| Library / Tipiṭaka / တိပိဋက • Tipiṭaka / အင္ဂုတ္တရနိကာယ (ဋီကာ) • Aṅguttaranikāya (ṭīkā) |
၈. ဣန္ဒ္ရိယသံဝရသုတ္တဝဏ္ဏနာ
8. Indriyasaṃvarasuttavaṇṇanā
၅၀. အဋ္ဌမေ ဥပနိသီဒတိ ဖလံ ဧတ္ထာတိ ကာရဏံ ဥပနိသာ။ ယထာဘူတဉာဏဒသ္သနန္တိ ယထာသဘာဝဇာနနသင္ခာတံ ဒသ္သနံ။ ဧတေန တရုဏဝိပသ္သနံ ဒသ္သေတိ။ တရုဏဝိပသ္သနာ ဟိ ဗလဝဝိပသ္သနာယ ပစ္စယော ဟောတိ။ တရုဏဝိပသ္သနာတိ နာမရူပပရိဂ္ဂဟေ ဉာဏံ, ပစ္စယပရိဂ္ဂဟေ ဉာဏံ, သမ္မသနေ ဉာဏံ, မဂ္ဂာမဂ္ဂေ ဝဝတ္ထပေတ္ဝာ ဌိတဉာဏန္တိ စတုန္နံ ဉာဏာနံ အဓိဝစနံ။ နိဗ္ဗိန္ဒတိ ဧတာယာတိ နိဗ္ဗိဒာ။ ဗလဝဝိပသ္သနာတိ ဘယတုပဋ္ဌာနေ ဉာဏံ အာဒီနဝာနုပသ္သနေ ဉာဏံ မုစ္စိတုကမ္ယတာဉာဏံ သင္ခာရုပေက္ခာဉာဏန္တိ စတုန္နံ ဉာဏာနံ အဓိဝစနံ။ ပဋိသင္ခာနုပသ္သနာ ပန မုစ္စိတုကမ္ယတာပက္ခိကာ ဧဝ။ ‘‘ယာဝ မဂ္ဂာမဂ္ဂဉာဏဒသ္သနဝိသုဒ္ဓိ, တာဝ တရုဏဝိပသ္သနာ’’တိ ဟိ ဝစနတော ဥပက္ကိလေသဝိမုတ္တဥဒယဗ္ဗယဉာဏတော ဗလဝဝိပသ္သနာ။ ဝိရဇ္ဇတိ အရိယော သင္ခာရတော ဧတေနာတိ ဝိရာဂော, အရိယမဂ္ဂော။ အရဟတ္တဖလန္တိ ဥက္ကဋ္ဌနိဒ္ဒေသတော ဝုတ္တံ။ ဣန္ဒ္ရိယသံဝရသ္သ သီလရက္ခဏဟေတုတ္တာ ဝုတ္တံ ‘‘သီလာနုရက္ခဏဣန္ဒ္ရိယသံဝရော ကထိတော’’တိ။
50. Aṭṭhame upanisīdati phalaṃ etthāti kāraṇaṃ upanisā. Yathābhūtañāṇadassananti yathāsabhāvajānanasaṅkhātaṃ dassanaṃ. Etena taruṇavipassanaṃ dasseti. Taruṇavipassanā hi balavavipassanāya paccayo hoti. Taruṇavipassanāti nāmarūpapariggahe ñāṇaṃ, paccayapariggahe ñāṇaṃ, sammasane ñāṇaṃ, maggāmagge vavatthapetvā ṭhitañāṇanti catunnaṃ ñāṇānaṃ adhivacanaṃ. Nibbindati etāyāti nibbidā. Balavavipassanāti bhayatupaṭṭhāne ñāṇaṃ ādīnavānupassane ñāṇaṃ muccitukamyatāñāṇaṃ saṅkhārupekkhāñāṇanti catunnaṃ ñāṇānaṃ adhivacanaṃ. Paṭisaṅkhānupassanā pana muccitukamyatāpakkhikā eva. ‘‘Yāva maggāmaggañāṇadassanavisuddhi, tāva taruṇavipassanā’’ti hi vacanato upakkilesavimuttaudayabbayañāṇato balavavipassanā. Virajjati ariyo saṅkhārato etenāti virāgo, ariyamaggo. Arahattaphalanti ukkaṭṭhaniddesato vuttaṃ. Indriyasaṃvarassa sīlarakkhaṇahetuttā vuttaṃ ‘‘sīlānurakkhaṇaindriyasaṃvaro kathito’’ti.
ဣန္ဒ္ရိယသံဝရသုတ္တဝဏ္ဏနာ နိဋ္ဌိတာ။
Indriyasaṃvarasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၈. ဣန္ဒ္ရိယသံဝရသုတ္တံ • 8. Indriyasaṃvarasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၈. ဣန္ဒ္ရိယသံဝရသုတ္တဝဏ္ဏနာ • 8. Indriyasaṃvarasuttavaṇṇanā
