Library / Tipiṭaka / ཏིཔིཊཀ • Tipiṭaka / མཛྫྷིམནིཀཱཡ • Majjhimanikāya

    ༦. ཨིསིགིལིསུཏྟཾ

    6. Isigilisuttaṃ

    ༡༣༣. ཨེཝཾ མེ སུཏཾ – ཨེཀཾ སམཡཾ བྷགཝཱ རཱཛགཧེ ཝིཧརཏི ཨིསིགིལིསྨིཾ པབྦཏེ། ཏཏྲ ཁོ བྷགཝཱ བྷིཀྑཱུ ཨཱམནྟེསི – ‘‘བྷིཀྑཝོ’’ཏི། ‘‘བྷདནྟེ’’ཏི ཏེ བྷིཀྑཱུ བྷགཝཏོ པཙྩསྶོསུཾ། བྷགཝཱ ཨེཏདཝོཙ –

    133. Evaṃ me sutaṃ – ekaṃ samayaṃ bhagavā rājagahe viharati isigilismiṃ pabbate. Tatra kho bhagavā bhikkhū āmantesi – ‘‘bhikkhavo’’ti. ‘‘Bhadante’’ti te bhikkhū bhagavato paccassosuṃ. Bhagavā etadavoca –

    ‘‘པསྶཐ ནོ ཏུམྷེ, བྷིཀྑཝེ, ཨེཏཾ ཝེབྷཱརཾ པབྦཏ’’ནྟི? ‘‘ཨེཝཾ, བྷནྟེ’’། ‘‘ཨེཏསྶཔི ཁོ, བྷིཀྑཝེ, ཝེབྷཱརསྶ པབྦཏསྶ ཨཉྙཱཝ སམཉྙཱ ཨཧོསི ཨཉྙཱ པཉྙཏྟི’’།

    ‘‘Passatha no tumhe, bhikkhave, etaṃ vebhāraṃ pabbata’’nti? ‘‘Evaṃ, bhante’’. ‘‘Etassapi kho, bhikkhave, vebhārassa pabbatassa aññāva samaññā ahosi aññā paññatti’’.

    ‘‘པསྶཐ ནོ ཏུམྷེ, བྷིཀྑཝེ, ཨེཏཾ པཎྜཝཾ པབྦཏ’’ནྟི? ‘‘ཨེཝཾ, བྷནྟེ’’། ‘‘ཨེཏསྶཔི ཁོ, བྷིཀྑཝེ, པཎྜཝསྶ པབྦཏསྶ ཨཉྙཱཝ སམཉྙཱ ཨཧོསི ཨཉྙཱ པཉྙཏྟི’’།

    ‘‘Passatha no tumhe, bhikkhave, etaṃ paṇḍavaṃ pabbata’’nti? ‘‘Evaṃ, bhante’’. ‘‘Etassapi kho, bhikkhave, paṇḍavassa pabbatassa aññāva samaññā ahosi aññā paññatti’’.

    ‘‘པསྶཐ ནོ ཏུམྷེ, བྷིཀྑཝེ, ཨེཏཾ ཝེཔུལླཾ པབྦཏ’’ནྟི? ‘‘ཨེཝཾ, བྷནྟེ’’། ‘‘ཨེཏསྶཔི ཁོ, བྷིཀྑཝེ, ཝེཔུལླསྶ པབྦཏསྶ ཨཉྙཱཝ སམཉྙཱ ཨཧོསི ཨཉྙཱ པཉྙཏྟི’’།

    ‘‘Passatha no tumhe, bhikkhave, etaṃ vepullaṃ pabbata’’nti? ‘‘Evaṃ, bhante’’. ‘‘Etassapi kho, bhikkhave, vepullassa pabbatassa aññāva samaññā ahosi aññā paññatti’’.

