| Library / Tipiṭaka / তিপিটক • Tipiṭaka / মজ্ঝিমনিকায (টীকা) • Majjhimanikāya (ṭīkā) |
৬. ইসিগিলিসুত্তৰণ্ণনা
6. Isigilisuttavaṇṇanā
১৩৩. সমঞ্ঞাযতি এতাযাতি সমঞ্ঞা, নামন্তি অত্থো। অযমযং নামাতি পঞ্ঞাপেন্তি এতায, তথাপঞ্ঞাপনমত্তন্তি ৰা পঞ্ঞত্তি, নামমেৰ। তেনাহ ‘‘পুরিমপদস্সেৰ ৰেৰচন’’ন্তি। সেসেসুপীতি ‘‘পণ্ডৰস্স পব্বতস্সা’’তিআদীসু তীসু ৰারেসুপি।
133. Samaññāyati etāyāti samaññā, nāmanti attho. Ayamayaṃ nāmāti paññāpenti etāya, tathāpaññāpanamattanti vā paññatti, nāmameva. Tenāha ‘‘purimapadasseva vevacana’’nti. Sesesupīti ‘‘paṇḍavassa pabbatassā’’tiādīsu tīsu vāresupi.
সমুট্ঠানং তাৰ সুত্তস্স কথেত্ৰা অত্থসংৰণ্ণনং কাতুং ‘‘তদা কিরা’’তিআদি ৰুত্তং। ন পব্বতেহি অত্থোতি ন ভগৰতো পব্বতেহি কথিতেহি অত্থো অত্থি। ইসিগিলিভাৰোতি ইসিগিলিনামতা। ইতীতি ইমিনা কারণেন, ইমং অট্ঠুপ্পত্তিং অৰেক্খন্তোতি অত্থো।
Samuṭṭhānaṃ tāva suttassa kathetvā atthasaṃvaṇṇanaṃ kātuṃ ‘‘tadā kirā’’tiādi vuttaṃ. Na pabbatehi atthoti na bhagavato pabbatehi kathitehi attho atthi. Isigilibhāvoti isigilināmatā. Itīti iminā kāraṇena, imaṃ aṭṭhuppattiṃ avekkhantoti attho.
চেতিযগব্ভেতি চেতিযঘরে চেতিযস্স অব্ভন্তরে। যমকমহাদ্ৰারন্তি যমককৰাটযুত্তং মহন্তং দ্ৰারং। দ্ৰেধা কত্ৰাতি পব্বতস্স অব্ভন্তরে মণ্ডপসঙ্খেপেন লেণং নিম্মিনিত্ৰা দ্ৰেধা কত্ৰা তদা তে তত্থ ৰসিংসু।
Cetiyagabbheti cetiyaghare cetiyassa abbhantare. Yamakamahādvāranti yamakakavāṭayuttaṃ mahantaṃ dvāraṃ. Dvedhā katvāti pabbatassa abbhantare maṇḍapasaṅkhepena leṇaṃ nimminitvā dvedhā katvā tadā te tattha vasiṃsu.
ৰসিতকালঞ্চ কথেন্তো তেসং মাতুযা যাৰ ততিযভৰতো পট্ঠায সমুদাগমং দস্সেতুং, ‘‘অতীতে কিরা’’তিআদি ৰুত্তং। পত্থেসীতি তস্সা কির খেত্তকুটিযা ৰীহযো ভজ্জন্তিযা তত্থ মহাকরঞ্জপুপ্ফপ্পমাণা মহন্তা মনোহরা পঞ্চসতমত্তা লাজা জাযিংসু। সা তা গহেত্ৰা মহন্তে পদুমিনিপত্তে ঠপেসি। তস্মিঞ্চ সমযে একো পচ্চেকবুদ্ধো তস্সা অনুগ্গহত্থং অৰিদূরে খেত্তপাল়িযা গচ্ছতি। সা তং দিস্ৰা পসন্নমানসা সুপুপ্ফিতং মহন্তং একং পদুমং গহেত্ৰা তত্থ লাজে পক্খিপিত্ৰা পচ্চেকবুদ্ধং উপসঙ্কমিত্ৰা পঞ্চপতিট্ঠিতেন ৰন্দিত্ৰা, ‘‘ইমস্স, ভন্তে, পুঞ্ঞস্স আনুভাৰেন আনুভাৰসম্পন্নে পঞ্চসতপুত্তে লভেয্য’’ন্তি পঞ্চ পুত্তসতানি পত্থেসি। তস্মিংযেৰ খণেতি যদা সা যথাৰুত্তং পত্থনং পট্ঠপেসি; তস্মিংযেৰ খণে পঞ্চসতা মিগলুদ্দকা সম্ভতসম্ভারা পরিপক্কপচ্চেকবোধিঞাণা তস্সেৰ পচ্চেকবুদ্ধস্স মধুরমংসং দত্ৰা, ‘‘এতিস্সা পুত্তা ভৰেয্যামা’’তি পত্থযিংসু। অতীতাসু অনেকজাতীসু তস্সা পুত্তভাৰেন আগতত্তা তথা তেসং অহোসীতি ৰদন্তি। পাদুদ্ধারেতি পাদুদ্ধারে পাদুদ্ধারে। পাদুদ্ধারসীসেন চেত্থ নিক্খিপনং আহ।
