| Library / Tipiṭaka / তিপিটক • Tipiṭaka / থেরগাথা-অট্ঠকথা • Theragāthā-aṭṭhakathā |
৪. ইসিদিন্নত্থেরগাথাৰণ্ণনা
4. Isidinnattheragāthāvaṇṇanā
দিট্ঠা মযাতি আযস্মতো ইসিদিন্নত্থেরস্স গাথা। কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে পুঞ্ঞানি করোন্তো ৰিপস্সিস্স ভগৰতো কালে কুলগেহে নিব্বত্তিত্ৰা ৰিঞ্ঞুতং পত্তো বীজনিং গহেত্ৰা বোধিযা পূজং অকাসি। সো তেন পুঞ্ঞকম্মেন দেৰমনুস্সেসু সংসরন্তো ইমস্মিং বুদ্ধুপ্পাদে সুনাপরন্তজনপদে সেট্ঠিকুলে নিব্বত্তিত্ৰা ইসিদিন্নোতি লদ্ধনামো ৰযপ্পত্তো সত্থু চন্দনমাল়পটিগ্গহণে পাটিহারিযং দিস্ৰা পসন্নমানসো সত্থারং উপসঙ্কমিত্ৰা ধম্মং সুত্ৰা সোতাপন্নো হুত্ৰা অগারং অজ্ঝাৰসতি। তস্স হিতানুকম্পিনী দেৰতা তং চোদেন্তী –
Diṭṭhāmayāti āyasmato isidinnattherassa gāthā. Kā uppatti? Ayampi purimabuddhesu katādhikāro tattha tattha bhave puññāni karonto vipassissa bhagavato kāle kulagehe nibbattitvā viññutaṃ patto bījaniṃ gahetvā bodhiyā pūjaṃ akāsi. So tena puññakammena devamanussesu saṃsaranto imasmiṃ buddhuppāde sunāparantajanapade seṭṭhikule nibbattitvā isidinnoti laddhanāmo vayappatto satthu candanamāḷapaṭiggahaṇe pāṭihāriyaṃ disvā pasannamānaso satthāraṃ upasaṅkamitvā dhammaṃ sutvā sotāpanno hutvā agāraṃ ajjhāvasati. Tassa hitānukampinī devatā taṃ codentī –
১৮৭.
187.
‘‘দিট্ঠা মযা ধম্মধরা উপাসকা, কামা অনিচ্চা ইতি ভাসমানা।
‘‘Diṭṭhā mayā dhammadharā upāsakā, kāmā aniccā iti bhāsamānā;
সারত্তরত্তা মণিকুণ্ডলেসু, পুত্তেসু দারেসু চ তে অপেক্খা॥
Sārattarattā maṇikuṇḍalesu, puttesu dāresu ca te apekkhā.
১৮৮.
188.
‘‘অদ্ধা ন জানন্তি যতোধ ধম্মং, কামা অনিচ্চা ইতি চাপি আহু।
‘‘Addhā na jānanti yatodha dhammaṃ, kāmā aniccā iti cāpi āhu;
রাগঞ্চ তেসং ন বলত্থি ছেত্তুং, তস্মা সিতা পুত্তদারং ধনঞ্চা’’তি॥ –
Rāgañca tesaṃ na balatthi chettuṃ, tasmā sitā puttadāraṃ dhanañcā’’ti. –
গাথাদ্ৰযমভাসি।
Gāthādvayamabhāsi.
তত্থ দিট্ঠা মযা ধম্মধরা উপাসকা, কামা অনিচ্চা ইতি ভাসমানাতি ইধেকচ্চে পরিযত্তিধম্মধরা উপাসকা মযা দিট্ঠা, পরিযত্তিধম্মধরত্তা এৰ ‘‘কামা নামেতে অনিচ্চা দুক্খা ৰিপরিণামধম্মা’’তি কামেসু আদীনৰপটিসংযুত্তং ধম্মং ভাসমানা, সযং পন সারত্তরত্তা মণিকুণ্ডলেসু, পুত্তেসু দারেসু চ তে অপেক্খাতি সারত্তা হুত্ৰা বহলরাগরত্তা মণীসু কুণ্ডলেসু চ, মণিচিতেসু ৰা কুণ্ডলেসু, পুত্তেসু পুত্তধীতাসু দারেসু চ অধিগতস্নেহা, অঞ্ঞং ভণন্তা অঞ্ঞং করোন্তা দিট্ঠা মযাতি অত্থো।
Tattha diṭṭhā mayā dhammadharā upāsakā, kāmā aniccā iti bhāsamānāti idhekacce pariyattidhammadharā upāsakā mayā diṭṭhā, pariyattidhammadharattā eva ‘‘kāmā nāmete aniccā dukkhā vipariṇāmadhammā’’ti kāmesu ādīnavapaṭisaṃyuttaṃ dhammaṃ bhāsamānā, sayaṃ pana sārattarattā maṇikuṇḍalesu, puttesu dāresu ca te apekkhāti sārattā hutvā bahalarāgarattā maṇīsu kuṇḍalesu ca, maṇicitesu vā kuṇḍalesu, puttesu puttadhītāsu dāresu ca adhigatasnehā, aññaṃ bhaṇantā aññaṃ karontā diṭṭhā mayāti attho.
