| Library / Tipiṭaka / តិបិដក • Tipiṭaka / អង្គុត្តរនិកាយ (ដីកា) • Aṅguttaranikāya (ṭīkā) |
៨. ឥន្ទ្រិយសំវរសុត្តវណ្ណនា
8. Indriyasaṃvarasuttavaṇṇanā
៥០. អដ្ឋមេ ឧបនិសីទតិ ផលំ ឯត្ថាតិ ការណំ ឧបនិសា។ យថាភូតញាណទស្សនន្តិ យថាសភាវជាននសង្ខាតំ ទស្សនំ។ ឯតេន តរុណវិបស្សនំ ទស្សេតិ។ តរុណវិបស្សនា ហិ ពលវវិបស្សនាយ បច្ចយោ ហោតិ។ តរុណវិបស្សនាតិ នាមរូបបរិគ្គហេ ញាណំ, បច្ចយបរិគ្គហេ ញាណំ, សម្មសនេ ញាណំ, មគ្គាមគ្គេ វវត្ថបេត្វា ឋិតញាណន្តិ ចតុន្នំ ញាណានំ អធិវចនំ។ និព្ពិន្ទតិ ឯតាយាតិ និព្ពិទា។ ពលវវិបស្សនាតិ ភយតុបដ្ឋានេ ញាណំ អាទីនវានុបស្សនេ ញាណំ មុច្ចិតុកម្យតាញាណំ សង្ខារុបេក្ខាញាណន្តិ ចតុន្នំ ញាណានំ អធិវចនំ។ បដិសង្ខានុបស្សនា បន មុច្ចិតុកម្យតាបក្ខិកា ឯវ។ ‘‘យាវ មគ្គាមគ្គញាណទស្សនវិសុទ្ធិ, តាវ តរុណវិបស្សនា’’តិ ហិ វចនតោ ឧបក្កិលេសវិមុត្តឧទយព្ពយញាណតោ ពលវវិបស្សនា។ វិរជ្ជតិ អរិយោ សង្ខារតោ ឯតេនាតិ វិរាគោ, អរិយមគ្គោ។ អរហត្តផលន្តិ ឧក្កដ្ឋនិទ្ទេសតោ វុត្តំ។ ឥន្ទ្រិយសំវរស្ស សីលរក្ខណហេតុត្តា វុត្តំ ‘‘សីលានុរក្ខណឥន្ទ្រិយសំវរោ កថិតោ’’តិ។
50. Aṭṭhame upanisīdati phalaṃ etthāti kāraṇaṃ upanisā. Yathābhūtañāṇadassananti yathāsabhāvajānanasaṅkhātaṃ dassanaṃ. Etena taruṇavipassanaṃ dasseti. Taruṇavipassanā hi balavavipassanāya paccayo hoti. Taruṇavipassanāti nāmarūpapariggahe ñāṇaṃ, paccayapariggahe ñāṇaṃ, sammasane ñāṇaṃ, maggāmagge vavatthapetvā ṭhitañāṇanti catunnaṃ ñāṇānaṃ adhivacanaṃ. Nibbindati etāyāti nibbidā. Balavavipassanāti bhayatupaṭṭhāne ñāṇaṃ ādīnavānupassane ñāṇaṃ muccitukamyatāñāṇaṃ saṅkhārupekkhāñāṇanti catunnaṃ ñāṇānaṃ adhivacanaṃ. Paṭisaṅkhānupassanā pana muccitukamyatāpakkhikā eva. ‘‘Yāva maggāmaggañāṇadassanavisuddhi, tāva taruṇavipassanā’’ti hi vacanato upakkilesavimuttaudayabbayañāṇato balavavipassanā. Virajjati ariyo saṅkhārato etenāti virāgo, ariyamaggo. Arahattaphalanti ukkaṭṭhaniddesato vuttaṃ. Indriyasaṃvarassa sīlarakkhaṇahetuttā vuttaṃ ‘‘sīlānurakkhaṇaindriyasaṃvaro kathito’’ti.
ឥន្ទ្រិយសំវរសុត្តវណ្ណនា និដ្ឋិតា។
Indriyasaṃvarasuttavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / អង្គុត្តរនិកាយ • Aṅguttaranikāya / ៨. ឥន្ទ្រិយសំវរសុត្តំ • 8. Indriyasaṃvarasuttaṃ
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā) / ៨. ឥន្ទ្រិយសំវរសុត្តវណ្ណនា • 8. Indriyasaṃvarasuttavaṇṇanā