    ‘‘པསྶཐ ནོ ཏུམྷེ, བྷིཀྑཝེ, ཨེཏཾ གིཛ྄ཛྷཀཱུཊཾ པབྦཏ’’ནྟི? ‘‘ཨེཝཾ, བྷནྟེ’’། ‘‘ཨེཏསྶཔི ཁོ, བྷིཀྑཝེ, གིཛ྄ཛྷཀཱུཊསྶ པབྦཏསྶ ཨཉྙཱཝ སམཉྙཱ ཨཧོསི ཨཉྙཱ པཉྙཏྟི’’།

    ‘‘Passatha no tumhe, bhikkhave, etaṃ gijjhakūṭaṃ pabbata’’nti? ‘‘Evaṃ, bhante’’. ‘‘Etassapi kho, bhikkhave, gijjhakūṭassa pabbatassa aññāva samaññā ahosi aññā paññatti’’.

    ‘‘པསྶཐ ནོ ཏུམྷེ, བྷིཀྑཝེ, ཨིམཾ ཨིསིགིལིཾ པབྦཏ’’ནྟི? ‘‘ཨེཝཾ, བྷནྟེ’’། ‘‘ཨིམསྶ ཁོ པན, བྷིཀྑཝེ, ཨིསིགིལིསྶ པབྦཏསྶ ཨེསཱཝ སམཉྙཱ ཨཧོསི ཨེསཱ པཉྙཏྟི’’།

    ‘‘Passatha no tumhe, bhikkhave, imaṃ isigiliṃ pabbata’’nti? ‘‘Evaṃ, bhante’’. ‘‘Imassa kho pana, bhikkhave, isigilissa pabbatassa esāva samaññā ahosi esā paññatti’’.

    ‘‘བྷཱུཏཔུབྦཾ, བྷིཀྑཝེ, པཉྩ པཙྩེཀབུདྡྷསཏཱནི ཨིམསྨིཾ ཨིསིགིལིསྨིཾ པབྦཏེ ཙིརནིཝཱསིནོ ཨཧེསུཾ། ཏེ ཨིམཾ པབྦཏཾ པཝིསནྟཱ དིསྶནྟི , པཝིཊྛཱ ན དིསྶནྟི། ཏམེནཾ མནུསྶཱ དིསྭཱ ཨེཝམཱཧཾསུ – ‘ཨཡཾ པབྦཏོ ཨིམེ ཨིསཱི 1 གིལཏཱི’ཏི; ‘ཨིསིགིལི ཨིསིགིལི’ ཏྭེཝ སམཉྙཱ ཨུདཔཱདི། ཨཱཙིཀྑིསྶཱམི 2, བྷིཀྑཝེ, པཙྩེཀབུདྡྷཱནཾ ནཱམཱནི; ཀིཏྟཡིསྶཱམི, བྷིཀྑཝེ, པཙྩེཀབུདྡྷཱནཾ ནཱམཱནི; དེསེསྶཱམི, བྷིཀྑཝེ , པཙྩེཀབུདྡྷཱནཾ ནཱམཱནི ། ཏཾ སུཎཱཐ, སཱདྷུཀཾ མནསི ཀརོཐ; བྷཱསིསྶཱམཱི’’ཏི། ‘‘ཨེཝཾ, བྷནྟེ’’ཏི ཁོ ཏེ བྷིཀྑཱུ བྷགཝཏོ པཙྩསྶོསུཾ། བྷགཝཱ ཨེཏདཝོཙ –

    ‘‘Bhūtapubbaṃ, bhikkhave, pañca paccekabuddhasatāni imasmiṃ isigilismiṃ pabbate ciranivāsino ahesuṃ. Te imaṃ pabbataṃ pavisantā dissanti , paviṭṭhā na dissanti. Tamenaṃ manussā disvā evamāhaṃsu – ‘ayaṃ pabbato ime isī 3 gilatī’ti; ‘isigili isigili’ tveva samaññā udapādi. Ācikkhissāmi 4, bhikkhave, paccekabuddhānaṃ nāmāni; kittayissāmi, bhikkhave, paccekabuddhānaṃ nāmāni; desessāmi, bhikkhave , paccekabuddhānaṃ nāmāni . Taṃ suṇātha, sādhukaṃ manasi karotha; bhāsissāmī’’ti. ‘‘Evaṃ, bhante’’ti kho te bhikkhū bhagavato paccassosuṃ. Bhagavā etadavoca –

