| Library / Tipiṭaka / තිපිටක • Tipiṭaka / කථාවත්‌ථුපාළි • Kathāvatthupāḷi |
23. තෙවීසතිමවග්‌ගො
23. Tevīsatimavaggo
(220-4) 3-7. ඉස්‌සරියකාමකාරිකාදිකථා
(220-4) 3-7. Issariyakāmakārikādikathā
910. බොධිසත්‌තො ඉස්‌සරියකාමකාරිකාහෙතු විනිපාතං ගච්‌ඡතීති? ආමන්‌තා. බොධිසත්‌තො ඉස්‌සරියකාමකාරිකාහෙතු නිරයං ගච්‌ඡති , සඤ්‌ජීවං ගච්‌ඡති, කාලසුත්‌තං ගච්‌ඡති, තාපනං ගච්‌ඡති, මහාතාපනං 1 ගච්‌ඡති, සඞ්‌ඝාතකං ගච්‌ඡති, රොරුවං ගච්‌ඡති…පෙ.… අවීචිං ගච්‌ඡතීති? න හෙවං වත්‌තබ්‌බෙ…පෙ.….
910. Bodhisatto issariyakāmakārikāhetu vinipātaṃ gacchatīti? Āmantā. Bodhisatto issariyakāmakārikāhetu nirayaṃ gacchati , sañjīvaṃ gacchati, kālasuttaṃ gacchati, tāpanaṃ gacchati, mahātāpanaṃ 2 gacchati, saṅghātakaṃ gacchati, roruvaṃ gacchati…pe… avīciṃ gacchatīti? Na hevaṃ vattabbe…pe….
බොධිසත්‌තො ඉස්‌සරියකාමකාරිකාහෙතු විනිපාතං ගච්‌ඡතීති? ආමන්‌තා. ‘‘බොධිසත්‌තො ඉස්‌සරියකාමකාරිකාහෙතු විනිපාතං ගච්‌ඡතී’’ති – අත්‌ථෙව සුත්‌තන්‌තොති? නත්‌ථි. හඤ්‌චි ‘‘බොධිසත්‌තො ඉස්‌සරියකාමකාරිකාහෙතු විනිපාතං ගච්‌ඡතී’’ති – නත්‌ථෙව සුත්‌තන්‌තො, නො ච වත රෙ වත්‌තබ්‌බෙ – ‘‘බොධිසත්‌තො ඉස්‌සරියකාමකාරිකාහෙතු විනිපාතං ගච්‌ඡතී’’ති.
Bodhisatto issariyakāmakārikāhetu vinipātaṃ gacchatīti? Āmantā. ‘‘Bodhisatto issariyakāmakārikāhetu vinipātaṃ gacchatī’’ti – attheva suttantoti? Natthi. Hañci ‘‘bodhisatto issariyakāmakārikāhetu vinipātaṃ gacchatī’’ti – nattheva suttanto, no ca vata re vattabbe – ‘‘bodhisatto issariyakāmakārikāhetu vinipātaṃ gacchatī’’ti.
911. බොධිසත්‌තො ඉස්‌සරියකාමකාරිකාහෙතු ගබ්‌භසෙය්‍යං ඔක්‌කමතීති? ආමන්‌තා. බොධිසත්‌තො ඉස්‌සරියකාමකාරිකාහෙතු නිරයං උපපජ්‌ජෙය්‍ය, තිරච්‌ඡානයොනිං උපපජ්‌ජෙය්‍යාති? න හෙවං වත්‌තබ්‌බෙ…පෙ.….
911. Bodhisatto issariyakāmakārikāhetu gabbhaseyyaṃ okkamatīti? Āmantā. Bodhisatto issariyakāmakārikāhetu nirayaṃ upapajjeyya, tiracchānayoniṃ upapajjeyyāti? Na hevaṃ vattabbe…pe….
බොධිසත්‌තො ඉස්‌සරියකාමකාරිකාහෙතු ගබ්‌භසෙය්‍යං ඔක්‌කමතීති ? ආමන්‌තා. බොධිසත්‌තො ඉද්‌ධිමාති? න හෙවං වත්‌තබ්‌බෙ…පෙ.… බොධිසත්‌තො ඉද්‌ධිමාති? ආමන්‌තා. බොධිසත්‌තෙන ඡන්‌දිද්‌ධිපාදො භාවිතො…පෙ.… වීරියිද්‌ධිපාදො…පෙ.… චිත්‌තිද්‌ධිපාදො…පෙ.… වීමංසිද්‌ධිපාදො භාවිතොති? න හෙවං වත්‌තබ්‌බෙ…පෙ.….