যতোতি যস্মা তে উপাসকা সারত্তরত্তা মণিকুণ্ডলেসু পুত্তেসু দারেসু চ অপেক্খৰন্তো, তস্মা ইধ ইমস্মিং বুদ্ধসাসনে ধম্মং যাথাৰতো অদ্ধা একংসেন ন জানন্তি। এৰং ভূতা চ ‘‘কামা অনিচ্চা’’ইতি চাপি আহু অহোসি, সত্তপকতি ৰিচিত্তসভাৰাতি অধিপ্পাযো। রাগঞ্চ তেসং ন বলত্থি ছেত্তুন্তি তেসং উপাসকানং যস্মা রাগং ছেত্তুং সমুচ্ছিন্দিতুং তাদিসং ঞাণবলং নত্থি, তস্মা তেন কারণেন সিতা তণ্হাৰসেন নিস্সিতা পুত্তদারং ধনঞ্চ অল্লীনা ন ৰিস্সজ্জেন্তীতি সব্বমেতং দেৰতা তংযেৰ উপাসকং উদ্দিস্স অঞ্ঞাপদেসেন কথেসি। তং সুত্ৰা উপাসকো সংৰেগজাতো পব্বজিত্ৰা নচিরস্সেৰ অরহত্তং পাপুণি। তেন ৰুত্তং অপদানে (অপ॰ থের ২.৪৮.৪৬-৫০) –
Yatoti yasmā te upāsakā sārattarattā maṇikuṇḍalesu puttesu dāresu ca apekkhavanto, tasmā idha imasmiṃ buddhasāsane dhammaṃ yāthāvato addhā ekaṃsena na jānanti. Evaṃ bhūtā ca ‘‘kāmā aniccā’’iti cāpi āhu ahosi, sattapakati vicittasabhāvāti adhippāyo. Rāgañca tesaṃ na balatthi chettunti tesaṃ upāsakānaṃ yasmā rāgaṃ chettuṃ samucchindituṃ tādisaṃ ñāṇabalaṃ natthi, tasmā tena kāraṇena sitā taṇhāvasena nissitā puttadāraṃ dhanañca allīnā na vissajjentīti sabbametaṃ devatā taṃyeva upāsakaṃ uddissa aññāpadesena kathesi. Taṃ sutvā upāsako saṃvegajāto pabbajitvā nacirasseva arahattaṃ pāpuṇi. Tena vuttaṃ apadāne (apa. thera 2.48.46-50) –
‘‘ৰিপস্সিনো ভগৰতো, বোধিযা পাদপুত্তমে।
‘‘Vipassino bhagavato, bodhiyā pādaputtame;
সুমনো বীজনিং গয্হ, অবীজিং বোধিমুত্তমং॥
Sumano bījaniṃ gayha, abījiṃ bodhimuttamaṃ.
‘‘একনৰুতিতো কপ্পে, অবীজিং বোধিমুত্তমং।
‘‘Ekanavutito kappe, abījiṃ bodhimuttamaṃ;
দুগ্গতিং নাভিজানামি, বীজনায ইদং ফলং॥
Duggatiṃ nābhijānāmi, bījanāya idaṃ phalaṃ.
‘‘কিলেসা ঝাপিতা ময্হং…পে॰… কতং বুদ্ধস্স সাসন’’ন্তি॥
‘‘Kilesā jhāpitā mayhaṃ…pe… kataṃ buddhassa sāsana’’nti.
অরহত্তং পন পত্ৰা অঞ্ঞং ব্যাকরোন্তো ইমা এৰ গাথা অভাসীতি।
Arahattaṃ pana patvā aññaṃ byākaronto imā eva gāthā abhāsīti.
ইসিদিন্নত্থেরগাথাৰণ্ণনা নিট্ঠিতা।
Isidinnattheragāthāvaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / থেরগাথাপাল়ি • Theragāthāpāḷi / ৪. ইসিদিন্নত্থেরগাথা • 4. Isidinnattheragāthā
