| Library / Tipiṭaka / ತಿಪಿಟಕ • Tipiṭaka / ಪಟಿಸಮ್ಭಿದಾಮಗ್ಗಪಾಳಿ • Paṭisambhidāmaggapāḷi |
೫. ಇನ್ದ್ರಿಯಸಮೋಧಾನಂ
5. Indriyasamodhānaṃ
೨೦೪. ಪುಥುಜ್ಜನೋ ಸಮಾಧಿಂ ಭಾವೇನ್ತೋ ಕತಿಹಾಕಾರೇಹಿ ಉಪಟ್ಠಾನಕುಸಲೋ ಹೋತಿ? ಸೇಕ್ಖೋ ಸಮಾಧಿಂ ಭಾವೇನ್ತೋ ಕತಿಹಾಕಾರೇಹಿ ಉಪಟ್ಠಾನಕುಸಲೋ ಹೋತಿ? ವೀತರಾಗೋ ಸಮಾಧಿಂ ಭಾವೇನ್ತೋ ಕತಿಹಾಕಾರೇಹಿ ಉಪಟ್ಠಾನಕುಸಲೋ ಹೋತಿ? ಪುಥುಜ್ಜನೋ ಸಮಾಧಿಂ ಭಾವೇನ್ತೋ ಸತ್ತಹಿ ಆಕಾರೇಹಿ ಉಪಟ್ಠಾನಕುಸಲೋ ಹೋತಿ। ಸೇಕ್ಖೋ ಸಮಾಧಿಂ ಭಾವೇನ್ತೋ ಅಟ್ಠಹಿ ಆಕಾರೇಹಿ ಉಪಟ್ಠಾನಕುಸಲೋ ಹೋತಿ। ವೀತರಾಗೋ ಸಮಾಧಿಂ ಭಾವೇನ್ತೋ ದಸಹಿ ಆಕಾರೇಹಿ ಉಪಟ್ಠಾನಕುಸಲೋ ಹೋತಿ।
204. Puthujjano samādhiṃ bhāvento katihākārehi upaṭṭhānakusalo hoti? Sekkho samādhiṃ bhāvento katihākārehi upaṭṭhānakusalo hoti? Vītarāgo samādhiṃ bhāvento katihākārehi upaṭṭhānakusalo hoti? Puthujjano samādhiṃ bhāvento sattahi ākārehi upaṭṭhānakusalo hoti. Sekkho samādhiṃ bhāvento aṭṭhahi ākārehi upaṭṭhānakusalo hoti. Vītarāgo samādhiṃ bhāvento dasahi ākārehi upaṭṭhānakusalo hoti.
ಪುಥುಜ್ಜನೋ ಸಮಾಧಿಂ ಭಾವೇನ್ತೋ ಕತಮೇಹಿ ಸತ್ತಹಾಕಾರೇಹಿ ಉಪಟ್ಠಾನಕುಸಲೋ ಹೋತಿ? ಆವಜ್ಜಿತತ್ತಾ ಆರಮ್ಮಣೂಪಟ್ಠಾನಕುಸಲೋ ಹೋತಿ, ಸಮಥನಿಮಿತ್ತೂಪಟ್ಠಾನಕುಸಲೋ ಹೋತಿ, ಪಗ್ಗಹನಿಮಿತ್ತೂಪಟ್ಠಾನಕುಸಲೋ ಹೋತಿ, ಅವಿಕ್ಖೇಪೂಪಟ್ಠಾನಕುಸಲೋ ಹೋತಿ, ಓಭಾಸೂಪಟ್ಠಾನಕುಸಲೋ ಹೋತಿ, ಸಮ್ಪಹಂಸನೂಪಟ್ಠಾನಕುಸಲೋ ಹೋತಿ, ಉಪೇಕ್ಖೂಪಟ್ಠಾನಕುಸಲೋ ಹೋತಿ – ಪುಥುಜ್ಜನೋ ಸಮಾಧಿಂ ಭಾವೇನ್ತೋ ಇಮೇಹಿ ಸತ್ತಹಿ ಆಕಾರೇಹಿ ಉಪಟ್ಠಾನಕುಸಲೋ ಹೋತಿ।
Puthujjano samādhiṃ bhāvento katamehi sattahākārehi upaṭṭhānakusalo hoti? Āvajjitattā ārammaṇūpaṭṭhānakusalo hoti, samathanimittūpaṭṭhānakusalo hoti, paggahanimittūpaṭṭhānakusalo hoti, avikkhepūpaṭṭhānakusalo hoti, obhāsūpaṭṭhānakusalo hoti, sampahaṃsanūpaṭṭhānakusalo hoti, upekkhūpaṭṭhānakusalo hoti – puthujjano samādhiṃ bhāvento imehi sattahi ākārehi upaṭṭhānakusalo hoti.
ಸೇಕ್ಖೋ ಸಮಾಧಿಂ ಭಾವೇನ್ತೋ ಕತಮೇಹಿ ಅಟ್ಠಹಿ ಆಕಾರೇಹಿ ಉಪಟ್ಠಾನಕುಸಲೋ ಹೋತಿ? ಆವಜ್ಜಿತತ್ತಾ ಆರಮ್ಮಣೂಪಟ್ಠಾನಕುಸಲೋ ಹೋತಿ, ಸಮಥನಿಮಿತ್ತೂಪಟ್ಠಾನಕುಸಲೋ ಹೋತಿ, ಪಗ್ಗಹನಿಮಿತ್ತೂಪಟ್ಠಾನಕುಸಲೋ ಹೋತಿ, ಅವಿಕ್ಖೇಪೂಪಟ್ಠಾನಕುಸಲೋ ಹೋತಿ, ಓಭಾಸೂಪಟ್ಠಾನಕುಸಲೋ ಹೋತಿ, ಸಮ್ಪಹಂಸನೂಪಟ್ಠಾನಕುಸಲೋ ಹೋತಿ, ಉಪೇಕ್ಖೂಪಟ್ಠಾನಕುಸಲೋ ಹೋತಿ, ಏಕತ್ತೂಪಟ್ಠಾನಕುಸಲೋ ಹೋತಿ – ಸೇಕ್ಖೋ ಸಮಾಧಿಂ ಭಾವೇನ್ತೋ ಇಮೇಹಿ ಅಟ್ಠಹಿ ಆಕಾರೇಹಿ ಉಪಟ್ಠಾನಕುಸಲೋ ಹೋತಿ।
Sekkho samādhiṃ bhāvento katamehi aṭṭhahi ākārehi upaṭṭhānakusalo hoti? Āvajjitattā ārammaṇūpaṭṭhānakusalo hoti, samathanimittūpaṭṭhānakusalo hoti, paggahanimittūpaṭṭhānakusalo hoti, avikkhepūpaṭṭhānakusalo hoti, obhāsūpaṭṭhānakusalo hoti, sampahaṃsanūpaṭṭhānakusalo hoti, upekkhūpaṭṭhānakusalo hoti, ekattūpaṭṭhānakusalo hoti – sekkho samādhiṃ bhāvento imehi aṭṭhahi ākārehi upaṭṭhānakusalo hoti.
ವೀತರಾಗೋ ಸಮಾಧಿಂ ಭಾವೇನ್ತೋ ಕತಮೇಹಿ ದಸಹಿ ಆಕಾರೇಹಿ ಉಪಟ್ಠಾನಕುಸಲೋ ಹೋತಿ? ಆವಜ್ಜಿತತ್ತಾ ಆರಮ್ಮಣೂಪಟ್ಠಾನಕುಸಲೋ ಹೋತಿ…ಪೇ॰… ಏಕತ್ತೂಪಟ್ಠಾನಕುಸಲೋ ಹೋತಿ, ಞಾಣೂಪಟ್ಠಾನಕುಸಲೋ ಹೋತಿ, ವಿಮುತ್ತೂಪಟ್ಠಾನಕುಸಲೋ ಹೋತಿ – ವೀತರಾಗೋ ಸಮಾಧಿಂ ಭಾವೇನ್ತೋ ಇಮೇಹಿ ದಸಹಿ ಆಕಾರೇಹಿ ಉಪಟ್ಠಾನಕುಸಲೋ ಹೋತಿ।
Vītarāgo samādhiṃ bhāvento katamehi dasahi ākārehi upaṭṭhānakusalo hoti? Āvajjitattā ārammaṇūpaṭṭhānakusalo hoti…pe… ekattūpaṭṭhānakusalo hoti, ñāṇūpaṭṭhānakusalo hoti, vimuttūpaṭṭhānakusalo hoti – vītarāgo samādhiṃ bhāvento imehi dasahi ākārehi upaṭṭhānakusalo hoti.
೨೦೫. ಪುಥುಜ್ಜನೋ ವಿಪಸ್ಸನಂ ಭಾವೇನ್ತೋ ಕತಿಹಾಕಾರೇಹಿ ಉಪಟ್ಠಾನಕುಸಲೋ ಹೋತಿ, ಕತಿಹಾಕಾರೇಹಿ ಅನುಪಟ್ಠಾನಕುಸಲೋ ಹೋತಿ? ಸೇಕ್ಖೋ ವಿಪಸ್ಸನಂ ಭಾವೇನ್ತೋ ಕತಿಹಾಕಾರೇಹಿ ಉಪಟ್ಠಾನಕುಸಲೋ ಹೋತಿ , ಕತಿಹಾಕಾರೇಹಿ ಅನುಪಟ್ಠಾನಕುಸಲೋ ಹೋತಿ? ವೀತರಾಗೋ ವಿಪಸ್ಸನಂ ಭಾವೇನ್ತೋ ಕತಿಹಾಕಾರೇಹಿ ಉಪಟ್ಠಾನಕುಸಲೋ ಹೋತಿ, ಕತಿಹಾಕಾರೇಹಿ ಅನುಪಟ್ಠಾನಕುಸಲೋ ಹೋತಿ?
