| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
৮. জম্বালীসুত্তং
8. Jambālīsuttaṃ
১৭৮. ‘‘চত্তারোমে , ভিক্খৰে, পুগ্গলা সন্তো সংৰিজ্জমানা লোকস্মিং। কতমে চত্তারো? ইধ, ভিক্খৰে, ভিক্খু অঞ্ঞতরং সন্তং চেতোৰিমুত্তিং উপসম্পজ্জ ৰিহরতি। সো সক্কাযনিরোধং মনসি করোতি। তস্স সক্কাযনিরোধং মনসি করোতো সক্কাযনিরোধে চিত্তং ন পক্খন্দতি নপ্পসীদতি ন সন্তিট্ঠতি নাধিমুচ্চতি। তস্স খো এৰং 1, ভিক্খৰে, ভিক্খুনো ন সক্কাযনিরোধো পাটিকঙ্খো। সেয্যথাপি, ভিক্খৰে, পুরিসো লেপগতেন 2 হত্থেন সাখং গণ্হেয্য, তস্স সো হত্থো সজ্জেয্যপি গণ্হেয্যপি 3 বজ্ঝেয্যপি 4; এৰমেৰং খো, ভিক্খৰে, ভিক্খু অঞ্ঞতরং সন্তং চেতোৰিমুত্তিং উপসম্পজ্জ ৰিহরতি। সো সক্কাযনিরোধং মনসি করোতি। তস্স সক্কাযনিরোধং মনসি করোতো সক্কাযনিরোধে চিত্তং ন পক্খন্দতি নপ্পসীদতি ন সন্তিট্ঠতি নাধিমুচ্চতি। তস্স খো এৰং, ভিক্খৰে, ভিক্খুনো ন সক্কাযনিরোধো পাটিকঙ্খো।
178. ‘‘Cattārome , bhikkhave, puggalā santo saṃvijjamānā lokasmiṃ. Katame cattāro? Idha, bhikkhave, bhikkhu aññataraṃ santaṃ cetovimuttiṃ upasampajja viharati. So sakkāyanirodhaṃ manasi karoti. Tassa sakkāyanirodhaṃ manasi karoto sakkāyanirodhe cittaṃ na pakkhandati nappasīdati na santiṭṭhati nādhimuccati. Tassa kho evaṃ 5, bhikkhave, bhikkhuno na sakkāyanirodho pāṭikaṅkho. Seyyathāpi, bhikkhave, puriso lepagatena 6 hatthena sākhaṃ gaṇheyya, tassa so hattho sajjeyyapi gaṇheyyapi 7 bajjheyyapi 8; evamevaṃ kho, bhikkhave, bhikkhu aññataraṃ santaṃ cetovimuttiṃ upasampajja viharati. So sakkāyanirodhaṃ manasi karoti. Tassa sakkāyanirodhaṃ manasi karoto sakkāyanirodhe cittaṃ na pakkhandati nappasīdati na santiṭṭhati nādhimuccati. Tassa kho evaṃ, bhikkhave, bhikkhuno na sakkāyanirodho pāṭikaṅkho.