Vasitakālañca kathento tesaṃ mātuyā yāva tatiyabhavato paṭṭhāya samudāgamaṃ dassetuṃ, ‘‘atīte kirā’’tiādi vuttaṃ. Patthesīti tassā kira khettakuṭiyā vīhayo bhajjantiyā tattha mahākarañjapupphappamāṇā mahantā manoharā pañcasatamattā lājā jāyiṃsu. Sā tā gahetvā mahante paduminipatte ṭhapesi. Tasmiñca samaye eko paccekabuddho tassā anuggahatthaṃ avidūre khettapāḷiyā gacchati. Sā taṃ disvā pasannamānasā supupphitaṃ mahantaṃ ekaṃ padumaṃ gahetvā tattha lāje pakkhipitvā paccekabuddhaṃ upasaṅkamitvā pañcapatiṭṭhitena vanditvā, ‘‘imassa, bhante, puññassa ānubhāvena ānubhāvasampanne pañcasataputte labheyya’’nti pañca puttasatāni patthesi. Tasmiṃyeva khaṇeti yadā sā yathāvuttaṃ patthanaṃ paṭṭhapesi; tasmiṃyeva khaṇe pañcasatā migaluddakā sambhatasambhārā paripakkapaccekabodhiñāṇā tasseva paccekabuddhassa madhuramaṃsaṃ datvā, ‘‘etissā puttā bhaveyyāmā’’ti patthayiṃsu. Atītāsu anekajātīsu tassā puttabhāvena āgatattā tathā tesaṃ ahosīti vadanti. Pāduddhāreti pāduddhāre pāduddhāre. Pāduddhārasīsena cettha nikkhipanaṃ āha.
গব্ভমলং নিস্সাযাতি বহি নিক্খন্তং গব্ভমলং নিস্সযং কত্ৰা সংসেদজভাৰেন নিব্বত্তা । ওপপাতিকভাৰেনাতি কেচি। খযৰযং পট্ঠপেত্ৰাতি ৰিপস্সনং আরভিত্ৰা। ৰিপস্সনাতি অনিচ্চানুপস্সনাপুব্বিকা সপ্পচ্চযনামরূপদস্সনপুব্বিকা চ, সঙ্খারে সম্মসন্তস্স অনিচ্চলক্খণে দিট্ঠে, ‘‘যদনিচ্চং তং দুক্খং, যং দুক্খং তদনত্তা’’তি সেসলক্খণানি সুৰিঞ্ঞেয্যানেৰ হোন্তি। পচ্চেকবোধিঞাণং নিব্বত্তযিংসূতি দ্ৰে অসঙ্খ্যেয্যানি কপ্পানং সতসহস্সঞ্চ পচ্চেকবোধিপারমিতায পরিনিপ্ফন্নত্তা ঞাণস্স পরিপাকত্তা ৰুত্তনযেন সযমেৰ ৰিপস্সনং পৰত্তেত্ৰা মত্থকং পাপেত্ৰা পচ্চেকবোধিঞাণং অধিগচ্ছিংসু। সব্বেপি তে তংযেৰ গাথং অভাসিংসূতি আহ – ‘‘অযং তেসং ব্যাকরণগাথা অহোসী’’তি।
Gabbhamalaṃ nissāyāti bahi nikkhantaṃ gabbhamalaṃ nissayaṃ katvā saṃsedajabhāvena nibbattā . Opapātikabhāvenāti keci. Khayavayaṃ paṭṭhapetvāti vipassanaṃ ārabhitvā. Vipassanāti aniccānupassanāpubbikā sappaccayanāmarūpadassanapubbikā ca, saṅkhāre sammasantassa aniccalakkhaṇe diṭṭhe, ‘‘yadaniccaṃ taṃ dukkhaṃ, yaṃ dukkhaṃ tadanattā’’ti sesalakkhaṇāni suviññeyyāneva honti. Paccekabodhiñāṇaṃ nibbattayiṃsūti dve asaṅkhyeyyāni kappānaṃ satasahassañca paccekabodhipāramitāya parinipphannattā ñāṇassa paripākattā vuttanayena sayameva vipassanaṃ pavattetvā matthakaṃ pāpetvā paccekabodhiñāṇaṃ adhigacchiṃsu. Sabbepi te taṃyeva gāthaṃ abhāsiṃsūti āha – ‘‘ayaṃ tesaṃ byākaraṇagāthā ahosī’’ti.