205. Puthujjano vipassanaṃ bhāvento katihākārehi upaṭṭhānakusalo hoti, katihākārehi anupaṭṭhānakusalo hoti? Sekkho vipassanaṃ bhāvento katihākārehi upaṭṭhānakusalo hoti , katihākārehi anupaṭṭhānakusalo hoti? Vītarāgo vipassanaṃ bhāvento katihākārehi upaṭṭhānakusalo hoti, katihākārehi anupaṭṭhānakusalo hoti?
ಪುಥುಜ್ಜನೋ ವಿಪಸ್ಸನಂ ಭಾವೇನ್ತೋ ನವಹಿ ಆಕಾರೇಹಿ ಉಪಟ್ಠಾನಕುಸಲೋ ಹೋತಿ, ನವಹಿ ಆಕಾರೇಹಿ ಅನುಪಟ್ಠಾನಕುಸಲೋ ಹೋತಿ। ಸೇಕ್ಖೋ ವಿಪಸ್ಸನಂ ಭಾವೇನ್ತೋ ದಸಹಿ ಆಕಾರೇಹಿ ಉಪಟ್ಠಾನಕುಸಲೋ ಹೋತಿ, ದಸಹಿ ಆಕಾರೇಹಿ ಅನುಪಟ್ಠಾನಕುಸಲೋ ಹೋತಿ। ವೀತರಾಗೋ ವಿಪಸ್ಸನಂ ಭಾವೇನ್ತೋ ದ್ವಾದಸಹಿ ಆಕಾರೇಹಿ ಉಪಟ್ಠಾನಕುಸಲೋ ಹೋತಿ, ದ್ವಾದಸಹಿ ಆಕಾರೇಹಿ ಅನುಪಟ್ಠಾನಕುಸಲೋ ಹೋತಿ।
Puthujjano vipassanaṃ bhāvento navahi ākārehi upaṭṭhānakusalo hoti, navahi ākārehi anupaṭṭhānakusalo hoti. Sekkho vipassanaṃ bhāvento dasahi ākārehi upaṭṭhānakusalo hoti, dasahi ākārehi anupaṭṭhānakusalo hoti. Vītarāgo vipassanaṃ bhāvento dvādasahi ākārehi upaṭṭhānakusalo hoti, dvādasahi ākārehi anupaṭṭhānakusalo hoti.
ಪುಥುಜ್ಜನೋ ವಿಪಸ್ಸನಂ ಭಾವೇನ್ತೋ ಕತಮೇಹಿ ನವಹಿ ಆಕಾರೇಹಿ ಉಪಟ್ಠಾನಕುಸಲೋ ಹೋತಿ, ಕತಮೇಹಿ ನವಹಿ ಆಕಾರೇಹಿ ಅನುಪಟ್ಠಾನಕುಸಲೋ ಹೋತಿ? ಅನಿಚ್ಚತೋ ಉಪಟ್ಠಾನಕುಸಲೋ ಹೋತಿ, ನಿಚ್ಚತೋ ಅನುಪಟ್ಠಾನಕುಸಲೋ ಹೋತಿ। ದುಕ್ಖತೋ ಉಪಟ್ಠಾನಕುಸಲೋ ಹೋತಿ, ಸುಖತೋ ಅನುಪಟ್ಠಾನಕುಸಲೋ ಹೋತಿ। ಅನತ್ತತೋ ಉಪಟ್ಠಾನಕುಸಲೋ ಹೋತಿ, ಅತ್ತತೋ ಅನುಪಟ್ಠಾನಕುಸಲೋ ಹೋತಿ। ಖಯತೋ ಉಪಟ್ಠಾನಕುಸಲೋ ಹೋತಿ, ಘನತೋ ಅನುಪಟ್ಠಾನಕುಸಲೋ ಹೋತಿ। ವಯತೋ ಉಪಟ್ಠಾನಕುಸಲೋ ಹೋತಿ, ಆಯೂಹನಾನುಪಟ್ಠಾನಕುಸಲೋ ಹೋತಿ। ವಿಪರಿಣಾಮೂಪಟ್ಠಾನಕುಸಲೋ ಹೋತಿ, ಧುವತೋ ಅನುಪಟ್ಠಾನಕುಸಲೋ ಹೋತಿ। ಅನಿಮಿತ್ತೂಪಟ್ಠಾನಕುಸಲೋ ಹೋತಿ, ನಿಮಿತ್ತಾನುಪಟ್ಠಾನಕುಸಲೋ ಹೋತಿ। ಅಪ್ಪಣಿಹಿತೂಪಟ್ಠಾನಕುಸಲೋ ಹೋತಿ, ಪಣಿಧಿಅನುಪಟ್ಠಾನಕುಸಲೋ 1 ಹೋತಿ। ಸುಞ್ಞತೂಪಟ್ಠಾನಕುಸಲೋ ಹೋತಿ, ಅಭಿನಿವೇಸಾನುಪಟ್ಠಾನಕುಸಲೋ ಹೋತಿ – ಪುಥುಜ್ಜನೋ ವಿಪಸ್ಸನಂ ಭಾವೇನ್ತೋ ಇಮೇಹಿ ನವಹಿ ಆಕಾರೇಹಿ ಉಪಟ್ಠಾನಕುಸಲೋ ಹೋತಿ, ಇಮೇಹಿ ನವಹಿ ಆಕಾರೇಹಿ ಅನುಪಟ್ಠಾನಕುಸಲೋ ಹೋತಿ।
Puthujjano vipassanaṃ bhāvento katamehi navahi ākārehi upaṭṭhānakusalo hoti, katamehi navahi ākārehi anupaṭṭhānakusalo hoti? Aniccato upaṭṭhānakusalo hoti, niccato anupaṭṭhānakusalo hoti. Dukkhato upaṭṭhānakusalo hoti, sukhato anupaṭṭhānakusalo hoti. Anattato upaṭṭhānakusalo hoti, attato anupaṭṭhānakusalo hoti. Khayato upaṭṭhānakusalo hoti, ghanato anupaṭṭhānakusalo hoti. Vayato upaṭṭhānakusalo hoti, āyūhanānupaṭṭhānakusalo hoti. Vipariṇāmūpaṭṭhānakusalo hoti, dhuvato anupaṭṭhānakusalo hoti. Animittūpaṭṭhānakusalo hoti, nimittānupaṭṭhānakusalo hoti. Appaṇihitūpaṭṭhānakusalo hoti, paṇidhianupaṭṭhānakusalo 2 hoti. Suññatūpaṭṭhānakusalo hoti, abhinivesānupaṭṭhānakusalo hoti – puthujjano vipassanaṃ bhāvento imehi navahi ākārehi upaṭṭhānakusalo hoti, imehi navahi ākārehi anupaṭṭhānakusalo hoti.
೨೦೬. ಸೇಕ್ಖೋ ವಿಪಸ್ಸನಂ ಭಾವೇನ್ತೋ ಕತಮೇಹಿ ದಸಹಿ ಆಕಾರೇಹಿ ಉಪಟ್ಠಾನಕುಸಲೋ ಹೋತಿ, ಕತಮೇಹಿ ದಸಹಿ ಆಕಾರೇಹಿ ಅನುಪಟ್ಠಾನಕುಸಲೋ ಹೋತಿ? ಅನಿಚ್ಚತೋ ಉಪಟ್ಠಾನಕುಸಲೋ ಹೋತಿ, ನಿಚ್ಚತೋ ಅನುಪಟ್ಠಾನಕುಸಲೋ ಹೋತಿ…ಪೇ॰… ಸುಞ್ಞತೂಪಟ್ಠಾನಕುಸಲೋ ಹೋತಿ, ಅಭಿನಿವೇಸಾನೂಪಟ್ಠಾನಕುಸಲೋ ಹೋತಿ। ಞಾಣೂಪಟ್ಠಾನಕುಸಲೋ ಹೋತಿ, ಅಞಾಣಅನುಪಟ್ಠಾನಕುಸಲೋ ಹೋತಿ – ಸೇಕ್ಖೋ ವಿಪಸ್ಸನಂ ಭಾವೇನ್ತೋ ಇಮೇಹಿ ದಸಹಿ ಆಕಾರೇಹಿ ಉಪಟ್ಠಾನಕುಸಲೋ ಹೋತಿ, ಇಮೇಹಿ ದಸಹಿ ಆಕಾರೇಹಿ ಅನುಪಟ್ಠಾನಕುಸಲೋ ಹೋತಿ।
206. Sekkho vipassanaṃ bhāvento katamehi dasahi ākārehi upaṭṭhānakusalo hoti, katamehi dasahi ākārehi anupaṭṭhānakusalo hoti? Aniccato upaṭṭhānakusalo hoti, niccato anupaṭṭhānakusalo hoti…pe… suññatūpaṭṭhānakusalo hoti, abhinivesānūpaṭṭhānakusalo hoti. Ñāṇūpaṭṭhānakusalo hoti, añāṇaanupaṭṭhānakusalo hoti – sekkho vipassanaṃ bhāvento imehi dasahi ākārehi upaṭṭhānakusalo hoti, imehi dasahi ākārehi anupaṭṭhānakusalo hoti.
