| Library / Tipiṭaka / তিপিটক • Tipiṭaka / থেরগাথা-অট্ঠকথা • Theragāthā-aṭṭhakathā |
৮. জম্বুগামিযপুত্তত্থেরগাথাৰণ্ণনা
8. Jambugāmiyaputtattheragāthāvaṇṇanā
কচ্চি নো ৰত্থপসুতোতি আযস্মতো জম্বুগামিযপুত্তত্থেরস্স গাথা। কা উপ্পত্তি? সো কির পুরিমবুদ্ধেসু কতাধিকারো হুত্ৰা তত্থ তত্থ ৰিৰট্টূপনিস্সযং কুসলং আচিনন্তো ইতো একতিংসে কপ্পে ৰেস্সভুস্স ভগৰতো কালে একদিৰসং কিংসুকানি পুপ্ফানি দিস্ৰা তানি পুপ্ফানি গহেত্ৰা বুদ্ধগুণে অনুস্সরন্তো ভগৰন্তং উদ্দিস্স আকাসে খিপন্তো পূজেসি। সো তেন পুঞ্ঞকম্মেন তাৰতিংসেসু নিব্বত্তো। ততো পরং পুঞ্ঞানি কত্ৰা অপরাপরং দেৰমনুস্সেসু সংসরন্তো ইমস্মিং বুদ্ধুপ্পাদে চম্পাযং জম্বুগামিযস্স নাম উপাসকস্স পুত্তো হুত্ৰা নিব্বত্তি। তেন পুঞ্ঞকম্মেন তাৰতিংসেসু নিব্বত্তো। ততো পরং পুঞ্ঞানি কত্ৰা অপরাপরং দেৰমনুস্সেসু সংসরন্তো ইমস্মিং বুদ্ধুপ্পাদে চম্পাযং জম্বুগামিযস্স নাম উপাসকস্স পুত্ৰা নিব্বত্তি। তেনস্স জম্বুগামিযপুত্তোত্ৰেৰ সমঞ্ঞা অহোসি। সো ৰযপ্পত্তো ভগৰতো সন্তিকে ধম্মং সুত্ৰা পটিলদ্ধসংৰেগো পব্বজিত্ৰা কতপুব্বকিচ্চো কম্মট্ঠানং গহেত্ৰা সাকেতে অঞ্জনৰনে ৰসতি। অথস্স পিতা ‘‘কিং নু খো মম পুত্তো সাসনে অভিরতো ৰিহরতি, উদাহু নো’’তি ৰীমংসনত্থং ‘‘কচ্চি নো ৰত্থপসুতো’’তি গাথং লিখিত্ৰা পেসেসি। সো তং ৰাচেত্ৰা, ‘‘পিতা মে পমাদৰিহারং আসঙ্কতি, অহঞ্চ অজ্জাপি পুথুজ্জনভূমিং নাতিৰত্তো’’তি সংৰেগজাতো ঘটেন্তো ৰাযমন্তো নচিরস্সেৰ ছল়ভিঞ্ঞো অহোসি। তেন ৰুত্তং অপদানে (অপ॰ থের ২.৫০.২৫-৩০) –
Kaccino vatthapasutoti āyasmato jambugāmiyaputtattherassa gāthā. Kā uppatti? So kira purimabuddhesu katādhikāro hutvā tattha tattha vivaṭṭūpanissayaṃ kusalaṃ ācinanto ito ekatiṃse kappe vessabhussa bhagavato kāle ekadivasaṃ kiṃsukāni pupphāni disvā tāni pupphāni gahetvā buddhaguṇe anussaranto bhagavantaṃ uddissa ākāse khipanto pūjesi. So tena puññakammena tāvatiṃsesu nibbatto. Tato paraṃ puññāni katvā aparāparaṃ devamanussesu saṃsaranto imasmiṃ buddhuppāde campāyaṃ jambugāmiyassa nāma upāsakassa putto hutvā nibbatti. Tena puññakammena tāvatiṃsesu nibbatto. Tato paraṃ puññāni katvā aparāparaṃ devamanussesu