| Library / Tipiṭaka / திபிடக • Tipiṭaka / மஜ்ஜி²மனிகாய (டீகா) • Majjhimanikāya (ṭīkā) |
6. இஸிகி³லிஸுத்தவண்ணனா
6. Isigilisuttavaṇṇanā
133. ஸமஞ்ஞாயதி ஏதாயாதி ஸமஞ்ஞா, நாமந்தி அத்தோ². அயமயங் நாமாதி பஞ்ஞாபெந்தி ஏதாய, ததா²பஞ்ஞாபனமத்தந்தி வா பஞ்ஞத்தி, நாமமேவ. தேனாஹ ‘‘புரிமபத³ஸ்ஸேவ வேவசன’’ந்தி. ஸேஸேஸுபீதி ‘‘பண்ட³வஸ்ஸ பப்³ப³தஸ்ஸா’’திஆதீ³ஸு தீஸு வாரேஸுபி.
133. Samaññāyati etāyāti samaññā, nāmanti attho. Ayamayaṃ nāmāti paññāpenti etāya, tathāpaññāpanamattanti vā paññatti, nāmameva. Tenāha ‘‘purimapadasseva vevacana’’nti. Sesesupīti ‘‘paṇḍavassa pabbatassā’’tiādīsu tīsu vāresupi.
ஸமுட்டா²னங் தாவ ஸுத்தஸ்ஸ கதெ²த்வா அத்த²ஸங்வண்ணனங் காதுங் ‘‘ததா³ கிரா’’திஆதி³ வுத்தங். ந பப்³ப³தேஹி அத்தோ²தி ந ப⁴க³வதோ பப்³ப³தேஹி கதி²தேஹி அத்தோ² அத்தி². இஸிகி³லிபா⁴வோதி இஸிகி³லினாமதா. இதீதி இமினா காரணேன, இமங் அட்டு²ப்பத்திங் அவெக்க²ந்தோதி அத்தோ².
Samuṭṭhānaṃ tāva suttassa kathetvā atthasaṃvaṇṇanaṃ kātuṃ ‘‘tadā kirā’’tiādi vuttaṃ. Na pabbatehi atthoti na bhagavato pabbatehi kathitehi attho atthi. Isigilibhāvoti isigilināmatā. Itīti iminā kāraṇena, imaṃ aṭṭhuppattiṃ avekkhantoti attho.
சேதியக³ப்³பே⁴தி சேதியக⁴ரே சேதியஸ்ஸ அப்³ப⁴ந்தரே. யமகமஹாத்³வாரந்தி யமககவாடயுத்தங் மஹந்தங் த்³வாரங். த்³வேதா⁴ கத்வாதி பப்³ப³தஸ்ஸ அப்³ப⁴ந்தரே மண்ட³பஸங்கே²பேன லேணங் நிம்மினித்வா த்³வேதா⁴ கத்வா ததா³ தே தத்த² வஸிங்ஸு.
Cetiyagabbheti cetiyaghare cetiyassa abbhantare. Yamakamahādvāranti yamakakavāṭayuttaṃ mahantaṃ dvāraṃ. Dvedhā katvāti pabbatassa abbhantare maṇḍapasaṅkhepena leṇaṃ nimminitvā dvedhā katvā tadā te tattha vasiṃsu.