    ༡༣༤. ‘‘ཨརིཊྛོ ནཱམ, བྷིཀྑཝེ, པཙྩེཀསམྦུདྡྷོ 5 ཨིམསྨིཾ ཨིསིགིལིསྨིཾ པབྦཏེ ཙིརནིཝཱསཱི ཨཧོསི; ཨུཔརིཊྛོ ནཱམ, བྷིཀྑཝེ, པཙྩེཀསམྦུདྡྷོ ཨིམསྨིཾ ཨིསིགིལིསྨིཾ པབྦཏེ ཙིརནིཝཱསཱི ཨཧོསི; ཏགརསིཁཱི 6 ནཱམ, བྷིཀྑཝེ, པཙྩེཀསམྦུདྡྷོ ཨིམསྨིཾ ཨིསིགིལིསྨིཾ པབྦཏེ ཙིརནིཝཱསཱི ཨཧོསི; ཡསསྶཱི ནཱམ, བྷིཀྑཝེ, པཙྩེཀསམྦུདྡྷོ ཨིམསྨིཾ ཨིསིགིལིསྨིཾ པབྦཏེ ཙིརནིཝཱསཱི ཨཧོསི; སུདསྶནོ ནཱམ, བྷིཀྑཝེ, པཙྩེཀསམྦུདྡྷོ ཨིམསྨིཾ ཨིསིགིལིསྨིཾ པབྦཏེ ཙིརནིཝཱསཱི ཨཧོསི; པིཡདསྶཱི ནཱམ, བྷིཀྑཝེ, པཙྩེཀསམྦུདྡྷོ ཨིམསྨིཾ ཨིསིགིལིསྨིཾ པབྦཏེ ཙིརནིཝཱསཱི ཨཧོསི; གནྡྷཱརོ ནཱམ, བྷིཀྑཝེ, པཙྩེཀསམྦུདྡྷོ ཨིམསྨིཾ ཨིསིགིལིསྨིཾ པབྦཏེ ཙིརནིཝཱསཱི ཨཧོསི; པིཎྜོལོ ནཱམ, བྷིཀྑཝེ, པཙྩེཀསམྦུདྡྷོ ཨིམསྨིཾ ཨིསིགིལིསྨིཾ པབྦཏེ ཙིརནིཝཱསཱི ཨཧོསི; ཨུཔཱསབྷོ ནཱམ, བྷིཀྑཝེ, པཙྩེཀསམྦུདྡྷོ ཨིམསྨིཾ ཨིསིགིལིསྨིཾ པབྦཏེ ཙིརནིཝཱསཱི ཨཧོསི; ནཱིཏོ ནཱམ, བྷིཀྑཝེ, པཙྩེཀསམྦུདྡྷོ ཨིམསྨིཾ ཨིསིགིལིསྨིཾ པབྦཏེ ཙིརནིཝཱསཱི ཨཧོསི; ཏཐོ ནཱམ, བྷིཀྑཝེ, པཙྩེཀསམྦུདྡྷོ ཨིམསྨིཾ ཨིསིགིལིསྨིཾ པབྦཏེ ཙིརནིཝཱསཱི ཨཧོསི, སུཏཝཱ ནཱམ, བྷིཀྑཝེ, པཙྩེཀསམྦུདྡྷོ ཨིམསྨིཾ ཨིསིགིལིསྨིཾ པབྦཏེ ཙིརནིཝཱསཱི ཨཧོསི; བྷཱཝིཏཏྟོ ནཱམ, བྷིཀྑཝེ, པཙྩེཀསམྦུདྡྷོ ཨིམསྨིཾ ཨིསིགིལིསྨིཾ པབྦཏེ ཙིརནིཝཱསཱི ཨཧོསི།