ವೀತರಾಗೋ ವಿಪಸ್ಸನಂ ಭಾವೇನ್ತೋ ಕತಮೇಹಿ ದ್ವಾದಸಹಿ ಆಕಾರೇಹಿ ಉಪಟ್ಠಾನಕುಸಲೋ ಹೋತಿ, ಕತಮೇಹಿ ದ್ವಾದಸಹಿ ಆಕಾರೇಹಿ ಅನುಪಟ್ಠಾನಕುಸಲೋ ಹೋತಿ? ಅನಿಚ್ಚತೋ ಉಪಟ್ಠಾನಕುಸಲೋ ಹೋತಿ, ನಿಚ್ಚತೋ ಅನುಪಟ್ಠಾನಕುಸಲೋ ಹೋತಿ…ಪೇ॰… ಞಾಣೂಪಟ್ಠಾನಕುಸಲೋ ಹೋತಿ, ಅಞಾಣಾನುಪಟ್ಠಾನಕುಸಲೋ ಹೋತಿ। ವಿಸಞ್ಞೋಗೂಪಟ್ಠಾನಕುಸಲೋ ಹೋತಿ, ಸಞ್ಞೋಗಾನುಪಟ್ಠಾನಕುಸಲೋ ಹೋತಿ। ನಿರೋಧೂಪಟ್ಠಾನಕುಸಲೋ ಹೋತಿ, ಸಙ್ಖಾರಾನುಪಟ್ಠಾನಕುಸಲೋ ಹೋತಿ – ವೀತರಾಗೋ ವಿಪಸ್ಸನಂ ಭಾವೇನ್ತೋ ಇಮೇಹಿ ದ್ವಾದಸಹಿ ಆಕಾರೇಹಿ ಉಪಟ್ಠಾನಕುಸಲೋ ಹೋತಿ, ಇಮೇಹಿ ದ್ವಾದಸಹಿ ಆಕಾರೇಹಿ ಅನುಪಟ್ಠಾನಕುಸಲೋ ಹೋತಿ।
Vītarāgo vipassanaṃ bhāvento katamehi dvādasahi ākārehi upaṭṭhānakusalo hoti, katamehi dvādasahi ākārehi anupaṭṭhānakusalo hoti? Aniccato upaṭṭhānakusalo hoti, niccato anupaṭṭhānakusalo hoti…pe… ñāṇūpaṭṭhānakusalo hoti, añāṇānupaṭṭhānakusalo hoti. Visaññogūpaṭṭhānakusalo hoti, saññogānupaṭṭhānakusalo hoti. Nirodhūpaṭṭhānakusalo hoti, saṅkhārānupaṭṭhānakusalo hoti – vītarāgo vipassanaṃ bhāvento imehi dvādasahi ākārehi upaṭṭhānakusalo hoti, imehi dvādasahi ākārehi anupaṭṭhānakusalo hoti.
ಆವಜ್ಜಿತತ್ತಾ ಆರಮ್ಮಣೂಪಟ್ಠಾನಕುಸಲವಸೇನ ಇನ್ದ್ರಿಯಾನಿ ಸಮೋಧಾನೇತಿ, ಗೋಚರಞ್ಚ ಪಜಾನಾತಿ, ಸಮತ್ಥಞ್ಚ ಪಟಿವಿಜ್ಝತಿ…ಪೇ॰… ಧಮ್ಮೇ ಸಮೋಧಾನೇತಿ, ಗೋಚರಞ್ಚ ಪಜಾನಾತಿ, ಸಮತ್ಥಞ್ಚ ಪಟಿವಿಜ್ಝತಿ। ಇನ್ದ್ರಿಯಾನಿ ಸಮೋಧಾನೇತೀತಿ ಕಥಂ ಇನ್ದ್ರಿಯಾನಿ ಸಮೋಧಾನೇತಿ? ಅಧಿಮೋಕ್ಖಟ್ಠೇನ ಸದ್ಧಿನ್ದ್ರಿಯಂ ಸಮೋಧಾನೇತಿ…ಪೇ॰… ಸಮಥನಿಮಿತ್ತೂಪಟ್ಠಾನಕುಸಲವಸೇನ, ಪಗ್ಗಹನಿಮಿತ್ತೂಪಟ್ಠಾನಕುಸಲವಸೇನ, ಅವಿಕ್ಖೇಪೂಪಟ್ಠಾನಕುಸಲವಸೇನ, ಓಭಾಸೂಪಟ್ಠಾನಕುಸಲವಸೇನ, ಸಮ್ಪಹಂಸನೂಪಟ್ಠಾನಕುಸಲವಸೇನ, ಉಪೇಕ್ಖೂಪಟ್ಠಾನಕುಸಲವಸೇನ , ಏಕತ್ತೂಪಟ್ಠಾನಕುಸಲವಸೇನ, ಞಾಣೂಪಟ್ಠಾನಕುಸಲವಸೇನ, ವಿಮುತ್ತೂಪಟ್ಠಾನಕುಸಲವಸೇನ।
Āvajjitattā ārammaṇūpaṭṭhānakusalavasena indriyāni samodhāneti, gocarañca pajānāti, samatthañca paṭivijjhati…pe… dhamme samodhāneti, gocarañca pajānāti, samatthañca paṭivijjhati. Indriyāni samodhānetīti kathaṃ indriyāni samodhāneti? Adhimokkhaṭṭhena saddhindriyaṃ samodhāneti…pe… samathanimittūpaṭṭhānakusalavasena, paggahanimittūpaṭṭhānakusalavasena, avikkhepūpaṭṭhānakusalavasena, obhāsūpaṭṭhānakusalavasena, sampahaṃsanūpaṭṭhānakusalavasena, upekkhūpaṭṭhānakusalavasena , ekattūpaṭṭhānakusalavasena, ñāṇūpaṭṭhānakusalavasena, vimuttūpaṭṭhānakusalavasena.
ಅನಿಚ್ಚತೋ ಉಪಟ್ಠಾನಕುಸಲವಸೇನ, ನಿಚ್ಚತೋ ಅನುಪಟ್ಠಾನಕುಸಲವಸೇನ, ದುಕ್ಖತೋ ಉಪಟ್ಠಾನಕುಸಲವಸೇನ, ಸುಖತೋ ಅನುಪಟ್ಠಾನಕುಸಲವಸೇನ, ಅನತ್ತತೋ ಉಪಟ್ಠಾನಕುಸಲವಸೇನ, ಅತ್ತತೋ ಅನುಪಟ್ಠಾನಕುಸಲವಸೇನ, ಖಯತೋ ಉಪಟ್ಠಾನಕುಸಲವಸೇನ, ಘನತೋ ಅನುಪಟ್ಠಾನಕುಸಲವಸೇನ, ವಯತೋ ಉಪಟ್ಠಾನಕುಸಲವಸೇನ, ಆಯೂಹನಾನುಪಟ್ಠಾನಕುಸಲವಸೇನ, ವಿಪರಿಣಾಮೂಪಟ್ಠಾನಕುಸಲವಸೇನ, ಧುವತೋ ಅನುಪಟ್ಠಾನಕುಸಲವಸೇನ, ಅನಿಮಿತ್ತೂಪಟ್ಠಾನಕುಸಲವಸೇನ, ನಿಮಿತ್ತಾನುಪಟ್ಠಾನಕುಸಲವಸೇನ, ಅಪ್ಪಣಿಹಿತೂಪಟ್ಠಾನಕುಸಲವಸೇನ, ಪಣಿಧಿಅನುಪಟ್ಠಾನಕುಸಲವಸೇನ, ಸುಞ್ಞತೂಪಟ್ಠಾನಕುಸಲವಸೇನ, ಅಭಿನಿವೇಸಾನುಪಟ್ಠಾನಕುಸಲವಸೇನ, ಞಾಣೂಪಟ್ಠಾನಕುಸಲವಸೇನ, ಅಞಾಣಾನುಪಟ್ಠಾನಕುಸಲವಸೇನ, ವಿಸಞ್ಞೋಗೂಪಟ್ಠಾನಕುಸಲವಸೇನ, ಸಞ್ಞೋಗಾನುಪಟ್ಠಾನಕುಸಲವಸೇನ , ನಿರೋಧೂಪಟ್ಠಾನಕುಸಲವಸೇನ, ಸಙ್ಖಾರಾನುಪಟ್ಠಾನಕುಸಲವಸೇನ ಇನ್ದ್ರಿಯಾನಿ ಸಮೋಧಾನೇತಿ, ಗೋಚರಞ್ಚ ಪಜಾನಾತಿ, ಸಮತ್ಥಞ್ಚ ಪಟಿವಿಜ್ಝತಿ।
Aniccato upaṭṭhānakusalavasena, niccato anupaṭṭhānakusalavasena, dukkhato upaṭṭhānakusalavasena, sukhato anupaṭṭhānakusalavasena, anattato upaṭṭhānakusalavasena, attato anupaṭṭhānakusalavasena, khayato upaṭṭhānakusalavasena, ghanato anupaṭṭhānakusalavasena, vayato upaṭṭhānakusalavasena, āyūhanānupaṭṭhānakusalavasena, vipariṇāmūpaṭṭhānakusalavasena, dhuvato anupaṭṭhānakusalavasena, animittūpaṭṭhānakusalavasena, nimittānupaṭṭhānakusalavasena, appaṇihitūpaṭṭhānakusalavasena, paṇidhianupaṭṭhānakusalavasena, suññatūpaṭṭhānakusalavasena, abhinivesānupaṭṭhānakusalavasena, ñāṇūpaṭṭhānakusalavasena, añāṇānupaṭṭhānakusalavasena, visaññogūpaṭṭhānakusalavasena, saññogānupaṭṭhānakusalavasena , nirodhūpaṭṭhānakusalavasena, saṅkhārānupaṭṭhānakusalavasena indriyāni samodhāneti, gocarañca pajānāti, samatthañca paṭivijjhati.
೨೦೭. ಚತುಸಟ್ಠಿಯಾ ಆಕಾರೇಹಿ ತಿಣ್ಣನ್ನಂ ಇನ್ದ್ರಿಯಾನಂ ವಸೀಭಾವತಾಪಞ್ಞಾ ಆಸವಾನಂ ಖಯೇ ಞಾಣಂ। ಕತಮೇಸಂ ತಿಣ್ಣನ್ನಂ ಇನ್ದ್ರಿಯಾನಂ? ಅನಞ್ಞಾತಞ್ಞಸ್ಸಾಮೀತಿನ್ದ್ರಿಯಸ್ಸ, ಅಞ್ಞಿನ್ದ್ರಿಯಸ್ಸ, ಅಞ್ಞಾತಾವಿನ್ದ್ರಿಯಸ್ಸ।
207. Catusaṭṭhiyā ākārehi tiṇṇannaṃ indriyānaṃ vasībhāvatāpaññā āsavānaṃ khaye ñāṇaṃ. Katamesaṃ tiṇṇannaṃ indriyānaṃ? Anaññātaññassāmītindriyassa, aññindriyassa, aññātāvindriyassa.
