| Library / Tipiṭaka / တိပိဋက • Tipiṭaka / ပဋိသမ္ဘိဒာမဂ္ဂပာဠိ • Paṭisambhidāmaggapāḷi |
၁. ဣန္ဒ္ရိယဝာရော
1. Indriyavāro
၂၃. သဗ္ဗေသံ သတ္တာနံ ပီဠနံ ဝဇ္ဇေတ္ဝာ အပီဠနာယ, ဥပဃာတံ ဝဇ္ဇေတ္ဝာ အနုပဃာတေန, သန္တာပံ ဝဇ္ဇေတ္ဝာ အသန္တာပေန, ပရိယာဒာနံ ဝဇ္ဇေတ္ဝာ အပရိယာဒာနေန, ဝိဟေသံ ဝဇ္ဇေတ္ဝာ အဝိဟေသာယ, သဗ္ဗေ သတ္တာ အဝေရိနော ဟောန္တု မာ ဝေရိနော, သုခိနော ဟောန္တု မာ ဒုက္ခိနော, သုခိတတ္တာ ဟောန္တု မာ ဒုက္ခိတတ္တာတိ – ဣမေဟိ အဋ္ဌဟာကာရေဟိ သဗ္ဗေ သတ္တေ မေတ္တာယတီတိ – မေတ္တာ။ တံ ဓမ္မံ စေတယတီတိ – စေတော။ သဗ္ဗဗ္ယာပာဒပရိယုဋ္ဌာနေဟိ ဝိမုစ္စတီတိ – ဝိမုတ္တိ။ မေတ္တာ စ စေတော စ ဝိမုတ္တိ စာတိ – မေတ္တာစေတောဝိမုတ္တိ။
23. Sabbesaṃ sattānaṃ pīḷanaṃ vajjetvā apīḷanāya, upaghātaṃ vajjetvā anupaghātena, santāpaṃ vajjetvā asantāpena, pariyādānaṃ vajjetvā apariyādānena, vihesaṃ vajjetvā avihesāya, sabbe sattā averino hontu mā verino, sukhino hontu mā dukkhino, sukhitattā hontu mā dukkhitattāti – imehi aṭṭhahākārehi sabbe satte mettāyatīti – mettā. Taṃ dhammaṃ cetayatīti – ceto. Sabbabyāpādapariyuṭṭhānehi vimuccatīti – vimutti. Mettā ca ceto ca vimutti cāti – mettācetovimutti.
သဗ္ဗေ သတ္တာ အဝေရိနော ဟောန္တု, ခေမိနော ဟောန္တု, သုခိနော ဟောန္တူတိ – သဒ္ဓာယ အဓိမုစ္စတိ။ သဒ္ဓိန္ဒ္ရိယပရိဘာဝိတာ ဟောတိ မေတ္တာစေတောဝိမုတ္တိ။
Sabbe sattā averino hontu, khemino hontu, sukhino hontūti – saddhāya adhimuccati. Saddhindriyaparibhāvitā hoti mettācetovimutti.
သဗ္ဗေ သတ္တာ အဝေရိနော ဟောန္တု, ခေမိနော ဟောန္တု, သုခိနော ဟောန္တူတိ – ဝီရိယံ ပဂ္ဂဏ္ဟာတိ။ ဝီရိယိန္ဒ္ရိယပရိဘာဝိတာ ဟောတိ မေတ္တာစေတောဝိမုတ္တိ။
Sabbe sattā averino hontu, khemino hontu, sukhino hontūti – vīriyaṃ paggaṇhāti. Vīriyindriyaparibhāvitā hoti mettācetovimutti.
သဗ္ဗေ သတ္တာ အဝေရိနော ဟောန္တု, ခေမိနော ဟောန္တု, သုခိနော ဟောန္တူတိ – သတိံ ဥပဋ္ဌာပေတိ။ သတိန္ဒ္ရိယပရိဘာဝိတာ ဟောတိ မေတ္တာစေတောဝိမုတ္တိ။
Sabbe sattā averino hontu, khemino hontu, sukhino hontūti – satiṃ upaṭṭhāpeti. Satindriyaparibhāvitā hoti mettācetovimutti.
သဗ္ဗေ သတ္တာ အဝေရိနော ဟောန္တု, ခေမိနော ဟောန္တု, သုခိနော ဟောန္တူတိ – စိတ္တံ သမာဒဟတိ။ သမာဓိန္ဒ္ရိယပရိဘာဝိတာ ဟောတိ မေတ္တာစေတောဝိမုတ္တိ။
Sabbe sattā averino hontu, khemino hontu, sukhino hontūti – cittaṃ samādahati. Samādhindriyaparibhāvitā hoti mettācetovimutti.
သဗ္ဗေ သတ္တာ အဝေရိနော ဟောန္တု, ခေမိနော ဟောန္တု, သုခိနော ဟောန္တူတိ – ပညာယ ပဇာနာတိ။ ပညိန္ဒ္ရိယပရိဘာဝိတာ ဟောတိ မေတ္တာစေတောဝိမုတ္တိ။
Sabbe sattā averino hontu, khemino hontu, sukhino hontūti – paññāya pajānāti. Paññindriyaparibhāvitā hoti mettācetovimutti.
