| Library / Tipiṭaka / তিপিটক • Tipiṭaka / পটিসম্ভিদামগ্গপাল়ি • Paṭisambhidāmaggapāḷi |
১. ইন্দ্রিযৰারো
1. Indriyavāro
২৩. সব্বেসং সত্তানং পীল়নং ৰজ্জেত্ৰা অপীল়নায, উপঘাতং ৰজ্জেত্ৰা অনুপঘাতেন, সন্তাপং ৰজ্জেত্ৰা অসন্তাপেন, পরিযাদানং ৰজ্জেত্ৰা অপরিযাদানেন, ৰিহেসং ৰজ্জেত্ৰা অৰিহেসায, সব্বে সত্তা অৰেরিনো হোন্তু মা ৰেরিনো, সুখিনো হোন্তু মা দুক্খিনো, সুখিতত্তা হোন্তু মা দুক্খিতত্তাতি – ইমেহি অট্ঠহাকারেহি সব্বে সত্তে মেত্তাযতীতি – মেত্তা। তং ধম্মং চেতযতীতি – চেতো। সব্বব্যাপাদপরিযুট্ঠানেহি ৰিমুচ্চতীতি – ৰিমুত্তি। মেত্তা চ চেতো চ ৰিমুত্তি চাতি – মেত্তাচেতোৰিমুত্তি।
23. Sabbesaṃ sattānaṃ pīḷanaṃ vajjetvā apīḷanāya, upaghātaṃ vajjetvā anupaghātena, santāpaṃ vajjetvā asantāpena, pariyādānaṃ vajjetvā apariyādānena, vihesaṃ vajjetvā avihesāya, sabbe sattā averino hontu mā verino, sukhino hontu mā dukkhino, sukhitattā hontu mā dukkhitattāti – imehi aṭṭhahākārehi sabbe satte mettāyatīti – mettā. Taṃ dhammaṃ cetayatīti – ceto. Sabbabyāpādapariyuṭṭhānehi vimuccatīti – vimutti. Mettā ca ceto ca vimutti cāti – mettācetovimutti.
সব্বে সত্তা অৰেরিনো হোন্তু, খেমিনো হোন্তু, সুখিনো হোন্তূতি – সদ্ধায অধিমুচ্চতি। সদ্ধিন্দ্রিযপরিভাৰিতা হোতি মেত্তাচেতোৰিমুত্তি।
Sabbe sattā averino hontu, khemino hontu, sukhino hontūti – saddhāya adhimuccati. Saddhindriyaparibhāvitā hoti mettācetovimutti.
সব্বে সত্তা অৰেরিনো হোন্তু, খেমিনো হোন্তু, সুখিনো হোন্তূতি – ৰীরিযং পগ্গণ্হাতি। ৰীরিযিন্দ্রিযপরিভাৰিতা হোতি মেত্তাচেতোৰিমুত্তি।
Sabbe sattā averino hontu, khemino hontu, sukhino hontūti – vīriyaṃ paggaṇhāti. Vīriyindriyaparibhāvitā hoti mettācetovimutti.
সব্বে সত্তা অৰেরিনো হোন্তু, খেমিনো হোন্তু, সুখিনো হোন্তূতি – সতিং উপট্ঠাপেতি। সতিন্দ্রিযপরিভাৰিতা হোতি মেত্তাচেতোৰিমুত্তি।
Sabbe sattā averino hontu, khemino hontu, sukhino hontūti – satiṃ upaṭṭhāpeti. Satindriyaparibhāvitā hoti mettācetovimutti.
সব্বে সত্তা অৰেরিনো হোন্তু, খেমিনো হোন্তু, সুখিনো হোন্তূতি – চিত্তং সমাদহতি। সমাধিন্দ্রিযপরিভাৰিতা হোতি মেত্তাচেতোৰিমুত্তি।
Sabbe sattā averino hontu, khemino hontu, sukhino hontūti – cittaṃ samādahati. Samādhindriyaparibhāvitā hoti mettācetovimutti.
সব্বে সত্তা অৰেরিনো হোন্তু, খেমিনো হোন্তু, সুখিনো হোন্তূতি – পঞ্ঞায পজানাতি। পঞ্ঞিন্দ্রিযপরিভাৰিতা হোতি মেত্তাচেতোৰিমুত্তি।
Sabbe sattā averino hontu, khemino hontu, sukhino hontūti – paññāya pajānāti. Paññindriyaparibhāvitā hoti mettācetovimutti.
