| Library / Tipiṭaka / তিপিটক • Tipiṭaka / ৰিভঙ্গ-অনুটীকা • Vibhaṅga-anuṭīkā |
৫. ইন্দ্রিযৰিভঙ্গো
5. Indriyavibhaṅgo
১. অভিধম্মভাজনীযৰণ্ণনা
1. Abhidhammabhājanīyavaṇṇanā
২১৯. চক্খুদ্ৰারভাৰেতি চক্খুদ্ৰারভাৰহেতু। তংদ্ৰারিকেহীতি তস্মিং দ্ৰারে পৰত্তনকেহি চিত্তচেতসিকেহি। তে হি ‘‘তং দ্ৰারং পৰত্তিওকাসভূতং এতেসং অত্থী’’তি তংদ্ৰারিকা। ননু চ তব্বত্থুকেহিপি তং ইন্দট্ঠং কারেতি। তেনাহ অট্ঠকথাযং ‘‘তিক্খে তিক্খত্তা, মন্দে চ মন্দত্তা’’তি? সচ্চং কারেতি, তব্বত্থুকাপি পন ইধ ‘‘তংদ্ৰারিকা’’ইচ্চেৰ ৰুত্তা। অপরিচ্চত্তদ্ৰারভাৰংযেৰ হি চক্খু নিস্সযট্ঠেন ‘‘ৰত্থূ’’তি ৰুচ্চতি। অথ ৰা তংদ্ৰারিকেসু তস্স ইন্দট্ঠো পাকটোতি ‘‘তংদ্ৰারিকেহী’’তি ৰুত্তং। ইন্দট্ঠো পরেহি অনুৰত্তনীযতা পরমিস্সরভাৰোতি দস্সেন্তো ‘‘তঞ্হি…পে॰… অনুৰত্তন্তী’’তি আহ। তত্থ তন্তি চক্খুং। তেতি তংদ্ৰারিকে। কিরিযানিট্ঠানৰাচী আৰী-সদ্দো ‘‘ৰিজিতাৰী’’তিআদীসু (দী॰ নি॰ ১.২৫৮; ২.৩৩; ৩.১৯৯) ৰিযাতি আহ ‘‘পরিনিট্ঠিতকিচ্চজানন’’ন্তি।
219. Cakkhudvārabhāveti cakkhudvārabhāvahetu. Taṃdvārikehīti tasmiṃ dvāre pavattanakehi cittacetasikehi. Te hi ‘‘taṃ dvāraṃ pavattiokāsabhūtaṃ etesaṃ atthī’’ti taṃdvārikā. Nanu ca tabbatthukehipi taṃ indaṭṭhaṃ kāreti. Tenāha aṭṭhakathāyaṃ ‘‘tikkhe tikkhattā, mande ca mandattā’’ti? Saccaṃ kāreti, tabbatthukāpi pana idha ‘‘taṃdvārikā’’icceva vuttā. Apariccattadvārabhāvaṃyeva hi cakkhu nissayaṭṭhena ‘‘vatthū’’ti vuccati. Atha vā taṃdvārikesu tassa indaṭṭho pākaṭoti ‘‘taṃdvārikehī’’ti vuttaṃ. Indaṭṭho parehi anuvattanīyatā paramissarabhāvoti dassento ‘‘tañhi…pe… anuvattantī’’ti āha. Tattha tanti cakkhuṃ. Teti taṃdvārike. Kiriyāniṭṭhānavācī āvī-saddo ‘‘vijitāvī’’tiādīsu (dī. ni. 1.258; 2.33; 3.199) viyāti āha ‘‘pariniṭṭhitakiccajānana’’nti.
‘‘ছ ইমানি, ভিক্খৰে, ইন্দ্রিযানি। কতমানি ছ? চক্খুন্দ্রিযং…পে॰… মনিন্দ্রিয’’ন্তি (সং॰ নি॰ ৫.৪৯৫-৪৯৯) এৰং কত্থচি ছপিন্দ্রিযানি আগতানি, কস্মা পন সুত্তন্তে খন্ধাদযো ৰিয ইন্দ্রিযানি একজ্ঝং ন ৰুত্তানি, অভিধম্মে চ ৰুত্তানীতি আহ ‘‘তত্থ সুত্তন্তে’’তিআদি। নিস্সরণূপাযাদিভাৰতোতি এত্থ লোকুত্তরেসু মগ্গপরিযাপন্নানি নিস্সরণং, ইতরানি নিস্সরণফলং, ৰিৰট্টসন্নিস্সিতেন নিব্বত্তিতানি সদ্ধিন্দ্রিযাদীনি নিস্সরণূপাযো, ইতরেসু কানিচি পৰত্তিভূতানি, কানিচি পৰত্তিউপাযোতি ৰেদিতব্বানি।
‘‘Cha imāni, bhikkhave, indriyāni. Katamāni cha? Cakkhundriyaṃ…pe… manindriya’’nti (saṃ. ni. 5.495-499) evaṃ katthaci chapindriyāni āgatāni, kasmā pana suttante khandhādayo viya indriyāni ekajjhaṃ na vuttāni, abhidhamme ca vuttānīti āha ‘‘tattha suttante’’tiādi. Nissaraṇūpāyādibhāvatoti ettha lokuttaresu maggapariyāpannāni nissaraṇaṃ, itarāni nissaraṇaphalaṃ, vivaṭṭasannissitena nibbattitāni saddhindriyādīni nissaraṇūpāyo, itaresu kānici pavattibhūtāni, kānici pavattiupāyoti veditabbāni.
খীণাসৰস্স ভাৰভূতোতি ছল়ঙ্গুপেক্খা ৰিয খীণাসৰস্সেৰ ধম্মভূতো।
Khīṇāsavassa bhāvabhūtoti chaḷaṅgupekkhā viya khīṇāsavasseva dhammabhūto.