ಅನಞ್ಞಾತಞ್ಞಸ್ಸಾಮೀತಿನ್ದ್ರಿಯಂ ಕತಿ ಠಾನಾನಿ ಗಚ್ಛತಿ? ಅಞ್ಞಿನ್ದ್ರಿಯಂ ಕತಿ ಠಾನಾನಿ ಗಚ್ಛತಿ? ಅಞ್ಞಾತಾವಿನ್ದ್ರಿಯಂ ಕತಿ ಠಾನಾನಿ ಗಚ್ಛತಿ? ಅನಞ್ಞಾತಞ್ಞಸ್ಸಾಮೀತಿನ್ದ್ರಿಯಂ ಏಕಂ ಠಾನಂ ಗಚ್ಛತಿ – ಸೋತಾಪತ್ತಿಮಗ್ಗಂ। ಅಞ್ಞಿನ್ದ್ರಿಯಂ ಛ ಠಾನಾನಿ ಗಚ್ಛತಿ – ಸೋತಾಪತ್ತಿಫಲಂ, ಸಕದಾಗಾಮಿಮಗ್ಗಂ, ಸಕದಾಗಾಮಿಫಲಂ, ಅನಾಗಾಮಿಮಗ್ಗಂ, ಅನಾಗಾಮಿಫಲಂ, ಅರಹತ್ತಮಗ್ಗಂ। ಅಞ್ಞಾತಾವಿನ್ದ್ರಿಯಂ ಏಕಂ ಠಾನಂ ಗಚ್ಛತಿ – ಅರಹತ್ತಫಲಂ।
Anaññātaññassāmītindriyaṃ kati ṭhānāni gacchati? Aññindriyaṃ kati ṭhānāni gacchati? Aññātāvindriyaṃ kati ṭhānāni gacchati? Anaññātaññassāmītindriyaṃ ekaṃ ṭhānaṃ gacchati – sotāpattimaggaṃ. Aññindriyaṃ cha ṭhānāni gacchati – sotāpattiphalaṃ, sakadāgāmimaggaṃ, sakadāgāmiphalaṃ, anāgāmimaggaṃ, anāgāmiphalaṃ, arahattamaggaṃ. Aññātāvindriyaṃ ekaṃ ṭhānaṃ gacchati – arahattaphalaṃ.
ಸೋತಾಪತ್ತಿಮಗ್ಗಕ್ಖಣೇ ಅನಞ್ಞಾತಞ್ಞಸ್ಸಾಮೀತಿನ್ದ್ರಿಯಸ್ಸ ಸದ್ಧಿನ್ದ್ರಿಯಂ ಅಧಿಮೋಕ್ಖಪರಿವಾರಂ ಹೋತಿ, ವೀರಿಯಿನ್ದ್ರಿಯಂ ಪಗ್ಗಹಪರಿವಾರಂ ಹೋತಿ, ಸತಿನ್ದ್ರಿಯಂ ಉಪಟ್ಠಾನಪರಿವಾರಂ ಹೋತಿ, ಸಮಾಧಿನ್ದ್ರಿಯಂ ಅವಿಕ್ಖೇಪಪರಿವಾರಂ ಹೋತಿ, ಪಞ್ಞಿನ್ದ್ರಿಯಂ ದಸ್ಸನಪರಿವಾರಂ ಹೋತಿ, ಮನಿನ್ದ್ರಿಯಂ ವಿಜಾನನಪರಿವಾರಂ ಹೋತಿ, ಸೋಮನಸ್ಸಿನ್ದ್ರಿಯಂ ಅಭಿಸನ್ದನಪರಿವಾರಂ ಹೋತಿ, ಜೀವಿತಿನ್ದ್ರಿಯಂ ಪವತ್ತಸನ್ತತಾಧಿಪತೇಯ್ಯಪರಿವಾರಂ ಹೋತಿ। ಸೋತಾಪತ್ತಿಮಗ್ಗಕ್ಖಣೇ ಜಾತಾ ಧಮ್ಮಾ, ಠಪೇತ್ವಾ ಚಿತ್ತಸಮುಟ್ಠಾನಂ ರೂಪಂ, ಸಬ್ಬೇವ ಕುಸಲಾ ಹೋನ್ತಿ, ಸಬ್ಬೇವ ಅನಾಸವಾ ಹೋನ್ತಿ, ಸಬ್ಬೇವ ನಿಯ್ಯಾನಿಕಾ ಹೋನ್ತಿ, ಸಬ್ಬೇವ ಅಪಚಯಗಾಮಿನೋ ಹೋನ್ತಿ, ಸಬ್ಬೇವ ಲೋಕುತ್ತರಾ ಹೋನ್ತಿ, ಸಬ್ಬೇವ ನಿಬ್ಬಾನಾರಮ್ಮಣಾ ಹೋನ್ತಿ। ಸೋತಾಪತ್ತಿಮಗ್ಗಕ್ಖಣೇ ಅನಞ್ಞಾತಞ್ಞಸ್ಸಾಮೀತಿನ್ದ್ರಿಯಸ್ಸ ಇಮಾನಿ ಅಟ್ಠಿನ್ದ್ರಿಯಾನಿ ಸಹಜಾತಪರಿವಾರಾ ಹೋನ್ತಿ, ಅಞ್ಞಮಞ್ಞಪರಿವಾರಾ ಹೋನ್ತಿ, ನಿಸ್ಸಯಪರಿವಾರಾ ಹೋನ್ತಿ, ಸಮ್ಪಯುತ್ತಪರಿವಾರಾ ಹೋನ್ತಿ, ಸಹಗತಾ ಹೋನ್ತಿ, ಸಹಜಾತಾ ಹೋನ್ತಿ, ಸಂಸಟ್ಠಾ ಹೋನ್ತಿ, ಸಮ್ಪಯುತ್ತಾ ಹೋನ್ತಿ। ತೇವ ತಸ್ಸ ಆಕಾರಾ ಚೇವ ಹೋನ್ತಿ ಪರಿವಾರಾ ಚ।
Sotāpattimaggakkhaṇe anaññātaññassāmītindriyassa saddhindriyaṃ adhimokkhaparivāraṃ hoti, vīriyindriyaṃ paggahaparivāraṃ hoti, satindriyaṃ upaṭṭhānaparivāraṃ hoti, samādhindriyaṃ avikkhepaparivāraṃ hoti, paññindriyaṃ dassanaparivāraṃ hoti, manindriyaṃ vijānanaparivāraṃ hoti, somanassindriyaṃ abhisandanaparivāraṃ hoti, jīvitindriyaṃ pavattasantatādhipateyyaparivāraṃ hoti. Sotāpattimaggakkhaṇe jātā dhammā, ṭhapetvā cittasamuṭṭhānaṃ rūpaṃ, sabbeva kusalā honti, sabbeva anāsavā honti, sabbeva niyyānikā honti, sabbeva apacayagāmino honti, sabbeva lokuttarā honti, sabbeva nibbānārammaṇā honti. Sotāpattimaggakkhaṇe anaññātaññassāmītindriyassa imāni aṭṭhindriyāni sahajātaparivārā honti, aññamaññaparivārā honti, nissayaparivārā honti, sampayuttaparivārā honti, sahagatā honti, sahajātā honti, saṃsaṭṭhā honti, sampayuttā honti. Teva tassa ākārā ceva honti parivārā ca.
ಸೋತಾಪತ್ತಿಫಲಕ್ಖಣೇ…ಪೇ॰… ಅರಹತ್ತಫಲಕ್ಖಣೇ ಅಞ್ಞಾತಾವಿನ್ದ್ರಿಯಸ್ಸ ಸದ್ಧಿನ್ದ್ರಿಯಂ ಅಧಿಮೋಕ್ಖಪರಿವಾರಂ ಹೋತಿ…ಪೇ॰… ಜೀವಿತಿನ್ದ್ರಿಯಂ ಪವತ್ತಸನ್ತತಾಧಿಪತೇಯ್ಯಪರಿವಾರಂ ಹೋತಿ। ಅರಹತ್ತಫಲಕ್ಖಣೇ ಜಾತಾ ಧಮ್ಮಾ ಸಬ್ಬೇವ ಅಬ್ಯಾಕತಾ ಹೋನ್ತಿ, ಠಪೇತ್ವಾ ಚಿತ್ತಸಮುಟ್ಠಾನಂ ರೂಪಂ ಸಬ್ಬೇವ ಅನಾಸವಾ ಹೋನ್ತಿ, ಸಬ್ಬೇವ ಲೋಕುತ್ತರಾ ಹೋನ್ತಿ, ಸಬ್ಬೇವ ನಿಬ್ಬಾನಾರಮ್ಮಣಾ ಹೋನ್ತಿ। ಅರಹತ್ತಫಲಕ್ಖಣೇ ಅಞ್ಞಾತಾವಿನ್ದ್ರಿಯಸ್ಸ ಇಮಾನಿ ಅಟ್ಠಿನ್ದ್ರಿಯಾನಿ ಸಹಜಾತಪರಿವಾರಾ ಹೋನ್ತಿ । ತೇವ ತಸ್ಸ ಆಕಾರಾ ಚೇವ ಹೋನ್ತಿ ಪರಿವಾರಾ ಚ। ಇತಿ ಇಮಾನಿ ಅಟ್ಠ ಅಟ್ಠಕಾನಿ ಚತುಸಟ್ಠಿ ಹೋನ್ತಿ।
Sotāpattiphalakkhaṇe…pe… arahattaphalakkhaṇe aññātāvindriyassa saddhindriyaṃ adhimokkhaparivāraṃ hoti…pe… jīvitindriyaṃ pavattasantatādhipateyyaparivāraṃ hoti. Arahattaphalakkhaṇe jātā dhammā sabbeva abyākatā honti, ṭhapetvā cittasamuṭṭhānaṃ rūpaṃ sabbeva anāsavā honti, sabbeva lokuttarā honti, sabbeva nibbānārammaṇā honti. Arahattaphalakkhaṇe aññātāvindriyassa imāni aṭṭhindriyāni sahajātaparivārā honti . Teva tassa ākārā ceva honti parivārā ca. Iti imāni aṭṭha aṭṭhakāni catusaṭṭhi honti.
