| Library / Tipiṭaka / តិបិដក • Tipiṭaka / អង្គុត្តរនិកាយ • Aṅguttaranikāya |
៣. ឥដ្ឋធម្មសុត្តំ
3. Iṭṭhadhammasuttaṃ
៧៣. ‘‘ទសយិមេ, ភិក្ខវេ, ធម្មា ឥដ្ឋា កន្តា មនាបា ទុល្លភា លោកស្មិំ។ កតមេ ទស? ភោគា ឥដ្ឋា កន្តា មនាបា ទុល្លភា លោកស្មិំ; វណ្ណោ ឥដ្ឋោ កន្តោ មនាបោ ទុល្លភោ លោកស្មិំ; អារោគ្យំ ឥដ្ឋំ កន្តំ មនាបំ ទុល្លភំ លោកស្មិំ; សីលំ ឥដ្ឋំ កន្តំ មនាបំ ទុល្លភំ លោកស្មិំ; ព្រហ្មចរិយំ ឥដ្ឋំ កន្តំ មនាបំ ទុល្លភំ លោកស្មិំ; មិត្តា ឥដ្ឋា កន្តា មនាបា ទុល្លភា លោកស្មិំ; ពាហុសច្ចំ ឥដ្ឋំ កន្តំ មនាបំ ទុល្លភំ លោកស្មិំ; បញ្ញា ឥដ្ឋា កន្តា មនាបា ទុល្លភា លោកស្មិំ; ធម្មា ឥដ្ឋា កន្តា មនាបា ទុល្លភា លោកស្មិំ ; សគ្គា ឥដ្ឋា កន្តា មនាបា ទុល្លភា លោកស្មិំ។
73. ‘‘Dasayime, bhikkhave, dhammā iṭṭhā kantā manāpā dullabhā lokasmiṃ. Katame dasa? Bhogā iṭṭhā kantā manāpā dullabhā lokasmiṃ; vaṇṇo iṭṭho kanto manāpo dullabho lokasmiṃ; ārogyaṃ iṭṭhaṃ kantaṃ manāpaṃ dullabhaṃ lokasmiṃ; sīlaṃ iṭṭhaṃ kantaṃ manāpaṃ dullabhaṃ lokasmiṃ; brahmacariyaṃ iṭṭhaṃ kantaṃ manāpaṃ dullabhaṃ lokasmiṃ; mittā iṭṭhā kantā manāpā dullabhā lokasmiṃ; bāhusaccaṃ iṭṭhaṃ kantaṃ manāpaṃ dullabhaṃ lokasmiṃ; paññā iṭṭhā kantā manāpā dullabhā lokasmiṃ; dhammā iṭṭhā kantā manāpā dullabhā lokasmiṃ ; saggā iṭṭhā kantā manāpā dullabhā lokasmiṃ.
‘‘ឥមេសំ ខោ, ភិក្ខវេ, ទសន្នំ ធម្មានំ ឥដ្ឋានំ កន្តានំ មនាបានំ ទុល្លភានំ លោកស្មិំ ទស ធម្មា បរិបន្ថា 1 – អាលស្យំ អនុដ្ឋានំ ភោគានំ បរិបន្ថោ, អមណ្ឌនា អវិភូសនា វណ្ណស្ស បរិបន្ថោ, អសប្បាយកិរិយា អារោគ្យស្ស បរិបន្ថោ, បាបមិត្តតា សីលានំ បរិបន្ថោ, ឥន្ទ្រិយអសំវរោ ព្រហ្មចរិយស្ស បរិបន្ថោ, វិសំវាទនា មិត្តានំ បរិបន្ថោ, អសជ្ឈាយកិរិយា ពាហុសច្ចស្ស បរិបន្ថោ, អសុស្សូសា អបរិបុច្ឆា បញ្ញាយ បរិបន្ថោ, អននុយោគោ អបច្ចវេក្ខណា ធម្មានំ បរិបន្ថោ, មិច្ឆាបដិបត្តិ សគ្គានំ បរិបន្ថោ។ ឥមេសំ ខោ, ភិក្ខវេ, ទសន្នំ ឥដ្ឋានំ កន្តានំ មនាបានំ ទុល្លភានំ លោកស្មិំ ឥមេ ទស ធម្មា បរិបន្ថា។
‘‘Imesaṃ kho, bhikkhave, dasannaṃ dhammānaṃ iṭṭhānaṃ kantānaṃ manāpānaṃ dullabhānaṃ lokasmiṃ dasa dhammā paripanthā 2 – ālasyaṃ anuṭṭhānaṃ bhogānaṃ paripantho, amaṇḍanā avibhūsanā vaṇṇassa paripantho, asappāyakiriyā ārogyassa paripantho, pāpamittatā sīlānaṃ paripantho, indriyaasaṃvaro brahmacariyassa paripantho, visaṃvādanā mittānaṃ paripantho, asajjhāyakiriyā bāhusaccassa paripantho, asussūsā aparipucchā paññāya paripantho, ananuyogo apaccavekkhaṇā dhammānaṃ paripantho, micchāpaṭipatti saggānaṃ paripantho. Imesaṃ kho, bhikkhave, dasannaṃ iṭṭhānaṃ kantānaṃ manāpānaṃ dullabhānaṃ lokasmiṃ ime dasa dhammā paripanthā.
