| Library / Tipiṭaka / ཏིཔིཊཀ • Tipiṭaka / པཊིསམྦྷིདཱམགྒཔཱལི༹ • Paṭisambhidāmaggapāḷi |
༡. ཨིནྡྲིཡཝཱརོ
1. Indriyavāro
༢༣. སབྦེསཾ སཏྟཱནཾ པཱིལ༹ནཾ ཝཛྫེཏྭཱ ཨཔཱིལ༹ནཱཡ, ཨུཔགྷཱཏཾ ཝཛྫེཏྭཱ ཨནུཔགྷཱཏེན, སནྟཱཔཾ ཝཛྫེཏྭཱ ཨསནྟཱཔེན, པརིཡཱདཱནཾ ཝཛྫེཏྭཱ ཨཔརིཡཱདཱནེན, ཝིཧེསཾ ཝཛྫེཏྭཱ ཨཝིཧེསཱཡ, སབྦེ སཏྟཱ ཨཝེརིནོ ཧོནྟུ མཱ ཝེརིནོ, སུཁིནོ ཧོནྟུ མཱ དུཀྑིནོ, སུཁིཏཏྟཱ ཧོནྟུ མཱ དུཀྑིཏཏྟཱཏི – ཨིམེཧི ཨཊྛཧཱཀཱརེཧི སབྦེ སཏྟེ མེཏྟཱཡཏཱིཏི – མེཏྟཱ། ཏཾ དྷམྨཾ ཙེཏཡཏཱིཏི – ཙེཏོ། སབྦབྱཱཔཱདཔརིཡུཊྛཱནེཧི ཝིམུཙྩཏཱིཏི – ཝིམུཏྟི། མེཏྟཱ ཙ ཙེཏོ ཙ ཝིམུཏྟི ཙཱཏི – མེཏྟཱཙེཏོཝིམུཏྟི།
23. Sabbesaṃ sattānaṃ pīḷanaṃ vajjetvā apīḷanāya, upaghātaṃ vajjetvā anupaghātena, santāpaṃ vajjetvā asantāpena, pariyādānaṃ vajjetvā apariyādānena, vihesaṃ vajjetvā avihesāya, sabbe sattā averino hontu mā verino, sukhino hontu mā dukkhino, sukhitattā hontu mā dukkhitattāti – imehi aṭṭhahākārehi sabbe satte mettāyatīti – mettā. Taṃ dhammaṃ cetayatīti – ceto. Sabbabyāpādapariyuṭṭhānehi vimuccatīti – vimutti. Mettā ca ceto ca vimutti cāti – mettācetovimutti.
སབྦེ སཏྟཱ ཨཝེརིནོ ཧོནྟུ, ཁེམིནོ ཧོནྟུ, སུཁིནོ ཧོནྟཱུཏི – སདྡྷཱཡ ཨདྷིམུཙྩཏི། སདྡྷིནྡྲིཡཔརིབྷཱཝིཏཱ ཧོཏི མེཏྟཱཙེཏོཝིམུཏྟི།
Sabbe sattā averino hontu, khemino hontu, sukhino hontūti – saddhāya adhimuccati. Saddhindriyaparibhāvitā hoti mettācetovimutti.
སབྦེ སཏྟཱ ཨཝེརིནོ ཧོནྟུ, ཁེམིནོ ཧོནྟུ, སུཁིནོ ཧོནྟཱུཏི – ཝཱིརིཡཾ པགྒཎྷཱཏི། ཝཱིརིཡིནྡྲིཡཔརིབྷཱཝིཏཱ ཧོཏི མེཏྟཱཙེཏོཝིམུཏྟི།
Sabbe sattā averino hontu, khemino hontu, sukhino hontūti – vīriyaṃ paggaṇhāti. Vīriyindriyaparibhāvitā hoti mettācetovimutti.
