| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၇. ဣသ္သရိယသုတ္တဝဏ္ဏနာ
7. Issariyasuttavaṇṇanā
၇၇. သတ္ထသ္သ မလန္တိ သတ္ထမလံ, ယေန သတ္ထံ မလီနံ ဟောတိ, သတ္ထမလဂ္ဂဟဏေန စေတ္ထ မလီနံ သတ္ထမေဝ ဂဟိတန္တိ အာဟ ‘‘မလဂ္ဂဟိတသတ္ထ’’န္တိ။ အာဏာပဝတ္တနန္တိ အပ္ပကေ ဝာ မဟန္တေ ဝာ ယတ္ထ ကတ္ထစိ အတ္တနော အာဏာယ ပဝတ္တနဝသေန ဝသနံ ဣသ္သရိယတ္တမိစ္ဆန္တိ။ မဏိရတနမ္ပိ ဝိသ္သဇ္ဇနီယပက္ခိကတ္တာ ဥတ္တမံ ဘဏ္ဍံ နာမ န ဟောတိ, ဣတ္ထီ ပန ပရိစ္စတ္တကုလာစာရိတ္ထိကာယပိ အနိသ္သဇ္ဇနီယတာယ ဥတ္တမဘဏ္ဍံ နာမ။ တေနာဟ ‘‘ဣတ္ထီ ဘဏ္ဍာနမုတ္တမ’’န္တိ။ တေသံ တေသဉ္ဟိ ပုရိသာဇာနီယာနံ ဥပ္ပတ္တိဋ္ဌာနတာယ ဥတ္တမရတနာကရတ္တာ ဣတ္ထီ ဘဏ္ဍာနမုတ္တမံ။ မလဂ္ဂဟိတသတ္ထသဒိသော အဝဗောဓကိစ္စဝိဗန္ဓနတော။ သတ္ထမလံ ဝိယ သတ္ထသ္သ ပညာသတ္ထသ္သ ဂုဏာဘာဝကရဏတော ပညာသတ္ထမလံ ။ အဗ္ဗု ဝုစ္စတိ ဥပဒ္ဒဝံ, တံ ဒေတီတိ အဗ္ဗုဒံ, ဝိနာသကာရဏံ။ နနု ဟရဏံ သမဏသ္သ အယုတ္တန္တိ? ယုတ္တံ။ တသ္သ အန္ဝယတော ဗ္ယတိရေကတော စ ယုတ္တတံ ဒသ္သေန္တော ‘‘သလာကဘတ္တာဒီနီ’’တိအာဒိမာဟ။
77. Satthassa malanti satthamalaṃ, yena satthaṃ malīnaṃ hoti, satthamalaggahaṇena cettha malīnaṃ satthameva gahitanti āha ‘‘malaggahitasattha’’nti. Āṇāpavattananti appake vā mahante vā yattha katthaci attano āṇāya pavattanavasena vasanaṃ issariyattamicchanti. Maṇiratanampi vissajjanīyapakkhikattā uttamaṃ bhaṇḍaṃ nāma na hoti, itthī pana pariccattakulācāritthikāyapi anissajjanīyatāya uttamabhaṇḍaṃ nāma. Tenāha ‘‘itthī bhaṇḍānamuttama’’nti. Tesaṃ tesañhi purisājānīyānaṃ uppattiṭṭhānatāya uttamaratanākarattā itthī bhaṇḍānamuttamaṃ. Malaggahitasatthasadiso avabodhakiccavibandhanato. Satthamalaṃ viya satthassa paññāsatthassa guṇābhāvakaraṇato paññāsatthamalaṃ. Abbu vuccati upaddavaṃ, taṃ detīti abbudaṃ, vināsakāraṇaṃ. Nanu haraṇaṃ samaṇassa ayuttanti? Yuttaṃ. Tassa anvayato byatirekato ca yuttataṃ dassento ‘‘salākabhattādīnī’’tiādimāha.
ဣသ္သရိယသုတ္တဝဏ္ဏနာ နိဋ္ဌိတာ။
Issariyasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၇. ဣသ္သရိယသုတ္တံ • 7. Issariyasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၇. ဣသ္သရိယသုတ္တဝဏ္ဏနာ • 7. Issariyasuttavaṇṇanā