দ্ৰে অত্থাতি ইন্দলিঙ্গইন্দসিট্ঠট্ঠা। অত্তনো পচ্চযৰসেনাতি যথাসকং কম্মাদিপচ্চযৰসেন। তংসহিতসন্তানেতি ইত্থিন্দ্রিযসহিতে, পুরিসিন্দ্রিযসহিতে চ সন্তানে। অঞ্ঞাকারেনাতি ইত্থিআদিতো অঞ্ঞেন আকারেন। অনুৰত্তনীযভাৰো ইত্থিপুরিসিন্দ্রিযানং আধিপচ্চন্তি যোজনা। ইমস্মিঞ্চত্থেতি আধিপচ্চত্থে।
Dveatthāti indaliṅgaindasiṭṭhaṭṭhā. Attano paccayavasenāti yathāsakaṃ kammādipaccayavasena. Taṃsahitasantāneti itthindriyasahite, purisindriyasahite ca santāne. Aññākārenāti itthiādito aññena ākārena. Anuvattanīyabhāvo itthipurisindriyānaṃ ādhipaccanti yojanā. Imasmiñcattheti ādhipaccatthe.
তেসন্তি অনঞ্ঞাতঞ্ঞস্সামীতিন্দ্রিযাদীনং তিণ্ণং। যা সুখদুক্খিন্দ্রিযানং ইট্ঠানিট্ঠাকারসম্ভোগরসতা ৰুত্তা, সা আরম্মণসভাৰেনেৰ ৰেদিতব্বা, ন একচ্চসোমনস্সিন্দ্রিযাদীনং ৰিয পরিকপ্পৰসেনাতি দস্সেন্তো ‘‘এত্থ চা’’তিআদিমাহ।
Tesanti anaññātaññassāmītindriyādīnaṃ tiṇṇaṃ. Yā sukhadukkhindriyānaṃ iṭṭhāniṭṭhākārasambhogarasatā vuttā, sā ārammaṇasabhāveneva veditabbā, na ekaccasomanassindriyādīnaṃ viya parikappavasenāti dassento ‘‘ettha cā’’tiādimāha.
যদিপি পুরিসিন্দ্রিযানন্তরং জীৰিতিন্দ্রিযং রূপকণ্ডেপি (ধ॰ স॰ ৫৮৪) দেসিতং, তং পন রূপজীৰিতিন্দ্রিযং, ন চ তত্থ মনিন্দ্রিযং ৰত্ৰা ইত্থিপুরিসিন্দ্রিযানি ৰুত্তানি। ইধ পন অট্ঠকথাযং ইন্দ্রিযানুক্কমো ৰুত্তো সব্বাকারেন যমকদেসনায সংসন্দতীতি দস্সেন্তো আহ ‘‘সো ইন্দ্রিযযমকদেসনায সমেতী’’তি। পুরিমপচ্ছিমানং অজ্ঝত্তিকবাহিরানন্তি চক্খাদীনং পুরিমানং অজ্ঝত্তিকানং, ইত্থিন্দ্রিযাদীনং পচ্ছিমানং বাহিরানং। তেসং মজ্ঝে ৰুত্তং উভযেসং উপকারকতাদীপনত্থন্তি অধিপ্পাযো। তেন এৰম্পি দেসনন্তরানুরোধেন জীৰিতিন্দ্রিযস্স অনুক্কমং ৰত্তুং ৰট্টতীতি দস্সেতি। কামঞ্চেত্থ এৰং ৰুত্তং, পরতো পন কিচ্চৰিনিচ্ছযে ইধ পাল়িযং আগতনিযামেনেৰ মনিন্দ্রিযানন্তরং জীৰিতিন্দ্রিযস্স, তদনন্তরঞ্চ ইত্থিপুরিসিন্দ্রিযানং কিচ্চৰিনিচ্ছযং দস্সেস্সতি। সব্বং তং দুক্খং সঙ্খারদুক্খভাৰেন, যথারহং ৰা দুক্খদুক্খতাদিভাৰেন। দুৰিধত্তভাৰানুপালকস্সাতি রূপারূপৰসেন দুৰিধস্স অত্তভাৰস্স অনুপালকস্স। রূপারূপৰসেন দুৰিধম্পি হি জীৰিতিন্দ্রিযং ইধ গহিতং। ‘‘পৰত্তী’’তি এতেন সহজাতধম্মানং পৰত্তনরসেন জীৰিতিন্দ্রিযেন ৰেদযিতানং পৰত্তেতব্বতং দীপেতি। ‘‘ভাৰনামগ্গসম্পযুত্ত’’ন্তি ইমিনা ফলভূতং অঞ্ঞিন্দ্রিযং নিৰত্তেতি। ভাৰনাগহণঞ্চেত্থ সক্কা অৰত্তুং। ‘‘ভাৰেতব্বত্তা’’তি ৰুত্তত্তা ভাৰনাভাৰো পাকটোৰ। দস্সনানন্তরাতি সমানজাতিভূমিকেন অব্যৰহিততং সন্ধাযাহ, ন অনন্তরপচ্চযং।
Yadipi purisindriyānantaraṃ jīvitindriyaṃ rūpakaṇḍepi (dha. sa. 584) desitaṃ, taṃ pana rūpajīvitindriyaṃ, na ca tattha manindriyaṃ vatvā itthipurisindriyāni vuttāni. Idha pana aṭṭhakathāyaṃ indriyānukkamo vutto sabbākārena yamakadesanāya saṃsandatīti dassento āha ‘‘so indriyayamakadesanāya sametī’’ti. Purimapacchimānaṃ ajjhattikabāhirānanti cakkhādīnaṃ purimānaṃ ajjhattikānaṃ, itthindriyādīnaṃ pacchimānaṃ bāhirānaṃ. Tesaṃ majjhe vuttaṃ ubhayesaṃ upakārakatādīpanatthanti adhippāyo. Tena evampi desanantarānurodhena jīvitindriyassa anukkamaṃ vattuṃ vaṭṭatīti dasseti. Kāmañcettha evaṃ vuttaṃ, parato pana kiccavinicchaye idha pāḷiyaṃ āgataniyāmeneva manindriyānantaraṃ jīvitindriyassa, tadanantarañca itthipurisindriyānaṃ kiccavinicchayaṃ dassessati. Sabbaṃ taṃ dukkhaṃ saṅkhāradukkhabhāvena, yathārahaṃ vā dukkhadukkhatādibhāvena. Duvidhattabhāvānupālakassāti rūpārūpavasena duvidhassa attabhāvassa anupālakassa. Rūpārūpavasena duvidhampi hi jīvitindriyaṃ idha gahitaṃ. ‘‘Pavattī’’ti etena sahajātadhammānaṃ pavattanarasena jīvitindriyena vedayitānaṃ pavattetabbataṃ dīpeti. ‘‘Bhāvanāmaggasampayutta’’nti iminā phalabhūtaṃ aññindriyaṃ nivatteti. Bhāvanāgahaṇañcettha sakkā avattuṃ. ‘‘Bhāvetabbattā’’ti vuttattā bhāvanābhāvo pākaṭova. Dassanānantarāti samānajātibhūmikena abyavahitataṃ sandhāyāha, na anantarapaccayaṃ.