ಆಸವಾತಿ ಕತಮೇ ತೇ ಆಸವಾ? ಕಾಮಾಸವೋ, ಭವಾಸವೋ, ದಿಟ್ಠಾಸವೋ, ಅವಿಜ್ಜಾಸವೋ। ಕತ್ಥೇತೇ ಆಸವಾ ಖೀಯನ್ತಿ 3? ಸೋತಾಪತ್ತಿಮಗ್ಗೇನ ಅನವಸೇಸೋ ದಿಟ್ಠಾಸವೋ ಖೀಯತಿ। ಅಪಾಯಗಮನೀಯೋ ಕಾಮಾಸವೋ ಖೀಯತಿ, ಅಪಾಯಗಮನೀಯೋ ಭವಾಸವೋ ಖೀಯತಿ, ಅಪಾಯಗಮನೀಯೋ ಅವಿಜ್ಜಾಸವೋ ಖೀಯತಿ। ಏತ್ಥೇತೇ ಆಸವಾ ಖೀಯನ್ತಿ। ಸಕದಾಗಾಮಿಮಗ್ಗೇನ ಓಳಾರಿಕೋ ಕಾಮಾಸವೋ ಖೀಯತಿ, ತದೇಕಟ್ಠೋ ಭವಾಸವೋ ಖೀಯತಿ, ತದೇಕಟ್ಠೋ ಅವಿಜ್ಜಾಸವೋ ಖೀಯತಿ। ಏತ್ಥೇತೇ ಆಸವಾ ಖೀಯನ್ತಿ। ಅನಾಗಾಮಿಮಗ್ಗೇನ ಅನವಸೇಸೋ ಕಾಮಾಸವೋ ಖೀಯತಿ, ತದೇಕಟ್ಠೋ ಭವಾಸವೋ ಖೀಯತಿ, ತದೇಕಟ್ಠೋ ಅವಿಜ್ಜಾಸವೋ ಖೀಯತಿ। ಏತ್ಥೇತೇ ಆಸವಾ ಖೀಯನ್ತಿ। ಅರಹತ್ತಮಗ್ಗೇನ ಅನವಸೇಸೋ ಭವಾಸವೋ ಖೀಯತಿ, ಅನವಸೇಸೋ ಅವಿಜ್ಜಾಸವೋ ಖೀಯತಿ। ಏತ್ಥೇತೇ ಆಸವಾ ಖೀಯನ್ತಿ।
Āsavāti katame te āsavā? Kāmāsavo, bhavāsavo, diṭṭhāsavo, avijjāsavo. Katthete āsavā khīyanti 4? Sotāpattimaggena anavaseso diṭṭhāsavo khīyati. Apāyagamanīyo kāmāsavo khīyati, apāyagamanīyo bhavāsavo khīyati, apāyagamanīyo avijjāsavo khīyati. Etthete āsavā khīyanti. Sakadāgāmimaggena oḷāriko kāmāsavo khīyati, tadekaṭṭho bhavāsavo khīyati, tadekaṭṭho avijjāsavo khīyati. Etthete āsavā khīyanti. Anāgāmimaggena anavaseso kāmāsavo khīyati, tadekaṭṭho bhavāsavo khīyati, tadekaṭṭho avijjāsavo khīyati. Etthete āsavā khīyanti. Arahattamaggena anavaseso bhavāsavo khīyati, anavaseso avijjāsavo khīyati. Etthete āsavā khīyanti.
೨೦೮.
208.
ನ ತಸ್ಸ ಅದ್ದಿಟ್ಠಮಿಧತ್ಥಿ ಕಿಞ್ಚಿ, ಅಥೋ ಅವಿಞ್ಞಾತಮಜಾನಿತಬ್ಬಂ।
Na tassa addiṭṭhamidhatthi kiñci, atho aviññātamajānitabbaṃ;
ಸಬ್ಬಂ ಅಭಿಞ್ಞಾಸಿ ಯದತ್ಥಿ ನೇಯ್ಯಂ, ತಥಾಗತೋ ತೇನ ಸಮನ್ತಚಕ್ಖೂತಿ॥
Sabbaṃ abhiññāsi yadatthi neyyaṃ, tathāgato tena samantacakkhūti.
ಸಮನ್ತಚಕ್ಖೂತಿ ಕೇನಟ್ಠೇನ ಸಮನ್ತಚಕ್ಖು? ಚುದ್ದಸ ಬುದ್ಧಞಾಣಾನಿ – ದುಕ್ಖೇ ಞಾಣಂ ಬುದ್ಧಞಾಣಂ, ದುಕ್ಖಸಮುದಯೇ ಞಾಣಂ ಬುದ್ಧಞಾಣಂ…ಪೇ॰… ಸಬ್ಬಞ್ಞುತಞಾಣಂ ಬುದ್ಧಞಾಣಂ, ಅನಾವರಣಞಾಣಂ ಬುದ್ಧಞಾಣಂ। ಇಮಾನಿ ಚುದ್ದಸ ಬುದ್ಧಞಾಣಾನಿ। ಇಮೇಸಂ ಚುದ್ದಸನ್ನಂ ಬುದ್ಧಞಾಣಾನಂ ಅಟ್ಠ ಞಾಣಾನಿ ಸಾವಕಸಾಧಾರಣಾನಿ, ಛ ಞಾಣಾನಿ ಅಸಾಧಾರಣಾನಿ ಸಾವಕೇಹಿ।
Samantacakkhūti kenaṭṭhena samantacakkhu? Cuddasa buddhañāṇāni – dukkhe ñāṇaṃ buddhañāṇaṃ, dukkhasamudaye ñāṇaṃ buddhañāṇaṃ…pe… sabbaññutañāṇaṃ buddhañāṇaṃ, anāvaraṇañāṇaṃ buddhañāṇaṃ. Imāni cuddasa buddhañāṇāni. Imesaṃ cuddasannaṃ buddhañāṇānaṃ aṭṭha ñāṇāni sāvakasādhāraṇāni, cha ñāṇāni asādhāraṇāni sāvakehi.
ಯಾವತಾ ದುಕ್ಖಸ್ಸ ದುಕ್ಖಟ್ಠೋ ಞಾತೋ, ಅಞ್ಞಾತೋ ದುಕ್ಖಟ್ಠೋ ನತ್ಥೀತಿ – ಸಮನ್ತಚಕ್ಖು। ಯಂ ಸಮನ್ತಚಕ್ಖು ತಂ ಪಞ್ಞಿನ್ದ್ರಿಯಂ। ಪಞ್ಞಿನ್ದ್ರಿಯಸ್ಸ ವಸೇನ ಅಧಿಮೋಕ್ಖಟ್ಠೇನ ಸದ್ಧಿನ್ದ್ರಿಯಂ, ಪಗ್ಗಹಟ್ಠೇನ ವೀರಿಯಿನ್ದ್ರಿಯಂ, ಉಪಟ್ಠಾನಟ್ಠೇನ ಸತಿನ್ದ್ರಿಯಂ, ಅವಿಕ್ಖೇಪಟ್ಠೇನ ಸಮಾಧಿನ್ದ್ರಿಯಂ। ಯಾವತಾ ದುಕ್ಖಸ್ಸ ದುಕ್ಖಟ್ಠೋ ದಿಟ್ಠೋ ವಿದಿತೋ ಸಚ್ಛಿಕತೋ ಫಸ್ಸಿತೋ ಪಞ್ಞಾಯ; ಅಫಸ್ಸಿತೋ ಪಞ್ಞಾಯ ದುಕ್ಖಟ್ಠೋ ನತ್ಥೀತಿ – ಸಮನ್ತಚಕ್ಖು। ಯಂ ಸಮನ್ತಚಕ್ಖು ತಂ ಪಞ್ಞಿನ್ದ್ರಿಯಂ। ಪಞ್ಞಿನ್ದ್ರಿಯಸ್ಸ ವಸೇನ ಅಧಿಮೋಕ್ಖಟ್ಠೇನ ಸದ್ಧಿನ್ದ್ರಿಯಂ, ಪಗ್ಗಹಟ್ಠೇನ ವೀರಿಯಿನ್ದ್ರಿಯಂ, ಉಪಟ್ಠಾನಟ್ಠೇನ ಸತಿನ್ದ್ರಿಯಂ, ಅವಿಕ್ಖೇಪಟ್ಠೇನ ಸಮಾಧಿನ್ದ್ರಿಯಂ। ಯಾವತಾ ಸಮುದಯಸ್ಸ ಸಮುದಯಟ್ಠೋ…ಪೇ॰… ಯಾವತಾ ನಿರೋಧಸ್ಸ ನಿರೋಧಟ್ಠೋ… ಯಾವತಾ ಮಗ್ಗಸ್ಸ ಮಗ್ಗಟ್ಠೋ… ಯಾವತಾ ಅತ್ಥಪಟಿಸಮ್ಭಿದಾಯ ಅತ್ಥಪಟಿಸಮ್ಭಿದಟ್ಠೋ… ಯಾವತಾ ಧಮ್ಮಪಟಿಸಮ್ಭಿದಾಯ ಧಮ್ಮಪಟಿಸಮ್ಭಿದಟ್ಠೋ… ಯಾವತಾ ನಿರುತ್ತಿಪಟಿಸಮ್ಭಿದಾಯ ನಿರುತ್ತಿಪಟಿಸಮ್ಭಿದಟ್ಠೋ… ಯಾವತಾ ಪಟಿಭಾನಪಟಿಸಮ್ಭಿದಾಯ ಪಟಿಭಾನಪಟಿಸಮ್ಭಿದಟ್ಠೋ… ಯಾವತಾ ಇನ್ದ್ರಿಯಪರೋಪರಿಯತ್ತೇ ಞಾಣಂ… ಯಾವತಾ ಸತ್ತಾನಂ ಆಸಯಾನುಸಯೇ ಞಾಣಂ… ಯಾವತಾ ಯಮಕಪಾಟಿಹೀರೇ ಞಾಣಂ… ಯಾವತಾ ಮಹಾಕರುಣಾಸಮಾಪತ್ತಿಯಾ ಞಾಣಂ… ಯಾವತಾ ಸದೇವಕಸ್ಸ ಲೋಕಸ್ಸ ಸಮಾರಕಸ್ಸ ಸಬ್ರಹ್ಮಕಸ್ಸ ಸಸ್ಸಮಣಬ್ರಾಹ್ಮಣಿಯಾ ಪಜಾಯ ಸದೇವಮನುಸ್ಸಾಯ ದಿಟ್ಠಂ ಸುತಂ ಮುತಂ ವಿಞ್ಞಾತಂ ಪತ್ತಂ ಪರಿಯೇಸಿತಂ ಅನುವಿಚರಿತಂ ಮನಸಾ, ತಂ ಞಾತಂ ದಿಟ್ಠಂ ವಿದಿತಂ ಸಚ್ಛಿಕತಂ ಫಸ್ಸಿತಂ ಪಞ್ಞಾಯ। ಅಫಸ್ಸಿತಂ ಪಞ್ಞಾಯ ನತ್ಥೀತಿ – ಸಮನ್ತಚಕ್ಖು। ಯಂ ಸಮನ್ತಚಕ್ಖು ತಂ ಪಞ್ಞಿನ್ದ್ರಿಯಂ। ಪಞ್ಞಿನ್ದ್ರಿಯಸ್ಸ ವಸೇನ ಅಧಿಮೋಕ್ಖಟ್ಠೇನ ಸದ್ಧಿನ್ದ್ರಿಯಂ, ಪಗ್ಗಹಟ್ಠೇನ ವೀರಿಯಿನ್ದ್ರಿಯಂ, ಉಪಟ್ಠಾನಟ್ಠೇನ ಸತಿನ್ದ್ರಿಯಂ, ಅವಿಕ್ಖೇಪಟ್ಠೇನ ಸಮಾಧಿನ್ದ್ರಿಯಂ।