སབྦེ སཏྟཱ ཨཝེརིནོ ཧོནྟུ, ཁེམིནོ ཧོནྟུ, སུཁིནོ ཧོནྟཱུཏི – སཏིཾ ཨུཔཊྛཱཔེཏི། སཏིནྡྲིཡཔརིབྷཱཝིཏཱ ཧོཏི མེཏྟཱཙེཏོཝིམུཏྟི།
Sabbe sattā averino hontu, khemino hontu, sukhino hontūti – satiṃ upaṭṭhāpeti. Satindriyaparibhāvitā hoti mettācetovimutti.
སབྦེ སཏྟཱ ཨཝེརིནོ ཧོནྟུ, ཁེམིནོ ཧོནྟུ, སུཁིནོ ཧོནྟཱུཏི – ཙིཏྟཾ སམཱདཧཏི། སམཱདྷིནྡྲིཡཔརིབྷཱཝིཏཱ ཧོཏི མེཏྟཱཙེཏོཝིམུཏྟི།
Sabbe sattā averino hontu, khemino hontu, sukhino hontūti – cittaṃ samādahati. Samādhindriyaparibhāvitā hoti mettācetovimutti.
སབྦེ སཏྟཱ ཨཝེརིནོ ཧོནྟུ, ཁེམིནོ ཧོནྟུ, སུཁིནོ ཧོནྟཱུཏི – པཉྙཱཡ པཛཱནཱཏི། པཉྙིནྡྲིཡཔརིབྷཱཝིཏཱ ཧོཏི མེཏྟཱཙེཏོཝིམུཏྟི།
Sabbe sattā averino hontu, khemino hontu, sukhino hontūti – paññāya pajānāti. Paññindriyaparibhāvitā hoti mettācetovimutti.
ཨིམཱནི པཉྩིནྡྲིཡཱནི མེཏྟཱཡ ཙེཏོཝིམུཏྟིཡཱ ཨཱསེཝནཱ ཧོནྟི། ཨིམེཧི པཉྩཧི ཨིནྡྲིཡེཧི མེཏྟཱཙེཏོཝིམུཏྟི ཨཱསེཝཱིཡཏི། ཨིམཱནི པཉྩིནྡྲིཡཱནི མེཏྟཱཡ ཙེཏོཝིམུཏྟིཡཱ བྷཱཝནཱ ཧོནྟི། ཨིམེཧི པཉྩཧི ཨིནྡྲིཡེཧི མེཏྟཱཙེཏོཝིམུཏྟི བྷཱཝཱིཡཏི། ཨིམཱནི པཉྩིནྡྲིཡཱནི མེཏྟཱཡ ཙེཏོཝིམུཏྟིཡཱ བཧུལཱིཀཏཱ ཧོནྟི། ཨིམེཧི པཉྩཧི ཨིནྡྲིཡེཧི མེཏྟཱཙེཏོཝིམུཏྟི བཧུལཱིཀརཱིཡཏི། ཨིམཱནི པཉྩིནྡྲིཡཱནི མེཏྟཱཡ ཙེཏོཝིམུཏྟིཡཱ ཨལངྐཱརཱ ཧོནྟི། ཨིམེཧི པཉྩཧི ཨིནྡྲིཡེཧི མེཏྟཱཙེཏོཝིམུཏྟི སྭཱལངྐཏཱ ཧོཏི། ཨིམཱནི པཉྩིནྡྲིཡཱནི མེཏྟཱཡ ཙེཏོཝིམུཏྟིཡཱ པརིཀྑཱརཱ ཧོནྟི། ཨིམེཧི པཉྩཧི ཨིནྡྲིཡེཧི མེཏྟཱཙེཏོཝིམུཏྟི སུཔརིཀྑཏཱ ཧོཏི། ཨིམཱནི པཉྩིནྡྲིཡཱནི མེཏྟཱཡ ཙེཏོཝིམུཏྟིཡཱ པརིཝཱརཱ ཧོནྟི། ཨིམེཧི པཉྩཧི ཨིནྡྲིཡེཧི མེཏྟཱཙེཏོཝིམུཏྟི སུཔརིཝུཏཱ ཧོཏི། ཨིམཱནི པཉྩིནྡྲིཡཱནི མེཏྟཱཡ ཙེཏོཝིམུཏྟིཡཱ ཨཱསེཝནཱ ཧོནྟི, བྷཱཝནཱ ཧོནྟི, བཧུལཱིཀཏཱ ཧོནྟི, ཨལངྐཱརཱ ཧོནྟི, པརིཀྑཱརཱ ཧོནྟི, པརིཝཱརཱ ཧོནྟི, པཱརིཔཱུརཱི ཧོནྟི, སཧགཏཱ ཧོནྟི, སཧཛཱཏཱ ཧོནྟི, སཾསཊྛཱ ཧོནྟི, སམྤཡུཏྟཱ ཧོནྟི, པཀྑནྡནཱ ཧོནྟི, པསཱིདནཱ 1 ཧོནྟི, སནྟིཊྛནཱ ཧོནྟི, ཝིམུཙྩནཱ ཧོནྟི, ‘‘ཨེཏཾ སནྟ’’ནྟི ཕསྶནཱ ཧོནྟི, ཡཱནཱིཀཏཱ ཧོནྟི , ཝཏྠུཀཏཱ ཧོནྟི, ཨནུཊྛིཏཱ ཧོནྟི, པརིཙིཏཱ ཧོནྟི, སུསམཱརདྡྷཱ ཧོནྟི, སུབྷཱཝིཏཱ ཧོནྟི, སྭཱདྷིཊྛིཏཱ ཧོནྟི, སུསམུགྒཏཱ ཧོནྟི , སུཝིམུཏྟཱ ཧོནྟི, ནིབྦཏྟེནྟི ཛོཏེནྟི པཏཱཔེནྟི།
