| Library / Tipiṭaka / තිපිටක • Tipiṭaka / පඤ්‌චපකරණ-අට්‌ඨකථා • Pañcapakaraṇa-aṭṭhakathā |
4. ජහතිකථා
4. Jahatikathā
1. නසුත්‌තාහරණකථාවණ්‌ණනා
1. Nasuttāharaṇakathāvaṇṇanā
279. ඉදානි ජහතිකථා නාම හොති. තත්‌ථ යෙසං ‘‘ඣානලාභී පුථුජ්‌ජනො සහ සච්‌චාභිසමයා අනාගාමී නාම හොති, තස්‌ස පුථුජ්‌ජනකාලෙයෙව කාමරාගබ්‍යාපාදා පහීනා’’ති ලද්‌ධි සෙය්‍යථාපි එතරහි සම්‌මිතියානං, තෙසං තං ලද්‌ධිං භින්‌දිතුං ජහති පුථුජ්‌ජනොති පුච්‌ඡා සකවාදිස්‌ස, ඣානවික්‌ඛම්‌භිතානං පන තෙසං පරියුට්‌ඨානං අපස්‌සන්‌තස්‌ස පටිඤ්‌ඤා පරවාදිස්‌ස. යස්‌මා පන තෙසං ඣානවික්‌ඛම්‌භිතානම්‌පි අනාගාමිමග්‌ගෙනෙව අච්‌චන්‌තං පහානං හොති, තස්‌මා පුන අච්‌චන්‌තන්‌තිආදිඅනුයොගො සකවාදිස්‌ස, තථාරූපස්‌ස පහානස්‌ස අභාවතො පටික්‌ඛෙපො ඉතරස්‌ස. වික්‌ඛම්‌භෙතීති අච්‌චන්‌තවික්‌ඛම්‌භනමෙව සන්‌ධාය පුච්‌ඡා සකවාදිස්‌ස. තතො පරං අනාගාමිමග්‌ගට්‌ඨෙන සද්‌ධිං පුථුජ්‌ජනසංසන්‌දනං හොති. තං උත්‌තානත්‌ථමෙව.
279. Idāni jahatikathā nāma hoti. Tattha yesaṃ ‘‘jhānalābhī puthujjano saha saccābhisamayā anāgāmī nāma hoti, tassa puthujjanakāleyeva kāmarāgabyāpādā pahīnā’’ti laddhi seyyathāpi etarahi sammitiyānaṃ, tesaṃ taṃ laddhiṃ bhindituṃ jahati puthujjanoti pucchā sakavādissa, jhānavikkhambhitānaṃ pana tesaṃ pariyuṭṭhānaṃ apassantassa paṭiññā paravādissa. Yasmā pana tesaṃ jhānavikkhambhitānampi anāgāmimaggeneva accantaṃ pahānaṃ hoti, tasmā puna accantantiādianuyogo sakavādissa, tathārūpassa pahānassa abhāvato paṭikkhepo itarassa. Vikkhambhetīti accantavikkhambhanameva sandhāya pucchā sakavādissa. Tato paraṃ anāgāmimaggaṭṭhena saddhiṃ puthujjanasaṃsandanaṃ hoti. Taṃ uttānatthameva.
280. තතො පරං අනාගාමිඵලෙ සණ්‌ඨාතීති පුට්‌ඨො ඣානානාගාමිතං සන්‌ධාය පටිජානාති. අරහත්‌තෙ සණ්‌ඨාතීති පුට්‌ඨො දස්‌සනමග්‌ගෙන උද්‌ධම්‌භාගියානං පහානාභාවතො පටික්‌ඛිපති.
280. Tato paraṃ anāgāmiphale saṇṭhātīti puṭṭho jhānānāgāmitaṃ sandhāya paṭijānāti. Arahatte saṇṭhātīti puṭṭho dassanamaggena uddhambhāgiyānaṃ pahānābhāvato paṭikkhipati.
අපුබ්‌බං අචරිමං තයො මග්‌ගෙති පුට්‌ඨො තථාරූපාය භාවනාය අභාවා පටික්‌ඛිපති. පුන පුට්‌ඨො තිණ්‌ණං මග්‌ගානං කිච්‌චසබ්‌භාවං සන්‌ධාය පටිජානාති. සාමඤ්‌ඤඵලපුච්‌ඡාසුපි එසෙව නයො. කතමෙන මග්‌ගෙනාති පුට්‌ඨො අනාගාමිමග්‌ගෙනාති ඣානානාගාමිතං සන්‌ධාය වදති. පුන සංයොජනප්‌පහානං පුට්‌ඨො තිණ්‌ණං අනාගාමිමග්‌ගෙන තෙසං කිලෙසානං අප්‌පහෙය්‍යත්‌තා පටික්‌ඛිපති. දුතියං පුට්‌ඨො පඨමමග්‌ගස්‌සෙව ඣානානාගාමිමග්‌ගභාවං සන්‌ධාය පටිජානාති. සෙසමෙත්‌ථ උත්‌තානත්‌ථමෙවාති.
Apubbaṃ acarimaṃ tayo maggeti puṭṭho tathārūpāya bhāvanāya abhāvā paṭikkhipati. Puna puṭṭho tiṇṇaṃ maggānaṃ kiccasabbhāvaṃ sandhāya paṭijānāti. Sāmaññaphalapucchāsupi eseva nayo. Katamena maggenāti puṭṭho anāgāmimaggenāti jhānānāgāmitaṃ sandhāya vadati. Puna saṃyojanappahānaṃ puṭṭho tiṇṇaṃ anāgāmimaggena tesaṃ kilesānaṃ appaheyyattā paṭikkhipati. Dutiyaṃ puṭṭho paṭhamamaggasseva jhānānāgāmimaggabhāvaṃ sandhāya paṭijānāti. Sesamettha uttānatthamevāti.
ජහතිකථා.
Jahatikathā.
Related texts:
තිපිටක (මූල) • Tipiṭaka (Mūla) / අභිධම්‌මපිටක • Abhidhammapiṭaka / කථාවත්‌ථුපාළි • Kathāvatthupāḷi / 4. ජහතිකථා • 4. Jahatikathā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-මූලටීකා • Pañcapakaraṇa-mūlaṭīkā / 4. ජහතිකථාවණ්‌ණනා • 4. Jahatikathāvaṇṇanā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-අනුටීකා • Pañcapakaraṇa-anuṭīkā / 4. ජහතිකථාවණ්‌ණනා • 4. Jahatikathāvaṇṇanā