তস্সাতি ইন্দ্রিযপচ্চযভাৰস্স। অনঞ্ঞসাধারণত্তাতি অঞ্ঞেহি অনিন্দ্রিযেহি অসাধারণত্তা। এৰং সামত্থিযতো কিচ্চৰিসেসং ৰৰত্থপেত্ৰা পকরণতোপি তং দস্সেতি ‘‘ইন্দ্রিযকথায চ পৰত্তত্তা’’তি। অঞ্ঞেসন্তি অঞ্ঞেসং ইন্দ্রিযসভাৰানম্পি সহজাতধম্মানং। যেহি তে ইন্দট্ঠং কারেন্তি, তেসং ৰসৰত্তাপনং নত্থি, যথা মনিন্দ্রিযস্স পুব্বঙ্গমসভাৰাভাৰতো সযঞ্চ তে অঞ্ঞদত্থু মনিন্দ্রিযস্সেৰ ৰসে ৰত্তন্তি। তেনাহ ‘‘তংসম্পযুত্তানিপি হী’’তিআদি। যদি এৰং কথং তেসং ইন্দট্ঠোতি? ‘‘সুখনাদিলক্খণে সম্পযুত্তানং অত্তাকারানুৰিধাপনমত্ত’’ন্তি ৰুত্তোৰাযমত্থো । ‘‘চেতসিকত্তা’’তি ইমিনা সম্পযুত্তধম্মানং চিত্তস্স পধানতং দস্সেতি। ততো হি ‘‘চেতসিকা’’তি ৰুচ্চন্তি। সব্বত্থাতি ৰসৰত্তাপনং সহজাতধম্মানুপালনন্তি এৰং যাৰ অমতাভিমুখভাৰপচ্চযতা চ সম্পযুত্তানন্তি তংকিচ্চনিদ্দেসে। ‘‘অনুপ্পাদনে, অনুপত্থম্ভে চ সতী’’তি পদং আহরিত্ৰা সম্বন্ধিতব্বং। ন হি পদত্থো সব্ভাৰং ব্যভিচরতীতি জনকুপত্থম্ভকত্তাভাৰেপীতি ৰুত্তং হোতি। তপ্পচ্চযানন্তি ইত্থিপুরিসনিমিত্তাদিপচ্চযানং কম্মাদীনং। তপ্পৰত্তনে নিমিত্তভাৰোতি ইত্থিনিমিত্তাদিআকাররূপনিব্বত্তনে কারণভাৰো। স্ৰাযং ইত্থিন্দ্রিযাদীনং তত্থ অত্থিভাৰোযেৰাতি দট্ঠব্বং। যস্মিঞ্হি সতি যং হোতি, অসতি চ ন হোতি, তং তস্স কারণন্তি। ‘‘নিমিত্তভাৰো অনুৰিধান’’ন্তি ইমিনা অনুৰিধানসদ্দস্স কম্মত্থতং দস্সেতি। সুখদুক্খভাৰপ্পত্তা ৰিযাতি সযং সুখদুক্খসভাৰপ্পত্তা ৰিয, সুখন্তা দুক্খন্তা চ ৰিযাতি অত্থো। অসন্তস্স…পে॰… মজ্ঝত্তাকারানুপাপনং অঞ্ঞাণুপেক্খনাদিৰসেন ৰেদিতব্বং। সমানজাতিযন্তি অকুসলেহি সুখদুক্খেহি অকুসলূপেক্খায, অব্যাকতেহি অব্যাকতূপেক্খায, কুসলসুখতো কুসলূপেক্খায। তত্থাপি ভূমিৰিভাগেনাযমত্থো ভিন্দিত্ৰা যোজেতব্বো। তং সব্বং খন্ধৰিভঙ্গে ৰুত্তওল়ারিকসুখুমৰিভাগেন দীপেতব্বং। আদিসদ্দেনাতি ‘‘কামরাগব্যাপাদাদী’’তি এত্থ ৰুত্তআদিসদ্দেন। সংযোজনসমুচ্ছিন্দনতদুপনিস্সযতা এৰ সন্ধায অঞ্ঞাতাৰিন্দ্রিযস্স কিচ্চন্তরাপসুততা ৰুত্তা, তস্সাপি উদ্ধম্ভাগিযসংযোজনপটিপ্পস্সদ্ধিপ্পহানকিচ্চতা লব্ভতেৰ। অব্যাপীভাৰতো ৰা অঞ্ঞাতাৰিন্দ্রিযস্স পটিপ্পস্সদ্ধিপ্পহানকিচ্চং ন ৰত্তব্বং, ততো অঞ্ঞিন্দ্রিযস্সাপি তং অট্ঠকথাযং অনুদ্ধটং। মগ্গানন্তরঞ্হি ফলং ‘‘তায সদ্ধায অৰূপসন্তাযা’’তিআদিৰচনতো (ধ॰ স॰ অট্ঠ॰ ৫০৫) কিলেসানং পটিপ্পস্সম্ভনৰসেন পৰত্ততি, ন ইতরং। অঞ্ঞথা অরিযা সব্বকালং অপ্পটিপ্পস্সদ্ধকিলেসদরথা সিযুং। ইতরস্স পন নিচ্ছন্দরাগেসু সত্তৰোহারো ৰিয রুল়্হিৰসেন পটিপ্পস্সদ্ধিকিচ্চতা ৰেদিতব্বা।