Imāni pañcindriyāni mettāya cetovimuttiyā āsevanā honti. Imehi pañcahi indriyehi mettācetovimutti āsevīyati. Imāni pañcindriyāni mettāya cetovimuttiyā bhāvanā honti. Imehi pañcahi indriyehi mettācetovimutti bhāvīyati. Imāni pañcindriyāni mettāya cetovimuttiyā bahulīkatā honti. Imehi pañcahi indriyehi mettācetovimutti bahulīkarīyati. Imāni pañcindriyāni mettāya cetovimuttiyā alaṅkārā honti. Imehi pañcahi indriyehi mettācetovimutti svālaṅkatā hoti. Imāni pañcindriyāni mettāya cetovimuttiyā parikkhārā honti. Imehi pañcahi indriyehi mettācetovimutti suparikkhatā hoti. Imāni pañcindriyāni mettāya cetovimuttiyā parivārā honti. Imehi pañcahi indriyehi mettācetovimutti suparivutā hoti. Imāni pañcindriyāni mettāya cetovimuttiyā āsevanā honti, bhāvanā honti, bahulīkatā honti, alaṅkārā honti, parikkhārā honti, parivārā honti, pāripūrī honti, sahagatā honti, sahajātā honti, saṃsaṭṭhā honti, sampayuttā honti, pakkhandanā honti, pasīdanā 2 honti, santiṭṭhanā honti, vimuccanā honti, ‘‘etaṃ santa’’nti phassanā honti, yānīkatā honti , vatthukatā honti, anuṭṭhitā honti, paricitā honti, susamāraddhā honti, subhāvitā honti, svādhiṭṭhitā honti, susamuggatā honti , suvimuttā honti, nibbattenti jotenti patāpenti.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཁུདྡཀནིཀཱཡ (ཨཊྛཀཐཱ) • Khuddakanikāya (aṭṭhakathā) / པཊིསམྦྷིདཱམགྒ-ཨཊྛཀཐཱ • Paṭisambhidāmagga-aṭṭhakathā / ༡. ཨིནྡྲིཡཝཱརཝཎྞནཱ • 1. Indriyavāravaṇṇanā