Yāvatā dukkhassa dukkhaṭṭho ñāto, aññāto dukkhaṭṭho natthīti – samantacakkhu. Yaṃ samantacakkhu taṃ paññindriyaṃ. Paññindriyassa vasena adhimokkhaṭṭhena saddhindriyaṃ, paggahaṭṭhena vīriyindriyaṃ, upaṭṭhānaṭṭhena satindriyaṃ, avikkhepaṭṭhena samādhindriyaṃ. Yāvatā dukkhassa dukkhaṭṭho diṭṭho vidito sacchikato phassito paññāya; aphassito paññāya dukkhaṭṭho natthīti – samantacakkhu. Yaṃ samantacakkhu taṃ paññindriyaṃ. Paññindriyassa vasena adhimokkhaṭṭhena saddhindriyaṃ, paggahaṭṭhena vīriyindriyaṃ, upaṭṭhānaṭṭhena satindriyaṃ, avikkhepaṭṭhena samādhindriyaṃ. Yāvatā samudayassa samudayaṭṭho…pe… yāvatā nirodhassa nirodhaṭṭho… yāvatā maggassa maggaṭṭho… yāvatā atthapaṭisambhidāya atthapaṭisambhidaṭṭho… yāvatā dhammapaṭisambhidāya dhammapaṭisambhidaṭṭho… yāvatā niruttipaṭisambhidāya niruttipaṭisambhidaṭṭho… yāvatā paṭibhānapaṭisambhidāya paṭibhānapaṭisambhidaṭṭho… yāvatā indriyaparopariyatte ñāṇaṃ… yāvatā sattānaṃ āsayānusaye ñāṇaṃ… yāvatā yamakapāṭihīre ñāṇaṃ… yāvatā mahākaruṇāsamāpattiyā ñāṇaṃ… yāvatā sadevakassa lokassa samārakassa sabrahmakassa sassamaṇabrāhmaṇiyā pajāya sadevamanussāya diṭṭhaṃ sutaṃ mutaṃ viññātaṃ pattaṃ pariyesitaṃ anuvicaritaṃ manasā, taṃ ñātaṃ diṭṭhaṃ viditaṃ sacchikataṃ phassitaṃ paññāya. Aphassitaṃ paññāya natthīti – samantacakkhu. Yaṃ samantacakkhu taṃ paññindriyaṃ. Paññindriyassa vasena adhimokkhaṭṭhena saddhindriyaṃ, paggahaṭṭhena vīriyindriyaṃ, upaṭṭhānaṭṭhena satindriyaṃ, avikkhepaṭṭhena samādhindriyaṃ.
ಸದ್ದಹನ್ತೋ ಪಗ್ಗಣ್ಹಾತಿ, ಪಗ್ಗಣ್ಹನ್ತೋ ಸದ್ದಹತಿ। ಸದ್ದಹನ್ತೋ ಉಪಟ್ಠಾಪೇತಿ, ಉಪಟ್ಠಾಪೇನ್ತೋ ಸದ್ದಹತಿ। ಸದ್ದಹನ್ತೋ ಸಮಾದಹತಿ, ಸಮಾದಹನ್ತೋ ಸದ್ದಹತಿ। ಸದ್ದಹನ್ತೋ ಪಜಾನಾತಿ, ಪಜಾನನ್ತೋ ಸದ್ದಹತಿ। ಪಗ್ಗಣ್ಹನ್ತೋ ಉಪಟ್ಠಾಪೇತಿ, ಉಪಟ್ಠಾಪೇನ್ತೋ ಪಗ್ಗಣ್ಹಾತಿ। ಪಗ್ಗಣ್ಹನ್ತೋ ಸಮಾದಹತಿ, ಸಮಾದಹನ್ತೋ ಪಗ್ಗಣ್ಹಾತಿ। ಪಗ್ಗಣ್ಹನ್ತೋ ಪಜಾನಾತಿ, ಪಜಾನನ್ತೋ ಪಗ್ಗಣ್ಹಾತಿ। ಪಗ್ಗಣ್ಹನ್ತೋ ಸದ್ದಹತಿ, ಸದ್ದಹನ್ತೋ ಪಗ್ಗಣ್ಹಾತಿ। ಉಪಟ್ಠಾಪೇನ್ತೋ ಸಮಾದಹತಿ, ಸಮಾದಹನ್ತೋ ಉಪಟ್ಠಾಪೇತಿ। ಉಪಟ್ಠಾಪೇನ್ತೋ ಪಜಾನಾತಿ, ಪಜಾನನ್ತೋ ಉಪಟ್ಠಾಪೇತಿ। ಉಪಟ್ಠಾಪೇನ್ತೋ ಸದ್ದಹತಿ, ಸದ್ದಹನ್ತೋ ಉಪಟ್ಠಾಪೇತಿ। ಉಪಟ್ಠಾಪೇನ್ತೋ ಪಗ್ಗಣ್ಹಾತಿ, ಪಗ್ಗಣ್ಹನ್ತೋ ಉಪಟ್ಠಾಪೇತಿ। ಸಮಾದಹನ್ತೋ ಪಜಾನಾತಿ, ಪಜಾನನ್ತೋ ಸಮಾದಹತಿ। ಸಮಾದಹನ್ತೋ ಸದ್ದಹತಿ, ಸದ್ದಹನ್ತೋ ಸಮಾದಹತಿ। ಸಮಾದಹನ್ತೋ ಪಗ್ಗಣ್ಹಾತಿ, ಪಗ್ಗಣ್ಹನ್ತೋ ಸಮಾದಹತಿ। ಸಮಾದಹನ್ತೋ ಉಪಟ್ಠಾಪೇತಿ, ಉಪಟ್ಠಾಪೇನ್ತೋ ಸಮಾದಹತಿ। ಪಜಾನನ್ತೋ ಸದ್ದಹತಿ, ಸದ್ದಹನ್ತೋ ಪಜಾನಾತಿ। ಪಜಾನನ್ತೋ ಪಗ್ಗಣ್ಹಾತಿ, ಪಗ್ಗಣ್ಹನ್ತೋ ಪಜಾನಾತಿ। ಪಜಾನನ್ತೋ ಉಪಟ್ಠಾಪೇತಿ, ಉಪಟ್ಠಾಪೇನ್ತೋ ಪಜಾನಾತಿ। ಪಜಾನನ್ತೋ ಸಮಾದಹತಿ, ಸಮಾದಹನ್ತೋ ಪಜಾನಾತಿ।
Saddahanto paggaṇhāti, paggaṇhanto saddahati. Saddahanto upaṭṭhāpeti, upaṭṭhāpento saddahati. Saddahanto samādahati, samādahanto saddahati. Saddahanto pajānāti, pajānanto saddahati. Paggaṇhanto upaṭṭhāpeti, upaṭṭhāpento paggaṇhāti. Paggaṇhanto samādahati, samādahanto paggaṇhāti. Paggaṇhanto pajānāti, pajānanto paggaṇhāti. Paggaṇhanto saddahati, saddahanto paggaṇhāti. Upaṭṭhāpento samādahati, samādahanto upaṭṭhāpeti. Upaṭṭhāpento pajānāti, pajānanto upaṭṭhāpeti. Upaṭṭhāpento saddahati, saddahanto upaṭṭhāpeti. Upaṭṭhāpento paggaṇhāti, paggaṇhanto upaṭṭhāpeti. Samādahanto pajānāti, pajānanto samādahati. Samādahanto saddahati, saddahanto samādahati. Samādahanto paggaṇhāti, paggaṇhanto samādahati. Samādahanto upaṭṭhāpeti, upaṭṭhāpento samādahati. Pajānanto saddahati, saddahanto pajānāti. Pajānanto paggaṇhāti, paggaṇhanto pajānāti. Pajānanto upaṭṭhāpeti, upaṭṭhāpento pajānāti. Pajānanto samādahati, samādahanto pajānāti.
