| Library / Tipiṭaka / തിപിടക • Tipiṭaka / മിലിന്ദപഞ്ഹപാളി • Milindapañhapāḷi |
൮. ജലൂകങ്ഗപഞ്ഹോ
8. Jalūkaṅgapañho
൮. ‘‘ഭന്തേ നാഗസേന, ‘ജലൂകായ ഏകം അങ്ഗം ഗഹേതബ്ബ’ന്തി യം വദേസി, കതമം തം ഏകം അങ്ഗം ഗഹേതബ്ബ’’ന്തി? ‘‘യഥാ, മഹാരാജ, ജലൂകാ യത്ഥ അല്ലീയതി, തത്ഥേവ ദള്ഹം അല്ലീയിത്വാ രുഹിരം പിവതി, ഏവമേവ ഖോ, മഹാരാജ, യോഗിനാ യോഗാവചരേന യസ്മിം ആരമ്മണേ ചിത്തം അല്ലീയതി, തം ആരമ്മണം വണ്ണതോ ച സണ്ഠാനതോ ച ദിസതോ ച ഓകാസതോ ച പരിച്ഛേദതോ ച ലിങ്ഗതോ ച നിമിത്തതോ ച ദള്ഹം പതിട്ഠാപേത്വാ തേനേവാരമ്മണേന വിമുത്തിരസമസേചനകം പാതബ്ബം. ഇദം, മഹാരാജ, ജലൂകായ ഏകം അങ്ഗം ഗഹേതബ്ബം. ഭാസിതമ്പേതം, മഹാരാജ, ഥേരേന അനുരുദ്ധേന –
8. ‘‘Bhante nāgasena, ‘jalūkāya ekaṃ aṅgaṃ gahetabba’nti yaṃ vadesi, katamaṃ taṃ ekaṃ aṅgaṃ gahetabba’’nti? ‘‘Yathā, mahārāja, jalūkā yattha allīyati, tattheva daḷhaṃ allīyitvā ruhiraṃ pivati, evameva kho, mahārāja, yoginā yogāvacarena yasmiṃ ārammaṇe cittaṃ allīyati, taṃ ārammaṇaṃ vaṇṇato ca saṇṭhānato ca disato ca okāsato ca paricchedato ca liṅgato ca nimittato ca daḷhaṃ patiṭṭhāpetvā tenevārammaṇena vimuttirasamasecanakaṃ pātabbaṃ. Idaṃ, mahārāja, jalūkāya ekaṃ aṅgaṃ gahetabbaṃ. Bhāsitampetaṃ, mahārāja, therena anuruddhena –
‘‘‘പരിസുദ്ധേന ചിത്തേന, ആരമ്മണേ പതിട്ഠായ;
‘‘‘Parisuddhena cittena, ārammaṇe patiṭṭhāya;
തേന ചിത്തേന പാതബ്ബം, വിമുത്തിരസമസേചന’’’ന്തി.
Tena cittena pātabbaṃ, vimuttirasamasecana’’’nti.
ജലൂകങ്ഗപഞ്ഹോ അട്ഠമോ.
Jalūkaṅgapañho aṭṭhamo.
