| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
4. இஸ்ஸத்தஸுத்தவண்ணனா
4. Issattasuttavaṇṇanā
135. சதுத்த²ஸ்ஸ அட்டு²ப்பத்திகோ நிக்கே²போ. ப⁴க³வதோ கிர பட²மபோ³தி⁴யங் மஹாலாப⁴ஸக்காரோ உத³பாதி³ பி⁴க்கு²ஸங்க⁴ஸ்ஸ ச. தித்தி²யா ஹதலாப⁴ஸக்காரா ஹுத்வா குலேஸு ஏவங் கந்தெ²ந்தா விசரந்தி – ‘‘ஸமணோ கோ³தமோ ஏவமாஹ, ‘மய்ஹமேவ தா³னங் தா³தப்³ப³ங், ந அஞ்ஞேஸங் தா³னங் தா³தப்³ப³ங். மய்ஹமேவ ஸாவகானங் தா³னங் தா³தப்³ப³ங், ந அஞ்ஞேஸங் ஸாவகானங் தா³னங் தா³தப்³ப³ங். மய்ஹமேவ தி³ன்னங் மஹப்ப²லங், ந அஞ்ஞேஸங் தி³ன்னங் மஹப்ப²லங். மய்ஹமேவ ஸாவகானங் தி³ன்னங் மஹப்ப²லங், ந அஞ்ஞேஸங் ஸாவகானங் தி³ன்னங் மஹப்ப²ல’ந்தி. யுத்தங் நு கோ² ஸயம்பி பி⁴க்கா²சாரனிஸ்ஸிதேன பரேஸங் பி⁴க்கா²சாரனிஸ்ஸிதானங் சதுன்னங் பச்சயானங் அந்தராயங் காதுங், அயுத்தங் கரோதி அனநுச்ச²விக’’ந்தி. ஸா கதா² பத்த²ரமானா ராஜகுலங் ஸம்பத்தா. ராஜா ஸுத்வா சிந்தேஸி – ‘‘அட்டா²னமேதங் யங் ததா²க³தோ பரேஸங் லாப⁴ந்தராயங் கரெய்ய. ஏதே ததா²க³தஸ்ஸ அலாபா⁴ய அயஸாய பரிஸக்கந்தி. ஸசாஹங் இதே⁴வ ட²த்வா ‘மா ஏவங் அவோசுத்த², ந ஸத்தா² ஏவங் கதே²தீ’தி வதெ³ய்யங், ஏவங் ஸா கதா² நிஜ்ஜ²த்திங் ந க³ச்செ²ய்ய, இமஸ்ஸ மஹாஜனஸ்ஸ ஸன்னிபதிதகாலேயேவ நங் நிஜ்ஜா²பெஸ்ஸாமீ’’தி ஏகங் ச²ணதி³வஸங் ஆக³மெந்தோ துண்ஹீ அஹோஸி.
135. Catutthassa aṭṭhuppattiko nikkhepo. Bhagavato kira paṭhamabodhiyaṃ mahālābhasakkāro udapādi bhikkhusaṅghassa ca. Titthiyā hatalābhasakkārā hutvā kulesu evaṃ kanthentā vicaranti – ‘‘samaṇo gotamo evamāha, ‘mayhameva dānaṃ dātabbaṃ, na aññesaṃ dānaṃ dātabbaṃ. Mayhameva sāvakānaṃ dānaṃ dātabbaṃ, na aññesaṃ sāvakānaṃ dānaṃ dātabbaṃ. Mayhameva dinnaṃ mahapphalaṃ, na aññesaṃ dinnaṃ mahapphalaṃ. Mayhameva sāvakānaṃ dinnaṃ mahapphalaṃ, na aññesaṃ sāvakānaṃ dinnaṃ mahapphala’nti. Yuttaṃ nu kho sayampi bhikkhācāranissitena paresaṃ bhikkhācāranissitānaṃ catunnaṃ paccayānaṃ antarāyaṃ kātuṃ, ayuttaṃ karoti ananucchavika’’nti. Sā kathā pattharamānā rājakulaṃ sampattā. Rājā sutvā cintesi – ‘‘aṭṭhānametaṃ yaṃ tathāgato paresaṃ lābhantarāyaṃ kareyya. Ete tathāgatassa alābhāya ayasāya parisakkanti. Sacāhaṃ idheva ṭhatvā ‘mā evaṃ avocuttha, na satthā evaṃ kathetī’ti vadeyyaṃ, evaṃ sā kathā nijjhattiṃ na gaccheyya, imassa mahājanassa sannipatitakāleyeva naṃ nijjhāpessāmī’’ti ekaṃ chaṇadivasaṃ āgamento tuṇhī ahosi.