ಸದ್ದಹಿತತ್ತಾ ಪಗ್ಗಹಿತಂ, ಪಗ್ಗಹಿತತ್ತಾ ಸದ್ದಹಿತಂ। ಸದ್ದಹಿತತ್ತಾ ಉಪಟ್ಠಾಪಿತಂ, ಉಪಟ್ಠಾಪಿತತ್ತಾ ಸದ್ದಹಿತಂ। ಸದ್ದಹಿತತ್ತಾ ಸಮಾದಹಿತಂ, ಸಮಾದಹಿತತ್ತಾ ಸದ್ದಹಿತಂ। ಸದ್ದಹಿತತ್ತಾ ಪಜಾನಿತಂ, ಪಜಾನಿತತ್ತಾ ಸದ್ದಹಿತಂ। ಪಗ್ಗಹಿತತ್ತಾ ಉಪಟ್ಠಾಪಿತಂ , ಉಪಟ್ಠಾಪಿತತ್ತಾ ಪಗ್ಗಹಿತಂ। ಪಗ್ಗಹಿತತ್ತಾ ಸಮಾದಹಿತಂ, ಸಮಾದಹಿತತ್ತಾ ಪಗ್ಗಹಿತಂ। ಪಗ್ಗಹಿತತ್ತಾ ಪಜಾನಿತಂ ಪಜಾನಿತತ್ತಾ ಪಗ್ಗಹಿತಂ। ಪಗ್ಗಹಿತತ್ತಾ ಸದ್ದಹಿತಂ, ಸದ್ದಹಿತತ್ತಾ ಪಗ್ಗಹಿತಂ। ಉಪಟ್ಠಾಪಿತತ್ತಾ ಸಮಾದಹಿತಂ, ಸಮಾದಹಿತತ್ತಾ ಉಪಟ್ಠಾಪಿತಂ। ಉಪಟ್ಠಾಪಿತತ್ತಾ ಪಜಾನಿತಂ, ಪಜಾನಿತತ್ತಾ ಉಪಟ್ಠಾಪಿತಂ। ಉಪಟ್ಠಾಪಿತತ್ತಾ ಸದ್ದಹಿತಂ, ಸದ್ದಹಿತತ್ತಾ ಉಪಟ್ಠಾಪಿತಂ। ಉಪಟ್ಠಾಪಿತತ್ತಾ ಪಗ್ಗಹಿತಂ, ಪಗ್ಗಹಿತತ್ತಾ ಉಪಟ್ಠಾಪಿತಂ। ಸಮಾದಹಿತತ್ತಾ ಪಜಾನಿತಂ, ಪಜಾನಿತತ್ತಾ ಸಮಾದಹಿತಂ। ಸಮಾದಹಿತತ್ತಾ ಸದ್ದಹಿತಂ, ಸದ್ದಹಿತತ್ತಾ ಸಮಾದಹಿತಂ। ಸಮಾದಹಿತತ್ತಾ ಪಗ್ಗಹಿತಂ, ಪಗ್ಗಹಿತತ್ತಾ ಸಮಾದಹಿತಂ। ಸಮಾದಹಿತತ್ತಾ ಉಪಟ್ಠಾಪಿತಂ, ಉಪಟ್ಠಾಪಿತತ್ತಾ ಸಮಾದಹಿತಂ। ಪಜಾನಿತತ್ತಾ ಸದ್ದಹಿತಂ, ಸದ್ದಹಿತತ್ತಾ ಪಜಾನಿತಂ। ಪಜಾನಿತತ್ತಾ ಪಗ್ಗಹಿತಂ, ಪಗ್ಗಹಿತತ್ತಾ ಪಜಾನಿತಂ। ಪಜಾನಿತತ್ತಾ ಉಪಟ್ಠಾಪಿತಂ, ಉಪಟ್ಠಾಪಿತತ್ತಾ ಪಜಾನಿತಂ। ಪಜಾನಿತತ್ತಾ ಸಮಾದಹಿತಂ, ಸಮಾದಹಿತತ್ತಾ ಪಜಾನಿತಂ।
Saddahitattā paggahitaṃ, paggahitattā saddahitaṃ. Saddahitattā upaṭṭhāpitaṃ, upaṭṭhāpitattā saddahitaṃ. Saddahitattā samādahitaṃ, samādahitattā saddahitaṃ. Saddahitattā pajānitaṃ, pajānitattā saddahitaṃ. Paggahitattā upaṭṭhāpitaṃ , upaṭṭhāpitattā paggahitaṃ. Paggahitattā samādahitaṃ, samādahitattā paggahitaṃ. Paggahitattā pajānitaṃ pajānitattā paggahitaṃ. Paggahitattā saddahitaṃ, saddahitattā paggahitaṃ. Upaṭṭhāpitattā samādahitaṃ, samādahitattā upaṭṭhāpitaṃ. Upaṭṭhāpitattā pajānitaṃ, pajānitattā upaṭṭhāpitaṃ. Upaṭṭhāpitattā saddahitaṃ, saddahitattā upaṭṭhāpitaṃ. Upaṭṭhāpitattā paggahitaṃ, paggahitattā upaṭṭhāpitaṃ. Samādahitattā pajānitaṃ, pajānitattā samādahitaṃ. Samādahitattā saddahitaṃ, saddahitattā samādahitaṃ. Samādahitattā paggahitaṃ, paggahitattā samādahitaṃ. Samādahitattā upaṭṭhāpitaṃ, upaṭṭhāpitattā samādahitaṃ. Pajānitattā saddahitaṃ, saddahitattā pajānitaṃ. Pajānitattā paggahitaṃ, paggahitattā pajānitaṃ. Pajānitattā upaṭṭhāpitaṃ, upaṭṭhāpitattā pajānitaṃ. Pajānitattā samādahitaṃ, samādahitattā pajānitaṃ.
ಯಂ ಬುದ್ಧಚಕ್ಖು ತಂ ಬುದ್ಧಞಾಣಂ, ಯಂ ಬುದ್ಧಞಾಣಂ ತಂ ಬುದ್ಧಚಕ್ಖು, ಯೇನ ಚಕ್ಖುನಾ ತಥಾಗತೋ ಸತ್ತೇ ಪಸ್ಸತಿ ಅಪ್ಪರಜಕ್ಖೇ ಮಹಾರಜಕ್ಖೇ ತಿಕ್ಖಿನ್ದ್ರಿಯೇ ಮುದಿನ್ದ್ರಿಯೇ ಸ್ವಾಕಾರೇ ದ್ವಾಕಾರೇ ಸುವಿಞ್ಞಾಪಯೇ ದುವಿಞ್ಞಾಪಯೇ ಅಪ್ಪೇಕಚ್ಚೇ ಪರಲೋಕವಜ್ಜಭಯದಸ್ಸಾವಿನೋ 5, ಅಪ್ಪೇಕಚ್ಚೇ ನಪರಲೋಕವಜ್ಜಭಯದಸ್ಸಾವಿನೋ।
Yaṃ buddhacakkhu taṃ buddhañāṇaṃ, yaṃ buddhañāṇaṃ taṃ buddhacakkhu, yena cakkhunā tathāgato satte passati apparajakkhe mahārajakkhe tikkhindriye mudindriye svākāre dvākāre suviññāpaye duviññāpaye appekacce paralokavajjabhayadassāvino 6, appekacce naparalokavajjabhayadassāvino.
ಅಪ್ಪರಜಕ್ಖೇ ಮಹಾರಜಕ್ಖೇತಿ ಸದ್ಧೋ ಪುಗ್ಗಲೋ ಅಪ್ಪರಜಕ್ಖೋ, ಅಸ್ಸದ್ಧೋ ಪುಗ್ಗಲೋ ಮಹಾರಜಕ್ಖೋ। ಆರದ್ಧವೀರಿಯೋ ಪುಗ್ಗಲೋ ಅಪ್ಪರಜಕ್ಖೋ, ಕುಸೀತೋ ಪುಗ್ಗಲೋ ಮಹಾರಜಕ್ಖೋ। ಉಪಟ್ಠಿತಸ್ಸತಿ ಪುಗ್ಗಲೋ ಅಪ್ಪರಜಕ್ಖೋ, ಮುಟ್ಠಸ್ಸತಿ ಪುಗ್ಗಲೋ ಮಹಾರಜಕ್ಖೋ। ಸಮಾಹಿತೋ ಪುಗ್ಗಲೋ ಅಪ್ಪರಜಕ್ಖೋ, ಅಸಮಾಹಿತೋ ಪುಗ್ಗಲೋ ಮಹಾರಜಕ್ಖೋ। ಪಞ್ಞವಾ ಪುಗ್ಗಲೋ ಅಪ್ಪರಜಕ್ಖೋ, ದುಪ್ಪಞ್ಞೋ ಪುಗ್ಗಲೋ ಮಹಾರಜಕ್ಖೋ।
Apparajakkhe mahārajakkheti saddho puggalo apparajakkho, assaddho puggalo mahārajakkho. Āraddhavīriyo puggalo apparajakkho, kusīto puggalo mahārajakkho. Upaṭṭhitassati puggalo apparajakkho, muṭṭhassati puggalo mahārajakkho. Samāhito puggalo apparajakkho, asamāhito puggalo mahārajakkho. Paññavā puggalo apparajakkho, duppañño puggalo mahārajakkho.
