| Library / Tipiṭaka / তিপিটক • Tipiṭaka / কথাৰত্থুপাল়ি • Kathāvatthupāḷi |
৪. জহতিকথা
4. Jahatikathā
১. নসুত্তাহরণকথা
1. Nasuttāharaṇakathā
২৭৯. জহতি পুথুজ্জনো কামরাগব্যাপাদন্তি? আমন্তা। অচ্চন্তং জহতি, অনৰসেসং জহতি, অপ্পটিসন্ধিযং জহতি, সমূলং জহতি, সতণ্হং জহতি, সানুসযং জহতি, অরিযেন ঞাণেন জহতি, অরিযেন মগ্গেন জহতি, অকুপ্পং পটিৰিজ্ঝন্তো জহতি, অনাগামিফলং সচ্ছিকরোন্তো জহতীতি? ন হেৰং ৰত্তব্বে…পে॰…।
279. Jahati puthujjano kāmarāgabyāpādanti? Āmantā. Accantaṃ jahati, anavasesaṃ jahati, appaṭisandhiyaṃ jahati, samūlaṃ jahati, sataṇhaṃ jahati, sānusayaṃ jahati, ariyena ñāṇena jahati, ariyena maggena jahati, akuppaṃ paṭivijjhanto jahati, anāgāmiphalaṃ sacchikaronto jahatīti? Na hevaṃ vattabbe…pe….
ৰিক্খম্ভেতি পুথুজ্জনো কামরাগব্যাপাদন্তি? আমন্তা। অচ্চন্তং ৰিক্খম্ভেতি, অনৰসেসং ৰিক্খম্ভেতি, অপ্পটিসন্ধিযং ৰিক্খম্ভেতি, সমূলং ৰিক্খম্ভেতি, সতণ্হং ৰিক্খম্ভেতি, সানুসযং ৰিক্খম্ভেতি, অরিযেন ঞাণেন ৰিক্খম্ভেতি, অরিযেন মগ্গেন ৰিক্খম্ভেতি, অকুপ্পং পটিৰিজ্ঝন্তো ৰিক্খম্ভেতি, অনাগামিফলং সচ্ছিকরোন্তো ৰিক্খম্ভেতীতি? ন হেৰং ৰত্তব্বে…পে॰…।
Vikkhambheti puthujjano kāmarāgabyāpādanti? Āmantā. Accantaṃ vikkhambheti, anavasesaṃ vikkhambheti, appaṭisandhiyaṃ vikkhambheti, samūlaṃ vikkhambheti, sataṇhaṃ vikkhambheti, sānusayaṃ vikkhambheti, ariyena ñāṇena vikkhambheti, ariyena maggena vikkhambheti, akuppaṃ paṭivijjhanto vikkhambheti, anāgāmiphalaṃ sacchikaronto vikkhambhetīti? Na hevaṃ vattabbe…pe….
জহতি অনাগামিফলসচ্ছিকিরিযায পটিপন্নো পুগ্গলো কামরাগব্যাপাদং, সো চ অচ্চন্তং জহতি, অনৰসেসং জহতি…পে॰… অনাগামিফলং সচ্ছিকরোন্তো জহতীতি? আমন্তা। জহতি পুথুজ্জনো কামরাগব্যাপাদং, সো চ অচ্চন্তং জহতি, অনৰসেসং জহতি…পে॰… অনাগামিফলং সচ্ছিকরোন্তো জহতীতি? ন হেৰং ৰত্তব্বে…পে॰…।
Jahati anāgāmiphalasacchikiriyāya paṭipanno puggalo kāmarāgabyāpādaṃ, so ca accantaṃ jahati, anavasesaṃ jahati…pe… anāgāmiphalaṃ sacchikaronto jahatīti? Āmantā. Jahati puthujjano kāmarāgabyāpādaṃ, so ca accantaṃ jahati, anavasesaṃ jahati…pe… anāgāmiphalaṃ sacchikaronto jahatīti? Na hevaṃ vattabbe…pe….
