| Library / Tipiṭaka / তিপিটক • Tipiṭaka / পঞ্চপকরণ-অট্ঠকথা • Pañcapakaraṇa-aṭṭhakathā |
৬. ইতোদিন্নকথাৰণ্ণনা
6. Itodinnakathāvaṇṇanā
৪৮৮-৪৯১. ইদানি ইতো দিন্নকথা নাম হোতি। তত্থ যেসং ‘‘ইতো দিন্নেন যাপেন্তি, পেতা কালঙ্কতা তহি’’ন্তি (পে॰ ৰ॰ ১৯) ৰচনং নিস্সায ‘‘যং ইতো চীৰরাদি দিন্নং তেনেৰ যাপেন্তী’’তি লদ্ধি, সেয্যথাপি রাজগিরিকসিদ্ধত্থিকানং; তে সন্ধায ইতো দিন্নেনাতি পুচ্ছা সকৰাদিস্স, পটিঞ্ঞা ইতরস্স । পুন চীৰরাদিৰসেন অনুযুত্তো পটিক্খিপতি। অঞ্ঞো অঞ্ঞস্স কারকোতি অঞ্ঞস্স ৰিপাকদাযকানং কম্মানং অঞ্ঞো কারকো, ন অত্তনাৰ অত্তনো কম্মং করোতীতি ৰুত্তং হোতি। এৰং পুট্ঠো পন ইতরো সুত্তৰিরোধভযেন পটিক্খিপতি। দানং দেন্তন্তি দানং দদমানং দিস্ৰাতি অত্থো। তত্থ যস্মা অত্তনো অনুমোদিতত্তা চ তেসং তত্থ ভোগা উপ্পজ্জন্তি, তস্মাস্স ইমিনা কারণেন লদ্ধিং পতিট্ঠপেন্তস্সাপি অপ্পতিট্ঠিতাৰ হোতি। ন হি তে ইতো দিন্নেনেৰ ৰত্থুনা যাপেন্তি। সেসেসুপি সুত্তসাধনেসু এসেৰ নযোতি।
488-491. Idāni ito dinnakathā nāma hoti. Tattha yesaṃ ‘‘ito dinnena yāpenti, petā kālaṅkatā tahi’’nti (pe. va. 19) vacanaṃ nissāya ‘‘yaṃ ito cīvarādi dinnaṃ teneva yāpentī’’ti laddhi, seyyathāpi rājagirikasiddhatthikānaṃ; te sandhāya ito dinnenāti pucchā sakavādissa, paṭiññā itarassa . Puna cīvarādivasena anuyutto paṭikkhipati. Añño aññassa kārakoti aññassa vipākadāyakānaṃ kammānaṃ añño kārako, na attanāva attano kammaṃ karotīti vuttaṃ hoti. Evaṃ puṭṭho pana itaro suttavirodhabhayena paṭikkhipati. Dānaṃ dentanti dānaṃ dadamānaṃ disvāti attho. Tattha yasmā attano anumoditattā ca tesaṃ tattha bhogā uppajjanti, tasmāssa iminā kāraṇena laddhiṃ patiṭṭhapentassāpi appatiṭṭhitāva hoti. Na hi te ito dinneneva vatthunā yāpenti. Sesesupi suttasādhanesu eseva nayoti.
ইতো দিন্নকথাৰণ্ণনা।
Ito dinnakathāvaṇṇanā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / কথাৰত্থুপাল়ি • Kathāvatthupāḷi / (৬৮) ৬. ইতোদিন্নকথা • (68) 6. Itodinnakathā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-মূলটীকা • Pañcapakaraṇa-mūlaṭīkā / ৬. ইতোদিন্নকথাৰণ্ণনা • 6. Itodinnakathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-অনুটীকা • Pañcapakaraṇa-anuṭīkā / ৬. ইতোদিন্নকথাৰণ্ণনা • 6. Itodinnakathāvaṇṇanā
