| Library / Tipiṭaka / තිපිටක • Tipiṭaka / ඉතිවුත්‌තකපාළි • Itivuttakapāḷi |
10. ජාගරියසුත්‌තං
10. Jāgariyasuttaṃ
47. වුත්‌තඤ්‌හෙතං භගවතා, වුත්‌තමරහතාති මෙ සුතං –
47. Vuttañhetaṃ bhagavatā, vuttamarahatāti me sutaṃ –
‘‘ජාගරො චස්‌ස, භික්‌ඛවෙ, භික්‌ඛු විහරෙය්‍ය සතො සම්‌පජානො සමාහිතො පමුදිතො විප්‌පසන්‌නො ච තත්‌ථ කාලවිපස්‌සී ච කුසලෙසු ධම්‌මෙසු. ජාගරස්‌ස, භික්‌ඛවෙ, භික්‌ඛුනො විහරතො සතස්‌ස සම්‌පජානස්‌ස සමාහිතස්‌ස පමුදිතස්‌ස විප්‌පසන්‌නස්‌ස තත්‌ථ කාලවිපස්‌සිනො කුසලෙසු ධම්‌මෙසු ද්‌වින්‌නං ඵලානං අඤ්‌ඤතරං ඵලං පාටිකඞ්‌ඛං – දිට්‌ඨෙව ධම්‌මෙ අඤ්‌ඤා, සති වා උපාදිසෙසෙ අනාගාමිතා’’ති. එතමත්‌ථං භගවා අවොච. තත්‌ථෙතං ඉති වුච්‌චති –
‘‘Jāgaro cassa, bhikkhave, bhikkhu vihareyya sato sampajāno samāhito pamudito vippasanno ca tattha kālavipassī ca kusalesu dhammesu. Jāgarassa, bhikkhave, bhikkhuno viharato satassa sampajānassa samāhitassa pamuditassa vippasannassa tattha kālavipassino kusalesu dhammesu dvinnaṃ phalānaṃ aññataraṃ phalaṃ pāṭikaṅkhaṃ – diṭṭheva dhamme aññā, sati vā upādisese anāgāmitā’’ti. Etamatthaṃ bhagavā avoca. Tatthetaṃ iti vuccati –
‘‘ජාගරන්‌තා සුණාථෙතං, යෙ සුත්‌තා තෙ පබුජ්‌ඣථ;
‘‘Jāgarantā suṇāthetaṃ, ye suttā te pabujjhatha;
සුත්‌තා ජාගරිතං සෙය්‍යො, නත්‌ථි ජාගරතො භයං.
Suttā jāgaritaṃ seyyo, natthi jāgarato bhayaṃ.
‘‘යො ජාගරො ච සතිමා සම්‌පජානො, සමාහිතො මුදිතො විප්‌පසන්‌නො ච;
‘‘Yo jāgaro ca satimā sampajāno, samāhito mudito vippasanno ca;
කාලෙන සො සම්‌මා ධම්‌මං පරිවීමංසමානො, එකොදිභූතො විහනෙ තමං සො.
Kālena so sammā dhammaṃ parivīmaṃsamāno, ekodibhūto vihane tamaṃ so.
‘‘තස්‌මා හවෙ ජාගරියං භජෙථ, ආතාපී භික්‌ඛු නිපකො ඣානලාභී;
‘‘Tasmā have jāgariyaṃ bhajetha, ātāpī bhikkhu nipako jhānalābhī;
සංයොජනං ජාතිජරාය ඡෙත්‌වා, ඉධෙව සම්‌බොධිමනුත්‌තරං ඵුසෙ’’ති.
Saṃyojanaṃ jātijarāya chetvā, idheva sambodhimanuttaraṃ phuse’’ti.
අයම්‌පි අත්‌ථො වුත්‌තො භගවතා, ඉති මෙ සුතන්‌ති. දසමං.
Ayampi attho vutto bhagavatā, iti me sutanti. Dasamaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / ඛුද්‌දකනිකාය (අට්‌ඨකථා) • Khuddakanikāya (aṭṭhakathā) / ඉතිවුත්‌තක-අට්‌ඨකථා • Itivuttaka-aṭṭhakathā / 10. ජාගරියසුත්‌තවණ්‌ණනා • 10. Jāgariyasuttavaṇṇanā