ৰিক্খম্ভেতি অনাগামিফলসচ্ছিকিরিযায পটিপন্নো পুগ্গলো কামরাগব্যাপাদং, সো চ অচ্চন্তং ৰিক্খম্ভেতি, অনৰসেসং ৰিক্খম্ভেতি…পে॰… অনাগামিফলং সচ্ছিকরোন্তো ৰিক্খম্ভেতীতি? আমন্তা। ৰিক্খম্ভেতি পুথুজ্জনো কামরাগব্যাপাদং, সো চ অচ্চন্তং ৰিক্খম্ভেতি, অনৰসেসং ৰিক্খম্ভেতি …পে॰… অনাগামিফলং সচ্ছিকরোন্তো ৰিক্খম্ভেতীতি? ন হেৰং ৰত্তব্বে…পে॰…।
Vikkhambheti anāgāmiphalasacchikiriyāya paṭipanno puggalo kāmarāgabyāpādaṃ, so ca accantaṃ vikkhambheti, anavasesaṃ vikkhambheti…pe… anāgāmiphalaṃ sacchikaronto vikkhambhetīti? Āmantā. Vikkhambheti puthujjano kāmarāgabyāpādaṃ, so ca accantaṃ vikkhambheti, anavasesaṃ vikkhambheti …pe… anāgāmiphalaṃ sacchikaronto vikkhambhetīti? Na hevaṃ vattabbe…pe….
জহতি পুথুজ্জনো কামরাগব্যাপাদং, সো চ ন অচ্চন্তং জহতি, ন অনৰসেসং জহতি…পে॰… ন অনাগামিফলং সচ্ছিকরোন্তো জহতীতি? আমন্তা। জহতি অনাগামিফলসচ্ছিকিরিযায পটিপন্নো পুগ্গলো কামরাগব্যাপাদং, সো চ ন অচ্চন্তং জহতি…পে॰… ন অনাগামিফলং সচ্ছিকরোন্তো জহতীতি? ন হেৰং ৰত্তব্বে…পে॰…।
Jahati puthujjano kāmarāgabyāpādaṃ, so ca na accantaṃ jahati, na anavasesaṃ jahati…pe… na anāgāmiphalaṃ sacchikaronto jahatīti? Āmantā. Jahati anāgāmiphalasacchikiriyāya paṭipanno puggalo kāmarāgabyāpādaṃ, so ca na accantaṃ jahati…pe… na anāgāmiphalaṃ sacchikaronto jahatīti? Na hevaṃ vattabbe…pe….
ৰিক্খম্ভেতি পুথুজ্জনো কামরাগব্যাপাদং, সো চ ন অচ্চন্তং ৰিক্খম্ভেতি, ন অনৰসেসং ৰিক্খম্ভেতি…পে॰… ন অনাগামিফলং সচ্ছিকরোন্তো ৰিক্খম্ভেতীতি? আমন্তা। ৰিক্খম্ভেতি অনাগামিফলসচ্ছিকিরিযায পটিপন্নো পুগ্গলো কামরাগব্যাপাদং, সো চ ন অচ্চন্তং ৰিক্খম্ভেতি, ন অনৰসেসং ৰিক্খম্ভেতি…পে॰… ন অনাগামিফলং সচ্ছিকরোন্তো ৰিক্খম্ভেতীতি? ন হেৰং ৰত্তব্বে…পে॰…।
Vikkhambheti puthujjano kāmarāgabyāpādaṃ, so ca na accantaṃ vikkhambheti, na anavasesaṃ vikkhambheti…pe… na anāgāmiphalaṃ sacchikaronto vikkhambhetīti? Āmantā. Vikkhambheti anāgāmiphalasacchikiriyāya paṭipanno puggalo kāmarāgabyāpādaṃ, so ca na accantaṃ vikkhambheti, na anavasesaṃ vikkhambheti…pe… na anāgāmiphalaṃ sacchikaronto vikkhambhetīti? Na hevaṃ vattabbe…pe….