ဣမာနိ ပဉ္စိန္ဒ္ရိယာနိ မေတ္တာယ စေတောဝိမုတ္တိယာ အာသေဝနာ ဟောန္တိ။ ဣမေဟိ ပဉ္စဟိ ဣန္ဒ္ရိယေဟိ မေတ္တာစေတောဝိမုတ္တိ အာသေဝီယတိ။ ဣမာနိ ပဉ္စိန္ဒ္ရိယာနိ မေတ္တာယ စေတောဝိမုတ္တိယာ ဘာဝနာ ဟောန္တိ။ ဣမေဟိ ပဉ္စဟိ ဣန္ဒ္ရိယေဟိ မေတ္တာစေတောဝိမုတ္တိ ဘာဝီယတိ။ ဣမာနိ ပဉ္စိန္ဒ္ရိယာနိ မေတ္တာယ စေတောဝိမုတ္တိယာ ဗဟုလီကတာ ဟောန္တိ။ ဣမေဟိ ပဉ္စဟိ ဣန္ဒ္ရိယေဟိ မေတ္တာစေတောဝိမုတ္တိ ဗဟုလီကရီယတိ။ ဣမာနိ ပဉ္စိန္ဒ္ရိယာနိ မေတ္တာယ စေတောဝိမုတ္တိယာ အလင္ကာရာ ဟောန္တိ။ ဣမေဟိ ပဉ္စဟိ ဣန္ဒ္ရိယေဟိ မေတ္တာစေတောဝိမုတ္တိ သ္ဝာလင္ကတာ ဟောတိ။ ဣမာနိ ပဉ္စိန္ဒ္ရိယာနိ မေတ္တာယ စေတောဝိမုတ္တိယာ ပရိက္ခာရာ ဟောန္တိ။ ဣမေဟိ ပဉ္စဟိ ဣန္ဒ္ရိယေဟိ မေတ္တာစေတောဝိမုတ္တိ သုပရိက္ခတာ ဟောတိ။ ဣမာနိ ပဉ္စိန္ဒ္ရိယာနိ မေတ္တာယ စေတောဝိမုတ္တိယာ ပရိဝာရာ ဟောန္တိ။ ဣမေဟိ ပဉ္စဟိ ဣန္ဒ္ရိယေဟိ မေတ္တာစေတောဝိမုတ္တိ သုပရိဝုတာ ဟောတိ။ ဣမာနိ ပဉ္စိန္ဒ္ရိယာနိ မေတ္တာယ စေတောဝိမုတ္တိယာ အာသေဝနာ ဟောန္တိ, ဘာဝနာ ဟောန္တိ, ဗဟုလီကတာ ဟောန္တိ, အလင္ကာရာ ဟောန္တိ, ပရိက္ခာရာ ဟောန္တိ, ပရိဝာရာ ဟောန္တိ, ပာရိပူရီ ဟောန္တိ, သဟဂတာ ဟောန္တိ, သဟဇာတာ ဟောန္တိ, သံသဋ္ဌာ ဟောန္တိ, သမ္ပယုတ္တာ ဟောန္တိ, ပက္ခန္ဒနာ ဟောန္တိ, ပသီဒနာ 1 ဟောန္တိ, သန္တိဋ္ဌနာ ဟောန္တိ, ဝိမုစ္စနာ ဟောန္တိ, ‘‘ဧတံ သန္တ’’န္တိ ဖသ္သနာ ဟောန္တိ, ယာနီကတာ ဟောန္တိ , ဝတ္ထုကတာ ဟောန္တိ, အနုဋ္ဌိတာ ဟောန္တိ, ပရိစိတာ ဟောန္တိ, သုသမာရဒ္ဓာ ဟောန္တိ, သုဘာဝိတာ ဟောန္တိ, သ္ဝာဓိဋ္ဌိတာ ဟောန္တိ, သုသမုဂ္ဂတာ ဟောန္တိ , သုဝိမုတ္တာ ဟောန္တိ, နိဗ္ဗတ္တေန္တိ ဇောတေန္တိ ပတာပေန္တိ။
Imāni pañcindriyāni mettāya cetovimuttiyā āsevanā honti. Imehi pañcahi indriyehi mettācetovimutti āsevīyati. Imāni pañcindriyāni mettāya cetovimuttiyā bhāvanā honti. Imehi pañcahi indriyehi mettācetovimutti bhāvīyati. Imāni pañcindriyāni mettāya cetovimuttiyā bahulīkatā honti. Imehi pañcahi indriyehi mettācetovimutti bahulīkarīyati. Imāni pañcindriyāni mettāya cetovimuttiyā alaṅkārā honti. Imehi pañcahi indriyehi mettācetovimutti svālaṅkatā hoti. Imāni pañcindriyāni mettāya cetovimuttiyā parikkhārā honti. Imehi pañcahi indriyehi mettācetovimutti suparikkhatā hoti. Imāni pañcindriyāni mettāya cetovimuttiyā parivārā honti. Imehi pañcahi indriyehi mettācetovimutti suparivutā hoti. Imāni pañcindriyāni mettāya cetovimuttiyā āsevanā honti, bhāvanā honti, bahulīkatā honti, alaṅkārā honti, parikkhārā honti, parivārā honti, pāripūrī honti, sahagatā honti, sahajātā honti, saṃsaṭṭhā honti, sampayuttā honti, pakkhandanā honti, pasīdanā 2 honti, santiṭṭhanā honti, vimuccanā honti, ‘‘etaṃ santa’’nti phassanā honti, yānīkatā honti , vatthukatā honti, anuṭṭhitā honti, paricitā honti, susamāraddhā honti, subhāvitā honti, svādhiṭṭhitā honti, susamuggatā honti , suvimuttā honti, nibbattenti jotenti patāpenti.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / ခုဒ္ဒကနိကာယ (အဋ္ဌကထာ) • Khuddakanikāya (aṭṭhakathā) / ပဋိသမ္ဘိဒာမဂ္ဂ-အဋ္ဌကထာ • Paṭisambhidāmagga-aṭṭhakathā / ၁. ဣန္ဒ္ရိယဝာရဝဏ္ဏနာ • 1. Indriyavāravaṇṇanā