ইমানি পঞ্চিন্দ্রিযানি মেত্তায চেতোৰিমুত্তিযা আসেৰনা হোন্তি। ইমেহি পঞ্চহি ইন্দ্রিযেহি মেত্তাচেতোৰিমুত্তি আসেৰীযতি। ইমানি পঞ্চিন্দ্রিযানি মেত্তায চেতোৰিমুত্তিযা ভাৰনা হোন্তি। ইমেহি পঞ্চহি ইন্দ্রিযেহি মেত্তাচেতোৰিমুত্তি ভাৰীযতি। ইমানি পঞ্চিন্দ্রিযানি মেত্তায চেতোৰিমুত্তিযা বহুলীকতা হোন্তি। ইমেহি পঞ্চহি ইন্দ্রিযেহি মেত্তাচেতোৰিমুত্তি বহুলীকরীযতি। ইমানি পঞ্চিন্দ্রিযানি মেত্তায চেতোৰিমুত্তিযা অলঙ্কারা হোন্তি। ইমেহি পঞ্চহি ইন্দ্রিযেহি মেত্তাচেতোৰিমুত্তি স্ৰালঙ্কতা হোতি। ইমানি পঞ্চিন্দ্রিযানি মেত্তায চেতোৰিমুত্তিযা পরিক্খারা হোন্তি। ইমেহি পঞ্চহি ইন্দ্রিযেহি মেত্তাচেতোৰিমুত্তি সুপরিক্খতা হোতি। ইমানি পঞ্চিন্দ্রিযানি মেত্তায চেতোৰিমুত্তিযা পরিৰারা হোন্তি। ইমেহি পঞ্চহি ইন্দ্রিযেহি মেত্তাচেতোৰিমুত্তি সুপরিৰুতা হোতি। ইমানি পঞ্চিন্দ্রিযানি মেত্তায চেতোৰিমুত্তিযা আসেৰনা হোন্তি, ভাৰনা হোন্তি, বহুলীকতা হোন্তি, অলঙ্কারা হোন্তি, পরিক্খারা হোন্তি, পরিৰারা হোন্তি, পারিপূরী হোন্তি, সহগতা হোন্তি, সহজাতা হোন্তি, সংসট্ঠা হোন্তি, সম্পযুত্তা হোন্তি, পক্খন্দনা হোন্তি, পসীদনা 1 হোন্তি, সন্তিট্ঠনা হোন্তি, ৰিমুচ্চনা হোন্তি, ‘‘এতং সন্ত’’ন্তি ফস্সনা হোন্তি, যানীকতা হোন্তি , ৰত্থুকতা হোন্তি, অনুট্ঠিতা হোন্তি, পরিচিতা হোন্তি, সুসমারদ্ধা হোন্তি, সুভাৰিতা হোন্তি, স্ৰাধিট্ঠিতা হোন্তি, সুসমুগ্গতা হোন্তি , সুৰিমুত্তা হোন্তি, নিব্বত্তেন্তি জোতেন্তি পতাপেন্তি।
Imāni pañcindriyāni mettāya cetovimuttiyā āsevanā honti. Imehi pañcahi indriyehi mettācetovimutti āsevīyati. Imāni pañcindriyāni mettāya cetovimuttiyā bhāvanā honti. Imehi pañcahi indriyehi mettācetovimutti bhāvīyati. Imāni pañcindriyāni mettāya cetovimuttiyā bahulīkatā honti. Imehi pañcahi indriyehi mettācetovimutti bahulīkarīyati. Imāni pañcindriyāni mettāya cetovimuttiyā alaṅkārā honti. Imehi pañcahi indriyehi mettācetovimutti svālaṅkatā hoti. Imāni pañcindriyāni mettāya cetovimuttiyā parikkhārā honti. Imehi pañcahi indriyehi mettācetovimutti suparikkhatā hoti. Imāni pañcindriyāni mettāya cetovimuttiyā parivārā honti. Imehi pañcahi indriyehi mettācetovimutti suparivutā hoti. Imāni pañcindriyāni mettāya cetovimuttiyā āsevanā honti, bhāvanā honti, bahulīkatā honti, alaṅkārā honti, parikkhārā honti, parivārā honti, pāripūrī honti, sahagatā honti, sahajātā honti, saṃsaṭṭhā honti, sampayuttā honti, pakkhandanā honti, pasīdanā 2 honti, santiṭṭhanā honti, vimuccanā honti, ‘‘etaṃ santa’’nti phassanā honti, yānīkatā honti , vatthukatā honti, anuṭṭhitā honti, paricitā honti, susamāraddhā honti, subhāvitā honti, svādhiṭṭhitā honti, susamuggatā honti , suvimuttā honti, nibbattenti jotenti patāpenti.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / পটিসম্ভিদামগ্গ-অট্ঠকথা • Paṭisambhidāmagga-aṭṭhakathā / ১. ইন্দ্রিযৰারৰণ্ণনা • 1. Indriyavāravaṇṇanā
