitattā paggahitaṃ. Paggahitattā saddahitaṃ, saddahitattā paggahitaṃ. Upaṭṭhāpitattā samādahitaṃ, samādahitattā upaṭṭhāpitaṃ. Upaṭṭhāpitattā pajānitaṃ, pajānitattā upaṭṭhāpitaṃ. Upaṭṭhāpitattā saddahitaṃ, saddahitattā upaṭṭhāpitaṃ. Upaṭṭhāpitattā paggahitaṃ, paggahitattā upaṭṭhāpitaṃ. Samādahitattā pajānitaṃ, pajānitattā samādahitaṃ. Samādahitattā saddahitaṃ, saddahitattā samādahitaṃ. Samādahitattā paggahitaṃ, paggahitattā samādahitaṃ. Samādahitattā upaṭṭhāpitaṃ, upaṭṭhāpitattā samādahitaṃ. Pajānitattā saddahitaṃ, saddahitattā pajānitaṃ. Pajānitattā paggahitaṃ, paggahitattā pajānitaṃ. Pajānitattā upaṭṭhāpitaṃ, upaṭṭhāpitattā pajānitaṃ. Pajānitattā samādahitaṃ, samādahitattā pajānitaṃ.
ယံ ဗုဒ္ဓစက္ခု တံ ဗုဒ္ဓဉာဏံ, ယံ ဗုဒ္ဓဉာဏံ တံ ဗုဒ္ဓစက္ခု, ယေန စက္ခုနာ တထာဂတော သတ္တေ ပသ္သတိ အပ္ပရဇက္ခေ မဟာရဇက္ခေ တိက္ခိန္ဒ္ရိယေ မုဒိန္ဒ္ရိယေ သ္ဝာကာရေ ဒ္ဝာကာရေ သုဝိညာပယေ ဒုဝိညာပယေ အပ္ပေကစ္စေ ပရလောကဝဇ္ဇဘယဒသ္သာဝိနော 5, အပ္ပေကစ္စေ နပရလောကဝဇ္ဇဘယဒသ္သာဝိနော။
Yaṃ buddhacakkhu taṃ buddhañāṇaṃ, yaṃ buddhañāṇaṃ taṃ buddhacakkhu, yena cakkhunā tathāgato satte passati apparajakkhe mahārajakkhe tikkhindriye mudindriye svākāre dvākāre suviññāpaye duviññāpaye appekacce paralokavajjabhayadassāvino 6, appekacce naparalokavajjabhayadassāvino.
အပ္ပရဇက္ခေ မဟာရဇက္ခေတိ သဒ္ဓော ပုဂ္ဂလော အပ္ပရဇက္ခော, အသ္သဒ္ဓော ပုဂ္ဂလော မဟာရဇက္ခော။ အာရဒ္ဓဝီရိယော ပုဂ္ဂလော အပ္ပရဇက္ခော, ကုသီတော ပုဂ္ဂလော မဟာရဇက္ခော။ ဥပဋ္ဌိတသ္သတိ ပုဂ္ဂလော အပ္ပရဇက္ခော, မုဋ္ဌသ္သတိ ပုဂ္ဂလော မဟာရဇက္ခော။ သမာဟိတော ပုဂ္ဂလော အပ္ပရဇက္ခော, အသမာဟိတော ပုဂ္ဂလော မဟာရဇက္ခော။ ပညဝာ ပုဂ္ဂလော အပ္ပရဇက္ခော, ဒုပ္ပညော ပုဂ္ဂလော မဟာရဇက္ခော။
Apparajakkhe mahārajakkheti saddho puggalo apparajakkho, assaddho puggalo mahārajakkho. Āraddhavīriyo puggalo apparajakkho, kusīto puggalo mahārajakkho. Upaṭṭhitassati puggalo apparajakkho, muṭṭhassati puggalo mahārajakkho. Samāhito puggalo apparajakkho, asamāhito puggalo mahārajakkho. Paññavā puggalo apparajakkho, duppañño puggalo mahārajakkho.