    134. ‘‘Ariṭṭho nāma, bhikkhave, paccekasambuddho 7 imasmiṃ isigilismiṃ pabbate ciranivāsī ahosi; upariṭṭho nāma, bhikkhave, paccekasambuddho imasmiṃ isigilismiṃ pabbate ciranivāsī ahosi; tagarasikhī 8 nāma, bhikkhave, paccekasambuddho imasmiṃ isigilismiṃ pabbate ciranivāsī ahosi; yasassī nāma, bhikkhave, paccekasambuddho imasmiṃ isigilismiṃ pabbate ciranivāsī ahosi; sudassano nāma, bhikkhave, paccekasambuddho imasmiṃ isigilismiṃ pabbate ciranivāsī ahosi; piyadassī nāma, bhikkhave, paccekasambuddho imasmiṃ isigilismiṃ pabbate ciranivāsī ahosi; gandhāro nāma, bhikkhave, paccekasambuddho imasmiṃ isigilismiṃ pabbate ciranivāsī ahosi; piṇḍolo nāma, bhikkhave, paccekasambuddho imasmiṃ isigilismiṃ pabbate ciranivāsī ahosi; upāsabho nāma, bhikkhave, paccekasambuddho imasmiṃ isigilismiṃ pabbate ciranivāsī ahosi; nīto nāma, bhikkhave, paccekasambuddho imasmiṃ isigilismiṃ pabbate ciranivāsī ahosi; tatho nāma, bhikkhave, paccekasambuddho imasmiṃ isigilismiṃ pabbate ciranivāsī ahosi, sutavā nāma, bhikkhave, paccekasambuddho imasmiṃ isigilismiṃ pabbate ciranivāsī ahosi; bhāvitatto nāma, bhikkhave, paccekasambuddho imasmiṃ isigilismiṃ pabbate ciranivāsī ahosi.

    ༡༣༥.

    135.

    ‘‘ཡེ སཏྟསཱརཱ ཨནཱིགྷཱ ནིརཱསཱ,

    ‘‘Ye sattasārā anīghā nirāsā,

    པཙྩེཀམེཝཛ྄ཛྷགམཾསུ བོདྷིཾ 9།

    Paccekamevajjhagamaṃsu bodhiṃ 10;

    ཏེསཾ ཝིསལླཱན ནརུཏྟམཱནཾ,

    Tesaṃ visallāna naruttamānaṃ,

    ནཱམཱནི མེ ཀིཏྟཡཏོ སུཎཱཐ༎

    Nāmāni me kittayato suṇātha.

    ‘‘ཨརིཊྛོ ཨུཔརིཊྛོ ཏགརསིཁཱི ཡསསྶཱི,

    ‘‘Ariṭṭho upariṭṭho tagarasikhī yasassī,

    སུདསྶནོ པིཡདསྶཱི ཙ སུསམྦུདྡྷོ 11།

    Sudassano piyadassī ca susambuddho 12;

    གནྡྷཱརོ པིཎྜོལོ ཨུཔཱསབྷོ ཙ,

    Gandhāro piṇḍolo upāsabho ca,

    ནཱིཏོ ཏཐོ སུཏཝཱ བྷཱཝིཏཏྟོ༎

    Nīto tatho sutavā bhāvitatto.

    ‘‘སུམྦྷོ སུབྷོ མཏུལོ 13 ཨཊྛམོ ཙ,

    ‘‘Sumbho subho matulo 14 aṭṭhamo ca,

    ཨཐསྶུམེགྷོ 15 ཨནཱིགྷོ སུདཱཋོ།

    Athassumegho 16 anīgho sudāṭho;

    པཙྩེཀབུདྡྷཱ བྷཝནེཏྟིཁཱིཎཱ,

    Paccekabuddhā bhavanettikhīṇā,

    ཧིངྒཱུ ཙ ཧིངྒོ ཙ མཧཱནུབྷཱཝཱ༎

    Hiṅgū ca hiṅgo ca mahānubhāvā.

    ‘‘དྭེ ཛཱལིནོ མུནིནོ ཨཊྛཀོ ཙ,

    ‘‘Dve jālino munino aṭṭhako ca,

    ཨཐ ཀོསལློ བུདྡྷོ ཨཐོ སུབཱཧུ།

    Atha kosallo buddho atho subāhu;

    ཨུཔནེམིསོ ནེམིསོ སནྟཙིཏྟོ,

    Upanemiso nemiso santacitto,

    སཙྩོ ཏཐོ ཝིརཛོ པཎྜིཏོ ཙ༎

    Sacco tatho virajo paṇḍito ca.