வஸிதகாலஞ்ச கதெ²ந்தோ தேஸங் மாதுயா யாவ ததியப⁴வதோ பட்டா²ய ஸமுதா³க³மங் த³ஸ்ஸேதுங், ‘‘அதீதே கிரா’’திஆதி³ வுத்தங். பத்தே²ஸீதி தஸ்ஸா கிர கெ²த்தகுடியா வீஹயோ ப⁴ஜ்ஜந்தியா தத்த² மஹாகரஞ்ஜபுப்ப²ப்பமாணா மஹந்தா மனோஹரா பஞ்சஸதமத்தா லாஜா ஜாயிங்ஸு. ஸா தா க³ஹெத்வா மஹந்தே பது³மினிபத்தே ட²பேஸி. தஸ்மிஞ்ச ஸமயே ஏகோ பச்சேகபு³த்³தோ⁴ தஸ்ஸா அனுக்³க³ஹத்த²ங் அவிதூ³ரே கெ²த்தபாளியா க³ச்ச²தி. ஸா தங் தி³ஸ்வா பஸன்னமானஸா ஸுபுப்பி²தங் மஹந்தங் ஏகங் பது³மங் க³ஹெத்வா தத்த² லாஜே பக்கி²பித்வா பச்சேகபு³த்³த⁴ங் உபஸங்கமித்வா பஞ்சபதிட்டி²தேன வந்தி³த்வா, ‘‘இமஸ்ஸ, ப⁴ந்தே, புஞ்ஞஸ்ஸ ஆனுபா⁴வேன ஆனுபா⁴வஸம்பன்னே பஞ்சஸதபுத்தே லபெ⁴ய்ய’’ந்தி பஞ்ச புத்தஸதானி பத்தே²ஸி. தஸ்மிங்யேவ க²ணேதி யதா³ ஸா யதா²வுத்தங் பத்த²னங் பட்ட²பேஸி; தஸ்மிங்யேவ க²ணே பஞ்சஸதா மிக³லுத்³த³கா ஸம்ப⁴தஸம்பா⁴ரா பரிபக்கபச்சேகபோ³தி⁴ஞாணா தஸ்ஸேவ பச்சேகபு³த்³த⁴ஸ்ஸ மது⁴ரமங்ஸங் த³த்வா, ‘‘ஏதிஸ்ஸா புத்தா ப⁴வெய்யாமா’’தி பத்த²யிங்ஸு. அதீதாஸு அனேகஜாதீஸு தஸ்ஸா புத்தபா⁴வேன ஆக³தத்தா ததா² தேஸங் அஹோஸீதி வத³ந்தி. பாது³த்³தா⁴ரேதி பாது³த்³தா⁴ரே பாது³த்³தா⁴ரே. பாது³த்³தா⁴ரஸீஸேன செத்த² நிக்கி²பனங் ஆஹ.
Vasitakālañca kathento tesaṃ mātuyā yāva tatiyabhavato paṭṭhāya samudāgamaṃ dassetuṃ, ‘‘atīte kirā’’tiādi vuttaṃ. Patthesīti tassā kira khettakuṭiyā vīhayo bhajjantiyā tattha mahākarañjapupphappamāṇā mahantā manoharā pañcasatamattā lājā jāyiṃsu. Sā tā gahetvā mahante paduminipatte ṭhapesi. Tasmiñca samaye eko paccekabuddho tassā anuggahatthaṃ avidūre khettapāḷiyā gacchati. Sā taṃ disvā pasannamānasā supupphitaṃ mahantaṃ ekaṃ padumaṃ gahetvā tattha lāje pakkhipitvā paccekabuddhaṃ upasaṅkamitvā pañcapatiṭṭhitena vanditvā, ‘‘imassa, bhante, puññassa ānubhāvena ānubhāvasampanne pañcasataputte labheyya’’nti pañca puttasatāni patthesi. Tasmiṃyeva khaṇeti yadā sā yathāvuttaṃ patthanaṃ paṭṭhapesi; tasmiṃyeva khaṇe pañcasatā migaluddakā sambhatasambhārā paripakkapaccekabodhiñāṇā tasseva paccekabuddhassa madhuramaṃsaṃ datvā, ‘‘etissā puttā bhaveyyāmā’’ti patthayiṃsu. Atītāsu anekajātīsu tassā puttabhāvena āgatattā tathā tesaṃ ahosīti vadanti. Pāduddhāreti pāduddhāre pāduddhāre. Pāduddhārasīsena cettha nikkhipanaṃ āha.