တိက္ခိန္ဒ္ရိယေ မုဒိန္ဒ္ရိယေတိ သဒ္ဓော ပုဂ္ဂလော တိက္ခိန္ဒ္ရိယော, အသ္သဒ္ဓော ပုဂ္ဂလော မုဒိန္ဒ္ရိယော။ပေ.။ ပညဝာ ပုဂ္ဂလော တိက္ခိန္ဒ္ရိယော, ဒုပ္ပညော ပုဂ္ဂလော မုဒိန္ဒ္ရိယော။ သ္ဝာကာရေ ဒ္ဝာကာရေတိ သဒ္ဓော ပုဂ္ဂလော သ္ဝာကာရော, အသ္သဒ္ဓော ပုဂ္ဂလော ဒ္ဝာကာရော။ပေ.။ ပညဝာ ပုဂ္ဂလော သ္ဝာကာရော, ဒုပ္ပညော ပုဂ္ဂလော ဒ္ဝာကာရော။ သုဝိညာပယေ ဒုဝိညာပယေတိ သဒ္ဓော ပုဂ္ဂလော သုဝိညာပယော, အသ္သဒ္ဓော ပုဂ္ဂလော ဒုဝိညာပယော။ပေ.။ ပညဝာ ပုဂ္ဂလော သုဝိညာပယော, ဒုပ္ပညော ပုဂ္ဂလော ဒုဝိညာပယော။
Tikkhindriye mudindriyeti saddho puggalo tikkhindriyo, assaddho puggalo mudindriyo…pe… paññavā puggalo tikkhindriyo, duppañño puggalo mudindriyo. Svākāre dvākāreti saddho puggalo svākāro, assaddho puggalo dvākāro…pe… paññavā puggalo svākāro, duppañño puggalo dvākāro. Suviññāpaye duviññāpayeti saddho puggalo suviññāpayo, assaddho puggalo duviññāpayo…pe… paññavā puggalo suviññāpayo, duppañño puggalo duviññāpayo.
အပ္ပေကစ္စေ ပရလောကဝဇ္ဇဘယဒသ္သာဝိနော, အပ္ပေကစ္စေ နပရလောကဝဇ္ဇဘယဒသ္သာဝိနောတိ သဒ္ဓော ပုဂ္ဂလော ပရလောကဝဇ္ဇဘယဒသ္သာဝီ, အသ္သဒ္ဓော ပုဂ္ဂလော နပရလောကဝဇ္ဇဘယဒသ္သာဝီ။ အာရဒ္ဓဝီရိယော ပုဂ္ဂလော ပရလောကဝဇ္ဇဘယဒသ္သာဝီ , ကုသီတော ပုဂ္ဂလော နပရလောကဝဇ္ဇဘယဒသ္သာဝီ။ပေ.။ ပညဝာ ပုဂ္ဂလော ပရလောကဝဇ္ဇဘယဒသ္သာဝီ, ဒုပ္ပညော ပုဂ္ဂလော နပရလောကဝဇ္ဇဘယဒသ္သာဝီ။
Appekacceparalokavajjabhayadassāvino, appekacce naparalokavajjabhayadassāvinoti saddho puggalo paralokavajjabhayadassāvī, assaddho puggalo naparalokavajjabhayadassāvī. Āraddhavīriyo puggalo paralokavajjabhayadassāvī , kusīto puggalo naparalokavajjabhayadassāvī…pe… paññavā puggalo paralokavajjabhayadassāvī, duppañño puggalo naparalokavajjabhayadassāvī.
လောကောတိ ခန္ဓလောကော ဓာတုလောကော အာယတနလောကော ဝိပတ္တိဘဝလောကော ဝိပတ္တိသမ္ဘဝလောကော သမ္ပတ္တိဘဝလောကော သမ္ပတ္တိသမ္ဘဝလောကော။
Lokoti khandhaloko dhātuloko āyatanaloko vipattibhavaloko vipattisambhavaloko sampattibhavaloko sampattisambhavaloko.