Tassāti indriyapaccayabhāvassa. Anaññasādhāraṇattāti aññehi anindriyehi asādhāraṇattā. Evaṃ sāmatthiyato kiccavisesaṃ vavatthapetvā pakaraṇatopi taṃ dasseti ‘‘indriyakathāya ca pavattattā’’ti. Aññesanti aññesaṃ indriyasabhāvānampi sahajātadhammānaṃ. Yehi te indaṭṭhaṃ kārenti, tesaṃ vasavattāpanaṃ natthi, yathā manindriyassa pubbaṅgamasabhāvābhāvato sayañca te aññadatthu manindriyasseva vase vattanti. Tenāha ‘‘taṃsampayuttānipi hī’’tiādi. Yadi evaṃ kathaṃ tesaṃ indaṭṭhoti? ‘‘Sukhanādilakkhaṇe sampayuttānaṃ attākārānuvidhāpanamatta’’nti vuttovāyamattho . ‘‘Cetasikattā’’ti iminā sampayuttadhammānaṃ cittassa padhānataṃ dasseti. Tato hi ‘‘cetasikā’’ti vuccanti. Sabbatthāti vasavattāpanaṃ sahajātadhammānupālananti evaṃ yāva amatābhimukhabhāvapaccayatā ca sampayuttānanti taṃkiccaniddese. ‘‘Anuppādane, anupatthambhe ca satī’’ti padaṃ āharitvā sambandhitabbaṃ. Na hi padattho sabbhāvaṃ byabhicaratīti janakupatthambhakattābhāvepīti vuttaṃ hoti. Tappaccayānanti itthipurisanimittādipaccayānaṃ kammādīnaṃ. Tappavattane nimittabhāvoti itthinimittādiākārarūpanibbattane kāraṇabhāvo. Svāyaṃ itthindriyādīnaṃ tattha atthibhāvoyevāti daṭṭhabbaṃ. Yasmiñhi sati yaṃ hoti, asati ca na hoti, taṃ tassa kāraṇanti. ‘‘Nimittabhāvo anuvidhāna’’nti iminā anuvidhānasaddassa kammatthataṃ dasseti. Sukhadukkhabhāvappattā viyāti sayaṃ sukhadukkhasabhāvappattā viya, sukhantā dukkhantā ca viyāti attho. Asantassa…pe… majjhattākārānupāpanaṃ aññāṇupekkhanādivasena veditabbaṃ. Samānajātiyanti akusalehi sukhadukkhehi akusalūpekkhāya, abyākatehi abyākatūpekkhāya, kusalasukhato kusalūpekkhāya. Tatthāpi bhūmivibhāgenāyamattho bhinditvā yojetabbo. Taṃ sabbaṃ khandhavibhaṅge vuttaoḷārikasukhumavibhāgena dīpetabbaṃ. Ādisaddenāti ‘‘kāmarāgabyāpādādī’’ti ettha vuttaādisaddena. Saṃyojanasamucchindanatadupanissayatā eva sandhāya aññātāvindriyassa kiccantarāpasutatā vuttā, tassāpi uddhambhāgiyasaṃyojanapaṭippassaddhippahānakiccatā labbhateva. Abyāpībhāvato vā aññātāvindriyassa paṭippassaddhippahānakiccaṃ na vattabbaṃ, tato aññindriyassāpi taṃ aṭṭhakathāyaṃ anuddhaṭaṃ. Maggānantarañhi phalaṃ ‘‘tāya saddhāya avūpasantāyā’’tiādivacanato (dha. sa. aṭṭha. 505) kilesānaṃ paṭippassambhanavasena pavattati, na itaraṃ. Aññathā ariyā sabbakālaṃ appaṭippassaddhakilesadarathā siyuṃ. Itarassa pana nicchandarāgesu sattavohāro viya ruḷhivasena paṭippassaddhikiccatā veditabbā.
