| Library / Tipiṭaka / তিপিটক • Tipiṭaka / পঞ্চপকরণ-অট্ঠকথা • Pañcapakaraṇa-aṭṭhakathā |
১০. ইন্দ্রিযযমকং
10. Indriyayamakaṃ
ইদানি তেসঞ্ঞেৰ মূলযমকে দেসিতানং কুসলাদিধম্মানং লব্ভমানৰসেন একদেসং সংগণ্হিত্ৰা ধম্মযমকানন্তরং দেসিতস্স ইন্দ্রিযযমকস্স ৰণ্ণনা হোতি। তত্থ খন্ধযমকাদীসু ৰুত্তনযেনেৰ পাল়িৰৰত্থানং ৰেদিতব্বং। ইধাপি হি পণ্ণত্তিৰারাদযো তযো মহাৰারা অৰসেসা অন্তরৰারা চ সদ্ধিং কালপ্পভেদাদীহি খন্ধযমকাদীসু আগতসদিসাৰ। ইন্দ্রিযানং পন বহুতায ধাতুযমকতোপি বহুতরানি যমকানি হোন্তি। যথা পন হেট্ঠা পুগ্গলৰারাদীসু চক্খাযতনচক্খুধাতুমূলকে নযে চক্খাযতনচক্খুধাতূহি সদ্ধিং জিৰ্হাযতনকাযাযতনানি ন যোজিতানি। জিৰ্হাযতনকাযাযতনমূলকানি চ যমকানেৰ ন গহিতানি, তথা ইধাপি চক্খুন্দ্রিযমূলকে নযে জিৰ্হিন্দ্রিযকাযিন্দ্রিযানি ন যোজিতানি, জিৰ্হিন্দ্রিযকাযিন্দ্রিযমূলকানি চ যমকানেৰ ন গহিতানি। তেসং অগ্গহণে কারণং তত্থ ৰুত্তনযেনেৰ ৰেদিতব্বং। মনিন্দ্রিযং পন যথা চক্খুন্দ্রিযাদিমূলকেহি তথেৰ ইত্থিন্দ্রিযাদিমূলকেহিপি সদ্ধিং যস্মা যোজনং গচ্ছতি, তস্মা নিক্খিত্তপটিপাটিযা অযোজেত্ৰা সব্বেহিপি চক্খুন্দ্রিযমূলকাদীহি সদ্ধিং পরিযোসানে যোজিতন্তি ৰেদিতব্বং। চক্খুন্দ্রিযেন সদ্ধিং ইত্থিন্দ্রিযপুরিসিন্দ্রিযজীৰিতিন্দ্রিযানি যোজিতানি সুখিন্দ্রিযদুক্খিন্দ্রিযদোমনস্সিন্দ্রিযানি পটিসন্ধিযং নত্থীতি ন গহিতানি। সোমনস্সিন্দ্রিযউপেক্খিন্দ্রিযানি পটিসন্ধিযং উপ্পত্তিসব্ভাৰতো গহিতানি। তথা সদ্ধিন্দ্রিযাদীনি পঞ্চ। লোকুত্তরানি তীণি পটিসন্ধিযং অভাৰেনেৰ ন গহিতানি। ইতি যানি গহিতানি, তেসং ৰসেনেত্থ চক্খুন্দ্রিযমূলকে নযে যমকগণনা ৰেদিতব্বা। যথা চেত্থ, এৰং সব্বত্থ। যানি পন ন গহিতানি, তেসং ৰসেন যমকানি ন গণেতব্বানি। গণেন্তেন ৰা মোঘপুচ্ছাৰসেন গণেতব্বানীতি এৰং তাৰ সব্বৰারেসু পাল়িৰৰত্থানমেৰ ৰেদিতব্বং।
Idāni tesaññeva mūlayamake desitānaṃ kusalādidhammānaṃ labbhamānavasena ekadesaṃ saṃgaṇhitvā dhammayamakānantaraṃ desitassa indriyayamakassa vaṇṇanā hoti. Tattha khandhayamakādīsu vuttanayeneva pāḷivavatthānaṃ veditabbaṃ. Idhāpi hi paṇṇattivārādayo tayo mahāvārā avasesā antaravārā ca saddhiṃ kālappabhedādīhi khandhayamakādīsu āgatasadisāva. Indriyānaṃ pana bahutāya dhātuyamakatopi bahutarāni yamakāni honti. Yathā pana heṭṭhā puggalavārādīsu cakkhāyatanacakkhudhātumūlake naye cakkhāyatanacakkhudhātūhi saddhiṃ jivhāyatanakāyāyatanāni na yojitāni. Jivhāyatanakāyāyatanamūlakāni ca yamakāneva na gahitāni, tathā