ဧကော လောကော – သဗ္ဗေ သတ္တာ အာဟာရဋ္ဌိတိကာ။ ဒ္ဝေ လောကာ – နာမဉ္စ ရူပဉ္စ။ တယော လောကာ – တိသ္သော ဝေဒနာ။ စတ္တာရော လောကာ – စတ္တာရော အာဟာရာ။ ပဉ္စ လောကာ – ပဉ္စုပာဒာနက္ခန္ဓာ။ ဆ လောကာ – ဆ အဇ္ဈတ္တိကာနိ အာယတနာနိ။ သတ္တ လောကာ – သတ္တ ဝိညာဏဋ္ဌိတိယော။ အဋ္ဌ လောကာ – အဋ္ဌ လောကဓမ္မာ။ နဝ လောကာ – နဝ သတ္တာဝာသာ။ ဒသ လောကာ – ဒသာယတနာနိ။ ဒ္ဝာဒသ လောကာ – ဒ္ဝာဒသာယတနာနိ။ အဋ္ဌာရသ လောကာ – အဋ္ဌာရသ ဓာတုယော။
Eko loko – sabbe sattā āhāraṭṭhitikā. Dve lokā – nāmañca rūpañca. Tayo lokā – tisso vedanā. Cattāro lokā – cattāro āhārā. Pañca lokā – pañcupādānakkhandhā. Cha lokā – cha ajjhattikāni āyatanāni. Satta lokā – satta viññāṇaṭṭhitiyo. Aṭṭha lokā – aṭṭha lokadhammā. Nava lokā – nava sattāvāsā. Dasa lokā – dasāyatanāni. Dvādasa lokā – dvādasāyatanāni. Aṭṭhārasa lokā – aṭṭhārasa dhātuyo.
ဝဇ္ဇန္တိ သဗ္ဗေ ကိလေသာ ဝဇ္ဇာ, သဗ္ဗေ ဒုစ္စရိတာ ဝဇ္ဇာ, သဗ္ဗေ အဘိသင္ခာရာ ဝဇ္ဇာ, သဗ္ဗေ ဘဝဂာမိကမ္မာ ဝဇ္ဇာ။ ဣတိ ဣမသ္မိဉ္စ လောကေ ဣမသ္မိဉ္စ ဝဇ္ဇေ တိဗ္ဗာ ဘယသညာ ပစ္စုပဋ္ဌိတာ ဟောန္တိ, သေယ္ယထာပိ ဥက္ခိတ္တာသိကေ ဝဓကေ။ ဣမေဟိ ပညာသာယ အာကာရေဟိ ဣမာနိ ပဉ္စိန္ဒ္ရိယာနိ ဇာနာတိ ပသ္သတိ အညာတိ ပဋိဝိဇ္ဈတီတိ။
Vajjanti sabbe kilesā vajjā, sabbe duccaritā vajjā, sabbe abhisaṅkhārā vajjā, sabbe bhavagāmikammā vajjā. Iti imasmiñca loke imasmiñca vajje tibbā bhayasaññā paccupaṭṭhitā honti, seyyathāpi ukkhittāsike vadhake. Imehi paññāsāya ākārehi imāni pañcindriyāni jānāti passati aññāti paṭivijjhatīti.
ဣန္ဒ္ရိယသမောဓာနော ပဉ္စမော။
Indriyasamodhāno pañcamo.
တတိယဘာဏဝာရော။
Tatiyabhāṇavāro.
ဣန္ဒ္ရိယကထာ နိဋ္ဌိတာ။
Indriyakathā niṭṭhitā.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / ခုဒ္ဒကနိကာယ (အဋ္ဌကထာ) • Khuddakanikāya (aṭṭhakathā) / ပဋိသမ္ဘိဒာမဂ္ဂ-အဋ္ဌကထာ • Paṭisambhidāmagga-aṭṭhakathā / ၅. ဣန္ဒ္ရိယသမောဓာနဝဏ္ဏနာ • 5. Indriyasamodhānavaṇṇanā