এত্থাহ – কস্মা পন এত্তকানেৰ ইন্দ্রিযানি ৰুত্তানি, এতানি এৰ চ ৰুত্তানীতি? আধিপচ্চত্থসম্ভৰতোতি চে। আধিপচ্চং নাম ইস্সরিযন্তি ৰুত্তমেতং। তযিদং আধিপচ্চং অত্তনো কিচ্চে বলৰন্তি অঞ্ঞেসম্পি সভাৰধম্মানং লব্ভতেৰ। পচ্চযাধীনৰুত্তিকা হি পচ্চযুপ্পন্না । তস্মা তে তেহি অনুৰত্তীযন্তি, তে চ তে অনুৰত্তন্তীতি? সচ্চমেতং, তথাপি অত্থি তেসং ৰিসেসো। স্ৰাযং ৰিসেসো ‘‘চক্খুৰিঞ্ঞাণাদিপ্পৰত্তিযঞ্হি চক্খাদীনং সিদ্ধমাধিপচ্চ’’ন্তিআদিনা (ৰিভ॰ অট্ঠ॰ ২১৯) অট্ঠকথাযং দস্সিতোযেৰ।
Etthāha – kasmā pana ettakāneva indriyāni vuttāni, etāni eva ca vuttānīti? Ādhipaccatthasambhavatoti ce. Ādhipaccaṃ nāma issariyanti vuttametaṃ. Tayidaṃ ādhipaccaṃ attano kicce balavanti aññesampi sabhāvadhammānaṃ labbhateva. Paccayādhīnavuttikā hi paccayuppannā . Tasmā te tehi anuvattīyanti, te ca te anuvattantīti? Saccametaṃ, tathāpi atthi tesaṃ viseso. Svāyaṃ viseso ‘‘cakkhuviññāṇādippavattiyañhi cakkhādīnaṃ siddhamādhipacca’’ntiādinā (vibha. aṭṭha. 219) aṭṭhakathāyaṃ dassitoyeva.
অপিচ খন্ধপঞ্চকে যাযং সত্তপঞ্ঞত্তি, তস্সা ৰিসেসনিস্সযো ছ অজ্ঝত্তিকানি আযতনানীতি তানি তাৰ আধিপচ্চত্থং উপাদায ‘‘চক্খুন্দ্রিযং…পে॰… মনিন্দ্রিয’’ন্তিআদিতো ৰুত্তানি। তানি পন যেন ধম্মেন পৰত্তন্তি, অযং সো ধম্মো তেসং ঠিতিহেতূতি দস্সনত্থং জীৰিতং। তযিমে ইন্দ্রিযপটিবদ্ধা ধম্মা ইমেসং ৰসেন ‘‘ইত্থী, পুরিসো’’তি ৰোহরীযন্তীতি দস্সনত্থং ভাৰদ্ৰযং। স্ৰাযং সত্তসঞ্ঞিতো ধম্মপুঞ্জো পবন্ধৰসেন পৰত্তমানো ইমাহি ৰেদনাহি সংকিলিস্সতীতি দস্সনত্থং ৰেদনাপঞ্চকং। ততো ৰিসুদ্ধত্থিকানং ৰোদানসম্ভারদস্সনত্থং সদ্ধাদিপঞ্চকং। ততো ৰোদানসম্ভারা ইমেহি ৰিসুজ্ঝন্তি, ৰিসুদ্ধিপ্পত্তা, নিট্ঠিতকিচ্চা চ হোন্তীতি দস্সনত্থং অন্তে অনঞ্ঞাতঞ্ঞস্সামীতিন্দ্রিযাদীনি তীণি ৰুত্তানি। সব্বত্থ ‘‘আধিপচ্চত্থং উপাদাযা’’তি পদং যোজেতব্বং। এত্তাৰতা অধিপ্পেতত্থসিদ্ধীতি অঞ্ঞেসং অগ্গহণং।
Apica khandhapañcake yāyaṃ sattapaññatti, tassā visesanissayo cha ajjhattikāni āyatanānīti tāni tāva ādhipaccatthaṃ upādāya ‘‘cakkhundriyaṃ…pe… manindriya’’ntiādito vuttāni. Tāni pana yena dhammena pavattanti, ayaṃ so dhammo tesaṃ ṭhitihetūti dassanatthaṃ jīvitaṃ. Tayime indriyapaṭibaddhā dhammā imesaṃ vasena ‘‘itthī, puriso’’ti voharīyantīti dassanatthaṃ bhāvadvayaṃ. Svāyaṃ sattasaññito dhammapuñjo pabandhavasena pavattamāno imāhi vedanāhi saṃkilissatīti dassanatthaṃ vedanāpañcakaṃ. Tato visuddhatthikānaṃ vodānasambhāradassanatthaṃ saddhādipañcakaṃ. Tato vodānasambhārā imehi visujjhanti, visuddhippattā, niṭṭhitakiccā ca hontīti dassanatthaṃ ante anaññātaññassāmītindriyādīni tīṇi vuttāni. Sabbattha ‘‘ādhipaccatthaṃ upādāyā’’ti padaṃ yojetabbaṃ. Ettāvatā adhippetatthasiddhīti aññesaṃ aggahaṇaṃ.