idhāpi cakkhundriyamūlake naye jivhindriyakāyindriyāni na yojitāni, jivhindriyakāyindriyamūlakāni ca yamakāneva na gahitāni. Tesaṃ aggahaṇe kāraṇaṃ tattha vuttanayeneva veditabbaṃ. Manindriyaṃ pana yathā cakkhundriyādimūlakehi tatheva itthindriyādimūlakehipi saddhiṃ yasmā yojanaṃ gacchati, tasmā nikkhittapaṭipāṭiyā ayojetvā sabbehipi cakkhundriyamūlakādīhi saddhiṃ pariyosāne yojitanti veditabbaṃ. Cakkhundriyena saddhiṃ itthindriyapurisindriyajīvitindriyāni yojitāni sukhindriyadukkhindriyadomanassindriyāni paṭisandhiyaṃ natthīti na gahitāni. Somanassindriyaupekkhindriyāni paṭisandhiyaṃ uppattisabbhāvato gahitāni. Tathā saddhindriyādīni pañca. Lokuttarāni tīṇi paṭisandhiyaṃ abhāveneva na gahitāni. Iti yāni gahitāni, tesaṃ vasenettha cakkhundriyamūlake naye yamakagaṇanā veditabbā. Yathā cettha, evaṃ sabbattha. Yāni pana na gahitāni, tesaṃ vasena yamakāni na gaṇetabbāni. Gaṇentena vā moghapucchāvasena gaṇetabbānīti evaṃ tāva sabbavāresu pāḷivavatthānameva veditabbaṃ.
পৰত্তিৰারৰণ্ণনা
Pavattivāravaṇṇanā
১-৮৬. অত্থৰিনিচ্ছযে পনেত্থ ইদং নযমুখং – সচক্খুকানং ন ইত্থীনন্তি ব্রহ্মপারিসজ্জাদীনঞ্চেৰ রূপীনং পুরিসনপুংসকানঞ্চ ৰসেন ৰুত্তং। তেসঞ্হি ইত্থিন্দ্রিযং নুপ্পজ্জতি। সচক্খুকানং ন পুরিসানন্তি রূপীব্রহ্মানঞ্চেৰ ইত্থিনপুংসকানঞ্চ ৰসেন ৰুত্তং। তেসঞ্হি পুরিসিন্দ্রিযং নুপ্পজ্জতি। অচক্খুকানং উপপজ্জন্তানং তেসং জীৰিতিন্দ্রিযং উপ্পজ্জতীতি একৰোকারচতুৰোকারকামধাতুসত্তে সন্ধায ৰুত্তং। সচক্খুকানং ৰিনা সোমনস্সেনাতি উপেক্খাসহগতানং চতুন্নং মহাৰিপাকপটিসন্ধীনং ৰসেন ৰুত্তং। সচক্খুকানং ৰিনা উপেক্খাযাতি সোমনস্সসহগতপটিসন্ধিকানং ৰসেন ৰুত্তং। উপেক্খায অচক্খুকানন্তি অহেতুকপটিসন্ধিৰসেন ৰুত্তং। অহেতুকানন্তি অহেতুকপটিসন্ধিচিত্তেন সদ্ধিং সদ্ধিন্দ্রিযাদীনং অভাৰতো ৰুত্তং। তত্থ হি একন্তেনেৰ সদ্ধাসতিপঞ্ঞাযো নত্থি। সমাধিৰীরিযানি পন ইন্দ্রিযপ্পত্তানি ন হোন্তি। সহেতুকানং অচক্খুকানন্তি গব্ভসেয্যকৰসেন চেৰ অরূপীৰসেন চ ৰুত্তং। অঞ্ঞো হি সহেতুকো অচক্খুকো নাম নত্থি। সচক্খুকানং অহেতুকানন্তি অপাযে ওপপাতিকৰসেন ৰুত্তং। সচক্খুকানং ঞাণৰিপ্পযুত্তানন্তি কামধাতুযং দুহেতুকপটিসন্ধিকানং ৰসেন ৰুত্তং। সচক্খুকানং ঞাণসম্পযুত্তানন্তি রূপীব্রহ্মানো চেৰ কামাৰচরদেৰমনুস্সে চ সন্ধায ৰুত্তং। ঞাণসম্পযুত্তানং অচক্খুকানন্তি অরূপিনো চ তিহেতুকগব্ভসেয্যকে চ সন্ধায ৰুত্তং।
