| Library / Tipiṭaka / திபிடக • Tipiṭaka / பஞ்சபகரண-அனுடீகா • Pañcapakaraṇa-anuṭīkā |
4. ஜஹதிகதா²வண்ணனா
4. Jahatikathāvaṇṇanā
1. நஸுத்தாஹரணகதா²வண்ணனா
1. Nasuttāharaṇakathāvaṇṇanā
280. யதி³பி பாளியங் ‘‘தயோ மக்³கே³ பா⁴வேதீ’’தி வுத்தங், மக்³க³பா⁴வனா பன யாவதே³வ கிலேஸஸமுச்சி²ந்த³னத்தா²தி ஞத்வா ‘‘கிச்சஸப்³பா⁴வந்தி தீஹி பஹாதப்³ப³ஸ்ஸ பஹீனத’’ந்தி ஆஹ. தத்த² தீஹீதி ஹெட்டி²மேஹி தீஹி அரியமக்³கே³ஹி பஹாதப்³ப³ஸ்ஸ அஜ்ஜ²த்தஸங்யோஜனஸ்ஸ பஹீனதங் ஸமுச்சி²ந்த³னந்தி அத்தோ². தங் பன கிச்சந்தி அதோ⁴பா⁴கி³யஸங்யோஜனேஸு மக்³க³ஸ்ஸ பஹானாபி⁴ஸமயகிச்சங். தேனேவ மக்³கே³னாதி அனாகா³மிமக்³கே³னேவ. ஏதங் ந ஸமேதீதி ஏவங் மக்³கு³ப்பாத³தோ பகே³வ காமராக³ப்³யாபாதா³ பஹீயந்தீதி லத்³தி⁴கித்தனங் இமினா மக்³க³ஸ்ஸ கிச்சஸப்³பா⁴வகத²னேன ந ஸமேதி ந யுஜ்ஜதி. தஸ்மாதி இமினா யதா²வுத்தமேவ விரோத⁴ங் பச்சாமஸதி. பஹீனானந்தி விக்க²ம்பி⁴தானங். யோ ஹி ஜா²னலாபீ⁴ ஜா²னேன யதா²விக்க²ம்பி⁴தே கிலேஸே மக்³கே³ன ஸமுச்சி²ந்த³தி, ஸோ இதா⁴தி⁴ப்பேதோ. தேனாஹ ‘‘த³ஸ்ஸனமக்³கே³…பே॰… அதி⁴ப்பாயோ’’தி.
280. Yadipi pāḷiyaṃ ‘‘tayo magge bhāvetī’’ti vuttaṃ, maggabhāvanā pana yāvadeva kilesasamucchindanatthāti ñatvā ‘‘kiccasabbhāvanti tīhi pahātabbassa pahīnata’’nti āha. Tattha tīhīti heṭṭhimehi tīhi ariyamaggehi pahātabbassa ajjhattasaṃyojanassa pahīnataṃ samucchindananti attho. Taṃ pana kiccanti adhobhāgiyasaṃyojanesu maggassa pahānābhisamayakiccaṃ. Teneva maggenāti anāgāmimaggeneva. Etaṃ na sametīti evaṃ magguppādato pageva kāmarāgabyāpādā pahīyantīti laddhikittanaṃ iminā maggassa kiccasabbhāvakathanena na sameti na yujjati. Tasmāti iminā yathāvuttameva virodhaṃ paccāmasati. Pahīnānanti vikkhambhitānaṃ. Yo hi jhānalābhī jhānena yathāvikkhambhite kilese maggena samucchindati, so idhādhippeto. Tenāha ‘‘dassanamagge…pe… adhippāyo’’ti.
ஜஹதிகதா²வண்ணனா நிட்டி²தா.
Jahatikathāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / கதா²வத்து²பாளி • Kathāvatthupāḷi / 4. ஜஹதிகதா² • 4. Jahatikathā
அட்ட²கதா² • Aṭṭhakathā / அபி⁴த⁴ம்மபிடக (அட்ட²கதா²) • Abhidhammapiṭaka (aṭṭhakathā) / பஞ்சபகரண-அட்ட²கதா² • Pañcapakaraṇa-aṭṭhakathā / 4. ஜஹதிகதா² • 4. Jahatikathā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-மூலடீகா • Pañcapakaraṇa-mūlaṭīkā / 4. ஜஹதிகதா²வண்ணனா • 4. Jahatikathāvaṇṇanā