সরোরুহন্তি সরসি জাতং। পদুমপলাসপত্তজন্তি খুদ্দকমহন্তেহি কমলদলেহি সহজাতং। খুদ্দকমহন্তকমলদলসঙ্খাতানি ৰা পদুমপলাসপত্তানি এত্থ সন্তীতি পদুমপলাসপত্তং, পদুমগচ্ছং। তত্থ জাতন্তি পদুমপলাসপত্তজং। সুপুপ্ফিতন্তি সুট্ঠু পুপ্ফিতং সম্মা ৰিকসিতং। ভমরগণানুচিণ্ণন্তি ভমরগণেহি অনুকুলঞ্চেৰ অনুপরিব্ভমিতঞ্চ। অনিচ্চতাযুপগতন্তি খণে খণে ৰণ্ণভেদাদিৰসেন অনিচ্চতায উপগতং। ৰিদিত্ৰাতি ৰিপস্সনাপঞ্ঞাসহিতায মগ্গপঞ্ঞায জানিত্ৰা। একো চরেতি তস্মা অঞ্ঞোপি মাদিসো হোতুকামো এৰং পটিপজ্জিত্ৰা একো চরে খগ্গৰিসাণকপ্পোতি।
Saroruhanti sarasi jātaṃ. Padumapalāsapattajanti khuddakamahantehi kamaladalehi sahajātaṃ. Khuddakamahantakamaladalasaṅkhātāni vā padumapalāsapattāni ettha santīti padumapalāsapattaṃ, padumagacchaṃ. Tattha jātanti padumapalāsapattajaṃ. Supupphitanti suṭṭhu pupphitaṃ sammā vikasitaṃ. Bhamaragaṇānuciṇṇanti bhamaragaṇehi anukulañceva anuparibbhamitañca. Aniccatāyupagatanti khaṇe khaṇe vaṇṇabhedādivasena aniccatāya upagataṃ. Viditvāti vipassanāpaññāsahitāya maggapaññāya jānitvā. Eko careti tasmā aññopi mādiso hotukāmo evaṃ paṭipajjitvā eko care khaggavisāṇakappoti.
১৩৫. সতিসারসীলসারাদিসমন্নাগমনেন সত্তেসু সারভূতা। সব্বসো ৰট্টদুক্খস্স ৰিগতত্তা নিদ্দুক্খা। সমুচ্ছিন্নতণ্হতায নিত্তণ্হা। মানচ্ছিদোতি থুতিৰচনং।
135. Satisārasīlasārādisamannāgamanena sattesu sārabhūtā. Sabbaso vaṭṭadukkhassa vigatattā niddukkhā. Samucchinnataṇhatāya nittaṇhā. Mānacchidoti thutivacanaṃ.
এতেসং একনামকাযেৰাতি এতেসং আগতানং পচ্চেকবুদ্ধানং পাল়িযং অনাগতা অঞ্ঞে পচ্চেকবুদ্ধা সমাননামকা এৰ। ৰুত্তমেৰত্থং পাকটীকরণত্থং ‘‘ইমেসু হী’’তিআদি ৰুত্তং। ৰিসুং ৰিসুং অৰত্ৰাতি পচ্চেকং সরূপতো অৰত্ৰা। অঞ্ঞে চাতি অসাধারণত্তা আহ। সেসং সুৰিঞ্ঞেয্যমেৰ।
Etesaṃ ekanāmakāyevāti etesaṃ āgatānaṃ paccekabuddhānaṃ pāḷiyaṃ anāgatā aññe paccekabuddhā samānanāmakā eva. Vuttamevatthaṃ pākaṭīkaraṇatthaṃ ‘‘imesu hī’’tiādi vuttaṃ. Visuṃ visuṃ avatvāti paccekaṃ sarūpato avatvā. Aññe cāti asādhāraṇattā āha. Sesaṃ suviññeyyameva.
ইসিগিলিসুত্তৰণ্ণনায লীনত্থপ্পকাসনা সমত্তা।
Isigilisuttavaṇṇanāya līnatthappakāsanā samattā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / মজ্ঝিমনিকায • Majjhimanikāya / ৬. ইসিগিলিসুত্তং • 6. Isigilisuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / মজ্ঝিমনিকায (অট্ঠকথা) • Majjhimanikāya (aṭṭhakathā) / ৬. ইসিগিলিসুত্তৰণ্ণনা • 6. Isigilisuttavaṇṇanā
