| Library / Tipiṭaka / திபிடக • Tipiṭaka / பஞ்சபகரண-அட்ட²கதா² • Pañcapakaraṇa-aṭṭhakathā |
4. ஜஹதிகதா²
4. Jahatikathā
1. நஸுத்தாஹரணகதா²வண்ணனா
1. Nasuttāharaṇakathāvaṇṇanā
279. இதா³னி ஜஹதிகதா² நாம ஹோதி. தத்த² யேஸங் ‘‘ஜா²னலாபீ⁴ புது²ஜ்ஜனோ ஸஹ ஸச்சாபி⁴ஸமயா அனாகா³மீ நாம ஹோதி, தஸ்ஸ புது²ஜ்ஜனகாலேயேவ காமராக³ப்³யாபாதா³ பஹீனா’’தி லத்³தி⁴ ஸெய்யதா²பி ஏதரஹி ஸம்மிதியானங், தேஸங் தங் லத்³தி⁴ங் பி⁴ந்தி³துங் ஜஹதி புது²ஜ்ஜனோதி புச்சா² ஸகவாதி³ஸ்ஸ, ஜா²னவிக்க²ம்பி⁴தானங் பன தேஸங் பரியுட்டா²னங் அபஸ்ஸந்தஸ்ஸ படிஞ்ஞா பரவாதி³ஸ்ஸ. யஸ்மா பன தேஸங் ஜா²னவிக்க²ம்பி⁴தானம்பி அனாகா³மிமக்³கே³னேவ அச்சந்தங் பஹானங் ஹோதி, தஸ்மா புன அச்சந்தந்திஆதி³அனுயோகோ³ ஸகவாதி³ஸ்ஸ, ததா²ரூபஸ்ஸ பஹானஸ்ஸ அபா⁴வதோ படிக்கே²போ இதரஸ்ஸ. விக்க²ம்பே⁴தீதி அச்சந்தவிக்க²ம்ப⁴னமேவ ஸந்தா⁴ய புச்சா² ஸகவாதி³ஸ்ஸ. ததோ பரங் அனாகா³மிமக்³க³ட்டே²ன ஸத்³தி⁴ங் புது²ஜ்ஜனஸங்ஸந்த³னங் ஹோதி. தங் உத்தானத்த²மேவ.
279. Idāni jahatikathā nāma hoti. Tattha yesaṃ ‘‘jhānalābhī puthujjano saha saccābhisamayā anāgāmī nāma hoti, tassa puthujjanakāleyeva kāmarāgabyāpādā pahīnā’’ti laddhi seyyathāpi etarahi sammitiyānaṃ, tesaṃ taṃ laddhiṃ bhindituṃ jahati puthujjanoti pucchā sakavādissa, jhānavikkhambhitānaṃ pana tesaṃ pariyuṭṭhānaṃ apassantassa paṭiññā paravādissa. Yasmā pana tesaṃ jhānavikkhambhitānampi anāgāmimaggeneva accantaṃ pahānaṃ hoti, tasmā puna accantantiādianuyogo sakavādissa, tathārūpassa pahānassa abhāvato paṭikkhepo itarassa. Vikkhambhetīti accantavikkhambhanameva sandhāya pucchā sakavādissa. Tato paraṃ anāgāmimaggaṭṭhena saddhiṃ puthujjanasaṃsandanaṃ hoti. Taṃ uttānatthameva.
280. ததோ பரங் அனாகா³மிப²லே ஸண்டா²தீதி புட்டோ² ஜா²னானாகா³மிதங் ஸந்தா⁴ய படிஜானாதி. அரஹத்தே ஸண்டா²தீதி புட்டோ² த³ஸ்ஸனமக்³கே³ன உத்³த⁴ம்பா⁴கி³யானங் பஹானாபா⁴வதோ படிக்கி²பதி.
280. Tato paraṃ anāgāmiphale saṇṭhātīti puṭṭho jhānānāgāmitaṃ sandhāya paṭijānāti. Arahatte saṇṭhātīti puṭṭho dassanamaggena uddhambhāgiyānaṃ pahānābhāvato paṭikkhipati.
அபுப்³ப³ங் அசரிமங் தயோ மக்³கே³தி புட்டோ² ததா²ரூபாய பா⁴வனாய அபா⁴வா படிக்கி²பதி. புன புட்டோ² திண்ணங் மக்³கா³னங் கிச்சஸப்³பா⁴வங் ஸந்தா⁴ய படிஜானாதி. ஸாமஞ்ஞப²லபுச்சா²ஸுபி ஏஸேவ நயோ. கதமேன மக்³கே³னாதி புட்டோ² அனாகா³மிமக்³கே³னாதி ஜா²னானாகா³மிதங் ஸந்தா⁴ய வத³தி. புன ஸங்யோஜனப்பஹானங் புட்டோ² திண்ணங் அனாகா³மிமக்³கே³ன தேஸங் கிலேஸானங் அப்பஹெய்யத்தா படிக்கி²பதி. து³தியங் புட்டோ² பட²மமக்³க³ஸ்ஸேவ ஜா²னானாகா³மிமக்³க³பா⁴வங் ஸந்தா⁴ய படிஜானாதி. ஸேஸமெத்த² உத்தானத்த²மேவாதி.
Apubbaṃ acarimaṃ tayo maggeti puṭṭho tathārūpāya bhāvanāya abhāvā paṭikkhipati. Puna puṭṭho tiṇṇaṃ maggānaṃ kiccasabbhāvaṃ sandhāya paṭijānāti. Sāmaññaphalapucchāsupi eseva nayo. Katamena maggenāti puṭṭho anāgāmimaggenāti jhānānāgāmitaṃ sandhāya vadati. Puna saṃyojanappahānaṃ puṭṭho tiṇṇaṃ anāgāmimaggena tesaṃ kilesānaṃ appaheyyattā paṭikkhipati. Dutiyaṃ puṭṭho paṭhamamaggasseva jhānānāgāmimaggabhāvaṃ sandhāya paṭijānāti. Sesamettha uttānatthamevāti.
ஜஹதிகதா².
Jahatikathā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / கதா²வத்து²பாளி • Kathāvatthupāḷi / 4. ஜஹதிகதா² • 4. Jahatikathā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-மூலடீகா • Pañcapakaraṇa-mūlaṭīkā / 4. ஜஹதிகதா²வண்ணனா • 4. Jahatikathāvaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-அனுடீகா • Pañcapakaraṇa-anuṭīkā / 4. ஜஹதிகதா²வண்ணனா • 4. Jahatikathāvaṇṇanā