জহতি পুথুজ্জনো কামরাগব্যাপাদন্তি? আমন্তা। কতমেন মগ্গেনাতি? রূপাৰচরেন মগ্গেনাতি। রূপাৰচরো মগ্গো নিয্যানিকো খযগামী বোধগামী অপচযগামী অনাসৰো অসংযোজনিযো অগন্থনিযো অনোঘনিযো অযোগনিযো অনীৰরণিযো অপরামট্ঠো অনুপাদানিযো অসংকিলেসিযোতি? ন হেৰং ৰত্তব্বে। ননু রূপাৰচরো মগ্গো অনিয্যানিকো ন খযগামী ন বোধগামী ন অপচযগামী সাসৰো সংযোজনিযো…পে॰… সংকিলেসিযোতি? আমন্তা। হঞ্চি রূপাৰচরো মগ্গো অনিয্যানিকো ন খযগামী…পে॰… সংকিলেসিযো, নো চ ৰত রে ৰত্তব্বে – ‘‘জহতি পুথুজ্জনো রূপাৰচরেন মগ্গেন কামরাগব্যাপাদ’’ন্তি।
Jahati puthujjano kāmarāgabyāpādanti? Āmantā. Katamena maggenāti? Rūpāvacarena maggenāti. Rūpāvacaro maggo niyyāniko khayagāmī bodhagāmī apacayagāmī anāsavo asaṃyojaniyo aganthaniyo anoghaniyo ayoganiyo anīvaraṇiyo aparāmaṭṭho anupādāniyo asaṃkilesiyoti? Na hevaṃ vattabbe. Nanu rūpāvacaro maggo aniyyāniko na khayagāmī na bodhagāmī na apacayagāmī sāsavo saṃyojaniyo…pe… saṃkilesiyoti? Āmantā. Hañci rūpāvacaro maggo aniyyāniko na khayagāmī…pe… saṃkilesiyo, no ca vata re vattabbe – ‘‘jahati puthujjano rūpāvacarena maggena kāmarāgabyāpāda’’nti.
জহতি অনাগামিফলসচ্ছিকিরিযায পটিপন্নো পুগ্গলো অনাগামিমগ্গেন কামরাগব্যাপাদং, সো চ মগ্গো নিয্যানিকো খযগামী বোধগামী অপচযগামী অনাসৰো…পে॰… অসংকিলেসিযোতি? আমন্তা। জহতি পুথুজ্জনো রূপাৰচরেন মগ্গেন কামরাগব্যাপাদং, সো চ মগ্গো নিয্যানিকো খযগামী বোধগামী অপচযগামী অনাসৰো…পে॰… অসংকিলেসিযোতি? ন হেৰং ৰত্তব্বে…পে॰…।
Jahati anāgāmiphalasacchikiriyāya paṭipanno puggalo anāgāmimaggena kāmarāgabyāpādaṃ, so ca maggo niyyāniko khayagāmī bodhagāmī apacayagāmī anāsavo…pe… asaṃkilesiyoti? Āmantā. Jahati puthujjano rūpāvacarena maggena kāmarāgabyāpādaṃ, so ca maggo niyyāniko khayagāmī bodhagāmī apacayagāmī anāsavo…pe… asaṃkilesiyoti? Na hevaṃ vattabbe…pe….
জহতি পুথুজ্জনো রূপাৰচরেন মগ্গেন কামরাগব্যাপাদং, সো চ মগ্গো অনিয্যানিকো ন খযগামী ন বোধগামী ন অপচযগামী সাসৰো…পে॰… সংকিলেসিযোতি? আমন্তা। জহতি অনাগামিফলসচ্ছিকিরিযায পটিপন্নো পুগ্গলো অনাগামিমগ্গেন কামরাগব্যাপাদং, সো চ মগ্গো অনিয্যানিকো ন খযগামী ন বোধগামী ন অপচযগামী সাসৰো…পে॰… সংকিলেসিযোতি? ন হেৰং ৰত্তব্বে…পে॰…।
Jahati puthujjano rūpāvacarena maggena kāmarāgabyāpādaṃ, so ca maggo aniyyāniko na khayagāmī na bodhagāmī na apacayagāmī sāsavo…pe… saṃkilesiyoti? Āmantā. Jahati anāgāmiphalasacchikiriyāya paṭipanno puggalo anāgāmimaggena kāmarāgabyāpādaṃ, so ca maggo aniyyāniko na khayagāmī na bodhagāmī na apacayagāmī sāsavo…pe… saṃkilesiyoti? Na hevaṃ vattabbe…pe….
২৮০. পুথুজ্জনো কামেসু ৰীতরাগো সহ ধম্মাভিসমযা অনাগামিফলে সণ্ঠাতীতি? আমন্তা। অরহত্তে সণ্ঠাতীতি? ন হেৰং ৰত্তব্বে…পে॰…।
280. Puthujjano kāmesu vītarāgo saha dhammābhisamayā anāgāmiphale saṇṭhātīti? Āmantā. Arahatte saṇṭhātīti? Na hevaṃ vattabbe…pe….