க³ப்³ப⁴மலங் நிஸ்ஸாயாதி ப³ஹி நிக்க²ந்தங் க³ப்³ப⁴மலங் நிஸ்ஸயங் கத்வா ஸங்ஸேத³ஜபா⁴வேன நிப்³ப³த்தா . ஓபபாதிகபா⁴வேனாதி கேசி. க²யவயங் பட்ட²பெத்வாதி விபஸ்ஸனங் ஆரபி⁴த்வா. விபஸ்ஸனாதி அனிச்சானுபஸ்ஸனாபுப்³பி³கா ஸப்பச்சயனாமரூபத³ஸ்ஸனபுப்³பி³கா ச, ஸங்கா²ரே ஸம்மஸந்தஸ்ஸ அனிச்சலக்க²ணே தி³ட்டே², ‘‘யத³னிச்சங் தங் து³க்க²ங், யங் து³க்க²ங் தத³னத்தா’’தி ஸேஸலக்க²ணானி ஸுவிஞ்ஞெய்யானேவ ஹொந்தி. பச்சேகபோ³தி⁴ஞாணங் நிப்³ப³த்தயிங்ஸூதி த்³வே அஸங்க்²யெய்யானி கப்பானங் ஸதஸஹஸ்ஸஞ்ச பச்சேகபோ³தி⁴பாரமிதாய பரினிப்ப²ன்னத்தா ஞாணஸ்ஸ பரிபாகத்தா வுத்தனயேன ஸயமேவ விபஸ்ஸனங் பவத்தெத்வா மத்த²கங் பாபெத்வா பச்சேகபோ³தி⁴ஞாணங் அதி⁴க³ச்சி²ங்ஸு. ஸப்³பே³பி தே தங்யேவ கா³த²ங் அபா⁴ஸிங்ஸூதி ஆஹ – ‘‘அயங் தேஸங் ப்³யாகரணகா³தா² அஹோஸீ’’தி.
Gabbhamalaṃ nissāyāti bahi nikkhantaṃ gabbhamalaṃ nissayaṃ katvā saṃsedajabhāvena nibbattā . Opapātikabhāvenāti keci. Khayavayaṃ paṭṭhapetvāti vipassanaṃ ārabhitvā. Vipassanāti aniccānupassanāpubbikā sappaccayanāmarūpadassanapubbikā ca, saṅkhāre sammasantassa aniccalakkhaṇe diṭṭhe, ‘‘yadaniccaṃ taṃ dukkhaṃ, yaṃ dukkhaṃ tadanattā’’ti sesalakkhaṇāni suviññeyyāneva honti. Paccekabodhiñāṇaṃ nibbattayiṃsūti dve asaṅkhyeyyāni kappānaṃ satasahassañca paccekabodhipāramitāya parinipphannattā ñāṇassa paripākattā vuttanayena sayameva vipassanaṃ pavattetvā matthakaṃ pāpetvā paccekabodhiñāṇaṃ adhigacchiṃsu. Sabbepi te taṃyeva gāthaṃ abhāsiṃsūti āha – ‘‘ayaṃ tesaṃ byākaraṇagāthā ahosī’’ti.
ஸரோருஹந்தி ஸரஸி ஜாதங். பது³மபலாஸபத்தஜந்தி கு²த்³த³கமஹந்தேஹி கமலத³லேஹி ஸஹஜாதங். கு²த்³த³கமஹந்தகமலத³லஸங்கா²தானி வா பது³மபலாஸபத்தானி எத்த² ஸந்தீதி பது³மபலாஸபத்தங், பது³மக³ச்ச²ங். தத்த² ஜாதந்தி பது³மபலாஸபத்தஜங். ஸுபுப்பி²தந்தி ஸுட்டு² புப்பி²தங் ஸம்மா விகஸிதங். ப⁴மரக³ணானுசிண்ணந்தி ப⁴மரக³ணேஹி அனுகுலஞ்சேவ அனுபரிப்³ப⁴மிதஞ்ச. அனிச்சதாயுபக³தந்தி க²ணே க²ணே வண்ணபே⁴தா³தி³வஸேன அனிச்சதாய உபக³தங். விதி³த்வாதி விபஸ்ஸனாபஞ்ஞாஸஹிதாய மக்³க³பஞ்ஞாய ஜானித்வா. ஏகோ சரேதி தஸ்மா அஞ்ஞோபி மாதி³ஸோ ஹோதுகாமோ ஏவங் படிபஜ்ஜித்வா ஏகோ சரே க²க்³க³விஸாணகப்போதி.
