| Library / Tipiṭaka / ತಿಪಿಟಕ • Tipiṭaka / ಪಞ್ಚಪಕರಣ-ಅಟ್ಠಕಥಾ • Pañcapakaraṇa-aṭṭhakathā |
೪. ಜಹತಿಕಥಾ
4. Jahatikathā
೧. ನಸುತ್ತಾಹರಣಕಥಾವಣ್ಣನಾ
1. Nasuttāharaṇakathāvaṇṇanā
೨೭೯. ಇದಾನಿ ಜಹತಿಕಥಾ ನಾಮ ಹೋತಿ। ತತ್ಥ ಯೇಸಂ ‘‘ಝಾನಲಾಭೀ ಪುಥುಜ್ಜನೋ ಸಹ ಸಚ್ಚಾಭಿಸಮಯಾ ಅನಾಗಾಮೀ ನಾಮ ಹೋತಿ, ತಸ್ಸ ಪುಥುಜ್ಜನಕಾಲೇಯೇವ ಕಾಮರಾಗಬ್ಯಾಪಾದಾ ಪಹೀನಾ’’ತಿ ಲದ್ಧಿ ಸೇಯ್ಯಥಾಪಿ ಏತರಹಿ ಸಮ್ಮಿತಿಯಾನಂ, ತೇಸಂ ತಂ ಲದ್ಧಿಂ ಭಿನ್ದಿತುಂ ಜಹತಿ ಪುಥುಜ್ಜನೋತಿ ಪುಚ್ಛಾ ಸಕವಾದಿಸ್ಸ, ಝಾನವಿಕ್ಖಮ್ಭಿತಾನಂ ಪನ ತೇಸಂ ಪರಿಯುಟ್ಠಾನಂ ಅಪಸ್ಸನ್ತಸ್ಸ ಪಟಿಞ್ಞಾ ಪರವಾದಿಸ್ಸ। ಯಸ್ಮಾ ಪನ ತೇಸಂ ಝಾನವಿಕ್ಖಮ್ಭಿತಾನಮ್ಪಿ ಅನಾಗಾಮಿಮಗ್ಗೇನೇವ ಅಚ್ಚನ್ತಂ ಪಹಾನಂ ಹೋತಿ, ತಸ್ಮಾ ಪುನ ಅಚ್ಚನ್ತನ್ತಿಆದಿಅನುಯೋಗೋ ಸಕವಾದಿಸ್ಸ, ತಥಾರೂಪಸ್ಸ ಪಹಾನಸ್ಸ ಅಭಾವತೋ ಪಟಿಕ್ಖೇಪೋ ಇತರಸ್ಸ। ವಿಕ್ಖಮ್ಭೇತೀತಿ ಅಚ್ಚನ್ತವಿಕ್ಖಮ್ಭನಮೇವ ಸನ್ಧಾಯ ಪುಚ್ಛಾ ಸಕವಾದಿಸ್ಸ। ತತೋ ಪರಂ ಅನಾಗಾಮಿಮಗ್ಗಟ್ಠೇನ ಸದ್ಧಿಂ ಪುಥುಜ್ಜನಸಂಸನ್ದನಂ ಹೋತಿ। ತಂ ಉತ್ತಾನತ್ಥಮೇವ।
279. Idāni jahatikathā nāma hoti. Tattha yesaṃ ‘‘jhānalābhī puthujjano saha saccābhisamayā anāgāmī nāma hoti, tassa puthujjanakāleyeva kāmarāgabyāpādā pahīnā’’ti laddhi seyyathāpi etarahi sammitiyānaṃ, tesaṃ taṃ laddhiṃ bhindituṃ jahati puthujjanoti pucchā sakavādissa, jhānavikkhambhitānaṃ pana tesaṃ pariyuṭṭhānaṃ apassantassa paṭiññā paravādissa. Yasmā pana tesaṃ jhānavikkhambhitānampi anāgāmimaggeneva accantaṃ pahānaṃ hoti, tasmā puna accantantiādianuyogo sakavādissa, tathārūpassa pahānassa abhāvato paṭikkhepo itarassa. Vikkhambhetīti accantavikkhambhanameva sandhāya pucchā sakavādissa. Tato paraṃ anāgāmimaggaṭṭhena saddhiṃ puthujjanasaṃsandanaṃ hoti. Taṃ uttānatthameva.