Bodhisatto issariyakāmakārikāhetu gabbhaseyyaṃ okkamatīti ? Āmantā. Bodhisatto iddhimāti? Na hevaṃ vattabbe…pe… bodhisatto iddhimāti? Āmantā. Bodhisattena chandiddhipādo bhāvito…pe… vīriyiddhipādo…pe… cittiddhipādo…pe… vīmaṃsiddhipādo bhāvitoti? Na hevaṃ vattabbe…pe….
බොධිසත්‌තො ඉස්‌සරියකාමකාරිකාහෙතු ගබ්‌භසෙය්‍යං ඔක්‌කමතීති? ආමන්‌තා. ‘‘බොධිසත්‌තො ඉස්‌සරියකාමකාරිකාහෙතු ගබ්‌භසෙය්‍යං ඔක්‌කමතී’’ති – අත්‌ථෙව සුත්‌තන්‌තොති? නත්‌ථි. හඤ්‌චි ‘‘බොධිසත්‌තො ඉස්‌සරියකාමකාරිකාහෙතු ගබ්‌භසෙය්‍යං ඔක්‌කමතී’’ති – නත්‌ථෙව සුත්‌තන්‌තො, නො ච වත රෙ වත්‌තබ්‌බෙ – ‘‘බොධිසත්‌තො ඉස්‌සරියකාමකාරිකාහෙතු ගබ්‌භසෙය්‍යං ඔක්‌කමතී’’ති.
Bodhisatto issariyakāmakārikāhetu gabbhaseyyaṃ okkamatīti? Āmantā. ‘‘Bodhisatto issariyakāmakārikāhetu gabbhaseyyaṃ okkamatī’’ti – attheva suttantoti? Natthi. Hañci ‘‘bodhisatto issariyakāmakārikāhetu gabbhaseyyaṃ okkamatī’’ti – nattheva suttanto, no ca vata re vattabbe – ‘‘bodhisatto issariyakāmakārikāhetu gabbhaseyyaṃ okkamatī’’ti.
912. බොධිසත්‌තො ඉස්‌සරියකාමකාරිකාහෙතු දුක්‌කරකාරිකං අකාසීති? ආමන්‌තා. බොධිසත්‌තො ඉස්‌සරියකාමකාරිකාහෙතු ‘‘සස්‌සතො ලොකො’’ති පච්‌චාගච්‌ඡි, ‘‘අසස්‌සතො ලොකො’’ති…පෙ.… ‘‘අන්‌තවා ලොකො’’ති…පෙ.… ‘‘අනන්‌තවා ලොකො’’ති… ‘‘තං ජීවං තං සරීර’’න්‌ති … ‘‘අඤ්‌ඤං ජීවං අඤ්‌ඤං සරීර’’න්‌ති… ‘‘හොති තථාගතො පරං මරණා’’ති… ‘‘න හොති තථාගතො පරං මරණා’’ති… ‘‘හොති ච න ච හොති තථාගතො පරං මරණා’’ති…පෙ.… ‘‘නෙව හොති න න හොති තථාගතො පරං මරණා’’ති පච්‌චාගච්‌ඡීති? න හෙවං වත්‌තබ්‌බෙ…පෙ.….
912. Bodhisatto issariyakāmakārikāhetu dukkarakārikaṃ akāsīti? Āmantā. Bodhisatto issariyakāmakārikāhetu ‘‘sassato loko’’ti paccāgacchi, ‘‘asassato loko’’ti…pe… ‘‘antavā loko’’ti…pe… ‘‘anantavā loko’’ti… ‘‘taṃ jīvaṃ taṃ sarīra’’nti … ‘‘aññaṃ jīvaṃ aññaṃ sarīra’’nti… ‘‘hoti tathāgato paraṃ maraṇā’’ti… ‘‘na hoti tathāgato paraṃ maraṇā’’ti… ‘‘hoti ca na ca hoti tathāgato paraṃ maraṇā’’ti…pe… ‘‘neva hoti na na hoti tathāgato paraṃ maraṇā’’ti paccāgacchīti? Na hevaṃ vattabbe…pe….
බොධිසත්‌තො ඉස්‌සරියකාමකාරිකාහෙතු දුක්‌කරකාරිකං අකාසීති? ආමන්‌තා. ‘‘බොධිසත්‌තො ඉස්‌සරියකාමකාරිකාහෙතු දුක්‌කරකාරිකං අකාසී’’ති – අත්‌ථෙව සුත්‌තන්‌තොති? නත්‌ථි. හඤ්‌චි ‘‘බොධිසත්‌තො ඉස්‌සරියකාමකාරිකාහෙතු දුක්‌කරකාරිකං අකාසී’’ති – නත්‌ථෙව සුත්‌තන්‌තො, නො ච වත රෙ වත්‌තබ්‌බෙ – ‘‘බොධිසත්‌තො ඉස්‌සරියකාමකාරිකාහෙතු දුක්‌කරකාරිකං අකාසී’’ති.
