| Library / Tipiṭaka / တိပိဋက • Tipiṭaka / မိလိန္ဒပဉ္ဟပာဠိ • Milindapañhapāḷi |
၈. ဇလူကင္ဂပဉ္ဟော
8. Jalūkaṅgapañho
၈. ‘‘ဘန္တေ နာဂသေန, ‘ဇလူကာယ ဧကံ အင္ဂံ ဂဟေတဗ္ဗ’န္တိ ယံ ဝဒေသိ, ကတမံ တံ ဧကံ အင္ဂံ ဂဟေတဗ္ဗ’’န္တိ? ‘‘ယထာ, မဟာရာဇ, ဇလူကာ ယတ္ထ အလ္လီယတိ, တတ္ထေဝ ဒဠ္ဟံ အလ္လီယိတ္ဝာ ရုဟိရံ ပိဝတိ, ဧဝမေဝ ခော, မဟာရာဇ, ယောဂိနာ ယောဂာဝစရေန ယသ္မိံ အာရမ္မဏေ စိတ္တံ အလ္လီယတိ, တံ အာရမ္မဏံ ဝဏ္ဏတော စ သဏ္ဌာနတော စ ဒိသတော စ ဩကာသတော စ ပရိစ္ဆေဒတော စ လိင္ဂတော စ နိမိတ္တတော စ ဒဠ္ဟံ ပတိဋ္ဌာပေတ္ဝာ တေနေဝာရမ္မဏေန ဝိမုတ္တိရသမသေစနကံ ပာတဗ္ဗံ။ ဣဒံ, မဟာရာဇ, ဇလူကာယ ဧကံ အင္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ထေရေန အနုရုဒ္ဓေန –
8. ‘‘Bhante nāgasena, ‘jalūkāya ekaṃ aṅgaṃ gahetabba’nti yaṃ vadesi, katamaṃ taṃ ekaṃ aṅgaṃ gahetabba’’nti? ‘‘Yathā, mahārāja, jalūkā yattha allīyati, tattheva daḷhaṃ allīyitvā ruhiraṃ pivati, evameva kho, mahārāja, yoginā yogāvacarena yasmiṃ ārammaṇe cittaṃ allīyati, taṃ ārammaṇaṃ vaṇṇato ca saṇṭhānato ca disato ca okāsato ca paricchedato ca liṅgato ca nimittato ca daḷhaṃ patiṭṭhāpetvā tenevārammaṇena vimuttirasamasecanakaṃ pātabbaṃ. Idaṃ, mahārāja, jalūkāya ekaṃ aṅgaṃ gahetabbaṃ. Bhāsitampetaṃ, mahārāja, therena anuruddhena –
‘‘‘ပရိသုဒ္ဓေန စိတ္တေန၊ အာရမ္မဏေ ပတိဋ္ဌာယ။
‘‘‘Parisuddhena cittena, ārammaṇe patiṭṭhāya;
တေန စိတ္တေန ပာတဗ္ဗံ၊ ဝိမုတ္တိရသမသေစန’’’န္တိ။
Tena cittena pātabbaṃ, vimuttirasamasecana’’’nti.
ဇလူကင္ဂပဉ္ဟော အဋ္ဌမော။
Jalūkaṅgapañho aṭṭhamo.
