| Library / Tipiṭaka / တိပိဋက • Tipiṭaka / အင္ဂုတ္တရနိကာယ (ဋီကာ) • Aṅguttaranikāya (ṭīkā) |
၈. ဇမ္ဗာလီသုတ္တဝဏ္ဏနာ
8. Jambālīsuttavaṇṇanā
၁၇၈. အဋ္ဌမေ သန္တန္တိ အင္ဂသန္တတာယ စေဝ အာရမ္မဏသန္တတာယ စ ကမနီယံ မနောဟရံ။ စေတောဝိမုတ္တိန္တိ ရူပာရူပာဝစရံ စိတ္တဝိမုတ္တိံ။ တေနေဝာဟ ‘‘အဋ္ဌန္နံ သမာပတ္တီနံ အညတရံ သမာပတ္တိ’’န္တိ။ လေပမက္ခိတေနာတိ လာခာမက္ခိတေန။ ပာရိပန္ထိကေ အသောဓေတ္ဝာတိ ကာမစ္ဆန္ဒာဒိပာရိပန္ထိကေ အသောဓေတ္ဝာ။ ယော ဟိ ကာမာဒီနဝပစ္စဝေက္ခဏာဒီဟိ ကာမစ္ဆန္ဒံ န သုဋ္ဌု ဝိက္ခမ္ဘေတ္ဝာ ကာယပ္ပသ္သဒ္ဓိဝသေန ဒုဋ္ဌုလ္လံ သုပ္ပဋိပ္ပသ္သဒ္ဓံ အကတ္ဝာ အာရမ္ဘဓာတုမနသိကာရာဒိဝသေန ထိနမိဒ္ဓံ န သုဋ္ဌု ပဋိဝိနောဒေတ္ဝာ သမထနိမိတ္တမနသိကာရာဒိဝသေန ဥဒ္ဓစ္စကုက္ကုစ္စံ န သမူဟတံ ကတ္ဝာ အညေပိ သမာဓိပရိပန္ထေ ဓမ္မေ န သုဋ္ဌု သောဓေတ္ဝာ ဈာနံ သမာပဇ္ဇတိ။ သော အသောဓိတံ အာသယံ ပဝိဋ္ဌဘမရော ဝိယ အသုဒ္ဓံ ဥယ္ယာနံ ပဝိဋ္ဌရာဇာ ဝိယ စ ခိပ္ပမေဝ နိက္ခမတိ။ ယော ပန သမာဓိပရိပန္ထေ ဓမ္မေ သုဋ္ဌု ဝိသောဓေတ္ဝာ ဈာနံ သမာပဇ္ဇတိ, သော သုဝိသောဓိတံ အာသယံ ပဝိဋ္ဌဘမရော ဝိယ သုပရိသုဒ္ဓံ ဥယ္ယာနံ ပဝိဋ္ဌရာဇာ ဝိယ စ သကလမ္ပိ ဒိဝသဘာဂံ အန္တောသမာပတ္တိယံယေဝ ဟောတိ။
178. Aṭṭhame santanti aṅgasantatāya ceva ārammaṇasantatāya ca kamanīyaṃ manoharaṃ. Cetovimuttinti rūpārūpāvacaraṃ cittavimuttiṃ. Tenevāha ‘‘aṭṭhannaṃ samāpattīnaṃ aññataraṃ samāpatti’’nti. Lepamakkhitenāti lākhāmakkhitena. Pāripanthike asodhetvāti kāmacchandādipāripanthike asodhetvā. Yo hi kāmādīnavapaccavekkhaṇādīhi kāmacchandaṃ na suṭṭhu vikkhambhetvā kāyappassaddhivasena duṭṭhullaṃ suppaṭippassaddhaṃ akatvā ārambhadhātumanasikārādivasena thinamiddhaṃ na suṭṭhu paṭivinodetvā samathanimittamanasikārādivasena uddhaccakukkuccaṃ na samūhataṃ katvā aññepi samādhiparipanthe dhamme na suṭṭhu sodhetvā jhānaṃ samāpajjati. So asodhitaṃ āsayaṃ paviṭṭhabhamaro viya asuddhaṃ uyyānaṃ paviṭṭharājā viya ca khippameva nikkhamati. Yo pana samādhiparipanthe dhamme suṭṭhu visodhetvā jhānaṃ samāpajjati, so suvisodhitaṃ āsayaṃ paviṭṭhabhamaro viya suparisuddhaṃ uyyānaṃ paviṭṭharājā viya ca sakalampi divasabhāgaṃ antosamāpattiyaṃyeva hoti.
အာယမုခာနီတိ နဒိတဠာကကန္ဒရပဒရာဒိတော အာဂမနမဂ္ဂာ။ တေ စ ကန္ဒရာယေဝာတိ အာဟ ‘‘စတသ္သော ပဝိသနကန္ဒရာ’’တိ။ အပာယမုခာနီတိ အပဂမနမဂ္ဂာ။ အပေန္တိ အပဂစ္ဆန္တိ ဧတေဟီတိ ဟိ အပာယာ, တေ ဧဝ မုခာနီတိ အပာယမုခာနိ။ တာနိ စ ဥဒကနိက္ခမနစ္ဆိဒ္ဒာနီတိ အာဟ ‘‘အပဝာဟနစ္ဆိဒ္ဒာနီ’’တိ, အပာယသင္ခာတာနိ ဥဒကနိက္ခမနစ္ဆိဒ္ဒာနီတိ အတ္ထော။ သေသံ သုဝိညေယ္ယမေဝ။
Āyamukhānīti naditaḷākakandarapadarādito āgamanamaggā. Te ca kandarāyevāti āha ‘‘catasso pavisanakandarā’’ti. Apāyamukhānīti apagamanamaggā. Apenti apagacchanti etehīti hi apāyā, te eva mukhānīti apāyamukhāni. Tāni ca udakanikkhamanacchiddānīti āha ‘‘apavāhanacchiddānī’’ti, apāyasaṅkhātāni udakanikkhamanacchiddānīti attho. Sesaṃ suviññeyyameva.
ဇမ္ဗာလီသုတ္တဝဏ္ဏနာ နိဋ္ဌိတာ။
Jambālīsuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၈. ဇမ္ဗာလီသုတ္တံ • 8. Jambālīsuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၈. ဇမ္ဗာလီသုတ္တဝဏ္ဏနာ • 8. Jambālīsuttavaṇṇanā