அபரேன ஸமயேன மஹாச²ணே ஸம்பத்தே ‘‘அயங் இமஸ்ஸ காலோ’’தி நக³ரே பே⁴ரிங் சராபேஸி – ‘‘ஸத்³தா⁴ வா அஸ்ஸத்³தா⁴ வா ஸம்மாதி³ட்டி²கா வா மிச்சா²தி³ட்டி²கா வா கே³ஹரக்க²கே தா³ரகே வா மாதுகா³மே வா ட²பெத்வா அவஸேஸா யே விஹாரங் நாக³ச்ச²ந்தி, பஞ்ஞாஸங் த³ண்டோ³’’தி. ஸயம்பி பாதோவ ந்ஹத்வா கதபாதராஸோ ஸப்³பா³ப⁴ரணபடிமண்டி³தோ மஹதா ப³லகாயேன ஸத்³தி⁴ங் விஹாரங் அக³மாஸி. க³ச்ச²ந்தோ ச சிந்தேஸி – ‘‘ப⁴க³வா தும்ஹே கிர ஏவங் வத³த² ‘மய்ஹமேவ தா³னங் தா³தப்³ப³ங்…பே॰… ந அஞ்ஞேஸங் ஸாவகானங் தி³ன்னங் மஹப்ப²ல’ந்தி ஏவங் புச்சி²துங் அயுத்தங், பஞ்ஹமேவ புச்சி²ஸ்ஸாமி, பஞ்ஹங் கதெ²ந்தோ ச மே ப⁴க³வா அவஸானே தித்தி²யானங் வாத³ங் ப⁴ஞ்ஜிஸ்ஸதீ’’தி. ஸோ பஞ்ஹங் புச்ச²ந்தோ கத்த² நு கோ², ப⁴ந்தே, தா³னங் தா³தப்³ப³ந்தி ஆஹ. யத்தா²தி யஸ்மிங் புக்³க³லே சித்தங் பஸீத³தி, தஸ்மிங் தா³தப்³ப³ங், தஸ்ஸ வா தா³தப்³ப³ந்தி அத்தோ².
Aparena samayena mahāchaṇe sampatte ‘‘ayaṃ imassa kālo’’ti nagare bheriṃ carāpesi – ‘‘saddhā vā assaddhā vā sammādiṭṭhikā vā micchādiṭṭhikā vā geharakkhake dārake vā mātugāme vā ṭhapetvā avasesā ye vihāraṃ nāgacchanti, paññāsaṃ daṇḍo’’ti. Sayampi pātova nhatvā katapātarāso sabbābharaṇapaṭimaṇḍito mahatā balakāyena saddhiṃ vihāraṃ agamāsi. Gacchanto ca cintesi – ‘‘bhagavā tumhe kira evaṃ vadatha ‘mayhameva dānaṃ dātabbaṃ…pe… na aññesaṃ sāvakānaṃ dinnaṃ mahapphala’nti evaṃ pucchituṃ ayuttaṃ, pañhameva pucchissāmi, pañhaṃ kathento ca me bhagavā avasāne titthiyānaṃ vādaṃ bhañjissatī’’ti. So pañhaṃ pucchanto kattha nu kho, bhante, dānaṃ dātabbanti āha. Yatthāti yasmiṃ puggale cittaṃ pasīdati, tasmiṃ dātabbaṃ, tassa vā dātabbanti attho.
