| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) |
೭. ಇಸ್ಸರಿಯಸುತ್ತವಣ್ಣನಾ
7. Issariyasuttavaṇṇanā
೭೭. ಸತ್ಥಸ್ಸ ಮಲನ್ತಿ ಸತ್ಥಮಲಂ, ಯೇನ ಸತ್ಥಂ ಮಲೀನಂ ಹೋತಿ, ಸತ್ಥಮಲಗ್ಗಹಣೇನ ಚೇತ್ಥ ಮಲೀನಂ ಸತ್ಥಮೇವ ಗಹಿತನ್ತಿ ಆಹ ‘‘ಮಲಗ್ಗಹಿತಸತ್ಥ’’ನ್ತಿ। ಆಣಾಪವತ್ತನನ್ತಿ ಅಪ್ಪಕೇ ವಾ ಮಹನ್ತೇ ವಾ ಯತ್ಥ ಕತ್ಥಚಿ ಅತ್ತನೋ ಆಣಾಯ ಪವತ್ತನವಸೇನ ವಸನಂ ಇಸ್ಸರಿಯತ್ತಮಿಚ್ಛನ್ತಿ। ಮಣಿರತನಮ್ಪಿ ವಿಸ್ಸಜ್ಜನೀಯಪಕ್ಖಿಕತ್ತಾ ಉತ್ತಮಂ ಭಣ್ಡಂ ನಾಮ ನ ಹೋತಿ, ಇತ್ಥೀ ಪನ ಪರಿಚ್ಚತ್ತಕುಲಾಚಾರಿತ್ಥಿಕಾಯಪಿ ಅನಿಸ್ಸಜ್ಜನೀಯತಾಯ ಉತ್ತಮಭಣ್ಡಂ ನಾಮ। ತೇನಾಹ ‘‘ಇತ್ಥೀ ಭಣ್ಡಾನಮುತ್ತಮ’’ನ್ತಿ। ತೇಸಂ ತೇಸಞ್ಹಿ ಪುರಿಸಾಜಾನೀಯಾನಂ ಉಪ್ಪತ್ತಿಟ್ಠಾನತಾಯ ಉತ್ತಮರತನಾಕರತ್ತಾ ಇತ್ಥೀ ಭಣ್ಡಾನಮುತ್ತಮಂ। ಮಲಗ್ಗಹಿತಸತ್ಥಸದಿಸೋ ಅವಬೋಧಕಿಚ್ಚವಿಬನ್ಧನತೋ। ಸತ್ಥಮಲಂ ವಿಯ ಸತ್ಥಸ್ಸ ಪಞ್ಞಾಸತ್ಥಸ್ಸ ಗುಣಾಭಾವಕರಣತೋ ಪಞ್ಞಾಸತ್ಥಮಲಂ । ಅಬ್ಬು ವುಚ್ಚತಿ ಉಪದ್ದವಂ, ತಂ ದೇತೀತಿ ಅಬ್ಬುದಂ, ವಿನಾಸಕಾರಣಂ। ನನು ಹರಣಂ ಸಮಣಸ್ಸ ಅಯುತ್ತನ್ತಿ? ಯುತ್ತಂ। ತಸ್ಸ ಅನ್ವಯತೋ ಬ್ಯತಿರೇಕತೋ ಚ ಯುತ್ತತಂ ದಸ್ಸೇನ್ತೋ ‘‘ಸಲಾಕಭತ್ತಾದೀನೀ’’ತಿಆದಿಮಾಹ।
77. Satthassa malanti satthamalaṃ, yena satthaṃ malīnaṃ hoti, satthamalaggahaṇena cettha malīnaṃ satthameva gahitanti āha ‘‘malaggahitasattha’’nti. Āṇāpavattananti appake vā mahante vā yattha katthaci attano āṇāya pavattanavasena vasanaṃ issariyattamicchanti. Maṇiratanampi vissajjanīyapakkhikattā uttamaṃ bhaṇḍaṃ nāma na hoti, itthī pana pariccattakulācāritthikāyapi anissajjanīyatāya uttamabhaṇḍaṃ nāma. Tenāha ‘‘itthī bhaṇḍānamuttama’’nti. Tesaṃ tesañhi purisājānīyānaṃ uppattiṭṭhānatāya uttamaratanākarattā itthī bhaṇḍānamuttamaṃ. Malaggahitasatthasadiso avabodhakiccavibandhanato. Satthamalaṃ viya satthassa paññāsatthassa guṇābhāvakaraṇato paññāsatthamalaṃ. Abbu vuccati upaddavaṃ, taṃ detīti abbudaṃ, vināsakāraṇaṃ. Nanu haraṇaṃ samaṇassa ayuttanti? Yuttaṃ. Tassa anvayato byatirekato ca yuttataṃ dassento ‘‘salākabhattādīnī’’tiādimāha.
ಇಸ್ಸರಿಯಸುತ್ತವಣ್ಣನಾ ನಿಟ್ಠಿತಾ।
Issariyasuttavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಸಂಯುತ್ತನಿಕಾಯ • Saṃyuttanikāya / ೭. ಇಸ್ಸರಿಯಸುತ್ತಂ • 7. Issariyasuttaṃ
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) / ೭. ಇಸ್ಸರಿಯಸುತ್ತವಣ್ಣನಾ • 7. Issariyasuttavaṇṇanā