অথ ৰা পৰত্তিনিৰত্তীনং নিস্সযাদিদস্সনত্থম্পি এতানি এৰ ৰুত্তানি। পৰত্তিযা হি ৰিসেসতো মূলনিস্সযভূতানি ছ অজ্ঝত্তিকানি আযতনানি। যথাহ ‘‘ছসু লোকো সমুপ্পন্নো’’তিআদি (সু॰ নি॰ ১৭১)। তস্সা উপ্পত্তি ইত্থিপুরিসিন্দ্রিযেহি। ৰিসভাগৰত্থুসরাগনিমিত্তা হি যেভুয্যেন সত্তকাযস্স অভিনিব্বত্তি। ৰুত্তঞ্হেতং ‘‘তিণ্ণং খো পন, মহারাজ, সন্নিপাতা গব্ভস্সাৰক্কন্তি হোতি, ইধ মাতাপিতরো চ সন্নিপতিতা হোন্তি, মাতা চ উতুনী হোতি, গব্ভো চ পচ্চুপট্ঠিতো হোতী’’তি (ম॰ নি॰ ১.৪০৮; ২.৪১১; মি॰ প॰ ৪.১.৬)। অৰট্ঠানং জীৰিতিন্দ্রিযেন তেন অনুপালেতব্বতো। তেনাহ ‘‘আযু ঠিতি যপনা যাপনা’’তিআদি। উপভোগো ৰেদনাহি । ৰেদনাৰসেন হি ইট্ঠাদিসব্বৰিসযুপভোগো। যথাহ – ‘‘ৰেদযতি ৰেদযতীতি খো, ভিক্খৰে, তস্মা ৰেদনাতি ৰুচ্চতী’’তি (সং॰ নি॰ ৩.৭৯)। এৰং পৰত্তিযা নিস্সযসমুপ্পাদট্ঠিতিসম্ভোগদস্সনত্থং চক্খুন্দ্রিযং যাৰ উপেক্খিন্দ্রিযন্তি চুদ্দসিন্দ্রিযানি দেসিতানি। যথা চেতানি পৰত্তিযা, এৰং ইতরানি নিৰত্তিযা। ৰিৰট্টসন্নিস্সিতেন হি নিব্বত্তিতানি সদ্ধাদীনি পঞ্চ ইন্দ্রিযানি নিৰত্তিযা নিস্সযো। উপ্পাদো অনঞ্ঞাতঞ্ঞস্সামীতিন্দ্রিযেন তস্স পঠমং উপ্পজ্জনতো। অৰট্ঠানং অঞ্ঞিন্দ্রিযেন। উপভোগো অঞ্ঞাতাৰিন্দ্রিযেন অগ্গফলসমুপভোগতো। এৰম্পি এতানি এৰ ইন্দ্রিযানি দেসিতানি। এত্তাৰতা যথাধিপ্পেতত্থসিদ্ধিতো অঞ্ঞেসং অগ্গহণং। এতেনাপি নেসং দেসনানুক্কমোপি সংৰণ্ণিতো ৰেদিতব্বো।
Atha vā pavattinivattīnaṃ nissayādidassanatthampi etāni eva vuttāni. Pavattiyā hi visesato mūlanissayabhūtāni cha ajjhattikāni āyatanāni. Yathāha ‘‘chasu loko samuppanno’’tiādi (su. ni. 171). Tassā uppatti itthipurisindriyehi. Visabhāgavatthusarāganimittā hi yebhuyyena sattakāyassa abhinibbatti. Vuttañhetaṃ ‘‘tiṇṇaṃ kho pana, mahārāja, sannipātā gabbhassāvakkanti hoti, idha mātāpitaro ca sannipatitā honti, mātā ca utunī hoti, gabbho ca paccupaṭṭhito hotī’’ti (ma. ni. 1.408; 2.411; mi. pa. 4.1.6). Avaṭṭhānaṃ jīvitindriyena tena anupāletabbato. Tenāha ‘‘āyu ṭhiti yapanā yāpanā’’tiādi. Upabhogo vedanāhi . Vedanāvasena hi iṭṭhādisabbavisayupabhogo. Yathāha – ‘‘vedayati vedayatīti kho, bhikkhave, tasmā vedanāti vuccatī’’ti (saṃ. ni. 3.79). Evaṃ pavattiyā nissayasamuppādaṭṭhitisambhogadassanatthaṃ cakkhundriyaṃ yāva upekkhindriyanti cuddasindriyāni desitāni. Yathā cetāni pavattiyā, evaṃ itarāni nivattiyā. Vivaṭṭasannissitena hi nibbattitāni saddhādīni pañca indriyāni nivattiyā nissayo. Uppādo anaññātaññassāmītindriyena tassa paṭhamaṃ uppajjanato. Avaṭṭhānaṃ aññindriyena. Upabhogo aññātāvindriyena aggaphalasamupabhogato. Evampi etāni eva indriyāni desitāni. Ettāvatā yathādhippetatthasiddhito aññesaṃ aggahaṇaṃ. Etenāpi nesaṃ desanānukkamopi saṃvaṇṇito veditabbo.
২২০. কুসলাকুসলৰীরিযাদীনীতি এত্থ আদি-সদ্দেন কুসলসমাধিআদীনং, অব্যাকতৰীরিযাদীনঞ্চ সঙ্গহো দট্ঠব্বো। পচ্চযাদীতি আদি-সদ্দেন দেসারম্মণাদযো গহিতা, যথাৰুত্তৰীরিযাদীনি, চক্খাদীনি চ সঙ্গণ্হাতি। ইচ্চেৰং সব্বসঙ্গাহিকানি ৰীরিযিন্দ্রিযাদিপদানি, চক্খুন্দ্রিযাদিপদানি চ। তেনাতি ‘‘এৰং সন্তেপী’’তিআদিনা ভূমিৰিভাগকথনেন। তন্নিৰত্তনেনাতি সব্বেসং সব্বভূমিকত্তনিৰত্তনেন। অৰিজ্জমানসঙ্গাহকত্তন্তি তস্সং তস্সং ভূমিযং অনুপলব্ভমানস্স ইন্দ্রিযস্স সঙ্গাহকতা।
220. Kusalākusalavīriyādīnīti ettha ādi-saddena kusalasamādhiādīnaṃ, abyākatavīriyādīnañca saṅgaho daṭṭhabbo. Paccayādīti ādi-saddena desārammaṇādayo gahitā, yathāvuttavīriyādīni, cakkhādīni ca saṅgaṇhāti. Iccevaṃ sabbasaṅgāhikāni vīriyindriyādipadāni, cakkhundriyādipadāni ca. Tenāti ‘‘evaṃ santepī’’tiādinā bhūmivibhāgakathanena. Tannivattanenāti sabbesaṃ sabbabhūmikattanivattanena. Avijjamānasaṅgāhakattanti tassaṃ tassaṃ bhūmiyaṃ anupalabbhamānassa indriyassa saṅgāhakatā.