পুথুজ্জনো কামেসু ৰীতরাগো সহ ধম্মাভিসমযা অনাগামিফলে সণ্ঠাতীতি? আমন্তা। অপুব্বং অচরিমং তযো মগ্গে ভাৰেতীতি? ন হেৰং ৰত্তব্বে…পে॰…।
Puthujjano kāmesu vītarāgo saha dhammābhisamayā anāgāmiphale saṇṭhātīti? Āmantā. Apubbaṃ acarimaṃ tayo magge bhāvetīti? Na hevaṃ vattabbe…pe….
অপুব্বং অচরিমং তযো মগ্গে ভাৰেতীতি? আমন্তা। অপুব্বং অচরিমং তীণি সামঞ্ঞফলানি সচ্ছিকরোতীতি? ন হেৰং ৰত্তব্বে…পে॰…।
Apubbaṃ acarimaṃ tayo magge bhāvetīti? Āmantā. Apubbaṃ acarimaṃ tīṇi sāmaññaphalāni sacchikarotīti? Na hevaṃ vattabbe…pe….
অপুব্বং অচরিমং তীণি সামঞ্ঞফলানি সচ্ছিকরোতীতি? আমন্তা। তিণ্ণং ফস্সানং তিস্সন্নং ৰেদনানং তিস্সন্নং সঞ্ঞানং তিস্সন্নং চেতনানং তিণ্ণং চিত্তানং তিস্সন্নং সদ্ধানং তিণ্ণং ৰীরিযানং তিস্সন্নং সতীনং তিণ্ণং সমাধীনং তিস্সন্নং পঞ্ঞানং সমোধানং হোতীতি? ন হেৰং ৰত্তব্বে…পে॰…।
Apubbaṃ acarimaṃ tīṇi sāmaññaphalāni sacchikarotīti? Āmantā. Tiṇṇaṃ phassānaṃ tissannaṃ vedanānaṃ tissannaṃ saññānaṃ tissannaṃ cetanānaṃ tiṇṇaṃ cittānaṃ tissannaṃ saddhānaṃ tiṇṇaṃ vīriyānaṃ tissannaṃ satīnaṃ tiṇṇaṃ samādhīnaṃ tissannaṃ paññānaṃ samodhānaṃ hotīti? Na hevaṃ vattabbe…pe….
পুথুজ্জনো কামেসু ৰীতরাগো সহ ধম্মাভিসমযা অনাগামিফলে সণ্ঠাতীতি? আমন্তা। সোতাপত্তিমগ্গেনাতি? ন হেৰং ৰত্তব্বে…পে॰…।
Puthujjano kāmesu vītarāgo saha dhammābhisamayā anāgāmiphale saṇṭhātīti? Āmantā. Sotāpattimaggenāti? Na hevaṃ vattabbe…pe….
সকদাগামিমগ্গেনাতি? ন হেৰং ৰত্তব্বে। কতমেন মগ্গেনাতি? অনাগামিমগ্গেনাতি। অনাগামিমগ্গেন সক্কাযদিট্ঠিং ৰিচিকিচ্ছং সীলব্বতপরামাসং জহতীতি? ন হেৰং ৰত্তব্বে…পে॰…।
Sakadāgāmimaggenāti? Na hevaṃ vattabbe. Katamena maggenāti? Anāgāmimaggenāti. Anāgāmimaggena sakkāyadiṭṭhiṃ vicikicchaṃ sīlabbataparāmāsaṃ jahatīti? Na hevaṃ vattabbe…pe….
২. সুত্তাহরণকথা
2. Suttāharaṇakathā
২৮১. অনাগামিমগ্গেন সক্কাযদিট্ঠিং ৰিচিকিচ্ছং সীলব্বতপরামাসং জহতীতি? আমন্তা। ননু তিণ্ণং সংযোজনানং পহানা সোতাপত্তিফলং ৰুত্তং ভগৰতাতি? আমন্তা। হঞ্চি তিণ্ণং সংযোজনানং পহানা সোতাপত্তিফলং ৰুত্তং ভগৰতা, নো চ ৰত রে ৰত্তব্বে – ‘‘অনাগামিমগ্গেন সক্কাযদিট্ঠিং ৰিচিকিচ্ছং সীলব্বতপরামাসং জহতী’’তি। অনাগামিমগ্গেন ওল়ারিকং কামরাগং ওল়ারিকং ব্যাপাদং জহতীতি? ন হেৰং ৰত্তব্বে…পে॰…।
281. Anāgāmimaggena sakkāyadiṭṭhiṃ vicikicchaṃ sīlabbataparāmāsaṃ jahatīti? Āmantā. Nanu tiṇṇaṃ saṃyojanānaṃ pahānā sotāpattiphalaṃ vuttaṃ bhagavatāti? Āmantā. Hañci tiṇṇaṃ saṃyojanānaṃ pahānā sotāpattiphalaṃ vuttaṃ bhagavatā, no ca vata re vattabbe – ‘‘anāgāmimaggena sakkāyadiṭṭhiṃ vicikicchaṃ sīlabbataparāmāsaṃ jahatī’’ti. Anāgāmimaggena oḷārikaṃ kāmarāgaṃ oḷārikaṃ byāpādaṃ jahatīti? Na hevaṃ vattabbe…pe….