Bodhisatto issariyakāmakārikāhetu dukkarakārikaṃ akāsīti? Āmantā. ‘‘Bodhisatto issariyakāmakārikāhetu dukkarakārikaṃ akāsī’’ti – attheva suttantoti? Natthi. Hañci ‘‘bodhisatto issariyakāmakārikāhetu dukkarakārikaṃ akāsī’’ti – nattheva suttanto, no ca vata re vattabbe – ‘‘bodhisatto issariyakāmakārikāhetu dukkarakārikaṃ akāsī’’ti.
913. බොධිසත්‌තො ඉස්‌සරියකාමකාරිකාහෙතු අපරන්‌තපං 3 අකාසි, අඤ්‌ඤං සත්‌ථාරං උද්‌දිසීති? ආමන්‌තා. බොධිසත්‌තො ඉස්‌සරියකාමකාරිකාහෙතු ‘‘සස්‌සතො ලොකො’’ති පච්‌චාගච්‌ඡි…පෙ.… ‘‘නෙව හොති න න හොති තථාගතො පරං මරණා’’ති පච්‌චාගච්‌ඡීති? න හෙවං වත්‌තබ්‌බෙ…පෙ.….
913. Bodhisatto issariyakāmakārikāhetu aparantapaṃ 4 akāsi, aññaṃ satthāraṃ uddisīti? Āmantā. Bodhisatto issariyakāmakārikāhetu ‘‘sassato loko’’ti paccāgacchi…pe… ‘‘neva hoti na na hoti tathāgato paraṃ maraṇā’’ti paccāgacchīti? Na hevaṃ vattabbe…pe….
914. බොධිසත්‌තො ඉස්‌සරියකාමකාරිකාහෙතු අඤ්‌ඤං සත්‌ථාරං උද්‌දිසීති? ආමන්‌තා. ‘‘බොධිසත්‌තො ඉස්‌සරියකාමකාරිකාහෙතු අඤ්‌ඤං සත්‌ථාරං උද්‌දිසී’’ති – අත්‌ථෙව සුත්‌තන්‌තොති? නත්‌ථි. හඤ්‌චි ‘‘බොධිසත්‌තො ඉස්‌සරියකාමකාරිකාහෙතු අඤ්‌ඤං සත්‌ථාරං උද්‌දිසී’’ති – නත්‌ථෙව සුත්‌තන්‌තො, නො ච වත රෙ වත්‌තබ්‌බෙ – ‘‘බොධිසත්‌තො ඉස්‌සරියකාමකාරිකාහෙතු අඤ්‌ඤං සත්‌ථාරං උද්‌දිසී’’ති.
914. Bodhisatto issariyakāmakārikāhetu aññaṃ satthāraṃ uddisīti? Āmantā. ‘‘Bodhisatto issariyakāmakārikāhetu aññaṃ satthāraṃ uddisī’’ti – attheva suttantoti? Natthi. Hañci ‘‘bodhisatto issariyakāmakārikāhetu aññaṃ satthāraṃ uddisī’’ti – nattheva suttanto, no ca vata re vattabbe – ‘‘bodhisatto issariyakāmakārikāhetu aññaṃ satthāraṃ uddisī’’ti.
ඉස්‌සරියකාමකාරිකාකථා නිට්‌ඨිතා.
Issariyakāmakārikākathā niṭṭhitā.
Footnotes:
Related texts:
අට්‌ඨකථා • Aṭṭhakathā / අභිධම්‌මපිටක (අට්‌ඨකථා) • Abhidhammapiṭaka (aṭṭhakathā) / පඤ්‌චපකරණ-අට්‌ඨකථා • Pañcapakaraṇa-aṭṭhakathā / 3-7. ඉස්‌සරියකාමකාරිකාකථාවණ්‌ණනා • 3-7. Issariyakāmakārikākathāvaṇṇanā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-මූලටීකා • Pañcapakaraṇa-mūlaṭīkā / 3-7. ඉස්‌සරියකාමකාරිකාකථාවණ්‌ණනා • 3-7. Issariyakāmakārikākathāvaṇṇanā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-අනුටීකා • Pañcapakaraṇa-anuṭīkā / 3-7. ඉස්‌සරියකාමකාරිකාකථාවණ්‌ණනා • 3-7. Issariyakāmakārikākathāvaṇṇanā