saṃsaranto imasmiṃ buddhuppāde campāyaṃ jambugāmiyassa nāma upāsakassa putvā nibbatti. Tenassa jambugāmiyaputtotveva samaññā ahosi. So vayappatto bhagavato santike dhammaṃ sutvā paṭiladdhasaṃvego pabbajitvā katapubbakicco kammaṭṭhānaṃ gahetvā sākete añjanavane vasati. Athassa pitā ‘‘kiṃ nu kho mama putto sāsane abhirato viharati, udāhu no’’ti vīmaṃsanatthaṃ ‘‘kacci no vatthapasuto’’ti gāthaṃ likhitvā pesesi. So taṃ vācetvā, ‘‘pitā me pamādavihāraṃ āsaṅkati, ahañca ajjāpi puthujjanabhūmiṃ nātivatto’’ti saṃvegajāto ghaṭento vāyamanto nacirasseva chaḷabhiñño ahosi. Tena vuttaṃ apadāne (apa. thera 2.50.25-30) –
‘‘কিংসুকং পুপ্ফিতং দিস্ৰা, পগ্গহেত্ৰান অঞ্জলিং।
‘‘Kiṃsukaṃ pupphitaṃ disvā, paggahetvāna añjaliṃ;
বুদ্ধসেট্ঠং সরিত্ৰান, আকাসে অভিপূজযিং॥
Buddhaseṭṭhaṃ saritvāna, ākāse abhipūjayiṃ.
‘‘তেন কম্মেন সুকতেন, চেতনাপণিধীহি চ।
‘‘Tena kammena sukatena, cetanāpaṇidhīhi ca;
জহিত্ৰা মানুসং দেহং, তাৰতিংসমগচ্ছহং॥
Jahitvā mānusaṃ dehaṃ, tāvatiṃsamagacchahaṃ.
‘‘একতিংসে ইতো কপ্পে, যং কম্মমকরিং তদা।
‘‘Ekatiṃse ito kappe, yaṃ kammamakariṃ tadā;
দুগ্গতিং নাভিজানামি, বুদ্ধপূজাযিদং ফলং॥
Duggatiṃ nābhijānāmi, buddhapūjāyidaṃ phalaṃ.
‘‘কিলেসা ঝাপিতা ময্হং…পে॰… কতং বুদ্ধস্স সাসন’’ন্তি॥
‘‘Kilesā jhāpitā mayhaṃ…pe… kataṃ buddhassa sāsana’’nti.
অরহত্তং পন পত্ৰা ঞাতীনং ৰসননগরং গন্ত্ৰা সাসনস্স নিয্যানিকভাৰং পকাসেন্তো ইদ্ধিপাটিহারিযং দস্সেসি। তং দিস্ৰা ঞাতকা পসন্নমানসা বহূ সঙ্ঘারামে কারেসুং। থেরোপি সকপিতরা পেসিতং গাথং অঙ্কুসং কত্ৰা ঘটেন্তো ৰাযমন্তো অরহত্তং সচ্ছাকাসি। অঞ্ঞং ব্যাকরোন্তোপি পিতুপূজনত্থং ‘‘কচ্চি নো ৰত্থপসুতো’’তি তমেৰ গাথং অভাসি।
Arahattaṃ pana patvā ñātīnaṃ vasananagaraṃ gantvā sāsanassa niyyānikabhāvaṃ pakāsento iddhipāṭihāriyaṃ dassesi. Taṃ disvā ñātakā pasannamānasā bahū saṅghārāme kāresuṃ. Theropi sakapitarā pesitaṃ gāthaṃ aṅkusaṃ katvā ghaṭento vāyamanto arahattaṃ sacchākāsi. Aññaṃ byākarontopi pitupūjanatthaṃ ‘‘kacci no vatthapasuto’’ti tameva gāthaṃ abhāsi.
