| Library / Tipiṭaka / திபிடக • Tipiṭaka / தீ³க⁴னிகாய • Dīghanikāya |
7. ஜாலியஸுத்தங்
7. Jāliyasuttaṃ
த்³வேபப்³ப³ஜிதவத்து²
Dvepabbajitavatthu
378. ஏவங் மே ஸுதங் – ஏகங் ஸமயங் ப⁴க³வா கோஸம்பி³யங் விஹரதி கோ⁴ஸிதாராமே. தேன கோ² பன ஸமயேன த்³வே பப்³ப³ஜிதா – முண்டி³யோ ச பரிப்³பா³ஜகோ ஜாலியோ ச தா³ருபத்திகந்தேவாஸீ யேன ப⁴க³வா தேனுபஸங்கமிங்ஸு; உபஸங்கமித்வா ப⁴க³வதா ஸத்³தி⁴ங் ஸம்மோதி³ங்ஸு. ஸம்மோத³னீயங் கத²ங் ஸாரணீயங் வீதிஸாரெத்வா ஏகமந்தங் அட்ட²ங்ஸு. ஏகமந்தங் டி²தா கோ² தே த்³வே பப்³ப³ஜிதா ப⁴க³வந்தங் ஏதத³வோசுங் – ‘‘கிங் நு கோ², ஆவுஸோ கோ³தம, தங் ஜீவங் தங் ஸரீரங், உதா³ஹு அஞ்ஞங் ஜீவங் அஞ்ஞங் ஸரீர’’ந்தி?
378. Evaṃ me sutaṃ – ekaṃ samayaṃ bhagavā kosambiyaṃ viharati ghositārāme. Tena kho pana samayena dve pabbajitā – muṇḍiyo ca paribbājako jāliyo ca dārupattikantevāsī yena bhagavā tenupasaṅkamiṃsu; upasaṅkamitvā bhagavatā saddhiṃ sammodiṃsu. Sammodanīyaṃ kathaṃ sāraṇīyaṃ vītisāretvā ekamantaṃ aṭṭhaṃsu. Ekamantaṃ ṭhitā kho te dve pabbajitā bhagavantaṃ etadavocuṃ – ‘‘kiṃ nu kho, āvuso gotama, taṃ jīvaṃ taṃ sarīraṃ, udāhu aññaṃ jīvaṃ aññaṃ sarīra’’nti?
379. ‘‘தேன ஹாவுஸோ, ஸுணாத² ஸாது⁴கங் மனஸி கரோத²; பா⁴ஸிஸ்ஸாமீ’’தி. ‘‘ஏவமாவுஸோ’’தி கோ² தே த்³வே பப்³ப³ஜிதா ப⁴க³வதோ பச்சஸ்ஸோஸுங். ப⁴க³வா ஏதத³வோச – ‘‘இதா⁴வுஸோ, ததா²க³தோ லோகே உப்பஜ்ஜதி அரஹங், ஸம்மாஸம்பு³த்³தோ⁴…பே॰… (யதா² 190-212 அனுச்சே²தே³ஸு ஏவங் வித்தா²ரேதப்³ப³ங்). ஏவங் கோ², ஆவுஸோ, பி⁴க்கு² ஸீலஸம்பன்னோ ஹோதி…பே॰… பட²மங் ஜா²னங் உபஸம்பஜ்ஜ விஹரதி. யோ கோ², ஆவுஸோ, பி⁴க்கு² ஏவங் ஜானாதி ஏவங் பஸ்ஸதி , கல்லங் நு கோ² தஸ்ஸேதங் வசனாய – ‘தங் ஜீவங் தங் ஸரீர’ந்தி வா ‘அஞ்ஞங் ஜீவங் அஞ்ஞங் ஸரீர’ந்தி வாதி. யோ ஸோ, ஆவுஸோ, பி⁴க்கு² ஏவங் ஜானாதி ஏவங் பஸ்ஸதி, கல்லங் தஸ்ஸேதங் வசனாய – ‘தங் ஜீவங் தங் ஸரீர’ந்தி வா ‘அஞ்ஞங் ஜீவங் அஞ்ஞங் ஸரீர’ந்தி வாதி. அஹங் கோ² பனேதங், ஆவுஸோ, ஏவங் ஜானாமி ஏவங் பஸ்ஸாமி. அத² ச பனாஹங் ந வதா³மி – ‘தங் ஜீவங் தங் ஸரீர’ந்தி வா ‘அஞ்ஞங் ஜீவங் அஞ்ஞங் ஸரீர’ந்தி வா…பே॰… து³தியங் ஜா²னங்…பே॰… ததியங் ஜா²னங்…பே॰… சதுத்த²ங் ஜா²னங் உபஸம்பஜ்ஜ விஹரதி. யோ கோ², ஆவுஸோ, பி⁴க்கு² ஏவங் ஜானாதி ஏவங் பஸ்ஸதி, கல்லங் நு கோ² தஸ்ஸேதங் வசனாய – ‘தங் ஜீவங் தங் ஸரீர’ந்தி வா ‘அஞ்ஞங் ஜீவங் அஞ்ஞங் ஸரீர’ந்தி வாதி? யோ ஸோ, ஆவுஸோ, பி⁴க்கு² ஏவங் ஜானாதி ஏவங் பஸ்ஸதி கல்லங், தஸ்ஸேதங் வசனாய – ‘தங் ஜீவங் தங் ஸரீர’ந்தி வா ‘அஞ்ஞங் ஜீவங் அஞ்ஞங் ஸரீர’ந்தி வாதி. அஹங் கோ² பனேதங், ஆவுஸோ, ஏவங் ஜானாமி ஏவங் பஸ்ஸாமி. அத² ச பனாஹங் ந வதா³மி – ‘தங் ஜீவங் தங் ஸரீர’ந்தி வா ‘அஞ்ஞங் ஜீவங் அஞ்ஞங் ஸரீர’ந்தி வா…பே॰… ஞாணத³ஸ்ஸனாய சித்தங் அபி⁴னீஹரதி அபி⁴னின்னாமேதி…பே॰… யோ கோ², ஆவுஸோ, பி⁴க்கு² ஏவங் ஜானாதி ஏவங் பஸ்ஸதி, கல்லங் நு கோ² தஸ்ஸேதங் வசனாய – ‘தங் ஜீவங் தங் ஸரீர’ந்தி வா ‘அஞ்ஞங் ஜீவங் அஞ்ஞங் ஸரீர’ந்தி வாதி. யோ ஸோ, ஆவுஸோ, பி⁴க்கு² ஏவங் ஜானாதி ஏவங் பஸ்ஸதி கல்லங் தஸ்ஸேதங் வசனாய – ‘தங் ஜீவங் தங் ஸரீர’ந்தி வா ‘அஞ்ஞங் ஜீவங் அஞ்ஞங் ஸரீர’ந்தி வாதி. அஹங் கோ² பனேதங், ஆவுஸோ, ஏவங் ஜானாமி ஏவங் பஸ்ஸாமி. அத² ச பனாஹங் ந வதா³மி – ‘தங் ஜீவங் தங் ஸரீர’ந்தி வா ‘அஞ்ஞங் ஜீவங் அஞ்ஞங் ஸரீர’ந்தி வா…பே॰….
379. ‘‘Tena hāvuso, suṇātha sādhukaṃ manasi karotha; bhāsissāmī’’ti. ‘‘Evamāvuso’’ti kho te dve pabbajitā bhagavato paccassosuṃ. Bhagavā etadavoca – ‘‘idhāvuso, tathāgato loke uppajjati arahaṃ, sammāsambuddho…pe… (yathā 190-212 anucchedesu evaṃ vitthāretabbaṃ). Evaṃ kho, āvuso, bhikkhu sīlasampanno hoti…pe… paṭhamaṃ jhānaṃ upasampajja viharati. Yo kho, āvuso, bhikkhu evaṃ jānāti evaṃ passati , kallaṃ nu kho tassetaṃ vacanāya – ‘taṃ jīvaṃ taṃ sarīra’nti vā ‘aññaṃ jīvaṃ aññaṃ sarīra’nti vāti. Yo so, āvuso, bhikkhu evaṃ jānāti evaṃ passati, kallaṃ tassetaṃ vacanāya – ‘taṃ jīvaṃ taṃ sarīra’nti vā ‘aññaṃ jīvaṃ aññaṃ sarīra’nti vāti. Ahaṃ kho panetaṃ, āvuso, evaṃ jānāmi evaṃ passāmi. Atha ca panāhaṃ na vadāmi – ‘taṃ jīvaṃ taṃ sarīra’nti vā ‘aññaṃ jīvaṃ aññaṃ sarīra’nti vā…pe… dutiyaṃ jhānaṃ…pe… tatiyaṃ jhānaṃ…pe… catutthaṃ jhānaṃ upasampajja viharati. Yo kho, āvuso, bhikkhu evaṃ jānāti evaṃ passati, kallaṃ nu kho tassetaṃ vacanāya – ‘taṃ jīvaṃ taṃ sarīra’nti vā ‘aññaṃ jīvaṃ aññaṃ sarīra’nti vāti? Yo so, āvuso, bhikkhu evaṃ jānāti evaṃ passati kallaṃ, tassetaṃ vacanāya – ‘taṃ jīvaṃ taṃ sarīra’nti vā ‘aññaṃ jīvaṃ aññaṃ sarīra’nti vāti. Ahaṃ kho panetaṃ, āvuso, evaṃ jānāmi evaṃ passāmi. Atha ca panāhaṃ na vadāmi – ‘taṃ jīvaṃ taṃ sarīra’nti vā ‘aññaṃ jīvaṃ aññaṃ sarīra’nti vā…pe… ñāṇadassanāya cittaṃ abhinīharati abhininnāmeti…pe… yo kho, āvuso, bhikkhu evaṃ jānāti evaṃ passati, kallaṃ nu kho tassetaṃ vacanāya – ‘taṃ jīvaṃ taṃ sarīra’nti vā ‘aññaṃ jīvaṃ aññaṃ sarīra’nti vāti. Yo so, āvuso, bhikkhu evaṃ jānāti evaṃ passati kallaṃ tassetaṃ vacanāya – ‘taṃ jīvaṃ taṃ sarīra’nti vā ‘aññaṃ jīvaṃ aññaṃ sarīra’nti vāti. Ahaṃ kho panetaṃ, āvuso, evaṃ jānāmi evaṃ passāmi. Atha ca panāhaṃ na vadāmi – ‘taṃ jīvaṃ taṃ sarīra’nti vā ‘aññaṃ jīvaṃ aññaṃ sarīra’nti vā…pe….
380. …பே॰… நாபரங் இத்த²த்தாயாதி பஜானாதி. யோ கோ², ஆவுஸோ, பி⁴க்கு² ஏவங் ஜானாதி ஏவங் பஸ்ஸதி, கல்லங் நு கோ² தஸ்ஸேதங் வசனாய – ‘தங் ஜீவங் தங் ஸரீர’ந்தி வா ‘அஞ்ஞங் ஜீவங் அஞ்ஞங் ஸரீர’ந்தி வாதி? யோ ஸோ, ஆவுஸோ, பி⁴க்கு² ஏவங் ஜானாதி ஏவங் பஸ்ஸதி, ந கல்லங் தஸ்ஸேதங் வசனாய – ‘தங் ஜீவங் தங் ஸரீர’ந்தி வா ‘அஞ்ஞங் ஜீவங் அஞ்ஞங் ஸரீர’ந்தி வாதி. அஹங் கோ² பனேதங், ஆவுஸோ, ஏவங் ஜானாமி ஏவங் பஸ்ஸாமி. அத² ச பனாஹங் ந வதா³மி – ‘தங் ஜீவங் தங் ஸரீர’ந்தி வா ‘அஞ்ஞங் ஜீவங் அஞ்ஞங் ஸரீர’ந்தி வா’’தி. இத³மவோச ப⁴க³வா. அத்தமனா தே த்³வே பப்³ப³ஜிதா ப⁴க³வதோ பா⁴ஸிதங் அபி⁴னந்து³ந்தி.
380. …Pe… nāparaṃ itthattāyāti pajānāti. Yo kho, āvuso, bhikkhu evaṃ jānāti evaṃ passati, kallaṃ nu kho tassetaṃ vacanāya – ‘taṃ jīvaṃ taṃ sarīra’nti vā ‘aññaṃ jīvaṃ aññaṃ sarīra’nti vāti? Yo so, āvuso, bhikkhu evaṃ jānāti evaṃ passati, na kallaṃ tassetaṃ vacanāya – ‘taṃ jīvaṃ taṃ sarīra’nti vā ‘aññaṃ jīvaṃ aññaṃ sarīra’nti vāti. Ahaṃ kho panetaṃ, āvuso, evaṃ jānāmi evaṃ passāmi. Atha ca panāhaṃ na vadāmi – ‘taṃ jīvaṃ taṃ sarīra’nti vā ‘aññaṃ jīvaṃ aññaṃ sarīra’nti vā’’ti. Idamavoca bhagavā. Attamanā te dve pabbajitā bhagavato bhāsitaṃ abhinandunti.
ஜாலியஸுத்தங் நிட்டி²தங் ஸத்தமங்.
Jāliyasuttaṃ niṭṭhitaṃ sattamaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / தீ³க⁴ நிகாய (அட்ட²கதா²) • Dīgha nikāya (aṭṭhakathā) / 7. ஜாலியஸுத்தவண்ணனா • 7. Jāliyasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / தீ³க⁴னிகாய (டீகா) • Dīghanikāya (ṭīkā) / 7. ஜாலியஸுத்தவண்ணனா • 7. Jāliyasuttavaṇṇanā