অনাগামিমগ্গেন ওল়ারিকং কামরাগং ওল়ারিকং ব্যাপাদং জহতীতি? আমন্তা। ননু কামরাগব্যাপাদানং তনুভাৰা সকদাগামিফলং ৰুত্তং ভগৰতাতি? আমন্তা। হঞ্চি কামরাগব্যাপাদানং তনুভাৰা সকদাগামিফলং ৰুত্তং ভগৰতা, নো চ ৰত রে ৰত্তব্বে – ‘‘অনাগামিমগ্গেন ওল়ারিকং কামরাগং ওল়ারিকং ব্যাপাদং জহতী’’তি।
Anāgāmimaggena oḷārikaṃ kāmarāgaṃ oḷārikaṃ byāpādaṃ jahatīti? Āmantā. Nanu kāmarāgabyāpādānaṃ tanubhāvā sakadāgāmiphalaṃ vuttaṃ bhagavatāti? Āmantā. Hañci kāmarāgabyāpādānaṃ tanubhāvā sakadāgāmiphalaṃ vuttaṃ bhagavatā, no ca vata re vattabbe – ‘‘anāgāmimaggena oḷārikaṃ kāmarāgaṃ oḷārikaṃ byāpādaṃ jahatī’’ti.
পুথুজ্জনো কামেসু ৰীতরাগো সহ ধম্মাভিসমযা অনাগামিফলে সণ্ঠাতীতি? আমন্তা। যে কেচি ধম্মং অভিসমেন্তি, সব্বে তে সহ ধম্মাভিসমযা অনাগামিফলে সণ্ঠহন্তীতি? ন হেৰং ৰত্তব্বে…পে॰…।
Puthujjano kāmesu vītarāgo saha dhammābhisamayā anāgāmiphale saṇṭhātīti? Āmantā. Ye keci dhammaṃ abhisamenti, sabbe te saha dhammābhisamayā anāgāmiphale saṇṭhahantīti? Na hevaṃ vattabbe…pe….
ন ৰত্তব্বং – ‘‘জহতি পুথুজ্জনো কামরাগব্যাপাদ’’ন্তি? আমন্তা। ননু ৰুত্তং ভগৰতা –
Na vattabbaṃ – ‘‘jahati puthujjano kāmarāgabyāpāda’’nti? Āmantā. Nanu vuttaṃ bhagavatā –
‘‘কামরাগং ৰিরাজেত্ৰা, ব্রহ্মলোকূপগা অহু।
‘‘Kāmarāgaṃ virājetvā, brahmalokūpagā ahu;
অহেসুং সাৰকা তেসং, অনেকানি সতানিপি॥
Ahesuṃ sāvakā tesaṃ, anekāni satānipi.
‘‘নিরামগন্ধা করুণেধিমুত্তা, কামসংযোজনাতিগা।
‘‘Nirāmagandhā karuṇedhimuttā, kāmasaṃyojanātigā;
অত্থেৰ সুত্তন্তোতি? আমন্তা। তেন হি জহতি পুথুজ্জনো কামরাগব্যাপাদন্তি।
Attheva suttantoti? Āmantā. Tena hi jahati puthujjano kāmarāgabyāpādanti.
