| Library / Tipiṭaka / တိပိဋက • Tipiṭaka / ပဉ္စပကရဏ-အဋ္ဌကထာ • Pañcapakaraṇa-aṭṭhakathā |
၆. ဣတောဒိန္နကထာဝဏ္ဏနာ
6. Itodinnakathāvaṇṇanā
၄၈၈-၄၉၁. ဣဒာနိ ဣတော ဒိန္နကထာ နာမ ဟောတိ။ တတ္ထ ယေသံ ‘‘ဣတော ဒိန္နေန ယာပေန္တိ, ပေတာ ကာလင္ကတာ တဟိ’’န္တိ (ပေ. ဝ. ၁၉) ဝစနံ နိသ္သာယ ‘‘ယံ ဣတော စီဝရာဒိ ဒိန္နံ တေနေဝ ယာပေန္တီ’’တိ လဒ္ဓိ, သေယ္ယထာပိ ရာဇဂိရိကသိဒ္ဓတ္ထိကာနံ; တေ သန္ဓာယ ဣတော ဒိန္နေနာတိ ပုစ္ဆာ သကဝာဒိသ္သ, ပဋိညာ ဣတရသ္သ ။ ပုန စီဝရာဒိဝသေန အနုယုတ္တော ပဋိက္ခိပတိ။ အညော အညသ္သ ကာရကောတိ အညသ္သ ဝိပာကဒာယကာနံ ကမ္မာနံ အညော ကာရကော, န အတ္တနာဝ အတ္တနော ကမ္မံ ကရောတီတိ ဝုတ္တံ ဟောတိ။ ဧဝံ ပုဋ္ဌော ပန ဣတရော သုတ္တဝိရောဓဘယေန ပဋိက္ခိပတိ။ ဒာနံ ဒေန္တန္တိ ဒာနံ ဒဒမာနံ ဒိသ္ဝာတိ အတ္ထော။ တတ္ထ ယသ္မာ အတ္တနော အနုမောဒိတတ္တာ စ တေသံ တတ္ထ ဘောဂာ ဥပ္ပဇ္ဇန္တိ, တသ္မာသ္သ ဣမိနာ ကာရဏေန လဒ္ဓိံ ပတိဋ္ဌပေန္တသ္သာပိ အပ္ပတိဋ္ဌိတာဝ ဟောတိ။ န ဟိ တေ ဣတော ဒိန္နေနေဝ ဝတ္ထုနာ ယာပေန္တိ။ သေသေသုပိ သုတ္တသာဓနေသု ဧသေဝ နယောတိ။
488-491. Idāni ito dinnakathā nāma hoti. Tattha yesaṃ ‘‘ito dinnena yāpenti, petā kālaṅkatā tahi’’nti (pe. va. 19) vacanaṃ nissāya ‘‘yaṃ ito cīvarādi dinnaṃ teneva yāpentī’’ti laddhi, seyyathāpi rājagirikasiddhatthikānaṃ; te sandhāya ito dinnenāti pucchā sakavādissa, paṭiññā itarassa . Puna cīvarādivasena anuyutto paṭikkhipati. Añño aññassa kārakoti aññassa vipākadāyakānaṃ kammānaṃ añño kārako, na attanāva attano kammaṃ karotīti vuttaṃ hoti. Evaṃ puṭṭho pana itaro suttavirodhabhayena paṭikkhipati. Dānaṃ dentanti dānaṃ dadamānaṃ disvāti attho. Tattha yasmā attano anumoditattā ca tesaṃ tattha bhogā uppajjanti, tasmāssa iminā kāraṇena laddhiṃ patiṭṭhapentassāpi appatiṭṭhitāva hoti. Na hi te ito dinneneva vatthunā yāpenti. Sesesupi suttasādhanesu eseva nayoti.
ဣတော ဒိန္နကထာဝဏ္ဏနာ။
Ito dinnakathāvaṇṇanā.
Related texts:
တိပိဋက (မူလ) • Tipiṭaka (Mūla) / အဘိဓမ္မပိဋက • Abhidhammapiṭaka / ကထာဝတ္ထုပာဠိ • Kathāvatthupāḷi / (၆၈) ၆. ဣတောဒိန္နကထာ • (68) 6. Itodinnakathā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-မူလဋီကာ • Pañcapakaraṇa-mūlaṭīkā / ၆. ဣတောဒိန္နကထာဝဏ္ဏနာ • 6. Itodinnakathāvaṇṇanā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-အနုဋီကာ • Pañcapakaraṇa-anuṭīkā / ၆. ဣတောဒိန္နကထာဝဏ္ဏနာ • 6. Itodinnakathāvaṇṇanā