ஏவங் வுத்தே ராஜா யேஹி மனுஸ்ஸேஹி தித்தி²யானங் வசனங் ஆரோசிதங், தே ஓலோகேஸி. தே ரஞ்ஞா ஓலோகிதமத்தாவ மங்குபூ⁴தா அதோ⁴முகா² பாத³ங்கு³ட்ட²கேன பூ⁴மிங் லேக²மானா அட்ட²ங்ஸு. ராஜா – ‘‘ஏகபதே³னேவ, ப⁴ந்தே, ஹதா தித்தி²யா’’தி மஹாஜனங் ஸாவெந்தோ மஹாஸத்³தே³ன அபா⁴ஸி. ஏவஞ்ச பன பா⁴ஸித்வா – ‘‘ப⁴க³வா சித்தங் நாம நிக³ண்டா²சேலகபரிப்³பா³ஜகாதீ³ஸு யத்த² கத்த²சி பஸீத³தி , கத்த² பன, ப⁴ந்தே, தி³ன்னங் மஹப்ப²ல’’ந்தி புச்சி². அஞ்ஞங் கோ² ஏதந்தி, ‘‘மஹாராஜ, அஞ்ஞங் தயா பட²மங் புச்சி²தங், அஞ்ஞங் பச்சா², ஸல்லக்கே²ஹி ஏதங், பஞ்ஹாகத²னங் பன மய்ஹங் பா⁴ரோ’’தி வத்வா ஸீலவதோ கோ²திஆதி³மாஹ. தத்த² இத⁴ த்யஸ்ஸாதி இத⁴ தே அஸ்ஸ. ஸமுபப்³யூள்ஹோதி ராஸிபூ⁴தோ. அஸிக்கி²தோதி த⁴னுஸிப்பே அஸிக்கி²தோ. அகதஹத்தோ²தி முட்டி²ப³ந்தா⁴தி³வஸேன அஸம்பாதி³தஹத்தோ². அகதயொக்³கோ³தி திணபுஞ்ஜமத்திகாபுஞ்ஜாதீ³ஸு அகதபரிசயோ. அகதூபாஸனோதி ராஜராஜமஹாமத்தானங் அத³ஸ்ஸிதஸரக்கே²போ. ச²ம்பீ⁴தி பவேதி⁴தகாயோ.
Evaṃ vutte rājā yehi manussehi titthiyānaṃ vacanaṃ ārocitaṃ, te olokesi. Te raññā olokitamattāva maṅkubhūtā adhomukhā pādaṅguṭṭhakena bhūmiṃ lekhamānā aṭṭhaṃsu. Rājā – ‘‘ekapadeneva, bhante, hatā titthiyā’’ti mahājanaṃ sāvento mahāsaddena abhāsi. Evañca pana bhāsitvā – ‘‘bhagavā cittaṃ nāma nigaṇṭhācelakaparibbājakādīsu yattha katthaci pasīdati , kattha pana, bhante, dinnaṃ mahapphala’’nti pucchi. Aññaṃ kho etanti, ‘‘mahārāja, aññaṃ tayā paṭhamaṃ pucchitaṃ, aññaṃ pacchā, sallakkhehi etaṃ, pañhākathanaṃ pana mayhaṃ bhāro’’ti vatvā sīlavato khotiādimāha. Tattha idha tyassāti idha te assa. Samupabyūḷhoti rāsibhūto. Asikkhitoti dhanusippe asikkhito. Akatahatthoti muṭṭhibandhādivasena asampāditahattho. Akatayoggoti tiṇapuñjamattikāpuñjādīsu akataparicayo. Akatūpāsanoti rājarājamahāmattānaṃ adassitasarakkhepo. Chambhīti pavedhitakāyo.