Saroruhanti sarasi jātaṃ. Padumapalāsapattajanti khuddakamahantehi kamaladalehi sahajātaṃ. Khuddakamahantakamaladalasaṅkhātāni vā padumapalāsapattāni ettha santīti padumapalāsapattaṃ, padumagacchaṃ. Tattha jātanti padumapalāsapattajaṃ. Supupphitanti suṭṭhu pupphitaṃ sammā vikasitaṃ. Bhamaragaṇānuciṇṇanti bhamaragaṇehi anukulañceva anuparibbhamitañca. Aniccatāyupagatanti khaṇe khaṇe vaṇṇabhedādivasena aniccatāya upagataṃ. Viditvāti vipassanāpaññāsahitāya maggapaññāya jānitvā. Eko careti tasmā aññopi mādiso hotukāmo evaṃ paṭipajjitvā eko care khaggavisāṇakappoti.
135. ஸதிஸாரஸீலஸாராதி³ஸமன்னாக³மனேன ஸத்தேஸு ஸாரபூ⁴தா. ஸப்³ப³ஸோ வட்டது³க்க²ஸ்ஸ விக³தத்தா நித்³து³க்கா². ஸமுச்சி²ன்னதண்ஹதாய நித்தண்ஹா. மானச்சி²தோ³தி து²திவசனங்.
135. Satisārasīlasārādisamannāgamanena sattesu sārabhūtā. Sabbaso vaṭṭadukkhassa vigatattā niddukkhā. Samucchinnataṇhatāya nittaṇhā. Mānacchidoti thutivacanaṃ.
ஏதேஸங் ஏகனாமகாயேவாதி ஏதேஸங் ஆக³தானங் பச்சேகபு³த்³தா⁴னங் பாளியங் அனாக³தா அஞ்ஞே பச்சேகபு³த்³தா⁴ ஸமானநாமகா ஏவ. வுத்தமேவத்த²ங் பாகடீகரணத்த²ங் ‘‘இமேஸு ஹீ’’திஆதி³ வுத்தங். விஸுங் விஸுங் அவத்வாதி பச்சேகங் ஸரூபதோ அவத்வா. அஞ்ஞே சாதி அஸாதா⁴ரணத்தா ஆஹ. ஸேஸங் ஸுவிஞ்ஞெய்யமேவ.
Etesaṃ ekanāmakāyevāti etesaṃ āgatānaṃ paccekabuddhānaṃ pāḷiyaṃ anāgatā aññe paccekabuddhā samānanāmakā eva. Vuttamevatthaṃ pākaṭīkaraṇatthaṃ ‘‘imesu hī’’tiādi vuttaṃ. Visuṃ visuṃ avatvāti paccekaṃ sarūpato avatvā. Aññe cāti asādhāraṇattā āha. Sesaṃ suviññeyyameva.
இஸிகி³லிஸுத்தவண்ணனாய லீனத்த²ப்பகாஸனா ஸமத்தா.
Isigilisuttavaṇṇanāya līnatthappakāsanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 6. இஸிகி³லிஸுத்தங் • 6. Isigilisuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) / 6. இஸிகி³லிஸுத்தவண்ணனா • 6. Isigilisuttavaṇṇanā