    ‘‘ཀཱལཱུ༹པཀཱལཱ༹ ཝིཛིཏོ ཛིཏོ ཙ,

    ‘‘Kāḷūpakāḷā vijito jito ca,

    ཨངྒོ ཙ པངྒོ ཙ གུཏྟིཛིཏོ ཙ།

    Aṅgo ca paṅgo ca guttijito ca;

    པསྶི ཛཧི ཨུཔདྷིདུཀྑམཱུལཾ 17,

    Passi jahi upadhidukkhamūlaṃ 18,

    ཨཔརཱཛིཏོ མཱརབལཾ ཨཛེསི༎

    Aparājito mārabalaṃ ajesi.

    ‘‘སཏྠཱ པཝཏྟཱ སརབྷངྒོ ལོམཧཾསོ,

    ‘‘Satthā pavattā sarabhaṅgo lomahaṃso,

    ཨུཙྩངྒམཱཡོ ཨསིཏོ ཨནཱསཝོ།

    Uccaṅgamāyo asito anāsavo;

    མནོམཡོ མཱནཙྪིདོ ཙ བནྡྷུམཱ,

    Manomayo mānacchido ca bandhumā,

    ཏདཱདྷིམུཏྟོ ཝིམལོ ཙ ཀེཏུམཱ༎

    Tadādhimutto vimalo ca ketumā.

    ‘‘ཀེཏུམྦྷརཱགོ ཙ མཱཏངྒོ ཨརིཡོ,

    ‘‘Ketumbharāgo ca mātaṅgo ariyo,

    ཨཐཙྩུཏོ ཨཙྩུཏགཱམབྱཱམཀོ།

    Athaccuto accutagāmabyāmako;

    སུམངྒལོ དབྦིལོ སུཔཏིཊྛིཏོ,

    Sumaṅgalo dabbilo supatiṭṭhito,

    ཨསཡ྄ཧོ ཁེམཱབྷིརཏོ ཙ སོརཏོ༎

    Asayho khemābhirato ca sorato.

    ‘‘དུརནྣཡོ སངྒྷོ ཨཐོཔི ཨུཛྫཡོ,

    ‘‘Durannayo saṅgho athopi ujjayo,

    ཨཔརོ མུནི སཡ྄ཧོ ཨནོམནིཀྐམོ།

    Aparo muni sayho anomanikkamo;

    ཨཱནནྡོ ནནྡོ ཨུཔནནྡོ དྭཱདས,

    Ānando nando upanando dvādasa,

    བྷཱརདྭཱཛོ ཨནྟིམདེཧདྷཱརཱི 19༎

    Bhāradvājo antimadehadhārī 20.

    ‘‘བོདྷི མཧཱནཱམོ ཨཐོཔི ཨུཏྟརོ,

    ‘‘Bodhi mahānāmo athopi uttaro,

    ཀེསཱི སིཁཱི སུནྡརོ དྭཱརབྷཱཛོ།

    Kesī sikhī sundaro dvārabhājo;

    ཏིསྶཱུཔཏིསྶཱ བྷཝབནྡྷནཙྪིདཱ,

    Tissūpatissā bhavabandhanacchidā,

    ཨུཔསིཁི ཏཎྷཙྪིདོ ཙ སིཁརི 21༎

    Upasikhi taṇhacchido ca sikhari 22.

    ‘‘བུདྡྷོ ཨཧུ མངྒལོ ཝཱིཏརཱགོ,

    ‘‘Buddho ahu maṅgalo vītarāgo,

    ཨུསབྷཙྪིདཱ ཛཱལིནིཾ དུཀྑམཱུལཾ།

    Usabhacchidā jāliniṃ dukkhamūlaṃ;

    སནྟཾ པདཾ ཨཛ྄ཛྷགམོཔནཱིཏོ,

    Santaṃ padaṃ ajjhagamopanīto,

    ཨུཔོསཐོ སུནྡརོ སཙྩནཱམོ༎

    Uposatho sundaro saccanāmo.