1-86. Atthavinicchaye panettha idaṃ nayamukhaṃ – sacakkhukānaṃ na itthīnanti brahmapārisajjādīnañceva rūpīnaṃ purisanapuṃsakānañca vasena vuttaṃ. Tesañhi itthindriyaṃ nuppajjati. Sacakkhukānaṃ na purisānanti rūpībrahmānañceva itthinapuṃsakānañca vasena vuttaṃ. Tesañhi purisindriyaṃ nuppajjati. Acakkhukānaṃ upapajjantānaṃ tesaṃ jīvitindriyaṃ uppajjatīti ekavokāracatuvokārakāmadhātusatte sandhāya vuttaṃ. Sacakkhukānaṃ vinā somanassenāti upekkhāsahagatānaṃ catunnaṃ mahāvipākapaṭisandhīnaṃ vasena vuttaṃ. Sacakkhukānaṃ vinā upekkhāyāti somanassasahagatapaṭisandhikānaṃ vasena vuttaṃ. Upekkhāya acakkhukānanti ahetukapaṭisandhivasena vuttaṃ. Ahetukānanti ahetukapaṭisandhicittena saddhiṃ saddhindriyādīnaṃ abhāvato vuttaṃ. Tattha hi ekanteneva saddhāsatipaññāyo natthi. Samādhivīriyāni pana indriyappattāni na honti. Sahetukānaṃ acakkhukānanti gabbhaseyyakavasena ceva arūpīvasena ca vuttaṃ. Añño hi sahetuko acakkhuko nāma natthi. Sacakkhukānaṃ ahetukānanti apāye opapātikavasena vuttaṃ. Sacakkhukānaṃ ñāṇavippayuttānanti kāmadhātuyaṃ duhetukapaṭisandhikānaṃ vasena vuttaṃ. Sacakkhukānaṃ ñāṇasampayuttānanti rūpībrahmāno ceva kāmāvacaradevamanusse ca sandhāya vuttaṃ. Ñāṇasampayuttānaṃ acakkhukānanti arūpino ca tihetukagabbhaseyyake ca sandhāya vuttaṃ.
১৯০. জীৰিতিন্দ্রিযমূলকে ৰিনা সোমনস্সেন উপপজ্জন্তানন্তি দ্ৰেপি জীৰিতিন্দ্রিযানি সন্ধায ৰুত্তং। পৰত্তে সোমনস্সৰিপ্পযুত্তচিত্তস্স উপ্পাদক্খণেতি অরূপজীৰিতিন্দ্রিযং সন্ধায ৰুত্তং। ইমিনা নযেন সব্বত্থাপি পটিসন্ধিপৰত্তিৰসেন জীৰিতিন্দ্রিযযোজনা ৰেদিতব্বা। সোমনস্সিন্দ্রিযাদিমূলকেসুপি পটিসন্ধিপৰত্তিৰসেনেৰত্থো গহেতব্বো। পটিলোমনযে পন নিরোধৰারে চ এতেসঞ্চেৰ অঞ্ঞেসঞ্চ ধম্মানং যথালাভৰসেন চুতিপটিসন্ধিপৰত্তেসু তীসুপি অনুপ্পাদনিরোধা ৰেদিতব্বা।
190. Jīvitindriyamūlake vinā somanassena upapajjantānanti dvepi jīvitindriyāni sandhāya vuttaṃ. Pavattesomanassavippayuttacittassa uppādakkhaṇeti arūpajīvitindriyaṃ sandhāya vuttaṃ. Iminā nayena sabbatthāpi paṭisandhipavattivasena jīvitindriyayojanā veditabbā. Somanassindriyādimūlakesupi paṭisandhipavattivasenevattho gahetabbo. Paṭilomanaye pana nirodhavāre ca etesañceva aññesañca dhammānaṃ yathālābhavasena cutipaṭisandhipavattesu tīsupi anuppādanirodhā veditabbā.
২৮১. অনাগতৰারে এতেনেৰ ভাৰেনাতি এতেন পুরিসভাৰেনেৰ, অন্তরা ইত্থিভাৰং অনাপজ্জিত্ৰা পুরিসপটিসন্ধিগ্গহণেনেৰাতি অত্থো। কতিচি ভৰে দস্সেত্ৰা পরিনিব্বাযিস্সন্তীতি কতিচি পটিসন্ধিযো গহেত্ৰা ইত্থিভাৰং অপ্পত্ৰাৰ পরিনিব্বাযিস্সন্তীতি অত্থো। দুতিযপুচ্ছাযপি এসেৰ নযো।
281. Anāgatavāre eteneva bhāvenāti etena purisabhāveneva, antarā itthibhāvaṃ anāpajjitvā purisapaṭisandhiggahaṇenevāti attho. Katici bhave dassetvā parinibbāyissantīti katici paṭisandhiyo gahetvā itthibhāvaṃ appatvāva parinibbāyissantīti attho. Dutiyapucchāyapi eseva nayo.
৩৬১. পচ্চুপ্পন্নেন অতীতৰারে সুদ্ধাৰাসানং উপপত্তিচিত্তস্স ভঙ্গক্খণে মনিন্দ্রিযঞ্চ নুপ্পজ্জিত্থাতি চিত্তযমকে ৰিয উপ্পাদক্খণাতিক্কমৰসেন অত্থং অগ্গহেত্ৰা তস্মিং ভৰে অনুপ্পন্নপুব্বৰসেন গহেতব্বোতি। ইমিনা নযমুখেন সব্বস্মিম্পি পৰত্তিৰারে অত্থৰিনিচ্ছযো ৰেদিতব্বো।
361. Paccuppannena atītavāre suddhāvāsānaṃ upapatticittassa bhaṅgakkhaṇe manindriyañca nuppajjitthāti cittayamake viya uppādakkhaṇātikkamavasena atthaṃ aggahetvā tasmiṃ bhave anuppannapubbavasena gahetabboti. Iminā nayamukhena sabbasmimpi pavattivāre atthavinicchayo veditabbo.
পৰত্তিৰারৰণ্ণনা।
Pavattivāravaṇṇanā.
পরিঞ্ঞাৰারৰণ্ণনা
Pariññāvāravaṇṇanā
৪৩৫-৪৮২. পরিঞ্ঞাৰারে পন চক্খুমূলকাদীসু একমেৰ চক্খুসোতযমকং দস্সিতং। যস্মা পন সেসানিপি লোকিযঅব্যাকতানি চেৰ লোকিযঅব্যাকতমিস্সকানি চ পরিঞ্ঞেয্যানেৰ, তস্মা তানি অনুপদিট্ঠানিপি ইমিনাৰ দস্সিতানি হোন্তি। যস্মা পন অকুসলং একন্ততো পহাতব্বমেৰ, একন্তং কুসলং ভাৰেতব্বমেৰ, লোকুত্তরাব্যাকতং সচ্ছিকাতব্বং, তস্মা ‘‘দোমনস্সিন্দ্রিযং পজহতী’’তি ‘‘অনঞ্ঞাতঞ্ঞস্সামীতিন্দ্রিযং ভাৰেতী’’তি ‘‘অঞ্ঞাতাৰিন্দ্রিযং সচ্ছিকরোতী’’তি ৰুত্তং। অঞ্ঞিন্দ্রিযং পন ভাৰেতব্বম্পি অত্থি সচ্ছিকাতব্বম্পি, তং ভাৰনাৰসেনেৰ গহিতং। তত্থ দ্ৰে পুগ্গলাতি সকদাগামিমগ্গসমঙ্গী চ, অরহত্তমগ্গসমঙ্গী চ। তেসু একো সমুচ্ছিন্দিতুং অসমত্থত্তা দোমনস্সিন্দ্রিযং ন পজহতি নাম। একো পহীনদোসত্তা চক্খুন্দ্রিযং ন পরিজানাতীতি অনুপ্পাদং আপাদেতুং অসমত্থতায ন পরিজানাতি। ইমিনা নযেন সব্বৰিস্সজ্জনেসু অত্থো ৰেদিতব্বোতি।