ತಿಕ್ಖಿನ್ದ್ರಿಯೇ ಮುದಿನ್ದ್ರಿಯೇತಿ ಸದ್ಧೋ ಪುಗ್ಗಲೋ ತಿಕ್ಖಿನ್ದ್ರಿಯೋ, ಅಸ್ಸದ್ಧೋ ಪುಗ್ಗಲೋ ಮುದಿನ್ದ್ರಿಯೋ…ಪೇ॰… ಪಞ್ಞವಾ ಪುಗ್ಗಲೋ ತಿಕ್ಖಿನ್ದ್ರಿಯೋ, ದುಪ್ಪಞ್ಞೋ ಪುಗ್ಗಲೋ ಮುದಿನ್ದ್ರಿಯೋ। ಸ್ವಾಕಾರೇ ದ್ವಾಕಾರೇತಿ ಸದ್ಧೋ ಪುಗ್ಗಲೋ ಸ್ವಾಕಾರೋ, ಅಸ್ಸದ್ಧೋ ಪುಗ್ಗಲೋ ದ್ವಾಕಾರೋ…ಪೇ॰… ಪಞ್ಞವಾ ಪುಗ್ಗಲೋ ಸ್ವಾಕಾರೋ, ದುಪ್ಪಞ್ಞೋ ಪುಗ್ಗಲೋ ದ್ವಾಕಾರೋ। ಸುವಿಞ್ಞಾಪಯೇ ದುವಿಞ್ಞಾಪಯೇತಿ ಸದ್ಧೋ ಪುಗ್ಗಲೋ ಸುವಿಞ್ಞಾಪಯೋ, ಅಸ್ಸದ್ಧೋ ಪುಗ್ಗಲೋ ದುವಿಞ್ಞಾಪಯೋ…ಪೇ॰… ಪಞ್ಞವಾ ಪುಗ್ಗಲೋ ಸುವಿಞ್ಞಾಪಯೋ, ದುಪ್ಪಞ್ಞೋ ಪುಗ್ಗಲೋ ದುವಿಞ್ಞಾಪಯೋ।
Tikkhindriye mudindriyeti saddho puggalo tikkhindriyo, assaddho puggalo mudindriyo…pe… paññavā puggalo tikkhindriyo, duppañño puggalo mudindriyo. Svākāre dvākāreti saddho puggalo svākāro, assaddho puggalo dvākāro…pe… paññavā puggalo svākāro, duppañño puggalo dvākāro. Suviññāpaye duviññāpayeti saddho puggalo suviññāpayo, assaddho puggalo duviññāpayo…pe… paññavā puggalo suviññāpayo, duppañño puggalo duviññāpayo.
ಅಪ್ಪೇಕಚ್ಚೇ ಪರಲೋಕವಜ್ಜಭಯದಸ್ಸಾವಿನೋ, ಅಪ್ಪೇಕಚ್ಚೇ ನಪರಲೋಕವಜ್ಜಭಯದಸ್ಸಾವಿನೋತಿ ಸದ್ಧೋ ಪುಗ್ಗಲೋ ಪರಲೋಕವಜ್ಜಭಯದಸ್ಸಾವೀ, ಅಸ್ಸದ್ಧೋ ಪುಗ್ಗಲೋ ನಪರಲೋಕವಜ್ಜಭಯದಸ್ಸಾವೀ। ಆರದ್ಧವೀರಿಯೋ ಪುಗ್ಗಲೋ ಪರಲೋಕವಜ್ಜಭಯದಸ್ಸಾವೀ , ಕುಸೀತೋ ಪುಗ್ಗಲೋ ನಪರಲೋಕವಜ್ಜಭಯದಸ್ಸಾವೀ…ಪೇ॰… ಪಞ್ಞವಾ ಪುಗ್ಗಲೋ ಪರಲೋಕವಜ್ಜಭಯದಸ್ಸಾವೀ, ದುಪ್ಪಞ್ಞೋ ಪುಗ್ಗಲೋ ನಪರಲೋಕವಜ್ಜಭಯದಸ್ಸಾವೀ।
Appekacceparalokavajjabhayadassāvino, appekacce naparalokavajjabhayadassāvinoti saddho puggalo paralokavajjabhayadassāvī, assaddho puggalo naparalokavajjabhayadassāvī. Āraddhavīriyo puggalo paralokavajjabhayadassāvī , kusīto puggalo naparalokavajjabhayadassāvī…pe… paññavā puggalo paralokavajjabhayadassāvī, duppañño puggalo naparalokavajjabhayadassāvī.
ಲೋಕೋತಿ ಖನ್ಧಲೋಕೋ ಧಾತುಲೋಕೋ ಆಯತನಲೋಕೋ ವಿಪತ್ತಿಭವಲೋಕೋ ವಿಪತ್ತಿಸಮ್ಭವಲೋಕೋ ಸಮ್ಪತ್ತಿಭವಲೋಕೋ ಸಮ್ಪತ್ತಿಸಮ್ಭವಲೋಕೋ।
Lokoti khandhaloko dhātuloko āyatanaloko vipattibhavaloko vipattisambhavaloko sampattibhavaloko sampattisambhavaloko.
ಏಕೋ ಲೋಕೋ – ಸಬ್ಬೇ ಸತ್ತಾ ಆಹಾರಟ್ಠಿತಿಕಾ। ದ್ವೇ ಲೋಕಾ – ನಾಮಞ್ಚ ರೂಪಞ್ಚ। ತಯೋ ಲೋಕಾ – ತಿಸ್ಸೋ ವೇದನಾ। ಚತ್ತಾರೋ ಲೋಕಾ – ಚತ್ತಾರೋ ಆಹಾರಾ। ಪಞ್ಚ ಲೋಕಾ – ಪಞ್ಚುಪಾದಾನಕ್ಖನ್ಧಾ। ಛ ಲೋಕಾ – ಛ ಅಜ್ಝತ್ತಿಕಾನಿ ಆಯತನಾನಿ। ಸತ್ತ ಲೋಕಾ – ಸತ್ತ ವಿಞ್ಞಾಣಟ್ಠಿತಿಯೋ। ಅಟ್ಠ ಲೋಕಾ – ಅಟ್ಠ ಲೋಕಧಮ್ಮಾ। ನವ ಲೋಕಾ – ನವ ಸತ್ತಾವಾಸಾ। ದಸ ಲೋಕಾ – ದಸಾಯತನಾನಿ। ದ್ವಾದಸ ಲೋಕಾ – ದ್ವಾದಸಾಯತನಾನಿ। ಅಟ್ಠಾರಸ ಲೋಕಾ – ಅಟ್ಠಾರಸ ಧಾತುಯೋ।
Eko loko – sabbe sattā āhāraṭṭhitikā. Dve lokā – nāmañca rūpañca. Tayo lokā – tisso vedanā. Cattāro lokā – cattāro āhārā. Pañca lokā – pañcupādānakkhandhā. Cha lokā – cha ajjhattikāni āyatanāni. Satta lokā – satta viññāṇaṭṭhitiyo. Aṭṭha lokā – aṭṭha lokadhammā. Nava lokā – nava sattāvāsā. Dasa lokā – dasāyatanāni. Dvādasa lokā – dvādasāyatanāni. Aṭṭhārasa lokā – aṭṭhārasa dhātuyo.
ವಜ್ಜನ್ತಿ ಸಬ್ಬೇ ಕಿಲೇಸಾ ವಜ್ಜಾ, ಸಬ್ಬೇ ದುಚ್ಚರಿತಾ ವಜ್ಜಾ, ಸಬ್ಬೇ ಅಭಿಸಙ್ಖಾರಾ ವಜ್ಜಾ, ಸಬ್ಬೇ ಭವಗಾಮಿಕಮ್ಮಾ ವಜ್ಜಾ। ಇತಿ ಇಮಸ್ಮಿಞ್ಚ ಲೋಕೇ ಇಮಸ್ಮಿಞ್ಚ ವಜ್ಜೇ ತಿಬ್ಬಾ ಭಯಸಞ್ಞಾ ಪಚ್ಚುಪಟ್ಠಿತಾ ಹೋನ್ತಿ, ಸೇಯ್ಯಥಾಪಿ ಉಕ್ಖಿತ್ತಾಸಿಕೇ ವಧಕೇ। ಇಮೇಹಿ ಪಞ್ಞಾಸಾಯ ಆಕಾರೇಹಿ ಇಮಾನಿ ಪಞ್ಚಿನ್ದ್ರಿಯಾನಿ ಜಾನಾತಿ ಪಸ್ಸತಿ ಅಞ್ಞಾತಿ ಪಟಿವಿಜ್ಝತೀತಿ।
Vajjanti sabbe kilesā vajjā, sabbe duccaritā vajjā, sabbe abhisaṅkhārā vajjā, sabbe bhavagāmikammā vajjā. Iti imasmiñca loke imasmiñca vajje tibbā bhayasaññā paccupaṭṭhitā honti, seyyathāpi ukkhittāsike vadhake. Imehi paññāsāya ākārehi imāni pañcindriyāni jānāti passati aññāti paṭivijjhatīti.
ಇನ್ದ್ರಿಯಸಮೋಧಾನೋ ಪಞ್ಚಮೋ।
Indriyasamodhāno pañcamo.
ತತಿಯಭಾಣವಾರೋ।
Tatiyabhāṇavāro.
ಇನ್ದ್ರಿಯಕಥಾ ನಿಟ್ಠಿತಾ।
Indriyakathā niṭṭhitā.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಖುದ್ದಕನಿಕಾಯ (ಅಟ್ಠಕಥಾ) • Khuddakanikāya (aṭṭhakathā) / ಪಟಿಸಮ್ಭಿದಾಮಗ್ಗ-ಅಟ್ಠಕಥಾ • Paṭisambhidāmagga-aṭṭhakathā / ೫. ಇನ್ದ್ರಿಯಸಮೋಧಾನವಣ್ಣನಾ • 5. Indriyasamodhānavaṇṇanā