காமச்ச²ந்தோ³ பஹீனோதிஆதீ³ஸு அரஹத்தமக்³கே³ன காமச்ச²ந்தோ³ பஹீனோ ஹோதி, அனாகா³மிமக்³கே³ன ப்³யாபாதோ³ , அரஹத்தமக்³கே³னேவ தி²னமித்³த⁴ங், ததா² உத்³த⁴ச்சங், ததியேனேவ குக்குச்சங், பட²மமக்³கே³ன விசிகிச்சா² பஹீனா ஹோதி. அஸெக்கே²ன ஸீலக்க²ந்தே⁴னாதி அஸெக்க²ஸ்ஸ ஸீலக்க²ந்தோ⁴ அஸெக்கோ² ஸீலக்க²ந்தோ⁴ நாம. ஏஸ நயோ ஸப்³ப³த்த². எத்த² ச புரிமேஹி சதூஹி பதே³ஹி லோகியலோகுத்தரஸீலஸமாதி⁴பஞ்ஞாவிமுத்தியோ கதி²தா. விமுத்திஞாணத³ஸ்ஸனங் பச்சவெக்க²ணஞாணங் ஹோதி, தங் லோகியமேவ.
Kāmacchando pahīnotiādīsu arahattamaggena kāmacchando pahīno hoti, anāgāmimaggena byāpādo , arahattamaggeneva thinamiddhaṃ, tathā uddhaccaṃ, tatiyeneva kukkuccaṃ, paṭhamamaggena vicikicchā pahīnā hoti. Asekkhenasīlakkhandhenāti asekkhassa sīlakkhandho asekkho sīlakkhandho nāma. Esa nayo sabbattha. Ettha ca purimehi catūhi padehi lokiyalokuttarasīlasamādhipaññāvimuttiyo kathitā. Vimuttiñāṇadassanaṃ paccavekkhaṇañāṇaṃ hoti, taṃ lokiyameva.
இஸ்ஸத்தந்தி உஸுஸிப்பங். ப³லவீரியந்தி எத்த² ப³லங் நாம வாயோதா⁴து, வீரியங் காயிகசேதஸிகவீரியமேவ. ப⁴ரேதி ப⁴ரெய்ய. நாஸூரங் ஜாதிபச்சயாதி, ‘‘அயங் ஜாதிஸம்பன்னோ’’தி ஏவங் ஜாதிகாரணா அஸூரங் ந ப⁴ரெய்ய.
Issattanti ususippaṃ. Balavīriyanti ettha balaṃ nāma vāyodhātu, vīriyaṃ kāyikacetasikavīriyameva. Bhareti bhareyya. Nāsūraṃ jātipaccayāti, ‘‘ayaṃ jātisampanno’’ti evaṃ jātikāraṇā asūraṃ na bhareyya.
க²ந்திஸோரச்சந்தி எத்த² க²ந்தீதி அதி⁴வாஸனக²ந்தி, ஸோரச்சந்தி அரஹத்தங். த⁴ம்மாதி ஏதே த்³வே த⁴ம்மா. அஸ்ஸமேதி ஆவஸதே². விவனேதி அரஞ்ஞட்டா²னே, நிருத³கே அரஞ்ஞே சதுரஸ்ஸபொக்க²ரணிஆதீ³னி காரயேதி அத்தோ². து³க்³கே³தி விஸமட்டா²னே. ஸங்கமனானீதி பண்ணாஸஹத்த²ஸட்டி²ஹத்தா²னி ஸமோகிண்ணபரிஸுத்³த⁴வாலிகானி ஸங்கமனானி கரெய்ய.
