| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
8. ஜம்பா³லீஸுத்தவண்ணனா
8. Jambālīsuttavaṇṇanā
178. அட்ட²மே ஸந்தந்தி அங்க³ஸந்ததாய சேவ ஆரம்மணஸந்ததாய ச கமனீயங் மனோஹரங். சேதோவிமுத்திந்தி ரூபாரூபாவசரங் சித்தவிமுத்திங். தேனேவாஹ ‘‘அட்ட²ன்னங் ஸமாபத்தீனங் அஞ்ஞதரங் ஸமாபத்தி’’ந்தி. லேபமக்கி²தேனாதி லாகா²மக்கி²தேன. பாரிபந்தி²கே அஸோதெ⁴த்வாதி காமச்ச²ந்தா³தி³பாரிபந்தி²கே அஸோதெ⁴த்வா. யோ ஹி காமாதீ³னவபச்சவெக்க²ணாதீ³ஹி காமச்ச²ந்த³ங் ந ஸுட்டு² விக்க²ம்பெ⁴த்வா காயப்பஸ்ஸத்³தி⁴வஸேன து³ட்டு²ல்லங் ஸுப்படிப்பஸ்ஸத்³த⁴ங் அகத்வா ஆரம்ப⁴தா⁴துமனஸிகாராதி³வஸேன தி²னமித்³த⁴ங் ந ஸுட்டு² படிவினோதெ³த்வா ஸமத²னிமித்தமனஸிகாராதி³வஸேன உத்³த⁴ச்சகுக்குச்சங் ந ஸமூஹதங் கத்வா அஞ்ஞேபி ஸமாதி⁴பரிபந்தே² த⁴ம்மே ந ஸுட்டு² ஸோதெ⁴த்வா ஜா²னங் ஸமாபஜ்ஜதி. ஸோ அஸோதி⁴தங் ஆஸயங் பவிட்ட²ப⁴மரோ விய அஸுத்³த⁴ங் உய்யானங் பவிட்ட²ராஜா விய ச கி²ப்பமேவ நிக்க²மதி. யோ பன ஸமாதி⁴பரிபந்தே² த⁴ம்மே ஸுட்டு² விஸோதெ⁴த்வா ஜா²னங் ஸமாபஜ்ஜதி, ஸோ ஸுவிஸோதி⁴தங் ஆஸயங் பவிட்ட²ப⁴மரோ விய ஸுபரிஸுத்³த⁴ங் உய்யானங் பவிட்ட²ராஜா விய ச ஸகலம்பி தி³வஸபா⁴க³ங் அந்தோஸமாபத்தியங்யேவ ஹோதி.
178. Aṭṭhame santanti aṅgasantatāya ceva ārammaṇasantatāya ca kamanīyaṃ manoharaṃ. Cetovimuttinti rūpārūpāvacaraṃ cittavimuttiṃ. Tenevāha ‘‘aṭṭhannaṃ samāpattīnaṃ aññataraṃ samāpatti’’nti. Lepamakkhitenāti lākhāmakkhitena. Pāripanthike asodhetvāti kāmacchandādipāripanthike asodhetvā. Yo hi kāmādīnavapaccavekkhaṇādīhi kāmacchandaṃ na suṭṭhu vikkhambhetvā kāyappassaddhivasena duṭṭhullaṃ suppaṭippassaddhaṃ akatvā ārambhadhātumanasikārādivasena thinamiddhaṃ na suṭṭhu paṭivinodetvā samathanimittamanasikārādivasena uddhaccakukkuccaṃ na samūhataṃ katvā aññepi samādhiparipanthe dhamme na suṭṭhu sodhetvā jhānaṃ samāpajjati. So asodhitaṃ āsayaṃ paviṭṭhabhamaro viya asuddhaṃ uyyānaṃ paviṭṭharājā viya ca khippameva nikkhamati. Yo pana samādhiparipanthe dhamme suṭṭhu visodhetvā jhānaṃ samāpajjati, so suvisodhitaṃ āsayaṃ paviṭṭhabhamaro viya suparisuddhaṃ uyyānaṃ paviṭṭharājā viya ca sakalampi divasabhāgaṃ antosamāpattiyaṃyeva hoti.
ஆயமுகா²னீதி நதி³தளாககந்த³ரபத³ராதி³தோ ஆக³மனமக்³கா³. தே ச கந்த³ராயேவாதி ஆஹ ‘‘சதஸ்ஸோ பவிஸனகந்த³ரா’’தி. அபாயமுகா²னீதி அபக³மனமக்³கா³. அபெந்தி அபக³ச்ச²ந்தி ஏதேஹீதி ஹி அபாயா, தே ஏவ முகா²னீதி அபாயமுகா²னி. தானி ச உத³கனிக்க²மனச்சி²த்³தா³னீதி ஆஹ ‘‘அபவாஹனச்சி²த்³தா³னீ’’தி, அபாயஸங்கா²தானி உத³கனிக்க²மனச்சி²த்³தா³னீதி அத்தோ². ஸேஸங் ஸுவிஞ்ஞெய்யமேவ.
Āyamukhānīti naditaḷākakandarapadarādito āgamanamaggā. Te ca kandarāyevāti āha ‘‘catasso pavisanakandarā’’ti. Apāyamukhānīti apagamanamaggā. Apenti apagacchanti etehīti hi apāyā, te eva mukhānīti apāyamukhāni. Tāni ca udakanikkhamanacchiddānīti āha ‘‘apavāhanacchiddānī’’ti, apāyasaṅkhātāni udakanikkhamanacchiddānīti attho. Sesaṃ suviññeyyameva.
ஜம்பா³லீஸுத்தவண்ணனா நிட்டி²தா.
Jambālīsuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 8. ஜம்பா³லீஸுத்தங் • 8. Jambālīsuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 8. ஜம்பா³லீஸுத்தவண்ணனா • 8. Jambālīsuttavaṇṇanā
