| Library / Tipiṭaka / तिपिटक • Tipiṭaka / संयुत्तनिकाय (टीका) • Saṃyuttanikāya (ṭīkā) |
७. इस्सरियसुत्तवण्णना
7. Issariyasuttavaṇṇanā
७७. सत्थस्स मलन्ति सत्थमलं, येन सत्थं मलीनं होति, सत्थमलग्गहणेन चेत्थ मलीनं सत्थमेव गहितन्ति आह ‘‘मलग्गहितसत्थ’’न्ति। आणापवत्तनन्ति अप्पके वा महन्ते वा यत्थ कत्थचि अत्तनो आणाय पवत्तनवसेन वसनं इस्सरियत्तमिच्छन्ति। मणिरतनम्पि विस्सज्जनीयपक्खिकत्ता उत्तमं भण्डं नाम न होति, इत्थी पन परिच्चत्तकुलाचारित्थिकायपि अनिस्सज्जनीयताय उत्तमभण्डं नाम। तेनाह ‘‘इत्थी भण्डानमुत्तम’’न्ति। तेसं तेसञ्हि पुरिसाजानीयानं उप्पत्तिट्ठानताय उत्तमरतनाकरत्ता इत्थी भण्डानमुत्तमं। मलग्गहितसत्थसदिसो अवबोधकिच्चविबन्धनतो। सत्थमलं विय सत्थस्स पञ्ञासत्थस्स गुणाभावकरणतो पञ्ञासत्थमलं । अब्बु वुच्चति उपद्दवं, तं देतीति अब्बुदं, विनासकारणं। ननु हरणं समणस्स अयुत्तन्ति? युत्तं। तस्स अन्वयतो ब्यतिरेकतो च युत्ततं दस्सेन्तो ‘‘सलाकभत्तादीनी’’तिआदिमाह।
77. Satthassa malanti satthamalaṃ, yena satthaṃ malīnaṃ hoti, satthamalaggahaṇena cettha malīnaṃ satthameva gahitanti āha ‘‘malaggahitasattha’’nti. Āṇāpavattananti appake vā mahante vā yattha katthaci attano āṇāya pavattanavasena vasanaṃ issariyattamicchanti. Maṇiratanampi vissajjanīyapakkhikattā uttamaṃ bhaṇḍaṃ nāma na hoti, itthī pana pariccattakulācāritthikāyapi anissajjanīyatāya uttamabhaṇḍaṃ nāma. Tenāha ‘‘itthī bhaṇḍānamuttama’’nti. Tesaṃ tesañhi purisājānīyānaṃ uppattiṭṭhānatāya uttamaratanākarattā itthī bhaṇḍānamuttamaṃ. Malaggahitasatthasadiso avabodhakiccavibandhanato. Satthamalaṃ viya satthassa paññāsatthassa guṇābhāvakaraṇato paññāsatthamalaṃ. Abbu vuccati upaddavaṃ, taṃ detīti abbudaṃ, vināsakāraṇaṃ. Nanu haraṇaṃ samaṇassa ayuttanti? Yuttaṃ. Tassa anvayato byatirekato ca yuttataṃ dassento ‘‘salākabhattādīnī’’tiādimāha.
इस्सरियसुत्तवण्णना निट्ठिता।
Issariyasuttavaṇṇanā niṭṭhitā.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / संयुत्तनिकाय • Saṃyuttanikāya / ७. इस्सरियसुत्तं • 7. Issariyasuttaṃ
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / संयुत्तनिकाय (अट्ठकथा) • Saṃyuttanikāya (aṭṭhakathā) / ७. इस्सरियसुत्तवण्णना • 7. Issariyasuttavaṇṇanā
