| Library / Tipiṭaka / තිපිටක • Tipiṭaka / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) |
7. ඉස්‌සරියසුත්‌තවණ්‌ණනා
7. Issariyasuttavaṇṇanā
77. සත්‌තමෙ සත්‌ථමලන්‌ති මලග්‌ගහිතසත්‌ථං. කිං සු හරන්‌තං වාරෙන්‌තීති කං හරන්‌තං නිසෙධෙන්‌ති. වසොති ආණාපවත්‌තනං. ඉත්‌ථීති අවිස්‌සජ්‌ජනීයභණ්‌ඩත්‌තා ‘‘ඉත්‌ථී භණ්‌ඩානමුත්‌තමං, වරභණ්‌ඩ’’න්‌ති ආහ. අථ වා සබ්‌බෙපි බොධිසත්‌තා ච චක්‌කවත්‌තිනො ච මාතුකුච්‌ඡියංයෙව නිබ්‌බත්‌තන්‌තීති ‘‘ඉත්‌ථී භණ්‌ඩානමුත්‌තම’’න්‌ති ආහ. කොධො සත්‌ථමලන්‌ති කොධො මලග්‌ගහිතසත්‌ථසදිසො, පඤ්‌ඤාසත්‌ථස්‌ස වා මලන්‌ති සත්‌ථමලං. අබ්‌බුදන්‌ති විනාසකාරණං, චොරා ලොකස්‌මිං විනාසකාති අත්‌ථො. හරන්‌තොති සලාකභත්‌තාදීනි ගහෙත්‌වා ගච්‌ඡන්‌තො. සලාකභත්‌තාදීනි හි පට්‌ඨපිතකාලෙයෙව මනුස්‌සෙහි පරිච්‌චත්‌තානි. තෙසං තානි හරන්‌තො සමණො පියො හොති, අනාහරන්‌තෙ පුඤ්‌ඤහානිං නිස්‌සාය විප්‌පටිසාරිනො හොන්‌ති. සත්‌තමං.
77. Sattame satthamalanti malaggahitasatthaṃ. Kiṃ su harantaṃ vārentīti kaṃ harantaṃ nisedhenti. Vasoti āṇāpavattanaṃ. Itthīti avissajjanīyabhaṇḍattā ‘‘itthī bhaṇḍānamuttamaṃ, varabhaṇḍa’’nti āha. Atha vā sabbepi bodhisattā ca cakkavattino ca mātukucchiyaṃyeva nibbattantīti ‘‘itthī bhaṇḍānamuttama’’nti āha. Kodho satthamalanti kodho malaggahitasatthasadiso, paññāsatthassa vā malanti satthamalaṃ. Abbudanti vināsakāraṇaṃ, corā lokasmiṃ vināsakāti attho. Harantoti salākabhattādīni gahetvā gacchanto. Salākabhattādīni hi paṭṭhapitakāleyeva manussehi pariccattāni. Tesaṃ tāni haranto samaṇo piyo hoti, anāharante puññahāniṃ nissāya vippaṭisārino honti. Sattamaṃ.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 7. ඉස්‌සරියසුත්‌තං • 7. Issariyasuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 7. ඉස්‌සරියසුත්‌තවණ්‌ණනා • 7. Issariyasuttavaṇṇanā