435-482. Pariññāvāre pana cakkhumūlakādīsu ekameva cakkhusotayamakaṃ dassitaṃ. Yasmā pana sesānipi lokiyaabyākatāni ceva lokiyaabyākatamissakāni ca pariññeyyāneva, tasmā tāni anupadiṭṭhānipi imināva dassitāni honti. Yasmā pana akusalaṃ ekantato pahātabbameva, ekantaṃ kusalaṃ bhāvetabbameva, lokuttarābyākataṃ sacchikātabbaṃ, tasmā ‘‘domanassindriyaṃ pajahatī’’ti ‘‘anaññātaññassāmītindriyaṃ bhāvetī’’ti ‘‘aññātāvindriyaṃ sacchikarotī’’ti vuttaṃ. Aññindriyaṃ pana bhāvetabbampi atthi sacchikātabbampi, taṃ bhāvanāvaseneva gahitaṃ. Tattha dve puggalāti sakadāgāmimaggasamaṅgī ca, arahattamaggasamaṅgī ca. Tesu eko samucchindituṃ asamatthattā domanassindriyaṃ na pajahati nāma. Eko pahīnadosattā cakkhundriyaṃ na parijānātīti anuppādaṃ āpādetuṃ asamatthatāya na parijānāti. Iminā nayena sabbavissajjanesu attho veditabboti.
পরিঞ্ঞাৰারৰণ্ণনা।
Pariññāvāravaṇṇanā.
ইন্দ্রিযযমকৰণ্ণনা নিট্ঠিতা।
Indriyayamakavaṇṇanā niṭṭhitā.
নিগমনকথা
Nigamanakathā
এত্তাৰতা চ –
Ettāvatā ca –
যস্সোৰাদে ঠত্ৰা, নিট্ঠিতকিচ্চস্স কিচ্চসম্পন্নো।
Yassovāde ṭhatvā, niṭṭhitakiccassa kiccasampanno;
যুৰতিজনোপি অতীতো, সুৰিহিতনিযমো যমস্সাণং॥
Yuvatijanopi atīto, suvihitaniyamo yamassāṇaṃ.
দেৰপরিসায মজ্ঝে, দেৰপুরে সব্বদেৰদেৰেন।
Devaparisāya majjhe, devapure sabbadevadevena;
যমকং নাম পকাসিতং, যমামললোমেন যং তেন॥
Yamakaṃ nāma pakāsitaṃ, yamāmalalomena yaṃ tena.
পাল়িৰৰত্থানৰিধিং, পুচ্ছাৰিস্সজ্জনে চ অত্থনযং।
Pāḷivavatthānavidhiṃ, pucchāvissajjane ca atthanayaṃ;
দস্সেতুং আরদ্ধা, যমকঅট্ঠকথা মযা তস্স॥
Dassetuṃ āraddhā, yamakaaṭṭhakathā mayā tassa.
সা সুবহুঅন্তরাযে, লোকম্হি যথা অনন্তরাযেন।
Sā subahuantarāye, lokamhi yathā anantarāyena;
অযমজ্জ পঞ্চমত্তেহি, তন্তিযা ভাণৰারেহি॥
Ayamajja pañcamattehi, tantiyā bhāṇavārehi.
নিট্ঠং পত্তা এৰং, নিট্ঠানং পাপুণন্তু সব্বেপি।
Niṭṭhaṃ pattā evaṃ, niṭṭhānaṃ pāpuṇantu sabbepi;
হিতসুখনিব্বত্তিকরা, মনোরথা সব্বসত্তানন্তি॥
Hitasukhanibbattikarā, manorathā sabbasattānanti.
যমকপ্পকরণ-অট্ঠকথা নিট্ঠিতা।
Yamakappakaraṇa-aṭṭhakathā niṭṭhitā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / যমকপাল়ি • Yamakapāḷi / ১০. ইন্দ্রিযযমকং • 10. Indriyayamakaṃ