জহতি পুথুজ্জনো কামরাগব্যাপাদন্তি? আমন্তা। ননু ৰুত্তং ভগৰতা – ‘‘সো হি নাম, ভিক্খৰে, সুনেত্তো সত্থা এৰং দীঘাযুকো সমানো এৰং চিরট্ঠিতিকো অপরিমুত্তো অহোসি জাতিযা জরায মরণেন সোকেহি পরিদেৰেহি দুক্খেহি দোমনস্সেহি উপাযাসেহি অপরিমুত্তো দুক্খস্মাতি ৰদামি। তং কিস্স হেতু? চতুন্নং ধম্মানং অননুবোধা অপ্পটিৰেধা। কতমেসং চতুন্নং? অরিযস্স সীলস্স অননুবোধা অপ্পটিৰেধা, অরিযস্স সমাধিস্স, অরিযায পঞ্ঞায, অরিযায ৰিমুত্তিযা অননুবোধা অপ্পটিৰেধা। তযিদং, ভিক্খৰে, অরিযং সীলং অনুবুদ্ধং পটিৰিদ্ধং, অরিযো সমাধি অনুবুদ্ধো পটিৰিদ্ধো, অরিযা পঞ্ঞা অনুবুদ্ধা পটিৰিদ্ধা, অরিযা ৰিমুত্তি অনুবুদ্ধা পটিৰিদ্ধা, উচ্ছিন্না ভৰতণ্হা, খীণা ভৰনেত্তি, নত্থি দানি পুনব্ভৰোতি।
Jahati puthujjano kāmarāgabyāpādanti? Āmantā. Nanu vuttaṃ bhagavatā – ‘‘so hi nāma, bhikkhave, sunetto satthā evaṃ dīghāyuko samāno evaṃ ciraṭṭhitiko aparimutto ahosi jātiyā jarāya maraṇena sokehi paridevehi dukkhehi domanassehi upāyāsehi aparimutto dukkhasmāti vadāmi. Taṃ kissa hetu? Catunnaṃ dhammānaṃ ananubodhā appaṭivedhā. Katamesaṃ catunnaṃ? Ariyassa sīlassa ananubodhā appaṭivedhā, ariyassa samādhissa, ariyāya paññāya, ariyāya vimuttiyā ananubodhā appaṭivedhā. Tayidaṃ, bhikkhave, ariyaṃ sīlaṃ anubuddhaṃ paṭividdhaṃ, ariyo samādhi anubuddho paṭividdho, ariyā paññā anubuddhā paṭividdhā, ariyā vimutti anubuddhā paṭividdhā, ucchinnā bhavataṇhā, khīṇā bhavanetti, natthi dāni punabbhavoti.
‘‘সীলং সমাধি পঞ্ঞা চ, ৰিমুত্তি চ অনুত্তরা।
‘‘Sīlaṃ samādhi paññā ca, vimutti ca anuttarā;
অনুবুদ্ধা ইমে ধম্মা, গোতমেন যসস্সিনা॥
Anubuddhā ime dhammā, gotamena yasassinā.
‘‘ইতি বুদ্ধো অভিঞ্ঞায, ধম্মমক্খাসি ভিক্খুনং।
‘‘Iti buddho abhiññāya, dhammamakkhāsi bhikkhunaṃ;
দুক্খস্সন্তকরো সত্থা, চক্খুমা পরিনিব্বুতো’’তি 7॥
Dukkhassantakaro satthā, cakkhumā parinibbuto’’ti 8.
অত্থেৰ সুত্তন্তোতি? আমন্তা। তেন হি ন ৰত্তব্বং – ‘‘জহতি পুথুজ্জনো কামরাগব্যাপাদ’’ন্তি।
Attheva suttantoti? Āmantā. Tena hi na vattabbaṃ – ‘‘jahati puthujjano kāmarāgabyāpāda’’nti.
জহতিকথা নিট্ঠিতা।
Jahatikathā niṭṭhitā.
Footnotes:
Related texts:
অট্ঠকথা • Aṭṭhakathā / অভিধম্মপিটক (অট্ঠকথা) • Abhidhammapiṭaka (aṭṭhakathā) / পঞ্চপকরণ-অট্ঠকথা • Pañcapakaraṇa-aṭṭhakathā / ৪. জহতিকথা • 4. Jahatikathā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-মূলটীকা • Pañcapakaraṇa-mūlaṭīkā / ৪. জহতিকথাৰণ্ণনা • 4. Jahatikathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-অনুটীকা • Pañcapakaraṇa-anuṭīkā / ৪. জহতিকথাৰণ্ণনা • 4. Jahatikathāvaṇṇanā