‘‘ইধ পন, ভিক্খৰে, ভিক্খু অঞ্ঞতরং সন্তং চেতোৰিমুত্তিং উপসম্পজ্জ ৰিহরতি। সো সক্কাযনিরোধং মনসি করোতি । তস্স সক্কাযনিরোধং মনসি করোতো সক্কাযনিরোধে চিত্তং পক্খন্দতি পসীদতি সন্তিট্ঠতি অধিমুচ্চতি। তস্স খো এৰং, ভিক্খৰে, ভিক্খুনো সক্কাযনিরোধো পাটিকঙ্খো। সেয্যথাপি, ভিক্খৰে, পুরিসো সুদ্ধেন হত্থেন সাখং গণ্হেয্য, তস্স সো হত্থো নেৰ সজ্জেয্য ন গণ্হেয্য ন বজ্ঝেয্য; এৰমেৰং খো, ভিক্খৰে, ভিক্খু অঞ্ঞতরং সন্তং চেতোৰিমুত্তিং উপসম্পজ্জ ৰিহরতি। সো সক্কাযনিরোধং মনসি করোতি। তস্স সক্কাযনিরোধং মনসি করোতো সক্কাযনিরোধে চিত্তং পক্খন্দতি পসীদতি সন্তিট্ঠতি অধিমুচ্চতি। তস্স খো এৰং, ভিক্খৰে, ভিক্খুনো সক্কাযনিরোধো পাটিকঙ্খো।
‘‘Idha pana, bhikkhave, bhikkhu aññataraṃ santaṃ cetovimuttiṃ upasampajja viharati. So sakkāyanirodhaṃ manasi karoti . Tassa sakkāyanirodhaṃ manasi karoto sakkāyanirodhe cittaṃ pakkhandati pasīdati santiṭṭhati adhimuccati. Tassa kho evaṃ, bhikkhave, bhikkhuno sakkāyanirodho pāṭikaṅkho. Seyyathāpi, bhikkhave, puriso suddhena hatthena sākhaṃ gaṇheyya, tassa so hattho neva sajjeyya na gaṇheyya na bajjheyya; evamevaṃ kho, bhikkhave, bhikkhu aññataraṃ santaṃ cetovimuttiṃ upasampajja viharati. So sakkāyanirodhaṃ manasi karoti. Tassa sakkāyanirodhaṃ manasi karoto sakkāyanirodhe cittaṃ pakkhandati pasīdati santiṭṭhati adhimuccati. Tassa kho evaṃ, bhikkhave, bhikkhuno sakkāyanirodho pāṭikaṅkho.
‘‘ইধ পন, ভিক্খৰে, ভিক্খু অঞ্ঞতরং সন্তং চেতোৰিমুত্তিং উপসম্পজ্জ ৰিহরতি। সো অৰিজ্জাপ্পভেদং মনসি করোতি। তস্স অৰিজ্জাপ্পভেদং মনসি করোতো অৰিজ্জাপ্পভেদে চিত্তং ন পক্খন্দতি নপ্পসীদতি ন সন্তিট্ঠতি নাধিমুচ্চতি। তস্স খো এৰং, ভিক্খৰে, ভিক্খুনো ন অৰিজ্জাপ্পভেদো পাটিকঙ্খো। সেয্যথাপি, ভিক্খৰে, জম্বালী অনেকৰস্সগণিকা। তস্সা পুরিসো যানি চেৰ আযমুখানি তানি পিদহেয্য, যানি চ অপাযমুখানি তানি ৰিৰরেয্য, দেৰো চ ন সম্মা ধারং অনুপ্পৰেচ্ছেয্য। এৰঞ্হি তস্সা, ভিক্খৰে, জম্বালিযা ন আল়িপ্পভেদো পাটিকঙ্খো। এৰমেৰং খো, ভিক্খৰে, ভিক্খু অঞ্ঞতরং সন্তং চেতোৰিমুত্তিং উপসম্পজ্জ ৰিহরতি। সো অৰিজ্জাপ্পভেদং মনসি করোতি। তস্স অৰিজ্জাপ্পভেদং মনসি করোতো অৰিজ্জাপ্পভেদে চিত্তং ন পক্খন্দতি নপ্পসীদতি ন সন্তিট্ঠতি নাধিমুচ্চতি। তস্স খো এৰং, ভিক্খৰে, ভিক্খুনো ন অৰিজ্জাপ্পভেদো পাটিকঙ্খো।
‘‘Idha pana, bhikkhave, bhikkhu aññataraṃ santaṃ cetovimuttiṃ upasampajja viharati. So avijjāppabhedaṃ manasi karoti. Tassa avijjāppabhedaṃ manasi karoto avijjāppabhede cittaṃ na pakkhandati nappasīdati na santiṭṭhati nādhimuccati. Tassa kho evaṃ, bhikkhave, bhikkhuno na avijjāppabhedo pāṭikaṅkho. Seyyathāpi, bhikkhave, jambālī anekavassagaṇikā. Tassā puriso yāni ceva āyamukhāni tāni pidaheyya, yāni ca apāyamukhāni tāni vivareyya, devo ca na sammā dhāraṃ anuppaveccheyya. Evañhi tassā, bhikkhave, jambāliyā na āḷippabhedo pāṭikaṅkho. Evamevaṃ kho, bhikkhave, bhikkhu aññataraṃ santaṃ cetovimuttiṃ upasampajja viharati. So avijjāppabhedaṃ manasi karoti. Tassa avijjāppabhedaṃ manasi karoto avijjāppabhede cittaṃ na pakkhandati nappasīdati na santiṭṭhati nādhimuccati. Tassa kho evaṃ, bhikkhave, bhikkhuno na avijjāppabhedo pāṭikaṅkho.