‘‘ឥមេសំ ខោ, ភិក្ខវេ, ទសន្នំ ធម្មានំ ឥដ្ឋានំ កន្តានំ មនាបានំ ទុល្លភានំ លោកស្មិំ ទស ធម្មា អាហារា – ឧដ្ឋានំ អនាលស្យំ ភោគានំ អាហារោ, មណ្ឌនា វិភូសនា វណ្ណស្ស អាហារោ, សប្បាយកិរិយា អារោគ្យស្ស អាហារោ, កល្យាណមិត្តតា សីលានំ អាហារោ, ឥន្ទ្រិយសំវរោ ព្រហ្មចរិយស្ស អាហារោ, អវិសំវាទនា មិត្តានំ អាហារោ, សជ្ឈាយកិរិយា ពាហុសច្ចស្ស អាហារោ, សុស្សូសា បរិបុច្ឆា បញ្ញាយ អាហារោ, អនុយោគោ បច្ចវេក្ខណា ធម្មានំ អាហារោ, សម្មាបដិបត្តិ សគ្គានំ អាហារោ ។ ឥមេសំ ខោ, ភិក្ខវេ, ទសន្នំ ធម្មានំ ឥដ្ឋានំ កន្តានំ មនាបានំ ទុល្លភានំ លោកស្មិំ ឥមេ ទស ធម្មា អាហារា’’តិ។ តតិយំ។
‘‘Imesaṃ kho, bhikkhave, dasannaṃ dhammānaṃ iṭṭhānaṃ kantānaṃ manāpānaṃ dullabhānaṃ lokasmiṃ dasa dhammā āhārā – uṭṭhānaṃ anālasyaṃ bhogānaṃ āhāro, maṇḍanā vibhūsanā vaṇṇassa āhāro, sappāyakiriyā ārogyassa āhāro, kalyāṇamittatā sīlānaṃ āhāro, indriyasaṃvaro brahmacariyassa āhāro, avisaṃvādanā mittānaṃ āhāro, sajjhāyakiriyā bāhusaccassa āhāro, sussūsā paripucchā paññāya āhāro, anuyogo paccavekkhaṇā dhammānaṃ āhāro, sammāpaṭipatti saggānaṃ āhāro . Imesaṃ kho, bhikkhave, dasannaṃ dhammānaṃ iṭṭhānaṃ kantānaṃ manāpānaṃ dullabhānaṃ lokasmiṃ ime dasa dhammā āhārā’’ti. Tatiyaṃ.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā) / ៣-៤. ឥដ្ឋធម្មសុត្តាទិវណ្ណនា • 3-4. Iṭṭhadhammasuttādivaṇṇanā
ដីកា • Tīkā / សុត្តបិដក (ដីកា) • Suttapiṭaka (ṭīkā) / អង្គុត្តរនិកាយ (ដីកា) • Aṅguttaranikāya (ṭīkā) / ១-៤. អាកង្ខសុត្តាទិវណ្ណនា • 1-4. Ākaṅkhasuttādivaṇṇanā