২৮. তত্থ কচ্চীতি পুচ্ছাযং নিপাতো। নোতি পটিসেধে। ৰত্থপসুতোতি ৰত্থে পসুতো ৰত্থপসুতো, চীৰরমণ্ডনাভিরতো। নিদস্সনমত্তঞ্চেতং পত্তমণ্ডনাদিচাপল্লপটিক্খেপস্সাপি অধিপ্পেতত্তা। ‘‘কচ্চি ন ৰত্থপসুতো’’তিপি পাঠো, সো এৰত্থো। ভূসনারতোতি অত্তভাৰৰিভূসনায রতো অভিরতো, যথেকচ্চে পব্বজিত্ৰাপি চপলা কাযদল়্হিবহুলা চীৰরাদিপরিক্খারস্স অত্তনো সরীরস্স চ মণ্ডনৰিভূসনট্ঠানায যুত্তা হোন্তি। কিমেৰ পরিক্খারপসুতো ভূসনারতো চ নাহোসীতি অযমেত্থ পদদ্ৰযস্সাপি অত্থো। সীলমযং গন্ধন্তি অখণ্ডাদিভাৰাপাদনেন সুপরিসুদ্ধস্স চতুব্বিধস্সপি সীলস্স ৰসেন য্ৰাযং ‘‘যো চ সীলৰতং পজাতি ন ইতরা দুস্সীলপজা, দুস্সীলত্তাযেৰ দুস্সিল্যমযং দুগ্গন্ধং ৰাযতি, এৰং ত্ৰং দুগ্গন্ধং অৰাযিত্ৰা কচ্চি সীলমযং গন্ধং ৰাযসীতি অত্থো। অথ ৰা নেতরা পজাতি ন ইতরা দুস্সীলপজা, তং কচ্চি ন হোতি, যতো সীলমযং গন্ধং ৰাযসীতি ব্যতিরেকেন সীলগন্ধৰাযনমেৰ ৰিভাৰেতি।
28. Tattha kaccīti pucchāyaṃ nipāto. Noti paṭisedhe. Vatthapasutoti vatthe pasuto vatthapasuto, cīvaramaṇḍanābhirato. Nidassanamattañcetaṃ pattamaṇḍanādicāpallapaṭikkhepassāpi adhippetattā. ‘‘Kacci na vatthapasuto’’tipi pāṭho, so evattho. Bhūsanāratoti attabhāvavibhūsanāya rato abhirato, yathekacce pabbajitvāpi capalā kāyadaḷhibahulā cīvarādiparikkhārassa attano sarīrassa ca maṇḍanavibhūsanaṭṭhānāya yuttā honti. Kimeva parikkhārapasuto bhūsanārato ca nāhosīti ayamettha padadvayassāpi attho. Sīlamayaṃ gandhanti akhaṇḍādibhāvāpādanena suparisuddhassa catubbidhassapi sīlassa vasena yvāyaṃ ‘‘yo ca sīlavataṃ pajāti na itarā dussīlapajā, dussīlattāyeva dussilyamayaṃ duggandhaṃ vāyati, evaṃ tvaṃ duggandhaṃ avāyitvā kacci sīlamayaṃ gandhaṃ vāyasīti attho. Atha vā netarā pajāti na itarā dussīlapajā, taṃ kacci na hoti, yato sīlamayaṃ gandhaṃ vāyasīti byatirekena sīlagandhavāyanameva vibhāveti.
জম্বুগামিযপুত্তত্থেরগাথাৰণ্ণনা নিট্ঠিতা।
Jambugāmiyaputtattheragāthāvaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / থেরগাথাপাল়ি • Theragāthāpāḷi / ৮. জম্বুগামিকপুত্তত্থেরগাথা • 8. Jambugāmikaputtattheragāthā