‘‘ইধ পন, ভিক্খৰে, ভিক্খু অঞ্ঞতরং সন্তং চেতোৰিমুত্তিং উপসম্পজ্জ ৰিহরতি। সো অৰিজ্জাপ্পভেদং মনসি করোতি। তস্স অৰিজ্জাপ্পভেদং মনসি করোতো অৰিজ্জাপ্পভেদে চিত্তং পক্খন্দতি পসীদতি সন্তিট্ঠতি অধিমুচ্চতি। তস্স খো এৰং, ভিক্খৰে, ভিক্খুনো অৰিজ্জাপ্পভেদো পাটিকঙ্খো। সেয্যথাপি, ভিক্খৰে, জম্বালী অনেকৰস্সগণিকা। তস্সা পুরিসো যানি চেৰ আযমুখানি তানি ৰিৰরেয্য, যানি চ অপাযমুখানি তানি পিদহেয্য, দেৰো চ সম্মা ধারং অনুপ্পৰেচ্ছেয্য। এৰঞ্হি তস্সা, ভিক্খৰে, জম্বালিযা আল়িপ্পভেদো পাটিকঙ্খো। এৰমেৰং খো, ভিক্খৰে, ভিক্খু অঞ্ঞতরং সন্তং চেতোৰিমুত্তিং উপসম্পজ্জ ৰিহরতি। সো অৰিজ্জাপ্পভেদং মনসি করোতি। তস্স অৰিজ্জাপ্পভেদং মনসি করোতো অৰিজ্জাপ্পভেদে চিত্তং পক্খন্দতি পসীদতি সন্তিট্ঠতি অধিমুচ্চতি। তস্স খো এৰং, ভিক্খৰে, ভিক্খুনো অৰিজ্জাপ্পভেদো পাটিকঙ্খো । ইমে খো, ভিক্খৰে, চত্তারো পুগ্গলা সন্তো সংৰিজ্জমানা লোকস্মি’’ন্তি। অট্ঠমং।
‘‘Idha pana, bhikkhave, bhikkhu aññataraṃ santaṃ cetovimuttiṃ upasampajja viharati. So avijjāppabhedaṃ manasi karoti. Tassa avijjāppabhedaṃ manasi karoto avijjāppabhede cittaṃ pakkhandati pasīdati santiṭṭhati adhimuccati. Tassa kho evaṃ, bhikkhave, bhikkhuno avijjāppabhedo pāṭikaṅkho. Seyyathāpi, bhikkhave, jambālī anekavassagaṇikā. Tassā puriso yāni ceva āyamukhāni tāni vivareyya, yāni ca apāyamukhāni tāni pidaheyya, devo ca sammā dhāraṃ anuppaveccheyya. Evañhi tassā, bhikkhave, jambāliyā āḷippabhedo pāṭikaṅkho. Evamevaṃ kho, bhikkhave, bhikkhu aññataraṃ santaṃ cetovimuttiṃ upasampajja viharati. So avijjāppabhedaṃ manasi karoti. Tassa avijjāppabhedaṃ manasi karoto avijjāppabhede cittaṃ pakkhandati pasīdati santiṭṭhati adhimuccati. Tassa kho evaṃ, bhikkhave, bhikkhuno avijjāppabhedo pāṭikaṅkho . Ime kho, bhikkhave, cattāro puggalā santo saṃvijjamānā lokasmi’’nti. Aṭṭhamaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ৮. জম্বালীসুত্তৰণ্ণনা • 8. Jambālīsuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ৮. জম্বালীসুত্তৰণ্ণনা • 8. Jambālīsuttavaṇṇanā
