| Library / Tipiṭaka / තිපිටක • Tipiṭaka / අපදානපාළි • Apadānapāḷi |
46. ජගතිදායකවග්‌ගො
46. Jagatidāyakavaggo
1. ජගතිදායකත්‌ථෙරඅපදානං
1. Jagatidāyakattheraapadānaṃ
1.
1.
‘‘ධම්‌මදස්‌සිස්‌ස මුනිනො, බොධියා පාදපුත්‌තමෙ;
‘‘Dhammadassissa munino, bodhiyā pādaputtame;
පසන්‌නචිත්‌තො සුමනො, ජගතිං කාරයිං අහං.
Pasannacitto sumano, jagatiṃ kārayiṃ ahaṃ.
2.
2.
‘‘දරිතො පබ්‌බතතො වා, රුක්‌ඛතො පතිතො අහං;
‘‘Darito pabbatato vā, rukkhato patito ahaṃ;
චුතො පතිට්‌ඨං වින්‌දාමි, ජගතියා ඉදං ඵලං.
Cuto patiṭṭhaṃ vindāmi, jagatiyā idaṃ phalaṃ.
3.
3.
සබ්‌බාමිත්‌තෙතික්‌කමාමි, ජගතියා ඉදං ඵලං.
Sabbāmittetikkamāmi, jagatiyā idaṃ phalaṃ.
4.
4.
‘‘යං යං යොනුපපජ්‌ජාමි, දෙවත්‌තං අථ මානුසං;
‘‘Yaṃ yaṃ yonupapajjāmi, devattaṃ atha mānusaṃ;
සබ්‌බත්‌ථ පූජිතො හොමි, ජගතියා ඉදං ඵලං.
Sabbattha pūjito homi, jagatiyā idaṃ phalaṃ.
5.
5.
‘‘අට්‌ඨාරසෙ කප්‌පසතෙ, ජගතිං කාරයිං අහං;
‘‘Aṭṭhārase kappasate, jagatiṃ kārayiṃ ahaṃ;
දුග්‌ගතිං නාභිජානාමි, ජගතිදානස්‌සිදං ඵලං.
Duggatiṃ nābhijānāmi, jagatidānassidaṃ phalaṃ.
6.
6.
‘‘කිලෙසා ඣාපිතා මය්‌හං, භවා සබ්‌බෙ සමූහතා;
‘‘Kilesā jhāpitā mayhaṃ, bhavā sabbe samūhatā;
නාගොව බන්‌ධනං ඡෙත්‌වා, විහරාමි අනාසවො.
Nāgova bandhanaṃ chetvā, viharāmi anāsavo.
7.
7.
‘‘ස්‌වාගතං වත මෙ ආසි, මම බුද්‌ධස්‌ස සන්‌තිකෙ;
‘‘Svāgataṃ vata me āsi, mama buddhassa santike;
තිස්‌සො විජ්‌ජා අනුප්‌පත්‌තා, කතං බුද්‌ධස්‌ස සාසනං.
Tisso vijjā anuppattā, kataṃ buddhassa sāsanaṃ.
8.
8.
‘‘පටිසම්‌භිදා චතස්‌සො, විමොක්‌ඛාපි ච අට්‌ඨිමෙ;
‘‘Paṭisambhidā catasso, vimokkhāpi ca aṭṭhime;
ඡළභිඤ්‌ඤා සච්‌ඡිකතා, කතං බුද්‌ධස්‌ස සාසනං’’.
Chaḷabhiññā sacchikatā, kataṃ buddhassa sāsanaṃ’’.
ඉත්‌ථං සුදං ආයස්‌මා ජගතිදායකො ථෙරො ඉමා ගාථායො
Itthaṃ sudaṃ āyasmā jagatidāyako thero imā gāthāyo
අභාසිත්‌ථාති.
Abhāsitthāti.
ජගතිදායකත්‌ථෙරස්‌සාපදානං පඨමං.
Jagatidāyakattherassāpadānaṃ paṭhamaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / ඛුද්‌දකනිකාය (අට්‌ඨකථා) • Khuddakanikāya (aṭṭhakathā) / අපදාන-අට්‌ඨකථා • Apadāna-aṭṭhakathā / 1-60. සකිංසම්‌මජ්‌ජකත්‌ථෙරඅපදානාදිවණ්‌ණනා • 1-60. Sakiṃsammajjakattheraapadānādivaṇṇanā
