| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) |
༨. ཨིནྡྲིཡསཾཝརསུཏྟཝཎྞནཱ
8. Indriyasaṃvarasuttavaṇṇanā
༥༠. ཨཊྛམེ ཨུཔནིསཱིདཏི ཕལཾ ཨེཏྠཱཏི ཀཱརཎཾ ཨུཔནིསཱ། ཡཐཱབྷཱུཏཉཱཎདསྶནནྟི ཡཐཱསབྷཱཝཛཱནནསངྑཱཏཾ དསྶནཾ། ཨེཏེན ཏརུཎཝིཔསྶནཾ དསྶེཏི། ཏརུཎཝིཔསྶནཱ ཧི བལཝཝིཔསྶནཱཡ པཙྩཡོ ཧོཏི། ཏརུཎཝིཔསྶནཱཏི ནཱམརཱུཔཔརིགྒཧེ ཉཱཎཾ, པཙྩཡཔརིགྒཧེ ཉཱཎཾ, སམྨསནེ ཉཱཎཾ, མགྒཱམགྒེ ཝཝཏྠཔེཏྭཱ ཋིཏཉཱཎནྟི ཙཏུནྣཾ ཉཱཎཱནཾ ཨདྷིཝཙནཾ། ནིབྦིནྡཏི ཨེཏཱཡཱཏི ནིབྦིདཱ། བལཝཝིཔསྶནཱཏི བྷཡཏུཔཊྛཱནེ ཉཱཎཾ ཨཱདཱིནཝཱནུཔསྶནེ ཉཱཎཾ མུཙྩིཏུཀམྱཏཱཉཱཎཾ སངྑཱརུཔེཀྑཱཉཱཎནྟི ཙཏུནྣཾ ཉཱཎཱནཾ ཨདྷིཝཙནཾ། པཊིསངྑཱནུཔསྶནཱ པན མུཙྩིཏུཀམྱཏཱཔཀྑིཀཱ ཨེཝ། ‘‘ཡཱཝ མགྒཱམགྒཉཱཎདསྶནཝིསུདྡྷི, ཏཱཝ ཏརུཎཝིཔསྶནཱ’’ཏི ཧི ཝཙནཏོ ཨུཔཀྐིལེསཝིམུཏྟཨུདཡབྦཡཉཱཎཏོ བལཝཝིཔསྶནཱ། ཝིརཛྫཏི ཨརིཡོ སངྑཱརཏོ ཨེཏེནཱཏི ཝིརཱགོ, ཨརིཡམགྒོ། ཨརཧཏྟཕལནྟི ཨུཀྐཊྛནིདྡེསཏོ ཝུཏྟཾ། ཨིནྡྲིཡསཾཝརསྶ སཱིལརཀྑཎཧེཏུཏྟཱ ཝུཏྟཾ ‘‘སཱིལཱནུརཀྑཎཨིནྡྲིཡསཾཝརོ ཀཐིཏོ’’ཏི།
50. Aṭṭhame upanisīdati phalaṃ etthāti kāraṇaṃ upanisā. Yathābhūtañāṇadassananti yathāsabhāvajānanasaṅkhātaṃ dassanaṃ. Etena taruṇavipassanaṃ dasseti. Taruṇavipassanā hi balavavipassanāya paccayo hoti. Taruṇavipassanāti nāmarūpapariggahe ñāṇaṃ, paccayapariggahe ñāṇaṃ, sammasane ñāṇaṃ, maggāmagge vavatthapetvā ṭhitañāṇanti catunnaṃ ñāṇānaṃ adhivacanaṃ. Nibbindati etāyāti nibbidā. Balavavipassanāti bhayatupaṭṭhāne ñāṇaṃ ādīnavānupassane ñāṇaṃ muccitukamyatāñāṇaṃ saṅkhārupekkhāñāṇanti catunnaṃ ñāṇānaṃ adhivacanaṃ. Paṭisaṅkhānupassanā pana muccitukamyatāpakkhikā eva. ‘‘Yāva maggāmaggañāṇadassanavisuddhi, tāva taruṇavipassanā’’ti hi vacanato upakkilesavimuttaudayabbayañāṇato balavavipassanā. Virajjati ariyo saṅkhārato etenāti virāgo, ariyamaggo. Arahattaphalanti ukkaṭṭhaniddesato vuttaṃ. Indriyasaṃvarassa sīlarakkhaṇahetuttā vuttaṃ ‘‘sīlānurakkhaṇaindriyasaṃvaro kathito’’ti.
ཨིནྡྲིཡསཾཝརསུཏྟཝཎྞནཱ ནིཊྛིཏཱ།
Indriyasaṃvarasuttavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / ཨངྒུཏྟརནིཀཱཡ • Aṅguttaranikāya / ༨. ཨིནྡྲིཡསཾཝརསུཏྟཾ • 8. Indriyasaṃvarasuttaṃ
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༨. ཨིནྡྲིཡསཾཝརསུཏྟཝཎྞནཱ • 8. Indriyasaṃvarasuttavaṇṇanā
