| Library / Tipiṭaka / តិបិដក • Tipiṭaka / បញ្ចបករណ-អដ្ឋកថា • Pañcapakaraṇa-aṭṭhakathā |
៤. ជហតិកថា
4. Jahatikathā
១. នសុត្តាហរណកថាវណ្ណនា
1. Nasuttāharaṇakathāvaṇṇanā
២៧៩. ឥទានិ ជហតិកថា នាម ហោតិ។ តត្ថ យេសំ ‘‘ឈានលាភី បុថុជ្ជនោ សហ សច្ចាភិសមយា អនាគាមី នាម ហោតិ, តស្ស បុថុជ្ជនកាលេយេវ កាមរាគព្យាបាទា បហីនា’’តិ លទ្ធិ សេយ្យថាបិ ឯតរហិ សម្មិតិយានំ, តេសំ តំ លទ្ធិំ ភិន្ទិតុំ ជហតិ បុថុជ្ជនោតិ បុច្ឆា សកវាទិស្ស, ឈានវិក្ខម្ភិតានំ បន តេសំ បរិយុដ្ឋានំ អបស្សន្តស្ស បដិញ្ញា បរវាទិស្ស។ យស្មា បន តេសំ ឈានវិក្ខម្ភិតានម្បិ អនាគាមិមគ្គេនេវ អច្ចន្តំ បហានំ ហោតិ, តស្មា បុន អច្ចន្តន្តិអាទិអនុយោគោ សកវាទិស្ស, តថារូបស្ស បហានស្ស អភាវតោ បដិក្ខេបោ ឥតរស្ស។ វិក្ខម្ភេតីតិ អច្ចន្តវិក្ខម្ភនមេវ សន្ធាយ បុច្ឆា សកវាទិស្ស។ តតោ បរំ អនាគាមិមគ្គដ្ឋេន សទ្ធិំ បុថុជ្ជនសំសន្ទនំ ហោតិ។ តំ ឧត្តានត្ថមេវ។
279. Idāni jahatikathā nāma hoti. Tattha yesaṃ ‘‘jhānalābhī puthujjano saha saccābhisamayā anāgāmī nāma hoti, tassa puthujjanakāleyeva kāmarāgabyāpādā pahīnā’’ti laddhi seyyathāpi etarahi sammitiyānaṃ, tesaṃ taṃ laddhiṃ bhindituṃ jahati puthujjanoti pucchā sakavādissa, jhānavikkhambhitānaṃ pana tesaṃ pariyuṭṭhānaṃ apassantassa paṭiññā paravādissa. Yasmā pana tesaṃ jhānavikkhambhitānampi anāgāmimaggeneva accantaṃ pahānaṃ hoti, tasmā puna accantantiādianuyogo sakavādissa, tathārūpassa pahānassa abhāvato paṭikkhepo itarassa. Vikkhambhetīti accantavikkhambhanameva sandhāya pucchā sakavādissa. Tato paraṃ anāgāmimaggaṭṭhena saddhiṃ puthujjanasaṃsandanaṃ hoti. Taṃ uttānatthameva.
២៨០. តតោ បរំ អនាគាមិផលេ សណ្ឋាតីតិ បុដ្ឋោ ឈានានាគាមិតំ សន្ធាយ បដិជានាតិ។ អរហត្តេ សណ្ឋាតីតិ បុដ្ឋោ ទស្សនមគ្គេន ឧទ្ធម្ភាគិយានំ បហានាភាវតោ បដិក្ខិបតិ។
280. Tato paraṃ anāgāmiphale saṇṭhātīti puṭṭho jhānānāgāmitaṃ sandhāya paṭijānāti. Arahatte saṇṭhātīti puṭṭho dassanamaggena uddhambhāgiyānaṃ pahānābhāvato paṭikkhipati.
អបុព្ពំ អចរិមំ តយោ មគ្គេតិ បុដ្ឋោ តថារូបាយ ភាវនាយ អភាវា បដិក្ខិបតិ។ បុន បុដ្ឋោ តិណ្ណំ មគ្គានំ កិច្ចសព្ភាវំ សន្ធាយ បដិជានាតិ។ សាមញ្ញផលបុច្ឆាសុបិ ឯសេវ នយោ។ កតមេន មគ្គេនាតិ បុដ្ឋោ អនាគាមិមគ្គេនាតិ ឈានានាគាមិតំ សន្ធាយ វទតិ។ បុន សំយោជនប្បហានំ បុដ្ឋោ តិណ្ណំ អនាគាមិមគ្គេន តេសំ កិលេសានំ អប្បហេយ្យត្តា បដិក្ខិបតិ។ ទុតិយំ បុដ្ឋោ បឋមមគ្គស្សេវ ឈានានាគាមិមគ្គភាវំ សន្ធាយ បដិជានាតិ។ សេសមេត្ថ ឧត្តានត្ថមេវាតិ។
Apubbaṃ acarimaṃ tayo maggeti puṭṭho tathārūpāya bhāvanāya abhāvā paṭikkhipati. Puna puṭṭho tiṇṇaṃ maggānaṃ kiccasabbhāvaṃ sandhāya paṭijānāti. Sāmaññaphalapucchāsupi eseva nayo. Katamena maggenāti puṭṭho anāgāmimaggenāti jhānānāgāmitaṃ sandhāya vadati. Puna saṃyojanappahānaṃ puṭṭho tiṇṇaṃ anāgāmimaggena tesaṃ kilesānaṃ appaheyyattā paṭikkhipati. Dutiyaṃ puṭṭho paṭhamamaggasseva jhānānāgāmimaggabhāvaṃ sandhāya paṭijānāti. Sesamettha uttānatthamevāti.
ជហតិកថា។
Jahatikathā.
Related texts:
តិបិដក (មូល) • Tipiṭaka (Mūla) / អភិធម្មបិដក • Abhidhammapiṭaka / កថាវត្ថុបាឡិ • Kathāvatthupāḷi / ៤. ជហតិកថា • 4. Jahatikathā
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / បញ្ចបករណ-មូលដីកា • Pañcapakaraṇa-mūlaṭīkā / ៤. ជហតិកថាវណ្ណនា • 4. Jahatikathāvaṇṇanā
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / បញ្ចបករណ-អនុដីកា • Pañcapakaraṇa-anuṭīkā / ៤. ជហតិកថាវណ្ណនា • 4. Jahatikathāvaṇṇanā