೨೮೦. ತತೋ ಪರಂ ಅನಾಗಾಮಿಫಲೇ ಸಣ್ಠಾತೀತಿ ಪುಟ್ಠೋ ಝಾನಾನಾಗಾಮಿತಂ ಸನ್ಧಾಯ ಪಟಿಜಾನಾತಿ। ಅರಹತ್ತೇ ಸಣ್ಠಾತೀತಿ ಪುಟ್ಠೋ ದಸ್ಸನಮಗ್ಗೇನ ಉದ್ಧಮ್ಭಾಗಿಯಾನಂ ಪಹಾನಾಭಾವತೋ ಪಟಿಕ್ಖಿಪತಿ।
280. Tato paraṃ anāgāmiphale saṇṭhātīti puṭṭho jhānānāgāmitaṃ sandhāya paṭijānāti. Arahatte saṇṭhātīti puṭṭho dassanamaggena uddhambhāgiyānaṃ pahānābhāvato paṭikkhipati.
ಅಪುಬ್ಬಂ ಅಚರಿಮಂ ತಯೋ ಮಗ್ಗೇತಿ ಪುಟ್ಠೋ ತಥಾರೂಪಾಯ ಭಾವನಾಯ ಅಭಾವಾ ಪಟಿಕ್ಖಿಪತಿ। ಪುನ ಪುಟ್ಠೋ ತಿಣ್ಣಂ ಮಗ್ಗಾನಂ ಕಿಚ್ಚಸಬ್ಭಾವಂ ಸನ್ಧಾಯ ಪಟಿಜಾನಾತಿ। ಸಾಮಞ್ಞಫಲಪುಚ್ಛಾಸುಪಿ ಏಸೇವ ನಯೋ। ಕತಮೇನ ಮಗ್ಗೇನಾತಿ ಪುಟ್ಠೋ ಅನಾಗಾಮಿಮಗ್ಗೇನಾತಿ ಝಾನಾನಾಗಾಮಿತಂ ಸನ್ಧಾಯ ವದತಿ। ಪುನ ಸಂಯೋಜನಪ್ಪಹಾನಂ ಪುಟ್ಠೋ ತಿಣ್ಣಂ ಅನಾಗಾಮಿಮಗ್ಗೇನ ತೇಸಂ ಕಿಲೇಸಾನಂ ಅಪ್ಪಹೇಯ್ಯತ್ತಾ ಪಟಿಕ್ಖಿಪತಿ। ದುತಿಯಂ ಪುಟ್ಠೋ ಪಠಮಮಗ್ಗಸ್ಸೇವ ಝಾನಾನಾಗಾಮಿಮಗ್ಗಭಾವಂ ಸನ್ಧಾಯ ಪಟಿಜಾನಾತಿ। ಸೇಸಮೇತ್ಥ ಉತ್ತಾನತ್ಥಮೇವಾತಿ।
Apubbaṃ acarimaṃ tayo maggeti puṭṭho tathārūpāya bhāvanāya abhāvā paṭikkhipati. Puna puṭṭho tiṇṇaṃ maggānaṃ kiccasabbhāvaṃ sandhāya paṭijānāti. Sāmaññaphalapucchāsupi eseva nayo. Katamena maggenāti puṭṭho anāgāmimaggenāti jhānānāgāmitaṃ sandhāya vadati. Puna saṃyojanappahānaṃ puṭṭho tiṇṇaṃ anāgāmimaggena tesaṃ kilesānaṃ appaheyyattā paṭikkhipati. Dutiyaṃ puṭṭho paṭhamamaggasseva jhānānāgāmimaggabhāvaṃ sandhāya paṭijānāti. Sesamettha uttānatthamevāti.
ಜಹತಿಕಥಾ।
Jahatikathā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಅಭಿಧಮ್ಮಪಿಟಕ • Abhidhammapiṭaka / ಕಥಾವತ್ಥುಪಾಳಿ • Kathāvatthupāḷi / ೪. ಜಹತಿಕಥಾ • 4. Jahatikathā
ಟೀಕಾ • Tīkā / ಅಭಿಧಮ್ಮಪಿಟಕ (ಟೀಕಾ) • Abhidhammapiṭaka (ṭīkā) / ಪಞ್ಚಪಕರಣ-ಮೂಲಟೀಕಾ • Pañcapakaraṇa-mūlaṭīkā / ೪. ಜಹತಿಕಥಾವಣ್ಣನಾ • 4. Jahatikathāvaṇṇanā
ಟೀಕಾ • Tīkā / ಅಭಿಧಮ್ಮಪಿಟಕ (ಟೀಕಾ) • Abhidhammapiṭaka (ṭīkā) / ಪಞ್ಚಪಕರಣ-ಅನುಟೀಕಾ • Pañcapakaraṇa-anuṭīkā / ೪. ಜಹತಿಕಥಾವಣ್ಣನಾ • 4. Jahatikathāvaṇṇanā