অভিধম্মভাজনীযৰণ্ণনা নিট্ঠিতা।
Abhidhammabhājanīyavaṇṇanā niṭṭhitā.
২. পঞ্হপুচ্ছকৰণ্ণনা
2. Pañhapucchakavaṇṇanā
ইধ ইমস্মিং ‘‘সত্তিন্দ্রিযা অনারম্মণা’’তি এৰং একন্তানারম্মণত্তে ৰুচ্চমানে ন আভট্ঠং জীৰিতিন্দ্রিযং ন ভাসিতং। টীকাযং পন অনাভট্ঠন্তি কতসমাসং কত্ৰা ৰুত্তং। রূপধম্মেসু সঙ্গহিততন্তি ‘‘রূপ’’ন্তি গণিততং। অরূপকোট্ঠাসেন অরূপভাৰেন সিযাপক্খে সঙ্গহিতং। কস্মা? তস্স পরিত্তারম্মণাদিতা অত্থীতি। যস্মা পন রূপারূপমিস্সকস্সেৰ ৰসেন সিযাপক্খসঙ্গহো যুত্তো, ন একদেসস্স, তস্মা একদেসস্স তং অনিচ্ছন্তো আহ ‘‘অধিপ্পাযো’’তি। ইদানি তমত্থং পকাসেতুং ‘‘অরূপকোট্ঠাসেন পনা’’তিআদি ৰুত্তং। নৰত্তব্বতাতি পরিত্তারম্মণাদিভাৰেন নৰত্তব্বতা। কথং পন রূপকোট্ঠাসেনস্সানারম্মণস্স নৰত্তব্বতাতি চোদনং সন্ধাযাহ ‘‘ন হি অনারম্মণ’’ন্তিআদি। ‘‘অৰিজ্জমানারম্মণানারম্মণেসূ’’তি ইমিনা ‘‘অনারম্মণা’’তি বাহিরত্থসমাসো অযন্তি দস্সেতি । নৰত্তব্বেসূতি সারম্মণভাৰেন নৰত্তব্বেসু। অনারম্মণত্তাতি আরম্মণরহিতত্তা। ‘‘নৰিন্দ্রিযা সিযা পরিত্তারম্মণা, সিযা মহগ্গতারম্মণা, সিযা অপ্পমাণারম্মণা, সিযা ন ৰত্তব্বা ‘পরিত্তারম্মণা’তিপি ‘মহগ্গতারম্মণা’তিপি ‘অপ্পমাণারম্মণা’তিপী’’তিআদীসু (ৰিভ॰ ২২৩) ৰিয ন সারম্মণস্সেৰ নৰত্তব্বতং দস্সেতি। যথা চ ন সারম্মণস্সেৰ নৰত্তব্বতাপরিযাযো, অথ খো অনারম্মণস্সাপীতি সারম্মণে নিযমাভাৰো। এৰং নৰত্তব্বং সারম্মণমেৰাতি অযম্পি নিযমো নত্থীতি দস্সেন্তো ‘‘নৰত্তব্বস্স ৰা সারম্মণত’’ন্তি আহ। তস্স ন দস্সেতীতি সম্বন্ধো। ‘‘ন হী’’তিআদিনা তমেৰত্থং ৰিৰরতি।
Idha imasmiṃ ‘‘sattindriyā anārammaṇā’’ti evaṃ ekantānārammaṇatte vuccamāne na ābhaṭṭhaṃ jīvitindriyaṃ na bhāsitaṃ. Ṭīkāyaṃ pana anābhaṭṭhanti katasamāsaṃ katvā vuttaṃ. Rūpadhammesu saṅgahitatanti ‘‘rūpa’’nti gaṇitataṃ. Arūpakoṭṭhāsena arūpabhāvena siyāpakkhe saṅgahitaṃ. Kasmā? Tassa parittārammaṇāditā atthīti. Yasmā pana rūpārūpamissakasseva vasena siyāpakkhasaṅgaho yutto, na ekadesassa, tasmā ekadesassa taṃ anicchanto āha ‘‘adhippāyo’’ti. Idāni tamatthaṃ pakāsetuṃ ‘‘arūpakoṭṭhāsena panā’’tiādi vuttaṃ. Navattabbatāti parittārammaṇādibhāvena navattabbatā. Kathaṃ pana rūpakoṭṭhāsenassānārammaṇassa navattabbatāti codanaṃ sandhāyāha ‘‘na hi anārammaṇa’’ntiādi. ‘‘Avijjamānārammaṇānārammaṇesū’’ti iminā ‘‘anārammaṇā’’ti bāhiratthasamāso ayanti dasseti . Navattabbesūti sārammaṇabhāvena navattabbesu. Anārammaṇattāti ārammaṇarahitattā. ‘‘Navindriyā siyā parittārammaṇā, siyā mahaggatārammaṇā, siyā appamāṇārammaṇā, siyā na vattabbā ‘parittārammaṇā’tipi ‘mahaggatārammaṇā’tipi ‘appamāṇārammaṇā’tipī’’tiādīsu (vibha. 223) viya na sārammaṇasseva navattabbataṃ dasseti. Yathā ca na sārammaṇasseva navattabbatāpariyāyo, atha kho anārammaṇassāpīti sārammaṇe niyamābhāvo. Evaṃ navattabbaṃ sārammaṇamevāti ayampi niyamo natthīti dassento ‘‘navattabbassa vā sārammaṇata’’nti āha. Tassa na dassetīti sambandho. ‘‘Na hī’’tiādinā tamevatthaṃ vivarati.
