| Library / Tipiṭaka / তিপিটক • Tipiṭaka / অঙ্গুত্তরনিকায (টীকা) • Aṅguttaranikāya (ṭīkā) |
৮. ইন্দ্রিযসংৰরসুত্তৰণ্ণনা
8. Indriyasaṃvarasuttavaṇṇanā
৫০. অট্ঠমে উপনিসীদতি ফলং এত্থাতি কারণং উপনিসা। যথাভূতঞাণদস্সনন্তি যথাসভাৰজাননসঙ্খাতং দস্সনং। এতেন তরুণৰিপস্সনং দস্সেতি। তরুণৰিপস্সনা হি বলৰৰিপস্সনায পচ্চযো হোতি। তরুণৰিপস্সনাতি নামরূপপরিগ্গহে ঞাণং, পচ্চযপরিগ্গহে ঞাণং, সম্মসনে ঞাণং, মগ্গামগ্গে ৰৰত্থপেত্ৰা ঠিতঞাণন্তি চতুন্নং ঞাণানং অধিৰচনং। নিব্বিন্দতি এতাযাতি নিব্বিদা। বলৰৰিপস্সনাতি ভযতুপট্ঠানে ঞাণং আদীনৰানুপস্সনে ঞাণং মুচ্চিতুকম্যতাঞাণং সঙ্খারুপেক্খাঞাণন্তি চতুন্নং ঞাণানং অধিৰচনং। পটিসঙ্খানুপস্সনা পন মুচ্চিতুকম্যতাপক্খিকা এৰ। ‘‘যাৰ মগ্গামগ্গঞাণদস্সনৰিসুদ্ধি, তাৰ তরুণৰিপস্সনা’’তি হি ৰচনতো উপক্কিলেসৰিমুত্তউদযব্বযঞাণতো বলৰৰিপস্সনা। ৰিরজ্জতি অরিযো সঙ্খারতো এতেনাতি ৰিরাগো, অরিযমগ্গো। অরহত্তফলন্তি উক্কট্ঠনিদ্দেসতো ৰুত্তং। ইন্দ্রিযসংৰরস্স সীলরক্খণহেতুত্তা ৰুত্তং ‘‘সীলানুরক্খণইন্দ্রিযসংৰরো কথিতো’’তি।
50. Aṭṭhame upanisīdati phalaṃ etthāti kāraṇaṃ upanisā. Yathābhūtañāṇadassananti yathāsabhāvajānanasaṅkhātaṃ dassanaṃ. Etena taruṇavipassanaṃ dasseti. Taruṇavipassanā hi balavavipassanāya paccayo hoti. Taruṇavipassanāti nāmarūpapariggahe ñāṇaṃ, paccayapariggahe ñāṇaṃ, sammasane ñāṇaṃ, maggāmagge vavatthapetvā ṭhitañāṇanti catunnaṃ ñāṇānaṃ adhivacanaṃ. Nibbindati etāyāti nibbidā. Balavavipassanāti bhayatupaṭṭhāne ñāṇaṃ ādīnavānupassane ñāṇaṃ muccitukamyatāñāṇaṃ saṅkhārupekkhāñāṇanti catunnaṃ ñāṇānaṃ adhivacanaṃ. Paṭisaṅkhānupassanā pana muccitukamyatāpakkhikā eva. ‘‘Yāva maggāmaggañāṇadassanavisuddhi, tāva taruṇavipassanā’’ti hi vacanato upakkilesavimuttaudayabbayañāṇato balavavipassanā. Virajjati ariyo saṅkhārato etenāti virāgo, ariyamaggo. Arahattaphalanti ukkaṭṭhaniddesato vuttaṃ. Indriyasaṃvarassa sīlarakkhaṇahetuttā vuttaṃ ‘‘sīlānurakkhaṇaindriyasaṃvaro kathito’’ti.
ইন্দ্রিযসংৰরসুত্তৰণ্ণনা নিট্ঠিতা।
Indriyasaṃvarasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya / ৮. ইন্দ্রিযসংৰরসুত্তং • 8. Indriyasaṃvarasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ৮. ইন্দ্রিযসংৰরসুত্তৰণ্ণনা • 8. Indriyasaṃvarasuttavaṇṇanā