    ‘‘ཛེཏོ ཛཡནྟོ པདུམོ ཨུཔྤལོ ཙ,

    ‘‘Jeto jayanto padumo uppalo ca,

    པདུམུཏྟརོ རཀྑིཏོ པབྦཏོ ཙ།

    Padumuttaro rakkhito pabbato ca;

    མཱནཏྠདྡྷོ སོབྷིཏོ ཝཱིཏརཱགོ,

    Mānatthaddho sobhito vītarāgo,

    ཀཎྷོ ཙ བུདྡྷོ སུཝིམུཏྟཙིཏྟོ༎

    Kaṇho ca buddho suvimuttacitto.

    ‘‘ཨེཏེ ཙ ཨཉྙེ ཙ མཧཱནུབྷཱཝཱ,

    ‘‘Ete ca aññe ca mahānubhāvā,

    པཙྩེཀབུདྡྷཱ བྷཝནེཏྟིཁཱིཎཱ།

    Paccekabuddhā bhavanettikhīṇā;

    ཏེ སབྦསངྒཱཏིགཏེ མཧེསཱི,

    Te sabbasaṅgātigate mahesī,

    པརིནིབྦུཏེ ཝནྡཐ ཨཔྤམེཡྻེ’’ཏི༎

    Parinibbute vandatha appameyye’’ti.

    ཨིསིགིལིསུཏྟཾ ནིཊྛིཏཾ ཚཊྛཾ།

    Isigilisuttaṃ niṭṭhitaṃ chaṭṭhaṃ.




    Next: ༧. མཧཱཙཏྟཱརཱིསཀསུཏྟཾ • 7. Mahācattārīsakasuttaṃ




    Footnotes:
    1. ཨིསཡོ (ཀ॰)
    2. ཨཙིཀྑིསྶཱམི ཝོ (ཀ॰)
    3. isayo (ka.)
    4. acikkhissāmi vo (ka.)
    5. པཙྩེཀབུདྡྷོ (ཀ॰ སཱི॰ པཱི॰)
    6. ཏགྒརསིཁཱི (ཀ॰)
    7. paccekabuddho (ka. sī. pī.)
    8. taggarasikhī (ka.)
    9. པཙྩེཀམེཝཛ྄ཛྷགམུཾ སུབོདྷིཾ (སཱི॰ སྱཱ॰ ཀཾ॰ པཱི॰)
    10. paccekamevajjhagamuṃ subodhiṃ (sī. syā. kaṃ. pī.)
    11. བུདྡྷོ (སཱི॰ སྱཱ॰ ཀཾ॰ པཱི॰)
    12. buddho (sī. syā. kaṃ. pī.)
    13. མེཐུལོ (སཱི॰ སྱཱ॰ ཀཾ॰ པཱི॰)
    14. methulo (sī. syā. kaṃ. pī.)
    15. ཨཊྛསུམེདྷོ (ཀ॰)
    16. aṭṭhasumedho (ka.)
    17. པསྶཱི ཛཧཱི ཨུཔདྷིཾ དུཀྑམཱུལཾ (སཱི॰ སྱཱ॰ ཀཾ॰ པཱི॰)
    18. passī jahī upadhiṃ dukkhamūlaṃ (sī. syā. kaṃ. pī.)
    19. ཨནྟིམདེཧདྷཱརི (སཱི॰)
    20. antimadehadhāri (sī.)
    21. ཨུཔསཱིདརཱི ཏཎྷཙྪིདོ ཙ སཱིདརཱི (སཱི॰ སྱཱ॰ ཀཾ॰ པཱི॰)
    22. upasīdarī taṇhacchido ca sīdarī (sī. syā. kaṃ. pī.)



    Related texts:



    ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / མཛྫྷིམནིཀཱཡ (ཨཊྛཀཐཱ) • Majjhimanikāya (aṭṭhakathā) / ༦. ཨིསིགིལིསུཏྟཝཎྞནཱ • 6. Isigilisuttavaṇṇanā

    ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / མཛྫྷིམནིཀཱཡ (ཊཱིཀཱ) • Majjhimanikāya (ṭīkā) / ༦. ཨིསིགིལིསུཏྟཝཎྞནཱ • 6. Isigilisuttavaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact