| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৪. ইস্সত্তসুত্তং
4. Issattasuttaṃ
১৩৫. সাৰত্থিনিদানং। একমন্তং নিসিন্নো খো রাজা পসেনদি কোসলো ভগৰন্তং এতদৰোচ – ‘‘কত্থ নু খো, ভন্তে, দানং দাতব্ব’’ন্তি? ‘‘যত্থ খো, মহারাজ, চিত্তং পসীদতী’’তি। ‘‘কত্থ পন, ভন্তে, দিন্নং মহপ্ফল’’ন্তি? ‘‘অঞ্ঞং খো এতং, মহারাজ, কত্থ দানং দাতব্বং, অঞ্ঞং পনেতং কত্থ দিন্নং মহপ্ফলন্তি? সীলৰতো খো, মহারাজ, দিন্নং মহপ্ফলং, নো তথা দুস্সীলে। তেন হি, মহারাজ, তঞ্ঞেৰেত্থ পটিপুচ্ছিস্সামি। যথা, তে খমেয্য, তথা নং ব্যাকরেয্যাসি। তং কিং মঞ্ঞসি, মহারাজ, ইধ ত্যস্স যুদ্ধং পচ্চুপট্ঠিতং সঙ্গামো সমুপব্যূল়্হো 1। অথ আগচ্ছেয্য খত্তিযকুমারো অসিক্খিতো অকতহত্থো অকতযোগ্গো অকতূপাসনো ভীরু ছম্ভী উত্রাসী পলাযী। ভরেয্যাসি তং পুরিসং, অত্থো চ তে তাদিসেন পুরিসেনা’’তি? ‘‘নাহং, ভন্তে, ভরেয্যং তং পুরিসং, ন চ মে অত্থো তাদিসেন পুরিসেনা’’তি। ‘‘অথ আগচ্ছেয্য ব্রাহ্মণকুমারো অসিক্খিতো…পে॰… অথ আগচ্ছেয্য ৰেস্সকুমারো অসিক্খিতো…পে॰… অথ আগচ্ছেয্য সুদ্দকুমারো অসিক্খিতো…পে॰… ন চ মে অত্থো তাদিসেন পুরিসেনা’’তি।
135. Sāvatthinidānaṃ. Ekamantaṃ nisinno kho rājā pasenadi kosalo bhagavantaṃ etadavoca – ‘‘kattha nu kho, bhante, dānaṃ dātabba’’nti? ‘‘Yattha kho, mahārāja, cittaṃ pasīdatī’’ti. ‘‘Kattha pana, bhante, dinnaṃ mahapphala’’nti? ‘‘Aññaṃ kho etaṃ, mahārāja, kattha dānaṃ dātabbaṃ, aññaṃ panetaṃ kattha dinnaṃ mahapphalanti? Sīlavato kho, mahārāja, dinnaṃ mahapphalaṃ, no tathā dussīle. Tena hi, mahārāja, taññevettha paṭipucchissāmi. Yathā, te khameyya, tathā naṃ byākareyyāsi. Taṃ kiṃ maññasi, mahārāja, idha tyassa yuddhaṃ paccupaṭṭhitaṃ saṅgāmo samupabyūḷho 2. Atha āgaccheyya khattiyakumāro asikkhito akatahattho akatayoggo akatūpāsano bhīru chambhī utrāsī palāyī. Bhareyyāsi taṃ purisaṃ, attho ca te tādisena purisenā’’ti? ‘‘Nāhaṃ, bhante, bhareyyaṃ taṃ purisaṃ, na ca me attho tādisena purisenā’’ti. ‘‘Atha āgaccheyya brāhmaṇakumāro asikkhito…pe… atha āgaccheyya vessakumāro asikkhito…pe… atha āgaccheyya suddakumāro asikkhito…pe… na ca me attho tādisena purisenā’’ti.
‘‘তং কিং মঞ্ঞসি, মহারাজ, ইধ ত্যস্স যুদ্ধং পচ্চুপট্ঠিতং সঙ্গামো সমুপব্যূল়্হো। অথ আগচ্ছেয্য খত্তিযকুমারো সুসিক্খিতো কতহত্থো কতযোগ্গো কতূপাসনো অভীরু অচ্ছম্ভী অনুত্রাসী অপলাযী। ভরেয্যাসি তং পুরিসং, অত্থো চ তে তাদিসেন পুরিসেনা’’তি? ‘‘ভরেয্যাহং, ভন্তে , তং পুরিসং, অত্থো চ মে তাদিসেন পুরিসেনা’’তি। ‘‘অথ আগচ্ছেয্য ব্রাহ্মণকুমারো…পে॰… অথ আগচ্ছেয্য ৰেস্সকুমারো…পে॰… অথ আগচ্ছেয্য সুদ্দকুমারো সুসিক্খিতো কতহত্থো কতযোগ্গো কতূপাসনো অভীরু অচ্ছম্ভী অনুত্রাসী অপলাযী। ভরেয্যাসি তং পুরিসং, অত্থো চ তে তাদিসেন পুরিসেনা’’তি? ‘‘ভরেয্যাহং, ভন্তে, তং পুরিসং, অত্থো চ মে তাদিসেন পুরিসেনা’’তি।
‘‘Taṃ kiṃ maññasi, mahārāja, idha tyassa yuddhaṃ paccupaṭṭhitaṃ saṅgāmo samupabyūḷho. Atha āgaccheyya khattiyakumāro susikkhito katahattho katayoggo katūpāsano abhīru acchambhī anutrāsī apalāyī. Bhareyyāsi taṃ purisaṃ, attho ca te tādisena purisenā’’ti? ‘‘Bhareyyāhaṃ, bhante , taṃ purisaṃ, attho ca me tādisena purisenā’’ti. ‘‘Atha āgaccheyya brāhmaṇakumāro…pe… atha āgaccheyya vessakumāro…pe… atha āgaccheyya suddakumāro susikkhito katahattho katayoggo katūpāsano abhīru acchambhī anutrāsī apalāyī. Bhareyyāsi taṃ purisaṃ, attho ca te tādisena purisenā’’ti? ‘‘Bhareyyāhaṃ, bhante, taṃ purisaṃ, attho ca me tādisena purisenā’’ti.
‘‘এৰমেৰ খো, মহারাজ, যস্মা কস্মা চেপি 3 কুলা অগারস্মা অনগারিযং পব্বজিতো হোতি, সো চ হোতি পঞ্চঙ্গৰিপ্পহীনো পঞ্চঙ্গসমন্নাগতো, তস্মিং দিন্নং মহপ্ফলং হোতি। কতমানি পঞ্চঙ্গানি পহীনানি হোন্তি? কামচ্ছন্দো পহীনো হোতি, ব্যাপাদো পহীনো হোতি, থিনমিদ্ধং পহীনং হোতি, উদ্ধচ্চকুক্কুচ্চং পহীনং হোতি, ৰিচিকিচ্ছা পহীনা হোতি। ইমানি পঞ্চঙ্গানি পহীনানি হোন্তি। কতমেহি পঞ্চহঙ্গেহি সমন্নাগতো হোতি? অসেক্খেন সীলক্খন্ধেন সমন্নাগতো হোতি, অসেক্খেন সমাধিক্খন্ধেন সমন্নাগতো হোতি, অসেক্খেন পঞ্ঞাক্খন্ধেন সমন্নাগতো হোতি, অসেক্খেন ৰিমুত্তিক্খন্ধেন সমন্নাগতো হোতি, অসেক্খেন ৰিমুত্তিঞাণদস্সনক্খন্ধেন সমন্নাগতো হোতি। ইমেহি পঞ্চহঙ্গেহি সমন্নাগতো হোতি। ইতি পঞ্চঙ্গৰিপ্পহীনে পঞ্চঙ্গসমন্নাগতে দিন্নং মহপ্ফল’’ন্তি। ইদমৰোচ ভগৰা…পে॰… সত্থা –
‘‘Evameva kho, mahārāja, yasmā kasmā cepi 4 kulā agārasmā anagāriyaṃ pabbajito hoti, so ca hoti pañcaṅgavippahīno pañcaṅgasamannāgato, tasmiṃ dinnaṃ mahapphalaṃ hoti. Katamāni pañcaṅgāni pahīnāni honti? Kāmacchando pahīno hoti, byāpādo pahīno hoti, thinamiddhaṃ pahīnaṃ hoti, uddhaccakukkuccaṃ pahīnaṃ hoti, vicikicchā pahīnā hoti. Imāni pañcaṅgāni pahīnāni honti. Katamehi pañcahaṅgehi samannāgato hoti? Asekkhena sīlakkhandhena samannāgato hoti, asekkhena samādhikkhandhena samannāgato hoti, asekkhena paññākkhandhena samannāgato hoti, asekkhena vimuttikkhandhena samannāgato hoti, asekkhena vimuttiñāṇadassanakkhandhena samannāgato hoti. Imehi pañcahaṅgehi samannāgato hoti. Iti pañcaṅgavippahīne pañcaṅgasamannāgate dinnaṃ mahapphala’’nti. Idamavoca bhagavā…pe… satthā –
তং যুদ্ধত্থো ভরে রাজা, নাসূরং জাতিপচ্চযা॥
Taṃ yuddhattho bhare rājā, nāsūraṃ jātipaccayā.
‘‘তথেৰ খন্তিসোরচ্চং, ধম্মা যস্মিং পতিট্ঠিতা।
‘‘Tatheva khantisoraccaṃ, dhammā yasmiṃ patiṭṭhitā;
অরিযৰুত্তিং মেধাৰিং, হীনজচ্চম্পি পূজযে॥
Ariyavuttiṃ medhāviṃ, hīnajaccampi pūjaye.
‘‘কারযে অস্সমে রম্মে, ৰাসযেত্থ বহুস্সুতে।
‘‘Kāraye assame ramme, vāsayettha bahussute;
পপঞ্চ ৰিৰনে কযিরা, দুগ্গে সঙ্কমনানি চ॥
Papañca vivane kayirā, dugge saṅkamanāni ca.
‘‘অন্নং পানং খাদনীযং, ৰত্থসেনাসনানি চ।
‘‘Annaṃ pānaṃ khādanīyaṃ, vatthasenāsanāni ca;
দদেয্য উজুভূতেসু, ৰিপ্পসন্নেন চেতসা॥
Dadeyya ujubhūtesu, vippasannena cetasā.
‘‘যথা হি মেঘো থনযং, ৰিজ্জুমালী সতক্ককু।
‘‘Yathā hi megho thanayaṃ, vijjumālī satakkaku;
থলং নিন্নঞ্চ পূরেতি, অভিৰস্সং ৰসুন্ধরং॥
Thalaṃ ninnañca pūreti, abhivassaṃ vasundharaṃ.
‘‘তথেৰ সদ্ধো সুতৰা, অভিসঙ্খচ্চ ভোজনং।
‘‘Tatheva saddho sutavā, abhisaṅkhacca bhojanaṃ;
ৰনিব্বকে তপ্পযতি, অন্নপানেন পণ্ডিতো॥
Vanibbake tappayati, annapānena paṇḍito.
‘‘আমোদমানো পকিরেতি, দেথ দেথাতি ভাসতি।
‘‘Āmodamāno pakireti, detha dethāti bhāsati;
তং হিস্স গজ্জিতং হোতি, দেৰস্সেৰ পৰস্সতো।
Taṃ hissa gajjitaṃ hoti, devasseva pavassato;
সা পুঞ্ঞধারা ৰিপুলা, দাতারং অভিৰস্সতী’’তি॥
Sā puññadhārā vipulā, dātāraṃ abhivassatī’’ti.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৪. ইস্সত্তসুত্তৰণ্ণনা • 4. Issattasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৪. ইস্সত্তসুত্তৰণ্ণনা • 4. Issattasuttavaṇṇanā