তত্থ রূপনিব্বানানং সুখাদিসম্পযুত্তভাৰেন নৰত্তব্বতা, ন পরিত্তারম্মণাদিভাৰেনাতি চোদনং মনসি কত্ৰা আহ ‘‘অথাপী’’তিআদি। তত্থ অথাপি ৰত্ততীতি সম্বন্ধো। সিযা অনারম্মণন্তিপি ৰত্তব্বং সিযাতি অনারম্মণং ধম্মাযতনং সারম্মণেহি ৰিসুং কত্ৰা এৰং ৰত্তব্বং সিযা। নৰত্তব্ব-সদ্দো যদি সারম্মণেস্ৰেৰ ৰত্তেয্য, ন চেৰং ৰুত্তং, অৰচনে চ অঞ্ঞং কারণং নত্থীতি দস্সেন্তো আহ ‘‘ন হি পঞ্হপুচ্ছকে সাৰসেসা দেসনা অত্থী’’তি। তস্মা নৰত্তব্ব-সদ্দো অনারম্মণেসুপি ৰত্ততেৰাতি অধিপ্পাযো। যাপি ‘‘অট্ঠিন্দ্রিযা সিযা অজ্ঝত্তারম্মণা’’তি অজ্ঝত্তারম্মণাদিভাৰেন নৰত্তব্বতা ৰুত্তা, সা জীৰিতিন্দ্রিযস্স আকিঞ্চঞ্ঞাযতনকালে পঠমারুপ্পৰিঞ্ঞাণাভাৰমত্তারম্মণতং সন্ধায ৰুত্তা, ন সারম্মণস্সেৰ নৰত্তব্বতাদস্সনত্থং, নাপি অনারম্মণস্স পরিত্তারম্মণাদিভাৰেন নৰত্তব্বতাভাৰদস্সনত্থন্তি দস্সেন্তো ‘‘অট্ঠিন্দ্রিযা সিযা অজ্ঝত্তারম্মণাতি এত্থ চা’’তিআদিমাহ। তত্থ সিযা অজ্ঝত্তারম্মণাতীতি ইতি-সদ্দো আদিঅত্থো। তেন অৰসিট্ঠপাল়িসঙ্গণ্হনেন ‘‘সিযা ন ৰত্তব্বা ‘অজ্ঝত্তারম্মণা’তিপি ‘বহিদ্ধারম্মণা’তিপি ‘অজ্ঝত্তবহিদ্ধারম্মণা’তিপী’’তি ইমায পাল়িযা ৰুত্তমত্থং জীৰিতিন্দ্রিযস্স দস্সেন্তো ‘‘জীৰিতিন্দ্রিযস্স…পে॰… নৰত্তব্বতা ৰেদিতব্বা’’তি আহ, তং ৰুত্তত্থমেৰ।
Tattha rūpanibbānānaṃ sukhādisampayuttabhāvena navattabbatā, na parittārammaṇādibhāvenāti codanaṃ manasi katvā āha ‘‘athāpī’’tiādi. Tattha athāpi vattatīti sambandho. Siyā anārammaṇantipi vattabbaṃ siyāti anārammaṇaṃ dhammāyatanaṃ sārammaṇehi visuṃ katvā evaṃ vattabbaṃ siyā. Navattabba-saddo yadi sārammaṇesveva vatteyya, na cevaṃ vuttaṃ, avacane ca aññaṃ kāraṇaṃ natthīti dassento āha ‘‘na hi pañhapucchake sāvasesā desanā atthī’’ti. Tasmā navattabba-saddo anārammaṇesupi vattatevāti adhippāyo. Yāpi ‘‘aṭṭhindriyā siyā ajjhattārammaṇā’’ti ajjhattārammaṇādibhāvena navattabbatā vuttā, sā jīvitindriyassa ākiñcaññāyatanakāle paṭhamāruppaviññāṇābhāvamattārammaṇataṃ sandhāya vuttā, na sārammaṇasseva navattabbatādassanatthaṃ, nāpi anārammaṇassa parittārammaṇādibhāvena navattabbatābhāvadassanatthanti dassento ‘‘aṭṭhindriyā siyā ajjhattārammaṇāti ettha cā’’tiādimāha. Tattha siyā ajjhattārammaṇātīti iti-saddo ādiattho. Tena avasiṭṭhapāḷisaṅgaṇhanena ‘‘siyā na vattabbā ‘ajjhattārammaṇā’tipi ‘bahiddhārammaṇā’tipi ‘ajjhattabahiddhārammaṇā’tipī’’ti imāya pāḷiyā vuttamatthaṃ jīvitindriyassa dassento ‘‘jīvitindriyassa…pe… navattabbatā veditabbā’’ti āha, taṃ vuttatthameva.
পঞ্হপুচ্ছকৰণ্ণনা নিট্ঠিতা।
Pañhapucchakavaṇṇanā niṭṭhitā.
ইন্দ্রিযৰিভঙ্গৰণ্ণনা নিট্ঠিতা।
Indriyavibhaṅgavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / ৰিভঙ্গপাল়ি • Vibhaṅgapāḷi / ৫. ইন্দ্রিযৰিভঙ্গো • 5. Indriyavibhaṅgo
অট্ঠকথা • Aṭṭhakathā / অভিধম্মপিটক (অট্ঠকথা) • Abhidhammapiṭaka (aṭṭhakathā) / সম্মোহৰিনোদনী-অট্ঠকথা • Sammohavinodanī-aṭṭhakathā / ১. অভিধম্মভাজনীযৰণ্ণনা • 1. Abhidhammabhājanīyavaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / ৰিভঙ্গ-মূলটীকা • Vibhaṅga-mūlaṭīkā / ৫. ইন্দ্রিযৰিভঙ্গো • 5. Indriyavibhaṅgo