Khantisoraccanti ettha khantīti adhivāsanakhanti, soraccanti arahattaṃ. Dhammāti ete dve dhammā. Assameti āvasathe. Vivaneti araññaṭṭhāne, nirudake araññe caturassapokkharaṇiādīni kārayeti attho. Duggeti visamaṭṭhāne. Saṅkamanānīti paṇṇāsahatthasaṭṭhihatthāni samokiṇṇaparisuddhavālikāni saṅkamanāni kareyya.
இதா³னி ஏதேஸு அரஞ்ஞஸேனாஸனேஸு வஸந்தானங் பி⁴க்கூ²னங் பி⁴க்கா²சாரவத்தங் ஆசிக்க²ந்தோ அன்னங் பானந்திஆதி³மாஹ. தத்த² ஸேனாஸனானீதி மஞ்சபீடா²தீ³னி. விப்பஸன்னேனாதி கீ²ணாஸவஸ்ஸ தெ³ந்தோபி ஸகங்கே²ன கிலேஸமலினேன சித்தேன அத³த்வா விப்பஸன்னேனேவ சித்தேன த³தெ³ய்ய. த²னயந்தி க³ஜ்ஜந்தோ. ஸதக்ககூதி ஸதஸிக²ரோ, அனேககூடோதி அத்தோ². அபி⁴ஸங்க²ச்சாதி அபி⁴ஸங்க²ரித்வா ஸமோதா⁴னெத்வா ராஸிங் கத்வா.
Idāni etesu araññasenāsanesu vasantānaṃ bhikkhūnaṃ bhikkhācāravattaṃ ācikkhanto annaṃ pānantiādimāha. Tattha senāsanānīti mañcapīṭhādīni. Vippasannenāti khīṇāsavassa dentopi sakaṅkhena kilesamalinena cittena adatvā vippasanneneva cittena dadeyya. Thanayanti gajjanto. Satakkakūti satasikharo, anekakūṭoti attho. Abhisaṅkhaccāti abhisaṅkharitvā samodhānetvā rāsiṃ katvā.
ஆமோத³மானோதி துட்ட²மானஸோ ஹுத்வா. பகிரேதீதி தா³னக்³கே³ விசிரதி, பகிரந்தோ விய வா தா³னங் தே³தி. புஞ்ஞதா⁴ராதி அனேகதா³னசேதனாமயா புஞ்ஞதா⁴ரா. தா³தாரங் அபி⁴வஸ்ஸதீதி யதா² ஆகாஸே ஸமுட்டி²தமேக⁴தோ நிக்க²ந்தா உத³கதா⁴ரா பத²விங் ஸினேஹயந்தீ தேமெந்தீ கிலேத³யந்தீ அபி⁴வஸ்ஸதி, ஏவமேவ அயம்பி தா³யகஸ்ஸ அப்³ப⁴ந்தரே உப்பன்னா புஞ்ஞதா⁴ரா தமேவ தா³தாரங் அந்தோ ஸினேஹேதி பூரேதி அபி⁴ஸந்தே³தி. தேன வுத்தங் ‘‘தா³தாரங் அபி⁴வஸ்ஸதீ’’தி. சதுத்த²ங்.
Āmodamānoti tuṭṭhamānaso hutvā. Pakiretīti dānagge vicirati, pakiranto viya vā dānaṃ deti. Puññadhārāti anekadānacetanāmayā puññadhārā. Dātāraṃ abhivassatīti yathā ākāse samuṭṭhitameghato nikkhantā udakadhārā pathaviṃ sinehayantī tementī kiledayantī abhivassati, evameva ayampi dāyakassa abbhantare uppannā puññadhārā tameva dātāraṃ anto sineheti pūreti abhisandeti. Tena vuttaṃ ‘‘dātāraṃ abhivassatī’’ti. Catutthaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 4. இஸ்ஸத்தஸுத்தங் • 4. Issattasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 4. இஸ்ஸத்தஸுத்தவண்ணனா • 4. Issattasuttavaṇṇanā
